Фармондеҳи бонуфузи низомии Либия Халифа Ҳафтар рӯзи 14-уми август дар шаҳри Маскав бо вазирони умури хориҷӣ ва дифои Русия Сергей Лавров ва Сергей Шойгу мулоқот анҷом дод.
Бино ба маълумоти Вазорати умури хориҷии Русия, Лавров дар мулоқот бо Ҳафтар гуфтааст, ки Маскав аз талошҳои ӯ ва нахуствазири Либия Файз ас-Сироҷ барои ба эътидол овардани вазъ дар ин кишвар ҳимоят мекунад.
Вазири дифои Русия низ ҳамон рӯз бо Ҳафтар мулоқот кард ва ба гуфтаи вазорат, "дар он ҷонибҳо ба масъалаи рушди вазъи Африқои Шимолӣ бо назардошти авзои Либия таваҷҷӯҳи бештар зоҳир кардаанд".
Боздиди Ҳафтар аз Маскав дар ҳолест, ки ӯ ва ас-Сироҷ моҳи гузашта эъломияи муштараки сулҳ дар Либияро имзо карданд. Ин эъломия аз 10 банд иборат аст. Ҳафтар фармондеҳи артиши худхондаи миллии Либия буда, соли гузашта ду бор аз Маскав боздид кардааст.
