Пайвандҳои дастрасӣ

Хабарҳо

"Ҳафтгонаи бузург" ба бархурди шадид дар баробари Русия даъват кард

Вазирони хориҷии "Ҳафтгонаи бузург" дар Канада. 22, апрел, 2018

Вазирони умури хориҷии "Ҳафтгонаи бузург" - ҳафт кишвари пешрафтаи саноатии ҷаҳон, гуфтанд, ки дар баробари сиёсати хашмгинонаи Русия мавқеи муштарак доранд, аммо ҳамзамон умедвориро барои муколама бо Маскав ҳифз мекунанд. Дар ин бора хабаргузории Reuters рӯзи 23 апрел, бо такя ба ду манбаи наздик ба таҳаввулот гузориш дод. Ба гуфтаи намояндагони G7, ки мулоқоти онҳо рӯзи якшанбе дар шаҳри Торонтои Канда баргузор шуд, амалкардҳои Русия ба сулҳу амният таҳдид мекунад.

Як мақоми баландпояи Департаменти давлатии ИМА ба хабаргузорӣ гуфт, "агар Русия мехоҳад бархурд ба он ҳамчун ба як кишвари қуратманд сурат бигирад, пас бояд бо мо кор кунад".

Вазири корҳои хориҷии Олмон Ҳайло Маас аз Маскав даъват кард, ки дар ҳалли нозои Сурия кӯмак кунад. "Мо медонем, ки низои Сурия бе иштироки Русия ҳал намешавад, аммо мо аз ин кишвар пешниҳодҳои созандаро интизорем. Ғарб дар бархурд бо Сурия аз "протоколи Женава" пайгирӣ мекунад, ки бар пояи он Башор Асад бояд аз қудрат дур шавад.

Нишасти раҳбарони "Ҳафтгонаи бузург" аввали моҳи июн дар Торонто баргузор мешавад.

Дар ин нишаст таҳрим алайҳи Русия ба таври дастаҷамъона баррасӣ намешавад, зеро Британия, Фаронса, Олмон ва Италия узви Иттиҳоди Аврпуо ҳастанд ва наметавонанд бе розигии 24 давлати дигар узв тасмим бигиранд. Аммо масъалаи таҳримҳо дар мулоқоти ду ба дуи ин давлатҳо матраҳ мешавад.

Ҳамаи хабарҳои имрӯзро дар инҷо бихонед

Даҳҳо сомона дар Фаронса баъди изҳороти Макрон рахна шудаанд

Президенти Фаронса Эммануэл Макрон

Хабаргузории "Франс Пресс" навиштааст, ки шаби душанбе ба сешанбе дар Фаронса даҳҳо сомона мавриди ҳамлаи рахнагарони исломӣ қарор гирифтаанд.

Дар сомонаҳо, аз ҷумла сомонаҳои маъмурияти ноҳияҳо шиорҳои даъват ба пирӯзии дини Ислом, паёмбар Муҳаммад, марги Фаронса ва акси президенти ин кишвар Эммануэл Макрон дар шакли хук нашр шудааст.

Ин ҳамлаҳо баъди изҳороти Макрон дар робита ба куштори омӯзгор Самюэля Патӣ анҷом шуданд, ки дар ҷараёни дарс карикатураҳои паёмбарро нишон дода буд. Макрон омӯзгорро "қаҳрамони сокит" ва куштори ӯро "ҳамлаи террористии исломӣ" номид. Макрон гуфт, Ислом дар як вазъи буҳронӣ қарор дорад ва ӯ сокинони кишварашро ба ҳифзи арзишҳои дунявӣ ва Фаронса аз "Исломи ифротӣ" даъват кард.

​Изҳороти Макрон дар бораи Ислом нигарониҳоеро дар як қатор кишварҳои Ховари Миёна ба бор овард. Президенти Туркия ба Макрон тавсия дод, ки "табобати равонӣ" бигирад.

Муфтии Чеченистон ва мушовири раисҷумҳури ин кишвар Ҳоҷӣ Салоҳ Межиев президенти Фаронсаро "террористи рақами 1" хонд.

Дар посух ба пуштибонии Макрон аз ин карикатураҳо, дар кишварҳои мусалмоннишини ҷаҳони Араб даъватҳо ба бойкоти харидории маҳсулоти фаронсавӣ садо дод. Макрон гуфт, ки “Фаронса ҳеҷ гоҳ аз карикатураҳои мо даст намекашад”.

Ҳоло бойкоти харидории маҳсулоти сохтаи Фаронса дар Қатару Кувайт ҷараён дорад ва интизор меравад, ки дар Урдун ва дигар кишварҳо идома пайдо кунад.

Пас аз як рӯзи худкушии Шерафган Хоҷақулов. Масъулони Фурудгоҳи Душанбе гуфтанд, маоши ӯро пардохта буданд

Шерафган Хоҷақулов

Баъд аз як рӯзи худкушии Шерафган Хоҷақулов, корманди бахши амнияти Фурудгоҳи байналмилалии Душанбе, ки наздиконаш онро ба пардохт нашудани маоши чандмоҳааш рабт доданд, маъмурияти фурудгоҳ гуфтанд, ки "ҳодиса ба масъалаи маош рабт надорад".

Дафтари матбуоти Фурудгоҳи байналмилалии Душанбе рӯзи 27-уми октябр ба Радиои Озодӣ гуфт, маоши Шерафган Хоҷақулов пардохта шудааст ва санадҳои бонкӣ низ доранд.

Ин манбаъ гуфт, сабаби асосии даст ба худкушӣ задани корманди Бахши амнияти Фурудгоҳ ҳанӯз рӯшан нест ва онро Додситонии нақлиёт таҳқиқ дорад. Имрӯз раҳбари бевоситаи Шерафган Хоҷақулов барои додани баёнот ба додситонӣ даъват шудааст. Ӯ дар гуфтугӯи кутоҳи телефонӣ бо Радиои Озодӣ аз шарҳи масъала худдорӣ кард ва афзуд, барои ҳама гуна маълумот ба мақомоти тафтишотӣ муроҷиат карда шавад.

Дафтари матбуоти Фурудгоҳи байналмилалии Душанбе мегӯяд, Шерафган Хоҷақулов худро бо тири "Калашников" паррондааст ва мақомоти Фурудгоҳ ба таври расмӣ ба хонаводааш изҳори ҳамдардӣ кардаанд. Вале наздикони Хоҷақулов ба Радиои Озодӣ гуфтанд, ягон таслияти расмӣ нагирифтаанд, танҳо ҳамкорони Шерафган як миқдор маблағ ҷамъоварӣ намуда, ба ин хонавода расондаанд.

Дар ҳамин ҳол, як манбаи наздик ба мақомоти Фурудгоҳи байналмилалии Душанбе гуфт, Шерафган Хоҷақулов гуё бо хоҳараш мушкили пулӣ дошт, аммо ин хабар тасдиқ ё такзиб нашудааст.

Баръакс, рӯзи 26-уми октябр баъзе аз пайвандонаш худкушии ӯро ба пардохт нашудани маоши, ба гуфтаи онҳо, нӯҳмоҳааш ва қарздорӣ аз манзили иҷора рабт дода буданд.

Радиои Озодӣ барои маълум кардани паҳлӯҳои қазия ба раҳбарияти Фурудгоҳи байналмилалии Душанбе расман муроҷиат кардааст ва мунтазири посухи онҳо аст. Дар сурати ба даст омадани ҷузъиёти бештар онро дар сомона нашр хоҳем кард.

Ончи рӯзи 26-уми октябр гузашт, дар инҷо бихонед:

Узбекистон дар ду соли оянда барқро қимат намекунад

Хатти барқ дар минтақаи марзии Узбекистон

Мудири ширкати "Шабакаҳои минтақавии барқӣ"-и Узбекистон Улуғбек Мустафоев 26 октябр дар суҳбат бо телевизиони "Узбекистон 24" гуфт, солҳои 2021 ва 2022 арзиши нерӯи барқ дар ин кишвар боло бурда нахоҳад шуд.

"Вазифаи аслие, ки президент гузоштааст, ин гарон нашудани арзиши нерӯи барқ дар солҳои 2021-2022 мебошад", - афзуд Улуғбек Мустафоев.

Ба гуфтаи Мустафоев, бозсозӣ ва замонависозии низоми интиқоли барқ на аз ҳисоби боло бурдани тарифҳо, балки аз ҳисоби поин бурдани арзиши аслӣ сурат хоҳад гирифт.

СММ ба қатъи зӯровариҳо нисбати мухолифони Лукашенко даъват кард

Раҳпаймоии эътирозӣ дар Минск, 25 октябри соли 2020

Гузоришгари ҳуқуқи башари Созмони Милал дар Беларус рӯзи 26 октябр аз ҳукумати ин кишвар талаб кард, ки “аз саркӯб кардани мардуми худ даст кашад ”. Ин ишораест ба боздошт шудани ҳазорон нафар аз эътирозгарони зидди Аляксандр Лукашенко дар ҷараёни эътирозҳои ахир. Талаби Анаис Марин дар ҳоле садо медиҳад, ки мухолифони Лукашенко ба корпартоии саросарӣ дар кишвар оғоз кардаанд ва дар раҳпаймоиҳои эътирозӣ садҳо нафар боздошт шудаанд. Марин ба Кумитаи ҳуқуқи инсони СММ гуфт, ки дар моҳҳои август ва сентябр ба камияш 20 ҳазор нафар боздошт шуд, аз латукӯб, шиканҷа ё дигар бадрафторӣ нисбати онҳо дар боздоштгоҳҳо гузориш шудааст. Муроҷиати Марин дар изҳороти кумитаи иборат аз 52 кишвари асосан аврупоӣ ва Иттиҳоди Аврупо аксандоз шуд. Онҳо низ қатъи зӯроварӣ бар тазоҳуркунандагони осоишта ва тарсонидани раҳбарони мухолифат, рӯзноманигорон ва ҳомиёни ҳуқуқро талаб карданд. Дар Беларус ҳафтаҳост эътирозҳои зидди Лукашенко идома доранд, ки пирӯзияш дар интихоботи президентии 9 август боиси нобоварӣ ва баҳсҳо шудааст. Мухолифони ӯ мегӯянд, натиҷаҳои расмии овоздиҳӣ дурӯғанд ва дар асл номзади онҳо Святлана Тихановская барандаи қонунии инттихобот аст. Тихановская гуфт, ки корпартоӣ бо даъвати ӯ ҳамчун фишор ба Лукашенко барои рафтан аз мансаб "танҳо акнун оғоз ёфт ва то рафт қавитар хоҳад гашт."

Дар ҳамла ба як мадраса дар Пешовар 9 толибилм ҷон бохтанд

Ҳамла ба як мадраса дар шаҳри Пешовари Покистон. 27 оятябри соли 2020.

Мақомоти расмӣ дар Покистон мегӯянд, дар натиҷаи ҳамла ба як мадрасаи исломӣ дар шаҳри Пешовар камаш 9 донишҷӯ кушта шудаанд ва 70 нафари дигар ҷароҳат бардоштаанд.

Виқор Азим, як мақоми баландпояи пулиси шаҳри Пешовар гуфт, ки ҳангоми таркиш дар рӯзи 27-уми октябр дар дохили як синфи мадраса 60 нафар дарс мехондаанд. Ба гуфтаи ӯ, касе ҷузвдонеро, ки бомб доштааст, қабл аз оғози дарс дар дохили толори дарсхонии донишҷӯён гузошта рафтааст.

Муҳаммад Осимхон, сухангӯи Шифохонаи Луя дар Пешовар гуфт, ки ба инҷо 7 ҷасад ва 70 захмиро овардаанд. Ба гуфтаи ӯ, онҳое, ки ҳалок шудаанд, сочмаҳои зиёде хӯрдаанд ва ё бисёр сӯхтаанд.

Мақомот гуфтаанд, ки дар байни захмиён донишҷӯёни афғон низ ҳастанд. То кунун касе масъулияти ин бомбгузориро бар дӯш нагирифтааст.

Дар як шабонарӯз 43 кас дар Тоҷикистон ба КОВИД-19 гирифтор шуд

Акс аз бойгонӣ.

Дар шабонарӯзи гузашта дар Тоҷикистон ташхисҳо ба короновируси нав гирифтор шудани 43 каси дигарро ошкор кардаанд.

Ба иттилои Вазорати тандурстии Тоҷикистон то шоми 26-уми октябр шумори умумии сироятёфтагон аз коронавирус ба 10 ҳазору 819 нафар расид.

Ба гуфтаи ин ниҳод, дар чанд рӯзи ахир мавридҳои фавт аз коронавирус дар Тоҷикистон сабти ном нашудааст. Бинобар омори расмӣ, то кунун 81 нафар бар асари ин беморӣ фавтидаанд.

Аммо мутахассисон ба омори расмӣ дар бораи бемории COVID-19 шубҳа доранд ва мегӯянд, теъдоди гирифторону талафот ба маротиб бештар аз он аст, ки Вазорати тандурустӣ мегӯяд.

Сарвазири пешини Қирғизистон дар пайгарди байнидавлатӣ қарор гирифт

Сафар Исҳоқов, сарвазири пешини Қирғизистон.

Хадамоти иҷрои ҷазои ҷиноии Қирғизистон хабар медиҳад, ки сарвазири пешини ин кишвар Сафар Исҳоқов дар пайгарди байнидавлатӣ эълом шудааст.

Ин хадамот иттилоъ надорад, ки оё Исҳоқов кишварро тарк кардааст ё на. Ба иттилои расонаҳо, муҳлати дар озодӣ будани Исҳоқов ҳанӯз 12 октябр ба поён расида буд, вале вай ба маҳбас барнагашт.

Моҳи июни соли ҷорӣ додгоҳи ноҳияи Якуми майи шаҳри Бишкек Исҳоқовро дар фасодкорӣ ҳангоми сохтани Осорхонаи таърихӣ ва ипподром дар шаҳри Чолпон-Ота айбдор ва 18 сол зиндонӣ кард. Декабри соли 2019 додгоҳ ӯро бо айби фасодкорӣ ҳангоми азнавсозии маркази гармидиҳии шаҳри Бишкек 15 сол зиндонӣ карда буд.

Шаби 6 октябр дар натиҷаи эътирозҳои мардумӣ Исҳоқов барои ҳафт рӯз аз маҳбас озод карда шуд.

Исҳоқов дар солҳои 2017-2018 сарвазири Қирғизистон буд.

Президенти пешини Қирғизистон дар боздоштгоҳ гуруснашинӣ эълом кард

Алмосбек Отамбоев, раиси ҷумҳури пешини Қирғизистон.

Алмосбек Отамбоев, президенти пешини Қирғизистон, ки баъди аз сӯи эътирозгарон аз зиндон раҳо шудан дубора боздошт гардид, дар боздоштгоҳ гуруснашинӣ эълом кардааст. Дар ин бора вакили мудофеи вай Замира Жоошева хабар дод.

Талабҳои Отамбоев аз ин гуруснашинӣ ҳанӯз маълум нест. Ба гуфтаи Жоошева, президенти пешинро дар таҳхонаи боздоштгоҳ - ҷое ки пештар маҳкумони ба қатлро нигаҳ медоштанд - нигаҳдорӣ мекунанд. Вакили мудофеъ гуфт, он макон шароити бад дорад ва сиҳатии Отамбоев нохуб шудааст.

Хадамоти иҷрои ҷазои ҷиноии Қирғизистон гуфт, ки Отамбоев дар асоси қарори додгоҳи ноҳияи Якуми майи шаҳри Бишкек ба боздоштгоҳ интиқол ёфтааст ва шароити макони нигаҳдории президенти пешин мувофиқ ба талабот аст.

Рӯзҳои 7-8 августи соли гузашта дар деҳаи Кой-Тош "амалиёти иҷборан эҳзор кардани президенти пешини Қирғизистон ба бозпурсӣ" баргузор шуда, дар натиҷаи задухӯрди нерӯҳои пулис бо ҷонибдорони Алмосбек Отамбоев, президенти пешини Қирғизистон даҳҳо кас осеб диданд. Аз ҷумла, як афсари Кумитаи амнияти ин кишвар ҷон бохт.

Отамбоев дар солҳои 2011 то 2017 президенти Қирғизистон буд. Моҳи июли соли ҷорӣ ӯро бо айби фасодкорӣ 11 сол зиндонӣ карданд. Шаби 6 октябр дар натиҷаи эътирозҳои оммавӣ Отамбоев аз маҳбаси кумитаи давлатии амнияти миллӣ озод шуд. Баъди чанд рӯз ӯро дубора боздошт карданд.

Дар Қазоқистон фаъолон аз фишор ба боздоштшудаҳо шикоят доранд 

Акс аз бойгонӣ.

Як гуруҳи фаъолони маданӣ 26 октябр дар назди додситонии шаҳри Нурсултони Қазоқистон ҷамъ шуда, аз рафтори кормандони пулис нисбат ба фаъолоне шикоят карданд, ки дар натиҷаи ҳамоиши ҷонибдории хонаводаҳои шаҳрвандони таъқибшаванда дастгир шудаанд.

Ба гуфтаи ҷамъшудаҳо, фаъолон Гулмира Каликова ва Гулҷанат Темирхон рӯзи якшанбе 10-15 рӯз ҳабси маъмурӣ шуданд.

"Мо ба хотири ҳимоят аз ҳуқуқи ин занҳо ба додситонӣ омадем. Онҳоро пеш аз интиқол ба додгоҳ ҳудуди як шабонарӯз дар шуъбаи пулис нигаҳ доштанд. Ба онҳо ҳатто иҷозат надодаанд, ки аз ҳуқуқи худ истифода карда, ба наздиконашон занг зананд",-изҳор дошт яке аз фаъолон бо номи Айнур Мирзоалиева.

Муовини додситони ноҳияи Байконури пойтахти Қазоқистон Тимур Утеубоев гуфт, шикояти фаъолонро "баррасӣ хоҳанд кард". Вале аз ироаи ҷузъиёти он худдорӣ намуд. Дар Департаменти пулис Нурсултон гуфтанд, танҳо дар сурати ирсоли номаи расмӣ ҳодисаро шарҳ медиҳанд.

Як гуруҳи фаъолон рӯзи шанбе дар шаҳри Нурсултон гирди ҳам омада, хостанд барои хонаводаҳои шаҳрвандоне пул ҷамъ кунанд, ки мавриди таъқибҳои сиёсӣ қарор доранд. Ин гирдиҳамоӣ бо боздошти иштирокдорон анҷомид. Пулис гуфт, таҷаммуъ бидуни иҷозат ва ғайриқонунӣ буд.

Туркманистон ба карантини пурра аз 1 ноябр омодагӣ мегирад

Роҳгузарони ниқобдор дар яке аз кӯчаҳои Ишқобод



Ҳукумати Туркманистон масъалаи таҳкими чораҳои пешгирӣ аз паҳншавии коронавирусро ҷиддан баррасӣ дорад. Ин чораҷӯӣ ба паҳншавии COVID-19 дар маҳбаси занонаи вилояти Дашоғузи он кишвар рабт дорад, ки ба навиштани расонаҳо, вазъи COVID-19 дар маҳбаси мазкур ташвишовар боқӣ мондааст. Ба иттилои расонаҳо, дар маҳбас наздики 500 зан гирифтори COVID-19 аст. Гуфта мешавад, дар вилояти Лабиоб низ паҳншавии вабои коронавирус ташвишовар аст. Ба ин далел мақомоти Туркманистон тасмим гирифтаанд, ки сар аз 1 ноябр парвозҳои дохилӣ, равуои байни минтақаҳо ва баргузории чорабиниҳои оммавиро манъ кунанд.

"Тасмим ҳанӯз гирифта нашудааст, аммо интизор меравад, сар аз 1 ноябр рафту омад ба минтақаҳо қатъ шавад. Баргузориҳоии чорабиниҳои оммавӣ, амсоли тую маъракаҳо манъ гарданд", - хабар додааст як манбаи бахши туркмании Радиои Озодӣ.

Ин дар ҳолест, ки дар Туркманистон пӯшидани ниқоб ҳатмӣ эълом ва гардиши қатораҳо дар дохили кишвар манъ шудааст. Бо ин вуҷуд мақомоти Туркманистон расман мавҷудияти вабои коронавирусро дар кишвар эълом накардаанд.

Дар Узбекистон 14 донишгоҳи хусусӣ бунёд мешавад

Дар яке аз донишгоҳҳои Узбекистон дар давраи пеш аз ҳамагири COVID-19



Дар Узбекистон сар аз 1 сентябри соли 2021 дар ҳар як минтақа дасти кам як муассисаи таҳсилоти олии ғайридавлатӣ бунёд хоҳад шуд. Дар ин бора муовини вазири таҳсилоти олӣ ва миёнаи махсуси Узбекистон Узоқбой Бегимқулов дар як нишасти хабарӣ дар Тошканд иттилоъ дод.

Дар иттилоияи расмии Вазорати таҳсилоти олӣ ва миёнаи махсуси Узбекистон дақиқ гуфта нашудааст, ки дар ин кишвар чӣ қадар донишгоҳи ғайридавлатӣ бунёд мешавад.

Тавре Бегимқулов гуфт, агар дар шаҳри Тошканд, Қароқалпоқистон ва 12 вилояти Узбекистон яктоӣ донишгоҳ бунёд шавад, пас дар 1 сол дасти кам 14 донишгоҳи ғайридавлатӣ дар ин кишвар таъсис дода хоҳад шуд.

Расонаҳо дар бораи таъсиси донишгоҳҳои хусусӣ дар Узбекистон бори нахуст ду сол пеш иттилоъ дода буданд.

Пешбарии номзадҳо ба мақоми президентии Қирғизистон то 15 ноябр идома мекунад

Интихобкунанда ҳолнома ва барномаи номзадҳои интихоботи порлумонии Қирғизистонро меомӯзад.



Абдуҷаббор Бекматов, муовини раиси Комисияи марказии интихобот ва раъйпурсии Қирғизистон дар бораи интихоботи пеш аз муҳлати президентӣ изҳори назар кард.

Вай гуфт, қонунгузорӣ талаб мекунад, ки дар сурати пеш аз муҳлат қатъ шудани ваколатҳои президент, порлумон вазифадор аст, интихоботи пеш аз муҳлати президентиро дар давоми як ҳафта эълом кунад. Аммо ба далели он ки порлумон чунин накард, интихобот бидуни дахолати порлумон эъломшуда ба ҳисоб меравад.

"КМИР мебоист дар давоми ду рӯз санаи дақиқи интихоботро эълом мекард. Дар асоси ҳамин муқаррарот, КМИР 24 октябр интихоботи президентиро 10 январи соли 2021 эълом крад. То 15 ноябр пешбарии номзадҳо ба мақоми президентӣ идома мекунад. Номзадҳоро ҳизбҳои сиёсӣ ва шаҳрвандон пешбарӣ мекунанд. То ҳол касе аз пешбарии номзади худ хабар надодааст", - гуфт Бекматов.

Вай гуфт, КМИР то 7 декабр қабули ҳуҷҷатҳои номзадҳоро идома медиҳад. Ба ҷуз ин, номзадҳо бояд на камтар аз 30 ҳазор имзо ба ҷонибдорӣ аз пешбарии худ ҷамъ оваранд.

Сооронбой Ҷеенбеков, президенти пешини Қирғизистон аз мақоми худ 15 октябр истеъфо дод ва порлумони он кишвар рӯзи 16 октябр истеъфои президентро тасдиқ кард.

Мақомоти Узбекистон хабари сахттар шудани карантинро рад карданд

Барномаи телевизионӣ роҷеъ ба COVID-19 дар Узбекистон



Вазорати тандурустии Узбекистон гуфт, ки хабарҳо дар бораи сахттар шудани чораҳои карантинӣ шуруъ аз 1 ноябр дар кишвар асосе надоранд.

"Дар шабакаҳои иҷтимоӣ овозаҳои беасосе паҳн мешаванд, ки гӯё аз 1 ноябр чораҳои карантинӣ сахттар мешаванд. Бояд зикр кард, ки барои паҳн кардани овозаҳои беасос ва ангехтани ҳарос дар байни аҳолӣ муҷозот пешбинӣ шудааст", - омадааст дар хабари вазорати тандурустии Узбекистон.

Чораҳои карантинии марбут ба вабои коронавирус дар он кишвар, ки аз моҳи март эълом шуда буданд, 15 август бекор гардиданд.

То субҳи 26 октябр дар Узбекистон 65 ҳазору 480 ҳолати гирифторшавӣ ба ин вабо сабт шудааст. Мақомоти он кишвар мегӯянд, дар маҷмуъ дар Узбекистон аз моҳи март ба ин тараф на камтар аз 550 кас бар асари мубталошавӣ ба коронавирус фавтидааст.

Хабарнигори маҷруҳи Радиои Озодӣ дар Қазоқистон аз ташхиси тиббӣ мегузарад

Сония Тойкен, хабарнигори бахши қазоқии Радиои Озодӣ, соли 2017



Сония Тойкен, хабарнигори бахши қазоқии Радиои Озодӣ, ки аз сӯи пулис маҷруҳ карда шуд, рӯзи 26 октябр аз ташхиси судиву тиббӣ мегузарад. Ин хабарнигор ҳангоми инъикоси гирдиҳамоии осоиштаи сокинони шаҳри Нурсултони Қазоқистон рӯзи шанбеи гузашта мавриди ҳамла қарор гирифт.

Тойкен тасмим дорад, аз рӯи ҳодисаи расонидани ҷароҳати вазнин, монеъ шудан ба фаъолияти рӯзноманигорӣ, берун рафтан аз ваколатҳои хизматӣ аз сӯи пулис, ба додситонӣ шикоят барад.

Рӯзи шанбеи гузашта пулис ҳангоми баргузории гирдиҳамоии сокинони шаҳри Нурсултон Сония Тойкенро ба замин хобонида, талош кард, ки телефонашро бигирад. Рӯзноманигор худро муаррифӣ кард, аммо пулис бо вуҷуди ин ӯро ба автобус бурданд ва танҳо баъди чанде раҳо карданд.

Эътилофи рӯзноманигорони баробарҳуқуқи Қазоқистон дар робита ба ин ҳодиса изҳорот нашр ва аз Сония Тойкен ҳимоят кард.

Шурӯи корпартоӣ дар бархе корхонаҳои истеҳсоливу донишгоҳҳои Беларус

26-уми октябр, Минск

Дар як қатор корхонаҳои азими истеҳсолии Беларус рӯзи 26-уми октябр корпартоии эътирозӣ шурӯъ шуд ва донишҷӯён ҳам барои ширкат дар эътирозҳо ба хиёбонҳо баромаданд. Рӯзи душанбе аввалин рӯзи корпартоии миллӣ буд, ки онро мухолифон эълон карданд, ҳадафашон ба истеъфо фиристодани Александр Лукашенко мебошад. То ҳол мушаххасан маълум нест, ки оё кадом корхонае корашро қатъ кардааст ё на, вале мақомот мегӯянд, ки ҳама корхонаҳо аз рӯи нақша корро идома медиҳанд. Аз рӯи иттилои дастрас, дар чанд корхонаи Минск ва шаҳрҳои дигар коргарон дар долонҳо ҷамъ шуда бо даъвати корпартоӣ раҳпаймоӣ кардаанд. Телеграм-каналҳои мухолифон дар бораи ширкати қисме аз кормандони бархе корхонаҳо хабар медиҳанд. Дар корхонаи "Гродно-Азот" тахминан 100 коргар нахост навбати кори худро шурӯъ кунад. Онҳо дар даромадгоҳи корхона эътироз карданд ва чанд нафарашон боздошт гардиданд. Эътирозҳо дар корхонаҳои тракторсозии Минск, заводи электротехникии Минск, корхонаи чархбарории Минск ва "Беларускалий" баргузор шуд. Донишҷӯёни чандин мактаби олӣ ҳам даст ба эътироз задаанд.

Мухолифон ва садҳо ҳазор сокини Беларус, ки интихоботи президентии 9-уми августро ба фоидаи Лукашенко тақаллубшуда меноманд, ба истеъфои раҳбари худкома ва баргузории интихоботи нави озоду одилона даъват мекунанд.

Эрдуғон сокинони Туркияро ба бойкоти маҳсулоти фаронсавӣ даъват кард

Раҷаб Тайиб Эрдуғон (аз чап)ва Эммануэл Макрон. Акс аз бойгонӣ

Президенти Туркия Раҷаб Тайиб Эрдуғон дар пасманзари бадтар шудани робитаҳои Анкараву Париж дар заминаи масъалаҳои ифротгароии исломӣ, аз ҳамватанонаш хост, ки маҳсулоти сохтаи Фаронсаро бойкот кунанд. Изҳороти рӯзи 26-уми октябри Эрдуғон дар ҳоле садо дод, ки ду рӯз пеш аз ин ӯ аз президенти Фаронса Эммануэл Макрон хост, ки аз озмоиши сиҳҳатии равонӣ гузарад. Дар посух Фаронса сафирашро аз Анкара бозхонд. Айни чунин суханҳоро ӯ рӯзи 26-уми октябр ҳам ба забон овард. Эрдуғон дар як суханронии телевизиониаш дар Анкара гуфт: “Тавре дар Фаронса гуфтанд, ки “маҳсулоти сохташудаи туркиро нахаред”, ман аз мардумам ин ҷо даъват мекунам. Ҳеҷ гоҳ маҳсулоти сохтаи Фаронсаро нахаред”.
Рӯзи 17-уми октябр Фаронса аз ҳодисаи қатли бераҳмонаи омӯзгоре аз ҷониби як ҷангҷӯи исломӣ таконзада шуд. Ин омӯзгор қаблан зимни сӯҳбат дар мавзӯи озодии баён карикатураҳои Муҳаммад пайғамбарро ба шогирдонаш намоиш медод.
Рӯзи 23-юми октябр карикатураҳое, ки бори аввал чанд сол пеш дар маҷаллаи ҳаҷвии “Шарли Ҳебдо” нашр шудаанд, дар бинои ҳукумати Фаронса намоиш дода шуданд ва ин ҳодиса мояи хашми ҷаҳони Ислом шуд. Дар посух ба пуштибонии Макрон аз ин карикатураҳо, дар кишварҳои мусалмоннишини ҷаҳони Араб даъватҳо ба бойкоти харидории маҳсулоти фаронсавӣ садо дод. Макрон гуфт, ки “Фаронса ҳеҷ гоҳ аз кариатураҳои мо даст намекашад”.
Ҳоло бойкоти харидории маҳсулоти сохтаи Фаронса дар Қатару Кувайт ҷараён дорад ва интизор меравад, ки дар Урдун ва дигар кишварҳо идома пайдо кунад.
Аз лиҳози ҳаҷми маҳсулоти воридшаванда ба Туркия, Фаронса дар ҷои даҳум меистад ва барои Туркия Фаронса ҳафтумин кишварест, ки он ҷо маҳсулот содир мекунад. Дар миёни маҳсулоти дигар туркҳо мошинҳои фаронсавиро хеле зиёд мехаранд.

Туркияву Фаронса кишварҳои узви НАТО мебошанд, вале сари масоили Сурияву Либия, қонунгузории роҳҳои баҳрӣ дар шарқи Ховари Миёна ва низоъ дар Қаробоғи Кӯҳӣ ихтилофи назар доранд.

Ҷабборов гуфт, барои ба президентӣ номзад шудан, моҳи декабр аз вазифааш канор меравад

Содир Ҷабборов то 4-уми октябр як зиндонӣ буд. Ӯро соли 2017 бо иттиҳоми одамрабоӣ ба 11,5 соли зиндон маҳкум карданд
Иҷрокунандаи вазифаи президенти Қирғизистон Содир Ҷабборов (Ҷапаров) гуфт, ки то охири соли ҷорӣ аз мақомаш канор меравад, то ки битавонад моҳи январ дар интихоботи президентӣ номзад шавад. Таҳаввулоте, ки дар бораи он Ҷабборов рӯзи 25-уми октябр, зимни мулоқот бо сокинони Норин эълон кард, барояш имкон медиҳад, ки қонунеро, ки ба иҷрокунандаи вазифаи президент ширкат дар интихоботро манъ мекунад, сарфиназар бикунад. Ӯ гуфт, “интихоботи президентӣ рӯзи 10-уми январ баргузор мешавад. Ман дар оғози моҳи декабр ба истеъфо меравам, то ки дар интихобот иштирок кунам. Ман дар ин сабқат ба ҳайси як шаҳрванди қаторӣ иштирок мекунам. Агар пирӯз шудам, президент мешавам, агар не, пас як шаҳрванди оддӣ мемонам”. Баъди бекор шудани натиҷаҳои интихоботи 4-уми октябр бо сабаби эътирозҳо аз тақаллуби овоздиҳӣ, ҳукумат барканор шуд ва Ҷабборови 51-сола нахуствазири кишвар гардид. Аз соли 2005 ба ин сӯ ин сеюмин инқилоби мардумӣ дар Қирғизистон аст, ки боиси барканории ҳукумати кишвар мешавад. Президент Сооронбой Ҷеенбеков миёнаҳои моҳи октябр ба истеъфо рафт ва Ҷабборов ба ҳайси нахуствазир иҷрокунандаи вазифаи президент шуд. То 4-уми октябр ӯ дар зиндон буд ва барои одамрабоӣ ҳукми 11,5 соли ҳабсро пуштисар мекард. Озодии ӯ дар фазои нооромиву эътирозҳои баъдиинтихоботӣ имконпазир шуд. Рӯзи 24-уми октябр Комиссиюни марказии интихоботҳои Қирғизистон гуфт, ки таърихи интихоботи президентиро ба 10-уми январ таъин мекунад. Ҷабборов аллакай ба қонунҳои интихобот тағйирот ворид кардааст, ки санаи баргузории интихоботи нави парлумониву президентиро ба санаи дертар вогузор ва барои худи ӯ ҳам шароити қонунии ширкат дар интихоботро фароҳам мекунад. Дар сурати дар моҳи декабр ба истеъфо рафтанаш тағйирот ба қонун лозим намешавад. Бисёр коршиносони соҳаи ҳуқуқ ва ҳам сиёсатмадорон таъкид мекунанд, ки барои тағйир додани конститутсия бояд референдум ё ҳамапурсии мардумӣ баргузор шавад.

Журналистон аз ИМА хостанд, ки коҳиши мӯҳлати визаи расонаҳоро бозбинӣ кунанд

Июни соли 2019. Журналистони маҳалливу хориҷӣ дар ИМА як маъракаи ҳизби демократро мушоҳида мекунанд

Иттиҳоди садову симои Аврупо (EBU), ки аз эътилофи созмонҳои матбуотӣ иборат аст, дар як дархости муштарак аз номи 24 созмони матбуотӣ дар ҷаҳон аз ҳукумати ИМА хост, ки тарҳи коҳиши мӯҳлати виза ё раводиди будуши хабарнигорони хориҷӣ дар ин кишварро бозбинӣ кунад. Дар дархости ин созмон тақозо шудааст, ки пешниҳоди аз 5 сол ба 240 рӯз кам кардани визаи будубоши кормандони расонаҳо дар ҳудуди ИМА-ро бозбинӣ кунанд. Ин навъи виза дар сурати тамдид ба кормандони расонаҳо боз ба мӯҳлати 240 рӯзи дигар ҳақи истодан дар хоки Амрикоро имконпазир мекунад. Изҳороти рӯзи 25-уми октябри EBU мегӯяд, ки мӯҳлати ками будубош дар ИМА ба кори расонаҳои хориҷие, ки бо пӯшиши таҳаввулоти ИМА машғул ҳастанд, осеби ҷиддӣ мерасонад. Зери ин дархост чандин расонаҳои боэътибори мисли Reuters, the Associated Press, Agence France Presse, CBS ва Федератсияи байналмилалии журналистон имзо гузоштаанд, ки мухотабонашон дар маҷмӯъ беш аз 1 миллиард аҳолии сайёраро ташкил медиҳад.

Натиҷаҳои пешакии интихоботи Украина мегӯяд,  Зеленскию ҳизбаш мағлуб мешаванд

25-уми октябр. Президенти Украина Владимир Зеленский овоз медиҳад

Бар асоси натиҷаҳои пешакии экзит-полл, президенти Украина Владимир Зеленский ва ҳизбаш “Хидматдори халқ” зоҳиран мағлуб мешаванд ва дар Киеву дигар шаҳрҳои азими кишвар ҳизбҳои рӯ ба Русияву ғарбгароҳо пештози сабқат ҳастанд. Пурсишҳои ҳамзамони баъди овоздиҳии рӯзи 25-уми октябр дар Украина аз он далолат мекунад, ки ҳизби президентии “Хидматгори халқ” аз нӯҳ шаҳри калонтарин дар ҳафттоаш мағлуб шудааст. Аз ҷумла, ҳизби шаҳрдори Киев Виталий Кличко “Эътилофи демократии Украина барои ислоҳот” дар овоздиҳии ахир беш аз 50 % раъйҳоро ба худ ихтисос додааст.

Интихоботи маҳаллӣ, ки аввалин бор бар асоси қонуни нави ислоҳшудаи интихобот баргузор шуда, ҳадафаш ба минтақаҳо додани салоҳияти бештар аст, барои Зеленский баъди якуним соли кор дар мансаби президентӣ як зарбаи шадид шуд. Алекс Кокчаров, як таҳлилгари масоили хатарҳо дар Украина мегӯяд, “барои ҳизбе, ки соли гузашта 56 дарсади раъйҳоро бурда буд, ин овоздиҳӣ як фоҷеа шуд. Ин хеле бад аст ва мавқеи онҳоро дар Рада (парлумони Украина) хеле заъиф мекунад”.

Пурсишҳои ахири афкори умум мегӯяд, ки 70 дарсади сокинони Украина ба ин боваранд, ки кишвар дар самти нодуруст пеш меравад ва маҳбубияти шахсии Зеленский ҳам аз 50 дарсад поин омадааст. Натиҷаҳои пешакии овоздиҳӣ мегӯяд, ки раисони шаҳрҳои калонтарини кишвар – Киев, Харков, Одесса ва Лвов мақомҳои худро ҳифз кардаанд ва бархе бояд дар даври дуюми интихобот рақобат кунанд. Ҳеҷ яке аз онҳо узви ҳизби Зеленский нестанд.

Гурӯҳи шаҳрвандии “Опора”, ки дар тамоми минтақаҳои Украина интихоботро назорат кардааст, рӯзи 26-уми октябр гуфт, ки дар маҷмӯъ интихобот беайб ва мутобиқ бо қонуни интихобот гузашт. Комиссиюни марказии интихоботҳо гуфт, ки як қонуншикании умда ин буд, ки рӯзи овоздиҳӣ ҳам бархе таблиғотро идома доданд. Вале айни замон, ба қавли ин комиссиюн, ҳаҷми ин қонуншиканиҳо чандон зиёд набуд ва зарурат барои бекор кардани натиҷаҳо вуҷуд надорад.
Ба иттилои ин комиссиюн, дар овоздиҳӣ 37 дарсади раъйдиҳандагон иштирок карданд ва натиҷаҳои интихобот дар се то панҷ рӯзи дигар маълум мешавад.


Рӯзи 26-уми октябр Зеленский мардуми Украинаро бо баргузории интихоботи озод табрик кард. Зеленский гуфт, “мо таъкид мекунем, ки маъракаи интихоботӣ, ҷараёни овоздиҳӣ ва ҷараёни интихобот, дар маҷмӯъ, ҷавобгӯ ба меъёрҳои баландтарини демократӣ ва қонунҳои амалкунанда буд. Ҳама нирӯҳои сиёсӣ – ширкаторони ҷараёни интихоботӣ, ҳамчунин номзадҳо тамоми имкониятҳоро барои намоиши мавқеи худ дар баробари овоздиҳандагон дар ихтиёр доштанд”. Ӯ афзуд, ки “дастоварди калидӣ ин аст, ки украиниҳо намояндагони худро ба ҳукуматҳои маҳаллӣ интихоб карданд”.


Ислоҳоти интихоботии Украина ҳамчун қадами муҳим дар амри дур шудан аз шакли маъмурияти мероси шӯравӣ дониста мешавад, чун дар давоми қариб сӣ соли истиқлолият тақрибан бетағйир монда буд.

Овоздиҳӣ дар Қрим, ки соли 2014 аз ҷониби Русия ғасб шудааст ва ҳам бархе қаламравҳои минтақаҳои Донетск ва Луҳанск, ки такягоҳи нирӯҳои ҷудоиталаби рӯ ба Русия мебошанд, баргузор нашуд. Дар изҳороти рӯзи 26-уми октябри худ Зеленский ба “бозгарони низоми конститутсионӣ дар манотиқи Донетск, Луҳанск” ва Қрим ваъда дод.

Нахуствазири Булғористон ба COVID-19 олуда шудааст

Бойко Борисов, нахуствазири Булғористон

Бойко Борисов, нахуствазири Булғористон ба коронавируси нав олуда шудааст ва ин ҳам дар ҳолест, ки Аврупо бо мавҷи тозаи пандемия дастбагиребон аст. Дар бораи натиҷаи мусбати тести COVID-19 Борисов дар саҳифаи Фейсбуки худ хабар дод. Ӯ навишт, ки вуҷуди коронавирусро ду тест тасдиқ кард ва афзуд, ки “заъфи бадан дорад” ва мувофиқи машварати табибон дар хона бо муолиҷа машғул мешавад.

Дар кишвари иборат аз 7 миллион ҷамъияти Булғористон дар минтақаи Балкан беш аз 37,5 ҳазор ҳодисаи гирифторӣ ва 1084 ҳодисаи марг бар асари коронавирус ба қайд гирифта шудааст. Аз 21-уми октябр дар ин кишвар доштани ниқоби тиббӣ дар дохили муассисаҳо ҳатмӣ ва дар бархе манотиқ, аз ҷумла пойтахт, шаҳри София, кори тафреҳгоҳҳои шабона манъ шудааст.

"Бемори нав нест". Мелбурн баъди чор моҳ аз маҳдудиятҳои пандемия раҳо мешавад

4-уми август. Як хиёбони тиҷоратии Мелбурн дар давраи пандемияву маҳдудиятҳо

Дар ҳоле, ки дар Аврупо авҷи паҳншавии коронавирус мояи нигарониву тадбирҳои нави маҳдудкунанда шудааст, дар шаҳри Мелбурни Австралия мақомот рӯзи 26-уми октябр гуфтанд, ки ҳеҷ як ҳодисаи нави олудашавӣ ба коронавирус ба қайд гирифта нашудааст. Ин шаҳри дуюмини Австралия давоми чор моҳи гузашта яке аз нуқтаҳои доғи пандемия ба шумор мерафт. Раиси аёлати Виктория, ки Мелбурн ба ҳудудҳои маъмурии он дохил мешавад, амр дод, ки аз шаби 27-уми октябр дар ин кишвар иҷозаи боз шудани ҳама фурӯшгоҳҳо, тарабхонаву кафеву барҳо дода шавад. Баъди 9-уми ноябр манъи сафари сокинони Мелбурн ба 25 км дуртар аз маҳалли зисташон бекор мешавад. Инчунин ба онҳо иҷоза дода мешавад, ки ба қисматҳои дигари аёлат сафар кунанд. Мелбурн аз моҳи июл ба ин сӯ дар ҳолати маҳдудияти бисёр сахт қарор дошт.

Дар ҳамин ҳол дар Испания шурӯъ аз 25-уми октябр ҳолати изтирорӣ ва қуюди шабгардӣ ҷорӣ шудааст, то ки пандемия бештар таҳти назорат гирифта шавад. Қуюди шабгардӣ аз соати 11-и шаб то 6-и субҳ амал мекунад. Дар Итолиё ҳам маҳдудиятҳои нав ҷорӣ шуд.

Дар Фаронса рекорди нави олудашавиҳои рӯзона ба қайд гирифта шуд ва дар рӯзи 25-уми октябр дар бораи бемор шудани 52 ҳазору 10 нафар хабар расид. Рӯзе аз он пеш дар Фаронса 45 ҳазор нафар дар як рӯз ба коронавирус гирифтор шуда буд.

Дар таркиши Кветта се нафар кушта шуд

25-уми октябр, Кветта, раҳпаймоии эътирозӣ

Дар ҳоле, ки ҷонибдорони мухолифон дар як қисми шаҳри покистонии Кветта раҳпаймоии азими худро идома медоданд, таркиши маводи худсохте дар қисмати дигари ин шаҳр ҷони се нафарро гирифт. Раҳбарони як эътилофи азими мухолифони Покистон, ки нахуствазир Имрон Хонро дар нотавонии ҳалли бӯҳрони иқтисодӣ гунаҳкор карда истеъфояшро талаб доранд, моҳи октябр инчунин дар ду шаҳри азими дигари кишвар намоишҳои эътирозӣ ташкил карданд. Азҳар Акрам, як мақоми полиси Кветта гуфт, маводи мунфаҷира дар як бозори сабзавотфурӯшии Кветта дар як мотосикл гузошта шуда буд ва поёни рӯзи бозор таркид. Дар ин ҳодиса инчунин ду нафар маҷрӯҳ шуд. Ҳеҷ кас ё гурӯҳе масъулияти ин таркишро ба дӯш нагирифт. Маҳалли таркиш чанд километр дуртар аз раҳпаймоии мухолифон буд. Дар паи ин ҳодиса мақомот дар Кветта иртиботи телефонҳои мобилро қатъ карда, шумори полисро дар ҷои эътирозҳо афзун намуд.

Трамп мавзӯи карантини Пенсро ба худи ӯ ҳавола кард

Майк Пенс, муовини президенти ИМА

Президенти ИМА Доналд Трамп нахост ба саволҳо дар бораи ин ки то куҷо баъди мусбат баромадани озмоишҳои коронавируси аъзои тими муовини президенти ИМА худи Майк Пенс ҳам аз ширкат дар маъракаи таблиғотии интихоботӣ канор меравад, посух надод. Трамп, ки худ дар шаҳри Мэн бо таблиғи номзадиаш банд аст, рӯзи 25-уми октябр ишора кард, ки тасмим бо худи Пенс аст. Пенс инчунин раҳбарии гурӯҳи тасмимгирандаи ҳукуматӣ дар масоили коронавирусро ба ӯҳда дорад ва баъди ба коронавирус гирифтор шудани раиси ситоди ӯву дигар зертобеонаш интизор мерафт, ки ӯ ҳам ба карантин меравад. Ин дар ҳолест, ки як ҳафта пеш аз интихоботи ИМА, Майк Пенс ҳам нақшаву барномаҳои бисёр зиёди интихоботӣ ва сафарҳо дорад. Худи ӯ ҳам номзадиашро ба мақоми муовини президент гузоштааст. Кохи Сафед иддао кард, ки натиҷаҳои тести коронавирус Пенс манфӣ аст ва бо сабаби бисёр муҳим будани салоҳиятҳои ӯ дар ин шабурӯз шарт нест, ки ӯ дар карантини барои дигарҳо ҳатмии 14-рӯза бинишинад.

Ин тасмими Кохи Сафед интиқодҳои Ҷо Байден, номзади демократҳо дар интихоботи президентро ба бор овард.

Оилае, ки духтарашро барои ошиқ шудан ба ҷавони серб сар тарошид, аз Фаронса ихроҷ шуд

Вазири умури дохилаи Фаронса Жералд Дарманен


Мақомоти расмӣ аҳли хонаводаи як боснии мусалмонро, ки мӯи сари духтарашонро барои ошиқ шудан ба як серби масеҳӣ тарошидаанд, аз Фаронса ронданд ва барои 5 сол аз ҳаққи бозгашт ба ин кишвар маҳрум кардаанд. Жералд Дарманен, вазири корҳои дохилии Фаронса дар як баёнияи расмӣ гуфт, ки панҷ узви хонаводаи духтари 17-солае, яъне падару модар ва се хоҳару бародарашро, ки дар шаҳри шарқии Безансон зиндагӣ мекарданд, рӯзи 24-уми октябр ба шаҳри Сараево, пойтахти Босния ва Ҳерсоговина бозпас фиристодаанд. Ӯ афзуд, “ихроҷ аз қаламрави кишвар натиҷаи рафтори ғайриқобили қабули хонавода дар моҳи август буд, ки як духтари ноболиғро барои ошиқ шудан ба марде аз дини дигар латукӯб карда ва сарашро тарошидаанд.” Дар баёнияи вазир омадааст, ки духтари босниро мақомоти ҳифзи иҷтимоии Фаронса нигоҳубин мекунанд. Посбонони марзи Босния ва Ҳерсоговина ба Радиои Озодӣ тасдиқ карданд, ки оилаи рондашуда дар як ҳавопаймои махсус соати 12:50 ба вақти маҳаллӣ ва бо ҳамроҳии пулиси Фаронса ба Фурудгоҳи байналмилалии Сараево омад. Падару модари духтарро рӯзи 23-уми октябр дастгир карданд ва додгоҳи Безансон онҳоро дар зӯроварӣ ба ноболиғ гунаҳкор донист. Амма ва амаки духтарро барои чунин рафтор ба зиндон маҳкум кардаанд. Матбуоти Фаронса навиштааст, ки духтари боснии мусалмонро барои он латукӯб карда ва сарашро тарошиданд, ки ӯ бо як серби 20-солаи масеҳӣ иртибот доштааст.

Тошканд-Душанбе: парвозҳо барқарор мешаванд

Парки ҳавоии ширкати ҳавоии Узбекистон

Мақомоти Тоҷикистон ва Узбекистон барои барқарор кардани парвозҳо миёни Тошканд ва Душанбе ба мувофиқа расидаанд. Дар ин бора Вазорати нақлиёти Узбекистон иттилоъ додааст. Тибқи маълумоти пешакӣ, нахустин парвози ҳавопаймоҳо байни пойтахтҳои Узбекистон ва Тоҷикистон рӯзи 28-уми октябр сурат мегирад. Парвозҳо аз Тошканд ба Душанбе ҳафтае як маротиба рӯзҳои чоршанбе анҷом дода мешаванд. Ҳавопаймоҳо ҳафтае як маротиба рӯзи панҷшанбе аз пойтахти Тоҷикистон ба Узбекистон парвоз хоҳанд кард.
Парвозҳо миёни ду кишвар аз 16-уми март бинобар хуруҷи короновирус қатъ карда шуданд. Дар сурати оғоз шудани парвозҳо Узбекистон севвумин кишваре хоҳад буд, ки парвозҳо бо Тоҷикистон аз сар гирифта мешавад. То кунун парвозҳои маъмулӣ аз Тоҷикистон танҳо ба Туркия ва Имороти Мутаҳиддаи Араб сурат мегиранд. Парвозҳои маъмулӣ ба Русия ҳанӯз барқарор нашудаанд. Бинобар ҷадвали муқарраркардаи Вазорати корҳои хориҷаи Тоҷикистон аз Русия ҳар рӯз то 5 парвози чартерӣ, аз ҷумла 3 парвоз аз Маскав ба Душанбе то 1-уми ноябр анҷом дода мешавад. Парвозҳои чартериро танҳо ширкати “Сомон-эйр” анҷом медиҳад. Санаи барқарор шудани парвозҳои маъмулӣ ҳанӯз маълум нест.

Ёфтҳои бештар

XS
SM
MD
LG