Пайвандҳои дастрасӣ

Медали Дилшод Назаров дар мусобиқаи Олмон


Дилшод Назаров. Акс аз бойгонӣ

Дилшод Назаров, варзишгари маъруфи тоҷик, дар мусобиқаи ҷаҳонии гурзандозӣ дар шаҳри Ҳаллеи Олмон гурзро ба дурии 77 метру 11 сантиметр ҳаво дода, мақоми дувумро касб кард ва соҳиби медали нуқра шуд. Ин аввалин мусобиқаест, ки ӯ пас аз пирӯзӣ дар Олимпиадаи Рио-2016 иштирок кардааст.

Мусобиқаи асосии имсола қаҳрамонии ҷаҳон аст, ки рӯзҳои 4-13 август дар Лондон баргузор мешавад. Ман Тоҷикистонро намояндагӣ мекунам. Кӯшиш менамоям, ки медал ба даст биёрам. Дар варзиш пешгӯӣ кардан мушкил аст, аммо умедворам, ки муваффақ мешавам

Дар мусобиқаи ҷаҳонии гурзандозӣ дар Ҳалле Павел Фаҷдек аз Лаҳистон бо натиҷаи 82 метру 31 сантиметр ғолиб шуд. Ник Миллер аз Бритониё бо натиҷаи 76 метру 81 сантиметр ҷойи севумро гирифт.

Ин мусобиқа барои Дилшод Назаров пеш аз ширкат дар мусобиқоти ҷаҳонӣ аз силсилаи “IAAF Hammer Throw Challenge” як навъ санҷиш буд. Нахустин даври ин мусобиқот имсол дар Пекини Чин баргузор шуд. Даврҳои минбаъда дар Ҷопон ва Бразилия барпо мегарданд. Даври ниҳоии силсилаи “IAAF Hammer Throw Challenge” рӯзи 29-уми август дар Загреби Хорватия баргузор хоҳад шуд.

Ёдовар мешавем, Дилшод Назаров соли гузашта дар панҷ даври мусобиқоти ҷаҳонӣ ширкат карда, бо 236.37 имтиёз дар феҳристи зӯртарин гурзандозҳои ҷаҳон мақоми дувумро касб намуд. Соли гузашта ӯ дар Бозиҳои XXXI тобистонаи олимпӣ дар шаҳри Рио-де-Жанейрои Бразилия гурзро ба масофаи 78 метру 68 сантиметр ҳаво дод ва бо медали тилло сарфароз гашт. Вай барандаи медали нуқраи мусобиқаи қаҳрамонии ҷаҳон дар соли 2015 дар шаҳри Пекини Чин мебошад.

“Мусобиқаи асосии имсола қаҳрамонии ҷаҳон аст, ки рӯзҳои 4-13 август дар Лондон баргузор мешавад. Ман Тоҷикистонро намояндагӣ мекунам. Кӯшиш менамоям, ки медал ба даст биёрам. Дар варзиш пешгӯӣ кардан мушкил аст, аммо умедворам, ки муваффақ мешавам”, - гуфт Дилшод Назаров.

Аз рӯи натиҷаҳои мусобиқоти имсола ҳоло Дилшод Назаров бо 77,11 метр дар даҳгонаи беҳтарин дар ҷойи нӯҳум аст. Дар се ҷойгоҳи аввал Павел Фаҷдек (Лаҳистон, 82,31 м), Войтсех Новитски (Лаҳистон, 78,54 м) ва Павел Барейша (Булғористон, 78,04 м) дохиланд.

Рекорди инфиродии Дилшод Назаров 80 метру 71 сантиметр аст. Зимнан, ӯ ба ин натиҷа се сол пеш дар мусобиқаи байналмилалӣ дар шаҳри Ҳаллеи Олмон ноил шудааст. Бо ин натиҷа ӯ алъон дар байни 112 нафар беҳтарин гурзандозҳои ҷаҳон дар таърихи ин риштаи олимпии варзиш дар мақоми 72-юм қарор дорад.

Юрий Седих, узви дастаи мунтахаби Иттиҳоди Шӯравии собиқ, бо 86,74 метр дар мақоми аввал аст. Ин натиҷаро ӯ 30 августи соли 1986 дар Штутгарти Олмон ба даст овардааст.

Дар байни беҳтарин гурзандозҳои ҷаҳон, инчунин варзишгари машҳури тоҷик Андрей Абдувалиев, қаҳрамони Олимпиадаи соли 1992 дар Барселонаи Испания, бо натиҷаи 83,46 метр дар ҷойи дувоздаҳум қарор дорад. Ӯ ин натиҷаро 26 майи соли 1990 дар Сочи нишон додааст.

Андешаи Шумо

Намоиши шарҳҳо

Назари хонандагон

New Comments Available

Агар сухане, назаре ё хабаре доред, бемалол ба мо занг занед ё SMS (паёмак) фиристед:

Дар Душанбе:

+992 988 65 94 63
+992 988 65 94 64

Дар Прага:

+420 724 053 959

XS
SM
MD
LG