Пайвандҳои дастрасӣ

Хабари нав

Хабарҳо

Оҷонсии нирӯи ҳастаӣ иттиҳоми Исроилро дар бораи Эрон тасдиқ намекунад

Оҷонсии байналмилалии нирӯи ҳастаӣ, ки марбут ба СММ аст, гуфт, шаҳодати қобили эътимоди инро, ки Эрон гӯё дар сари эҷоди “аслиҳаи инфиҷоркунанда” бошад, надорад. Ин созмон рӯзи 1 май гуфт, ки баъди он ки аз соли 2009 ба ин воқеият мутақоид шуд, баҳси тавлиди силоҳи ҳастаиро баст ва дар ин бора дар гузориши моҳи декабри соли 2015 ҳам хулосаҳояшро иншо кард.

Дар гузориши соли 2015 гуфта мешавад, ки “оҷонсӣ баъди соли 2009 нишонаҳои қобили эътимоди фаъолиятҳои Эронро дар самти тавлиди маводи ҳастаии тарканда пайдо накард. Бар асоси гузориши умумӣ, шӯрои мудирон тасмим гирифт, ки ин қазия баста шавад”, гуфта шуд дар изҳороти рӯз 1 маи Оҷонсии байналмилалии нирӯи ҳастаӣ.

Изҳороти оҷонсӣ як рӯз баъди изҳори назарҳои нахуствазири Исроил Бенямин Нетаняҳу нашр шуд. Нетаняҳу рӯзи 30 апрел гуфт, ки Исроил ҳуҷҷатҳое дар ихтиёр дорад, ки нақшаи фаъолияти ҳастаии Эронро дар амри эҷоди силоҳи таркандаи ҳастаӣ фош мекунад.

Бар асоси созиши соли 2015 бо қудратҳои ҷаҳонӣ, Эрон фаъолиятҳои ғанисозии ураниумро барои тавлиди бомбаи атомӣ қатъ карда, бар иваз аз аксар таҳримҳои байналмилалӣ озод шуд.

Аз он замон то кунун нозирони Оҷонсии ҳастаии СММ чандин бор гузориш доданд, ки Эрон мутобиқ ба ҳамин созиш амал кардааст.

Давлатҳои аврупоӣ гузориши раҳбари Исроиро беарзиш номида, вале ИМА аз ин шаҳодати ба гуфтааш “дурӯғи” Эрон истиқбол кард. Эрон дар ҷавоб Нетаняҳуро як “дурӯғгӯи маъруф” номид.

Ин ҳама дар шароите садо медиҳад, ки ИМА дар фикри берун шудан аз созиши ҳастаӣ бо Эрон мебошад.

Ҳамаи хабарҳои имрӯзро дар инҷо бихонед

Эътирози сокинони Рушон аз боздошти гумонбарон

Даромадгоҳи ноҳияи Рӯшони Вилояти Мухтори Кӯҳистони Бадахшон (ВМКБ)

Гуруҳе аз сокинони ноҳияи Рӯшони Вилояти Мухтори Кӯҳистони Бадахшон (ВМКБ) рӯзи 25 май бо эътироз аз боздошти ду ҷавони деҳаи Барӯшони ин ноҳия даст ба тазоҳурот задаанд. Мақомоти вилоят аз додани маълумот дар ин бора худдорӣ карданд, вале як манбаи наздик ба Вазорати корҳои дохилии Тоҷикистон бо тасдиқи хабар гуфт, эътирозҳо ба қазияи сокини ин деҳа Шароф Қобилов рабт доранд, ки 22 май ба гумони даст доштан дар қочоқи маводи мухаддир боздошт шудаааст.

"Кормандони амният талош карданд ду узви гуруҳи Қобиловро дастгир кунанд, вале аҳолии маҳаллӣ ба ин роҳ надод ва ба кори мақомоти ҳифзи ҳуқуқ мудохила кард," -- гуфт ин манбаъ рӯзи 25 май ба Радиои Озодӣ.

Сокини 44-солаи деҳаи Барушон Шароф Қобилов 22 май боздошт шудааст. Хабаргузории "Азия-Плюс" мегӯяд, "ҳангоми амалиёт Ш.Қобилов бо корд ҳуҷум карда,сардори шӯъбаи ноҳиявӣ Чуянов Самариддинро захмӣ кардааст." Ба нақл аз мақомоти расмӣ Қобилов раҳбари гурӯҳи созмонёфтаи қочоқи маводи мухаддир унвон шудааст.

Рӯзи 23 май амалиёт бо ҳадафи боздошти боз се сокини деҳа идома кардааст. Бино ба хабари баъзе манбаъҳо ҳангоми ин амалиёт маъмурони амниятӣ ба ҳаво тир кушодаанд, то издиҳомро пароканда намоянд.

Як сокини маҳаллӣ ба хабаргузории Фергана.ру гуфтааст, ки маъмурони амниятӣ "беэҳтиромона рафтор карданд ва ҷавонони маҳаллӣ бо онҳо вориди кашокаш шуданд." Бино бар хабарҳо ба кормандони КДАМ муяссар нашудааст, ки се гумонбари дигарро аз байни сокинони Барушон боздошт кунанд. Ҳоло мақомот талаб доранд, гумонбарон ба дасти маъмурони амниятӣ супурда шаванд.

16 талаби Зоиров пеш аз интихоботи президентии Тоҷикистон

Раҳматилло Зоиров

Раҳматилло Зоиров, раиси Ҳизби сотсиал-демократ, хостори ислоҳи қонун дар бораи интихоботи президенти Тоҷикистон ва ҳуқуқи бештар ба муҳоҷирон шуд.

Ӯ рӯзи 25-уми май дар ин замина ба раиси ҷумҳурӣ ва порлумон 16 пешниҳоди худро ироа кард. Баъзе аз пешниҳодҳо ворид кардани тағйирот ба Қонуни асосиро дар назар дорад.

Интизор меравад, интихоботи навбатии президентӣ моҳи ноябри имсол баргузор шавад.

Пешниҳоди аввали Зоиров ин аст, ки то замони эъломи интихоботи президентӣ феҳраст ё рӯйхатти ягонаи интихобкунандаҳоро тартиб диҳанд. Тоҷикистон то кунун феҳрасти ягонаи интихобкунандагонро надорад ва набуди чунин рӯйхат, ба гуфтаи таҳлилгарон, роҳро барои тақаллуб дар интихобот мекушояд.

Раиси Ҳизби сотсиал-демократи Тоҷикистон, инчунин, хостааст, мақомот меъёри чӣ гуна пешниҳод шудани номзад ба мақоми президент аз байни муҳоҷиронро муқаррар кунанд. "Ҳуқуқи муҳоҷирони меҳнатӣ барои ҷамъоварии имзоҳо ба номзад ба мақоми президент ва механизми тасдиқи он дар қонуни интихобот муқаррар гардад. Интихоботи президентӣ дар асоси овоздиҳии электронӣ амалӣ шавад", - афзудааст ӯ.

Раҳматилло Зоиров дар пешниҳодҳояш ба масъалаи ҷамъоварии имзоҳо низ дахл карда, гуфтааст, дар баробари ҷамъоварии имзо дар интихоботи президентӣ ҳамчун алтернатива "гаравпулӣ ба маблағи 100 ҳазор сомонӣ" муқаррар карда шавад. Соли 2013 номзадии Ойниҳол Бобоназарова танҳо ба далели он ки, ба гуфтаи мақомот, имзои кофиро ҷамъ наовард, сабтином нашуд.

Зоиров пешниҳод кардааст, "қисми 2-и моддаи 65-и Конститутсияро тағйир диҳанд". Дар он гуфта шудааст, шахсе номзад ба президент мешавад, ки ҳадди ақал 5 дарсад аз афроди қобили раъй ба пешниҳоди номзадии ӯ имзо гузоранд. Зоиров гуфтааст, ин рақам ба 1 дарсад иваз карда шавад. "Ҳизбҳои сиёсие, ки дар интихоботи порлумонии соли 2020 аз 2 дарсад зиёд овози интихобкунандаҳоро ҷамъ кардаанд, аз ҷамъоварии имзо дар интихоботи президентӣ озод карда шаванд", - пешниҳод кардааст ӯ.

Ба қавли Зоиров, бояд интихоботи президентиро се моҳ пеш аз замони баргузориаш эълом кунанд, аммо қабл аз он тағйиру иловаҳои пешниҳодиро ба Конститутсия ва қонуни интихобот қабул кунанд.

Ҳар дафъа интихоботи президентӣ дар Тоҷикистон моҳи ноябр баргузор мешавад. Аз соли 1994 ба ин тараф дар чаҳор интихоботи президентӣ Эмомалӣ Раҳмон, раиси ҷумҳури кунунӣ пирӯз шудааст.

Аммо созмонҳои байнулмилалӣ интихоботҳои гузаштаро шаффофу демократӣ эътироф накардаанд ва мухолифон рақибони Раҳмонро воқеӣ надонистаанд.

Эмомалӣ Раҳмон ва писараш Рустами Эмомалӣ аз номзадҳои эҳтимолии интихоботи имсол гуфта мешаванд, вале падару писар ҳанӯз дар бораи иштирокашон дар корзори сиёсӣ ҳарфе нагуфтаанд. Президенти Тоҷикистон дар ҳафт сол як дафъа интихоб мешавад.

Пешниҳодҳои се тарҳи ҷамъиятӣ дар бораи COVID-19 ба ҳукумат

Се тарҳи ҷамъиятӣ мақомоти Тоҷикистонро барои пинҳон доштани омори воқеии гирифторон ва ҷонбохтагон аз бемории COVID-19 танқид кардаанд.

Изҳороти ихтиёриёни тарҳи kvtj.info, тарҳи расонаии МедиаМаркер ва ҳайати Ибтикори ҷамъиятии “COVID-19: Тоҷикистон” рӯзи 25-уми май дар Фейсбук нашр шуд.

Дар он ҳамчунин аз мақомот тақозо шудааст, ки карантини “нарм” ҷорӣ карда, хидматрасонии пулакӣ дар соҳаи тибро бекор ва маоши кормандони тибу ниҳодҳои ҳолати фавқулодаро се баробар зиёд кунанд.

Ҷубронпулӣ ба оилаҳои пизишкони фавтида аз COVID-19 ва шомил шудани фаъолони ҷомеаи шаҳрвандӣ ба Ситоди ҷумҳуриявии муқобила бо коронавируси нав аз пешниҳодҳои дигари онҳост.

Баъд аз эътирофи мавҷудияти коронавирус дар Тоҷикистон чанде аз пизишкону коршиносон ва хабарнигорон низ пешниҳодҳои худро барои бархӯрд бо COVID-19 ва пуштибонӣ аз табибон ба ҳукумат ироа карда буданд. Радиои Озодӣ чанде аз ин пешниҳодҳоро бо ҳадафи эҷоди баҳси озод ва ҳам ҷалби таваҷҷуҳи ҳукумат ба масъала нашр кард.

Се тарҳи ҷамъиятӣ нақши мақомотро дар рад кардани эътирофи вуҷуди COVID-19 интиқод ва матбуоти мустақил ва ҷомеаи маданиро дар огоҳонии мардум дар ин давраи бӯҳрони беҳдоштӣ муҳим арзёбӣ кардаанд.

Дар баёния, аз ҷумла, омадааст, “хушбахтона, сатҳи огоҳии мардум низ батадриҷ боло меравад, аммо тамоюли мақомот ба пинҳон доштани маълумот ва иттилооти марбут ба ин беморӣ аз байн нарафтааст”.

Вазорати тандурустии Тоҷикистон мегӯяд, то 24-уми май дар кишвар беш аз 2900 кас ба бемории ҳамагир мубтало шуда, 46 кас фавтидаанд.

Пойгоҳи интернетии kvtj.info, ки феҳрасти ғайрирасмии қурбониёни COVID-19 ва "илтиҳоби шуш"-ро нашр мекунад, то 25-уми май номи беш аз 340 нафарро гирд овардааст. Ба қавли масъулонаш, 57 нафари онҳо кормандони тиб ҳастанд.

Мақомот дастрасӣ ба ин пойгоҳро дар ҳудуди кишвар масдуд кардаанд.

Айни замон ин омор бар асоси навиштаҳои сокинон дар шабакаҳои иҷтимоӣ ва расонаҳо таҳия шуда, дар сомона ишора кардаанд, ки бахше аз он тасдиқшуда ва қисми дигар дар ҳоли санҷиш ва тасдиқ шудан аст. Дар ин байн ба ин феҳраст номи яке аз хабарнигорони тоҷик ҳам ворид шуда буд, ки баъд аз эълони зинда буданаш ҳазф гардид. Эҳтимол ин ҳолат замоне рух дод, ки ҳар шахс ҳақ дошт дар сомона маълумот ворид кунад ва он дарҳол дар интернет пайдо шавад.

Шумори гирифторони COVID-19 дар Тоҷикистон аз 3 ҳазор гузашт

Шумори гирифторони бемори COVID-19 дар Тоҷикистон расман аз 3 ҳазор нафар гузашт. Мақомот гуфтанд, аз ин беморӣ то ин дам 46 вафот карда, 1395 кас ҳам шифо ёфтанд.

Аммо бар асоси феҳрасти ғайрирасмӣ дар Интернет шумори ҷонбохтагон аз коронавирус ва "илтиҳоби шуш" беш аз 340 кас ҳисоб шудааст. Ин феҳрастро бар асоси хабари расонаҳо, шабакаҳои иҷтимоӣ ва иттилои наздикони фавтидагон таҳия мекунанд.

Мақомот дар ду рӯзи ахир аз коҳиши гирифторӣ ба коронавируси нав хабар медиҳанд. Дар як ҳафтаи ахир Вазорати тандурустӣ ҳамарӯза аз гирифтории беш аз 200 нафар ба бемории COVID-19 хабар медод. Аммо ду рӯзи ахир Вазорати тандурустӣ мегӯяд, теъдоди мубталошудагон аз 180 нафар камтар аст.

Дар ҳамин ҳол мақомот дар баъзе шаҳру ноҳияҳо мегӯянд, сироятёфтагон ба коронавируси нав дар беморхонаҳо камтар шудааст.

Мақомот мегӯянд, ҳоли ҳозир дар шифохонаҳои саросари кишвар беш аз 2773 нафар зери назорати пизишкон ҳастанд.

Вазорати тандурустӣ рӯзи 25-уми май гуфт, зиёда аз 7 ҳазор пизишк барои табобати гирифторони COVID-19 машғуланд. Дар ҳафтаҳои ахир шикоятҳо аз камбуди табибон ба маводи эҳтиётӣ дар расонаҳо зиёд садо дод. Ҳарчанд масъулини Вазорати тандурустӣ мегӯяд, пизишконро бо лавозимоти зарурӣ таъмин кардаанд.

Ашраф Ғанӣ ҷараёни озодкунии “то 2 ҳазор узви Толибон”-ро шурӯъ кард

24 май, Кобул. Президенти Афғонистон Ашраф Ғанӣ мардуми кишварро бо иди Рамазон табрик мекунад

Президенти Афғонистон Ашраф Ғанӣ баъди истиқбол аз се рӯзи оташбас ба муносибати Иди Фитр гуфт, ки рӯзи 24 май озодкунии то 2 ҳазор Толибони зиндониро шурӯъ мекунад. Дар паёми идонааш ба мардум Ғанӣ гуфт, ки “ба унвони як ҳукумати бомасъулият мо як қадам ба пеш мегузорем ва ман эълон мекунам, ки ҷараёни озодсозии Толибони зиндониро суръат мебахшам”.

Ғанӣ инчунин аз Толибон хост, ки онҳо ҳам озод кардани аъзои нирӯҳои амниятиро вусъат бахшанд. Каме баъдтар сухангӯи президент Сиддиқ Сиддиқӣ гуфт, ки Ғанӣ ба унвони ҳусни ният ба озод кардани 2 ҳазор узви Толибон ташаббус кард.

Сиддиқӣ афзуд, ки ҳукумати Афғонистон “пешниҳоди сулҳро тамдид кард ва барои муваффақияти бештари ҷараёни сулҳ иқдомҳои дигар рӯи даст мегирад”.


Охири моҳи феврал ИМА ва Толибон созиши таърихии хатми ҷанг дар Афғонистонро имзо карданд. Ин таъхир берун шудани нирӯҳои хориҷӣ аз Афғонистон ва иҷрои тааҳҳудот аз ҷониби Толибонро тақозо мекунад. Инчунин ин санад аз ҳукумат тақозо мекунад, ки 5000 узви Толибон ва 1000 узви нирӯҳои ҳукуматӣ аз ҳабс раҳо мешаванд.

Дар паи ин қарор аст музокироти миёни ҳукумати Кобул ва Толибон шурӯъ шавад. Толибон гуфтанд, ки аз 24 май оташбас ҷорӣ мешавад. Ғанӣ ҳам ба нирӯҳояш гуфт, ки ба оташбас эҳтиром гузоранд. Фиристодаи ИМА Залмай Халилзод гуфт, ки ин фурсати хуб барои зинда кардани ҷараёни сулҳи миёни ИМА ва Толибон мебошад.

Тоҷире, ки барои наҷоташ аз Маскав ба Хуҷанд ҳавопаймои кироя фиристоданд, даргузашт

Акси Исломҷон Рустамовро дӯстонаш дар шабакаҳои иҷтимоӣ нашр карданд

Исломҷон Рустамов, молики яке аз ширкатҳои азими фурӯши сӯзишворӣ дар Тоҷикистон, дар бемористони "Склифосовский"-и шаҳри Маскав аз COVID-19 даргузаштааст.

Додохон Рустамов, писари Исломҷон Рустамов, рӯзи 25-уми май дар суҳбат бо Радиои Озодӣ хабарро тасдиқ кард.

Исломҷон Рустамов, муассис ва роҳбари ширкати “Газойл”, ба бемории COVID-19 гирифтор шуда, аввал дар хона ва сипас дар шифохонае дар Хуҷанд муолиҷа мешуд.

Бино ба маълумоти дарёфтии Радиои Озодӣ, пас аз бад шудани вазъи саломатии ӯ нимаи моҳи май як ҳайати духтурони Ёрии таъҷилӣ бо ҳавопаймои кироя аз Маскав ба Хуҷанд омадааст. Онҳо Рустамовро барои табобат ба бемористони "Склифосовский"-и шаҳри Маскав интиқол доданд.

Дӯстони Рустамов мегӯянд, ҳавопаймо бо духтурон ва Ёрии таъҷилиро шарикони тиҷоратияш аз Маскав фиристоданд, аммо ӯро наҷот дода натавонистанд.

Ба гуфтаи наздикон, Исломҷон Рустамов рӯзи 24-уми май дар бемористони "Склифосовский" даргузашт ва, қарор аст, то рӯзи чоршанбе ҷасади ӯро ба шаҳри Хуҷанд биоранд.

“Газойл” яке аз ширкатҳои азими воридкунандаи маводи сӯхт ба Тоҷикистон буда, дар шаҳру навоҳии вилояти Суғд шабакаи иборат аз 13 нуқтаи фурӯши сӯзишвориро дар ихтиёр дорад.

Узбекистон: тарҳи насби ҳисобкунакҳои газро ба ширкатҳои шаҳрдори Тошканд доданд

Сар аз моҳи июли соли ҷорӣ дар Узбекистон дар манзилҳое, ки газ насб шудааст, ҳисобкунакҳои нави "ҳушманд" насб мекунанд. То соли 2022 дар Узбекистон нақша доранд, ки ба бештар аз 3,5 миллион манзил ҳисобкунаки "ҳушманд"-и газ насб кунанд.

Ҳадаф аз ин тарҳ, ба гуфтаи мансабдорон, хотима бахшидан ба норасоии газ аст, ки солҳост, сокинони он кишвар ранҷ мекашанд. Вазорати энержии Узбекистон мегӯяд, ҳисобкунакҳои "ҳушманд" мушкили дуздии газро дар кишвар ҳал мекунанд.

Ширкати "Ҳудудтаъминот" пешниҳод дорад, ки ин ҳисобкунакҳоро дар манзилҳои сокинон ройгон насб кунад.

Аммо коршиносон мегӯянд, қимати ҳисобкунакҳо аз ҳисоби боло бурдани арзиши газ ҷуброн хоҳад шуд.

Дар моҳи феврали соли ҷорӣ ширкате, ки ҳисобкунакҳоро насб мекунад, қимати тарҳро 555 миллион доллар арзёбӣ кард.

Фармоиши давлатиро дар ҳаҷми 555 миллион доллар ду ширкати марбут ба раиси шаҳри Тошканд Ҷаҳонгир Ортиқхоҷаев соҳиб шудааст.

Ин ягона фармоиши давлатӣ нест, ки дар Узбекистон ба шаҳрдори Тошканд дода мешавад. Аммо Ортиқхоҷаев то кунун машғул буданашро ба тиҷорат боре ҳам шарҳ надодааст.

Марди 80-солаи узбекистонӣ бо гумони парвариши бангдона боздошт шуд

Ба иттилои раёсати корҳои дохилии вилояти Бухорои Узбекистон, нисбати марди 80-сола бо гумони парвариш ва фурӯши қиёми кӯкнор ва дигар гиёҳҳои мамнуъ парванда боз шудааст.

Дар натиҷаи кофтукови манзили шаҳрванд Р.Р. мушаххас шуд, ки вай дар майдони бештар аз 300 метри мураббаъ кӯкнор ва ҳашиш коридааст.

Ҳангоми бозпурсӣ марди солхӯрда эътироф кард, ки тасмим дошт, то 19 килограм ҳосил ғундошта, ба фурӯш барорад.

Пештар аз ин дар ноҳияи Ҷамбайи вилояти Самарқанди он кишвар низ марди 96-сола бо айни ҳамин айбҳо ҳабс шуда буд.

Раёсати корҳои дохилии вилояти Самарқанд гуфт, 19-уми май дар манзили марди 96-сола 122 бех кӯкнор пайдо гардидааст.

Қирғизистон марзбони захмишуда дар низоъ бо Тоҷикистонро ба Маскав мефиристад

Раиси ҷумҳури Қирғизистон аз вазъи марзбони захмишуда дидан кард

Қирғизистон мехоҳад, марзбони худро, ки рӯзи 8-уми май дар натиҷаи як низои марзӣ бо Тоҷикистон захмӣ шуда буд, барои табобат ба шаҳри Маскав фиристад.

"Ин масъала зери назорат қарор дошта, бо модари сарбоз вохӯрӣ анҷом шудааст ва ду гузинаи ҷарроҳии марзбон дар ҳоли баррасӣ аст. Табибон метавонанд, ӯро дар ватан ҷарроҳӣ кунанд, вале модари сарбоз талаб дорад, ки писарашро барои ҷарроҳӣ ба Маскав фиристанд. Марзҳо дар пайи хуруҷи коронавирус баста шудаанд ва ҳоло масъалаи интиқоли сарбоз ба Русия баррасӣ мешавад", - хабар додааст сухангӯи сарвазири Қирғизистон Адилет Султоналиев дар Твиттер.

Вазорати тандурустии Қирғизистон рӯзи 22-уми май иттилоъ дод, ки вазъи сарбози захмӣ муътадил аст.

8-уми майи соли равон дар марзи Қирғизистон бо Тоҷикистон низоъ рух дода, дар он аз силоҳ низ истифода шуда буд. Ба гуфтаи мақомоти қирғиз, дар натиҷа се марзбони онҳо захмӣ шуда, баъди ду рӯзи табобат дар Бодканд ба бемористони Бишкек интиқол ёфтанд. Ҳамаи сарбозон аз ноҳияи қафаси сина захмӣ гашта, ду нафарашон баъди ҷарроҳӣ рӯзи 22-уми май аз беморхона рухсат шуданд. Вазъи марзбони севум Султонбек Мирбек баъди ду ҷарроҳӣ низ вазнин арзёбӣ мешавад.

Мақомоти Тоҷикистон гуфтанд, дар натиҷаи низои мазкур аз тарафи Тоҷикистон ду нафар захмӣ шудааст.

Дар паи саркӯби эътирозгарони Ҳонгконг ИМА бо таҳрим таҳдид кард

Эътироз дар Ҳонгконг алайҳи ҷорӣ шудани қонуни вижаи амниятӣ. 24 май

Мушовири аршади амниятии президенти ИМА Доналд Трамп рӯзи 24 май Пекинро ҳушдор дод, ки дар сурати “амалан ғасб шудани Ҳонгконг” дар ин минтақаи дорои мақоми вижаи чинӣ, эҳтимоли ҷорӣ кардани таҳрим вуҷуд дорад. Ахиран полиси Ҳонгконг барои пароканда кардани ҳазорҳо эътирозгар аз гази ашковар ва лӯлаҳои об истифода кард. Ин мардум ба нишони норизоият аз нақшаи Чин барои ҷорӣ кардани қонуни амнияти миллӣ дар шаҳр даст ба эътироз заданд.
Каме баъдтар полис дар Фейсбук навишт, ки 180 эътирозгарро барои ширкат дар намоиши ғайримуҷоз дастгир кардааст.
Пекин рӯзи 21 май пешниҳод кард, ки дар Ҳонгконг қонуни амнияти миллӣ ҷорӣ шавад ва сохторҳои интизомӣ ба Ҳонгконг ворид шаванд, вале ин иқдом дар амал метавонад ба мақоми вижаи ҳуқуқии Ҳонгконг зарба зада ихтилофҳои Чину ИМА-ро амиқтар кунад.
Котиби давлатии ИМА Майк Помпео гуфт, ки қонуни мазкур “мисли ноқуси марг ба мақоми мухторияти васее, ки Пекин ба Ҳонгконг ваъда додааст, хоҳад буд”. Роберт Обраян, мушовири аршади амниятии ИМА рӯзи 24 май гуфт, “чунин ба назар мерасад, ки ин қонуни амнияти миллӣ агар иҷро шавад, амалан ба хотири таҳти назорат гирифтани Ҳонгконг қабул шудааст”. Ӯ афзуд, ки агар чунин шуд, болои мақомоти Ҳонгконг ва Чин таҳрим ҷорӣ мешавад. Нақшаҳои Чин бо ин ки аз ҷониби мақомоти шаҳр ҳимоят мешаванд, мавриди нигаронии бозорҳои молӣ ва ҳукуматҳои хориҷиву гурӯҳҳои ҳуқуқи башар шуд. Вале вазири хориҷаи Чин Ванг Йӣ пойфишорӣ дорад, ки қонуни нав бетаъхир ба иҷро дарояд.

Нахустин киштии нафткаши эронӣ, бидуни дахолати ИМА, ба Венесуэла расид. ВИДЕО

Рӯзи 24-уми май нахустин киштии эронии ҳомили нафт ба бандари Венесуэла наздик шуд. Ин киштӣ дар ҳоле ба Венесуэла мерасад, ки танишҳо байни ИМА ва Эрон шиддат гирифтааст.

Киштии дувум аз панҷгонаи киштиҳои эронии дар роҳ ба сӯи Венесуэла рӯзи 23-уми май вориди баҳри Кариб шуд. Се киштии дигар уқёнуси Атлантикаро убур мекунанд. Ин панҷ киштӣ аз сӯи неруҳои ИМА монеае надиданд. Ҳарчанд пештар Вашингтон гуфта буд, ки посух додан ба Эронро дар робита ба интиқоли нафт ба Венесуэла, баррасӣ мекунад.

Президенти Венесуэла Николас Мадуро ҳамкорӣ ва ҳамраъйӣ бо Эронро баҳои баланд дод ва ҳамзамон ИМА-ро дар таҳмил додани иродаи худ тавассути зургӯӣ айбдор кард.

"Венесуэлаву Эрон хоҳони сулҳанд ва ҳақ доранд, ки дар обҳои байналхалқӣ озодона тиҷорат ва табодули мол кунанд", - гуфт Мадуро.

Арзиши умумии панҷ киштии ҳомили нафт наздики 45,5 миллион доллар баровард карда мешавад.

Пештар аз ин Эрон ИМА-ро ҳушдор дод, ки дар сурати ғасби киштиҳои рӯ ба Венесуэла посух хоҳад дод.

ИМА нисбати Эров ва Венесуэла таҳрим ҷорӣ кардааст. Таниш атрофи киштиҳои нафткаш замоне шиддат гирифт, ки ИМА моҳи апрел Эронро дар таъқиби киштиҳои амрикоӣ дар Халиҷи Форс айбдор кард.

Гузориши видеоиро дар инҷо бубинед:

Эрон ба Венесуэла нафт содир кард
лутфан мунтазир бошед
Embed

Феълан кор намекунад

0:00 0:01:34 0:00

Сӯхтор дар бозори Шаҳритус ба даҳҳо тоҷир зиён расондааст. ВИДЕО

Вазорати корҳои дохилии Тоҷикистон, ки сӯхтор дар бозори марказии ноҳияи Шаҳритуси вилояти Хатлонро таҳқиқ дорад, дар робита ба ин ҳодиса парвандаи ҷиноӣ кушодааст. Сӯхтори рӯзи 24-уми май даҳҳо дӯконро ба коми худ кашид ва ба ҳисоби ибтидоии мақомот ба садҳо тоҷир зиён расонд.

Дафтари матбуоти ВКД рӯзи 25-уми май дар хабарномае гуфт, аз рӯи хулосаҳои пешакӣ расиши ноқилҳои барқӣ сабаби сар задани сӯхтор дар бозори марказии Шаҳритус шудааст.

Тибқи иттилои ВКД, дар сӯхтори бозори Шаҳритус "2 сарой (навес)-и фурӯши маҳсулоти хоҷагии қишлоқ, 12 мағозаи хӯрокворӣ, 10 нуқтаи фурӯши маҳсулоти хоҷагӣ зарар дида, зиёда аз 30 дӯкон аз коми оташ наҷот дода шуд."

Шоҳидон мегӯянд, ду мошини оташнишонии ноҳияи Шаҳритус натавонистанд, алангаи оташро хомӯш кунанд ва барои кумак мошинҳо аз ноҳияи Носири Хусрав ва Қубодиён даъват шудааст.

Саймуддин Лоиқов, як масъули ҳукумати Шаҳритус, 25-уми май ба Радиои Озодӣ гуфт, бештари дӯконҳо аз масолеҳи пластикӣ сохта шуда буд ва онҳо натавонистанд оташро зуд хомӯш кунанд. "Вале чанд хона ва бонку дорухонаҳои атрофи бозоро тавонистем аз чанги сӯхтор наҷот диҳем", - афзуд ӯ.

Соҳибкорон мегӯянд, дар шароити ногувор мондааанд ва намедонанд, чӣ кор кунанд. Қурбоналӣ Қурбонов, тоҷири бозори марказии Шаҳритус, мегӯяд, ба ҷуз аз бору дӯконҳои бародаронаш, ки ба коми оташ рафтанд, худаш низ 100 ҳазор сомонӣ зарар дидааст. "Ба ҷаласа даъват карданд, вале рафта натавонистам. Ҳуҷҷатҳоро аз ҷойи ҳодиса мекобам, вале пайдо накардам. Ҳуҷҷате, ки ба мардум қарз дода будем. Ман зарари зиёд дидам, боз 5 дӯкони бародаронам сӯхт, намедонам, ки чӣ мешавад," - афзуд ӯ.

Фаридун Тошев, як соҳибкори дигари бозори Шаҳритус дар ин ҳодиса дӯконашро аз даст додааст. Ӯ то чанд рӯзи пеш дар бозор маҳсулоти хӯрокворӣ мефурӯхт ва ҳоло мегӯяд, сӯхтор ба ӯ 80 ҳазор сомонӣ зиён расонд. Мақомот ба Тошев ва дигар соҳибкорон ваъдаи кӯмак кардаанд.

"Дар маҷлис гуфтанд, ки бозоро сохта медиҳанд ва соҳибони дӯконҳоро то сохтани бозор аз андоз озод мекунад. Ман аз фурӯшгоҳҳои Душанбе қарздор ҳастам, аз онҷо маҳсулотро ба қарз мегирифтам, намедонам, оқибати корамон чӣ мешавад", - гуфт ин соҳибкор.

Дар ҳамин ҳол, Ҷаббори Ғаффор, раиси ноҳияи Шаҳритус, рӯзи 25-уми май ба Радиои Озодӣ гуфт, андозро камтар мекунанд ва масъалаи пардохти қарзҳои бонкии тоҷиронро баррасӣ менамоянд.

Раиси ноҳия афзуд, идораи Тоҷикматлубот ваъда додааст, дар муддати кӯтоҳ бозорро аз нав месозад.

Ноҳияи Шаҳритус ду бозори калон дорад. Яке бозори марказист, дувумӣ - "Ином". Чанд сол пеш моликони бозори "Ином" бар сари тақсими бозор бо Муҳибулло Саъдуллоев, додарарӯси раиси ҷумҳурии Тоҷикистон баҳс доштанд. Аммо масъулини ноҳияи Шаҳритус гуфтанд, рӯзи 24-уми май на бозори "Ином", балки бозори марказии ноҳия сӯхтааст.

Сӯхтор дар бозори марказии Шаҳритус
лутфан мунтазир бошед
Embed

Феълан кор намекунад

0:00 0:00:12 0:00

Аврупо ба сабуктар кардани тадбирҳо идома медиҳад

Пойтахти Итолиё шаҳри Рум, кори ороишгар бо эҳтиёт аз COVID-19

Ҳукуматҳои аврупоӣ рӯзи 25 май тадриҷан маҳдудиятҳои марбут ба коронавирусро бекор мекунанд ва интизор меравад, ки ҳафтаҳои наздик сабукӣ бештар мешавад. Айни замон дар ИМА, ки шумори фавтидаҳо бар асари COVID-19 ба 100 ҳазор нафар ва олудашудаҳо ба 1,6 миллион нафар расидааст, дар рӯзҳои истироҳати ахир мардум ба сӯи соҳилҳои об шитофтанд.
Тамоми 50 аёлат ба дараҷаҳои мухталиф маҳдудиятҳоро кам мекунанд. Вале саҳнаҳои пур аз мардум дар соҳилҳову тарабхонаҳои Флорида ва кӯли Озарк дар Миссури нигаронӣ аз эҳтимоли нақз шудани муқаррароти фосилагирӣ ва хатари аз нав боло гирифтани ҳодисаҳои олудагӣ ба коронавирусро ба бор овардааст.
Дар кишварҳои аз пандемия шадидан осебдидаи Аврупо тадбирҳои мисли боз шудани марзҳо, мактабҳо ва ҳатто мусобиқаҳои варзишӣ эълон шудаанд.
Дар бисёр кишварҳои мусалмоннишин таҷлили иди Фитр бидуни иҷрои маросимҳои серҷамъияти мисли намози иду идгардак барпо шуд.

13 тобут ва 237 муҳоҷири дигари тоҷикро аз Русия оварданд

Муҳоҷирони дармонда бо парвози махсуси Ютайр ба Душанбе интиқол ёфтанд

Мақомоти Тоҷикистон хабар доданд, ки 237 муҳоҷири дигарро аз Русия ба ватан оварданд. Ба иттилои Вазорати корҳои хориҷӣ, шаби 25-уми май инчунин 13 тобути муҳоҷирони фавтида аз Русия оварда шудааст.

Аз муҳоҷироне, ки шаби 25-уми май бо парвози махсуси ширкати Ютэйр ба Тоҷикистон интиқол ёфтанд, 197 нафарашон муҳоҷироне будаанд, ки дар марказҳои нигоҳдории муваққатӣ будаанд.

Дар ингуна марказҳо асосан муҳоҷироне нигоҳдорӣ мешаванд, ки қарори додгоҳ барои ихроҷашон содир шудааст.

Аммо маълум нест, ки 40 нафари дигар, ки бо парвози махсус ба Душанбе расиданд, киҳо мебошанд.

Пеш аз ин рӯзи 20-уми май ҳам як гуруҳи дигари муҳоҷирони ихроҷшудаи тоҷик ва ҷасади чанд муҳоҷири тоҷик аз Русия ба Тоҷикистон интиқол дода шуд. Тоҷикистон дар ҳоле шаҳрвандони ихроҷшудаашро бо парвозҳои махсус аз Русия меорад, ки ин гуруҳи муҳоҷирон вақтҳои ахир аз вазъи тоқатфарсои худ шикоят доштанд. Кор ба ҷое расид, ки як гуруҳ аз муҳоҷирони тоҷик дар як боздоштгоҳи Екатеринбург даст ба эътироз зада буданд.

Мақомот мегӯянд, бар асоси як нақша шаҳрвандони дармондаи тоҷикро аз кишварҳои хориҷӣ ба ватан бармегардонанд.

Тоҷикистон бо нигаронӣ аз эҳтимоли сирояти коронавирус парвози ҳавопаймоҳоро ба қаламраваш аз рӯзи 19-уми март ба таври ногаҳонӣ қатъ кард. Баъд аз қатъи парвозҳо то ин вақт танҳо чанд парвози махсус барои овардани шаҳрвандони Тоҷикистон ва интиқоли кумакҳои башардӯстона ба кишвар анҷом шудааст.

Ҳушдор аз пурзӯршавии карантин ва маҳдудиятҳо дар Ӯзбекистон

Нозири давлатии беҳдоштии Узбекистон Нурмат Отабеков дар нишасти хабарӣ дар шаҳри Тошканд сокинонро ҳушдор дод, ки агар қоидаҳои ҷориро риоя накунанд, ба иллати сахттар шудани маҳдудиятҳо дубора ба карантини хонагӣ гирифта хоҳанд шуд.

"Дар Узбекистон карантин идома дорад. Ягон кас онро бекор накардааст ва нафаре ҳам кафолат намедиҳад, ки дар атрофи мо мубталоёни коронавирус нестанд. Мутаассифона, вақтҳои охир гирифторони вирус дар миёни сокинон, яъне миёни онҳое ошкор мешавад, ки дар карантин нестанд. Бинобар ин, шумо бояд тамоми талабот дар доираи карантинро риоя кунед", - изҳор дошт Отабеков.

Ба гуфтаи ӯ, агар узбекистониҳо карантин ва маҳдудиятҳоро риоя накунанд, вазъ дар он кишвар вахимтар мешавад.

"Дар он ҳолат карантин сахттар шуда, ҳамаи шумо дубора дар хонаҳо хоҳед монд. Ҳушёр бошед", - таъкид кард вай.

Дар Узбекистон шумори умумии мубталоёни коронавирус ба 3164 расид. 2565 кас шифо ёфта, 13 нафар фавтиданд. Дар ҳоли ҳозир дар ин кишвар беш аз 44 ҳазор кас, аз ҷумла зиёда аз 18 ҳазор нафар дар маконҳои махсус дар карантинанд.

Дар шаҳри Нурсултон тадбирҳои нави карантинӣ ҷорӣ мешаванд

Дар бораи тадбирҳои нави карантин сар аз имрӯз, 25-уми май дар шаҳри Нурсултони Қазоқистон Жанна Пралиева, сарпизишки беҳдоштии он кишвар хабар дод.

Дар Нурсултон ҳамоно доштани ниқоб ҳатмӣ боқӣ мемонад. Вале дар шаҳр гашту гузор кардан иҷозат мешавад.

Инчунин рафтан ба майдонҳову боғҳо имконпазир мегардад, вале ҳамзамон на бештар аз 3 кас.

Мақомот ҳамоно сокинонро огоҳ кардаанд, ки аз баргузор кардани маъракаҳои оилавӣ ва дигар чорабиниҳо худдорӣ варзанд.

Сар аз 25-уми май ҳамзамон марказҳои тиҷорӣ ба фаъолияти комил мепардозанд.

Дар Қазоқистон бино ба омори охир 8322 кас ба вируси корона гирифтор шудааст.

Раиси пешини порлумони Қирғизистон аз COVID-19 фавтид

Мукар Чолпонбоев, фаъоли ҷамъиятиву сиёсӣ, раиси пешини порлумони Қирғизистон рӯзи 24-уми май аз вируси корона фавтид.

Чолпонбоев рӯзи 5-уми май дар бемористон бистарӣ шуд ва 12-уми май ба шуъбаи эҳё интиқол ёфт. Ӯ зери дастгоҳи нафаси сунъӣ муолиҷа мегирифт.

"Баъди мубталошавӣ ба вируси корона вазъи сиҳатиаш бадтар шуд ва ба илтиҳоби дутарафа гирифтор ва ҳамзамон нафасгириаш душвор гардид. Вай ҳамчунин дарди қалб, гурда ва дигар бемориҳо дошт", - хабар додааст ситоди фаврии Қирғизистон.

Чолпонбоев 15-умин қурбонии COVID-19 дар Қирғизистон аст.

Мукар Чолпонбоеви 70-сола дар солҳои 1995-96 раиси порлумони Қирғизистон буд.

Додгоҳи Исроил баррасии парвандаи Натаняҳуро оғоз кард

Додгоҳи Исроил рӯзи 24-уми май парвандаи сарвазири ин кишвар Бенёмин Натаняҳуро оғоз кард, ки дар фасодкорӣ ва сӯистифода аз мақом айбдор мешавад.

Натаняҳу рӯзи чаҳоршанбе парвандаи зидди худро сохта номида, хост, раванди мурофиаи додгоҳӣ тавассути пахши мустақим аз толори додгоҳ намоиш дода шавад.

Парвандаи сарвазири Исроилро се додрас баррасӣ мекунанд. Мурофиаҳо зери раҳбарии додрас Ривка Фелдман-Фридман, ки таҷрибаи иштирок дар парвандаҳои пурсарусадоро дорад, баргузор хоҳанд шуд. Ин додрас соли 2015 ба ҳайати комиссияи додгоҳие шомил буд, ки ҳукми сарвазири пешини Исроил Эҳуд Олмертро содир кард.

Зидди сарвазири Исроил моҳи ноябри соли 2019 бо ҷурми қаллобӣ ва фасодкорӣ айб эълом шуда буд. Ҷониби айбдоркунанда иддао дорад, ки Натаняҳу ва хонаводааш аз соли 2007 то соли 2016 аз коргардони амрикоӣ Арнон Милчен ва соҳибкори австралиягӣ Ҷеймс Пакер туҳфаҳои гаронарзиш дарёфт кардаанд, ки маблағи умумии онҳо чор миллион евроро ташкил медиҳад.

Натаняҳу рӯзи 17-уми май ба ҳайси сарвазири Исроил савганд ёд кард ва агар додгоҳ ӯро айбдор эълом кунад, ба истеъфо хоҳад рафт.

Ашраф Ғанӣ: Ҷараёни озод кардани Толибонро суръат мебахшем

Ашраф Ғанӣ ҳангоми суханронӣ. 24-уми майи 2020

Раиси ҷумҳури Афғонистон, гуфт, ҷараёни озод кардани ҷангҷӯёни зиндонии Толибонро сурат хоҳад бахшид. Ашраф Ғанӣ 24-уми май, пас аз адои намози ид дар масҷиди Арг, дар ин бора сухан гуфт.

Вай афзуд, “эълом мекунам, ки дар раҳоии зиндониёни Толибон ҳаракати сареъ хоҳад омад ва иқдомоти ҷиддӣ сурат хоҳад гирифт. Дар айни ҳол сари Толибон садо мекунем, ки нирӯҳои амниятиву дифоии моро, ки наздашон ҳастанд, ҳарчи зуд озод кунанд.”

Қаблан Шӯрои амнияти миллии Афғонистон гуфта буд, ки раванди раҳоии зиндониёни Толибон муваққатан боздошта шудааст.

Шӯро гуфта буд, раванд ба ин хотир боздошта шуд, ки Толибон дар ивази раҳоии ҳазор зиндониашон 105 нерӯи амниятиро озод кардаанд, дар ҳоле ки 200 кас аз чанги ин гурӯҳ бояд раҳо мешуданд.

Раҳоии то 5 ҳазор зиндонии Толибон ва як ҳазор зиндониёни ҳукумати Афғонистон бахше аз мувофиқатномаи Амрико ва ҷунбиши Толибон аст. Ин созишнома рӯзи 29-уми феврали имсол дар Доҳа, пойтахти Қатар, имзо шуд.

Эҳтимоли рақобати сеюми Тайсон ва Ҳолифилд дар Арабистони Саудӣ

Майк Тайсон бо раҳбари Чеченистон Рамазон Қодиров

Қаблан ду муштзани маъруфи ҷаҳон дар вазни сангинтарин аз бозгашти эҳтимолиашон ба майдони набард хабар дода буданд. Ҳамакнун маълум шуд, ки Эвандер Ҳолифилд ва Майк Тайсон, ҳарду муштзанҳои ҳирфаии амрикоӣ, дар хусуси баргузории муҳориба гуфтугзор доранд.

Макон ва санаи имконпазири баргузории рақобати ду собиқадори маъруфи бокс - Майк Тайсон ва Эвандер Ҳолифилд - дақиқ шудааст. Бино ба иттилои пойгоҳҳои иттилоотии варзишӣ, вохӯрии ин ду муштзани машҳур имкон дорад рӯзи 11-уми июл дар Арабистони Саудӣ баргузор шавад.

Муштзани афсонавӣ Майк Тайсон дар бораи пешниҳод роҷеъ ба муҳорибаи сеюм бо ситораи дигари варзиш - Эвандер Ҳолифилд сухан гуфт. Гуфтаҳои "Майки оҳанин" -ро TMZ иқтибос меорад.

Майк Тайсон гуфтааст, "агар мубориза хайриявӣ мебуд, ҳайратангез мешуд. Танҳо моро дар ринг тасаввур кунед. Ман ҳолати хуб дорам ва худро олӣ ҳис мекунам."

Майк инчунин илова намудааст, ки ӯ кӯшиш мекунад корҳои хуб анҷом диҳад ва маблағе, ки аз муборизаи эҳтимолӣ бо Ҳолифилд ба даст хоҳад овард, метавонад ба бисёр одамони ниёзманд кӯмак кунад.

Тайсон ва Ҳолифилд дар ринг ду маротиба бо ҳам вохӯрдаанд. Соли 1996 Эвандер дар даври 11-уми рақобат бо нокаути техникӣ ё фаннӣ ғолиб омад. Соли 1997 низ ӯ бори дигар ғолиб омад, вале ба иллати хориҷ шудани рақибаш, ки пораи гӯшашро газида буд.

Ҳолифилди 57-сола дар тӯли карйераи худ 57 қувваозмоӣ гузаронидааст. Ӯ 44 ғалаба ба даст оварда, 10 маротиба мағлуб шудааст ва ду бозиро мусовӣ кардааст, як набард бо иштироки Эвандер беэътибор дониста шуд.

Амрикоӣ ягона қаҳрамони 4-каратаи ҷаҳон дар вазни сангинтарин дар таърихи бокси ҳирфаӣ шудааст. Қабл аз ин, Ҳолифилд қаҳрамони мутлақи ҷаҳон дар вазни аввали сангин буд.

Майк Тайсони 53-сола дар замони худ аз ҳама муштзани маошаш баландтарини бокс дар таърих буд. Дар тӯли карйераи касбии худ Майк Тайсон 58 мубориза карда, 50 ғалаба ба даст овардааст ва шаш маротиба мағлуб шудааст, ду задухӯрди дигар бо иштироки ӯ беэътибор дониста шуд.

Аз 50 ғалаба “Майки оҳанин” дар 44-тоаш бо нокаут пирӯз гаштааст.

Сӯхтор дар бозори марказии Шаҳритус. ВИДЕО

Рӯзи 24-уми май дар бозори марказии ноҳияи Шаҳритуси вилояти Хатлон сӯхтор сар зад. Мақомот гуфтанд, то ин дам ниме аз бозор сӯхтааст. Сабаби сӯхтор ва зиёни тоҷирон аз он ҳанӯз маълум нест.

Мақомот гуфтанд, беш аз 1300 кас аз COVID-19 шифо ёфтаанд. Шумори фавтидагон ба 46 расид

Вазорати тандурустии Тоҷикистон хабар дод, ки дар шабонарӯзи гузашта 191 нафари дигар ба коронавируси нав гирифтор шудаанд ва шумори умумии беморон рӯзи 24-уми май ба 2929 кас баробар шуд.

Ба иттилои расмӣ, теъдоди шифоёфтагон ба 1301 кас ва фавтидагон ба 46 нафар расидааст.

Аммо бар асоси феҳрасти ғайрирасмӣ дар Интернет шумори ҷонбохтагон аз коронавирус ва "илтиҳоби шуш" тақрибан 300 кас ҳисоб шудааст. Ин феҳрастро бар асоси хабари расонаҳо, шабакаҳои иҷтимоӣ ва иттилои наздикони фавтидагон таҳия мекунанд.

Бо таваҷҷуҳ ба ин, баъзе аз мутахассисон ва теъдоди зиёде аз мардум ба дурустии омори расмӣ шубҳа доранд ва мегӯянд, мумкин аст, теъдоди гирифторону талафот аз беморӣ дар Тоҷикистон зиёд бошад.

Ҳамарӯза дар шабакаҳои иҷтимоӣ низ корбарон дар бораи марги наздикону ҳамкорони худ гузориш медиҳанд.

Мақомот мегӯянд, ҳоли ҳозир дар шифохонаҳои саросари кишвар беш аз 2700 нафар зери назорати пизишкон ҳастанд.

Пулиси Ҳонгконг ба зидди эътирозгарон аз гази ашковар истифода кард

Ҳонгконг, 24-уми майи 2020

Пулиси Ҳонгконг рӯзи якшанбе барои пароканда кардани таҷаммӯи тарафдорони демократия аз гази ашковар истифода намуд.

Ин кор баъди он сурат гирифт, ки ҳазорон нафар ба кӯчаҳҳои Ҳонгконг баромаданд, то аз тарҳи пешниҳодии Чин эътироз кунанд.

Чин рӯзи 21-уми май пешниҳоди ҷорӣ кардани қонуни амнияти миллӣ бар Ҳонгконгро матраҳ кард, то ба ҳузури идораҳои истихборотиаш дар ин шаҳр иҷоза диҳад.

Ҳукумати Ҳонгконг талош кард, то нигарониҳои мардум ва сармоягузорони хориҷиро дар бораи лоиҳаи пешниҳодии Чин аз байн барад.

Ин лоиҳа, ки аллакай нигарониҳоро дар бозори молӣ ба вуҷуд овард, аз сӯи ҳукуматҳои хориҷӣ ва гуруҳҳои байнулмилалии дифоъ аз ҳуқуқи башар ба шиддат танқид шудааст.

Интизор меравад, лоиҳаи ҳукумати Чин рӯзи 4-уми июн аз сӯи порлумони ин кишвар қабул шавад. Бар асоси лоиҳа, мудохилаи хориҷӣ, хиёнат, харобкорӣ ва фитнаангезӣ манъ хоҳад шуд.

Задухӯрд дар марзи Тоҷикистону Қирғизистон. Сарбози тоҷик захмӣ шуд

Рӯзи 8-уми май низ дар марзи Тоҷикистону Қирғизистон задухӯрди мусаллаҳона сурат гирифта, аз ду тараф захмӣ ба ҷой гузошт

Дар марзи Тоҷикистону Қирғизистон задухӯрди мусаллаҳона сурат гирифт. Мақомоти Тоҷикистон гуфтанд, як сарбози қаторӣ захмӣ шудааст. Хадамоти давлатии марзбонии Қирғизистон мегӯяд, аз тарафи онҳо касе осеб надид.

Ҳодиса рӯзи якшанбе дар байни ҷамоати Ворух ва ноҳияи Бодканд рух додааст.

Маркази матбуоти нирӯҳои марзбонии Кумитаи давлатии амнияти миллии Тоҷикистон дар изҳороти расмӣ гуфт, муноқиша баъди он сар зад, ки “чӯпонҳои қирғиз соати 10:30-и 24-уми май дар ҳудуди деҳаи Пули Офтобрӯяи ҷамоати Ворух вориди қаламрави Тоҷикистон гардида, ба муноқишаи навбатӣ бо сокинони наздимарзӣ даст заданд.”

Ба иттилои манбаъ, сокинони деҳаи Пули Офтобрӯя аз чӯпонҳо хостаанд, то ҳудуди деҳаро тарк кунанд. “Ҷониби қирғиз ба ҷойи риояи иҷрои созишномаҳои дуҷониба, ки аломатгузориро дар минтақаҳои баҳсӣ мушаххас мекунад, ба маҳалли ҳодиса нирӯҳои иловагии сарҳадбононро сафарбар карда, ба сӯи сокинони бесилоҳи деҳаи Пули Офтобрӯя аз яроқи оташфишон тирпаронӣ намуд”, - гуфта шудааст дар изҳороти Маркази матбуоти нирӯҳои марзбонии Тоҷикистон.

Хадамоти давлатии марзбонии Қирғизистон ба расонаҳои он кишвар гуфтааст, аввал афроди номаълум аз ҳудуди Тоҷикистон ба сӯи марзбонҳои Қирғизистон тир кушодаанд: “Дертар, соати 11:40 байни сарҳадбонҳои Қирғизистону Тоҷикистон тирпаронӣ сурат гирифт. Аз тарафи Қирғизистон касе осеб надид.”

Ҷониби Тоҷикистон мегӯяд, дар муноқиша сарбози қаторӣ Давлатёр Зоирови 19-сола аз пояш захм бардоштааст. Нирӯҳои марзбонии Тоҷикистон инро “амали иғвоангезона” номида, “нишонаи кӯшишҳои ба таври сунъӣ ноором кардани вазъият дар хатти сарҳади давлатӣ” арзёбӣ намудааст.

Мақомот гуфтанд, чунин бархӯрд метавонад “вокуниши ҷавобиро аз ҷониби сокинони наздисарҳадии Тоҷикистон дар ин минтақаи ҳассос барангезад”.

Ҳарду тараф эълон карданд, ки намояндагони идораҳои марзбонии Тоҷикистону Қирғизистон мулоқот карда, сабабҳои сар задани ҳодисаро таҳқиқ доранд.

Дар тақрибан ду ҳафтаи охир бори дувум аст, ки дар марзи Тоҷикистону Қирғизистон муноқишаи мусаллаҳона сурат мегирад. Дар муноқишаи рӯзи 8-уми май, ба гуфтаи мақомот, ду шаҳрванди Тоҷикистон, се сарбоз ва як сокини оддии Қирғизистон ҷароҳат бардоштанд.

Нерӯҳои марзбонии Тоҷикистону Қирғизистон якдигарро ба барангехтани муноқишаи мусаллаҳона муттаҳам карданд.

Вазоратҳои умури хориҷии ҳарду кишвар рӯзи 9-уми май яке паси дигар бо нашри баёнияи расмӣ гуфтанд, ки сафирони ҳамдигарро ба вазорат хонда ва нотаи эътирозӣ супурдаанд.

Тоҷикистону Қирғизистон 976 километр марз доранд, ки то кунун 504 километри он муайян ва аломатгузорӣ шудааст. Ду тараф бо вуҷуди гузашти солҳо натавонистанд, сари минтақаҳои баҳсбарангез ба мувофиқа бирасанд ва хатти марзро бикашанд. Ҷанҷолу тирандозӣ маҳз дар ҳамин минтақаҳо ва барои обу замин ва чарогоҳ сурат мегирад ва гоҳо ба хунрезӣ меанҷомад.

Муноқишаи имсол дар замоне сурат мегирад, ки ду кишвар барои муқобила бо густариши бемории СОVID-19 даступо мезананд. Дар Қирғизистон беш аз 1400 нафар ва дар Тоҷикистон беш аз 2700 нафар ба бемории нав гирифторанд.​

Барномаи онлайни овозхонҳои тоҷик ба ҳимоят аз пизишкони тоҷик

Аслишо Акимбеков

Овозхонҳои тоҷик рӯзи 24-уми май консерти хайриявии онлайнро баргузор мекунанд. Дар ин барнома иштироки Ҷонибеки Мурод, Зикриоллоҳ Ҳакимов, Зулайхо Маҳмадшоева, Дамирбек Олимов, Валиҷон Азизов, Зайнура Пӯлодова ва рэпсаро Мастер Исмайл дар назар аст.

Аз сарояндагони бурунмарзӣ Фарҳоди Дарё дар ин консерт ҳунарнамоӣ хоҳанд кард. Ғижжакнавоз Ноҳид Зайналпур низ дар барнома ҳунарнамоӣ мекунад.

Консерт соати ҳашти шоми 24-уми май (ба вақти Душанбе) дар пойгоҳи интернетии clickstars.ru ва саҳифаи Радиои Озодӣ дар шабакаи иҷтимоии Youtube пахш мешавад.

Аслишо Акимбеков, муҷрӣ ва яке аз созмондиҳандагони консерт, рӯзи 24-уми май ба Радиои Озодӣ гуфт, “ин консерт хурсандӣ дар миёнаи вабо нест, балки як иқдоми ҳамдардӣ ва рӯҳбаландкунанда барои табибон ва беморон аст”.

Ташкилоти хайриявии ғайридавлатии “Пешрафт”, яке аз ташаббускорон ва созмондиҳандаҳои консерти хайрия аст, ки то кунун дар замони буҳрони короновирус ба садҳо хонаводаи эҳтиёҷманд дар Тоҷикистон бастаҳои хӯрокворӣ тақдим кардааст.

Ёфтҳои бештар

XS
SM
MD
LG