Дастаи "Истиқлол"-и Душанбе, қаҳрамони Тоҷикистон, дар дувумин бозиаш дар марҳилаи гурӯҳии Ҷоми AFC (Конфедератсияи футболи Осиё)-2017 дар гурӯҳи “D” имрӯз, 4 апрел, дар меҳмонӣ бо тими «Олтин Асир»-и Балканобод, қаҳрамони Туркманистон, рақобат мекунад. Ин бозӣ соати 17:00 шуруъ мешавад.
Мӯҳсин Муҳаммадиев, сармураббии дастаи «Истиқлол», дар як нишасти хабарӣ, ки пеш аз ин бозӣ 3 апрел дар Балканобод баргузор шуд, гуфтааст, ки ба бошгоҳи «Олтин Асир» эҳтиром дорад ва аз қуввати ин даста хуб огаҳ аст. Ба қавли ӯ, бозӣ хеле шавқовару пуршиддат хоҳад гузашт. “Мо танҳо як вазифа дорем – пирӯзӣ дар ҳар як бозӣ. Фикр мекунам, ки рақибамон ҳам чунин вазифа дорад. Умуман, ҳамаи дастаҳое, ки дар ин гурӯҳ ҷамъ омадаанд, як мақсад – бурд кардан ва роҳ ёфтан ба даврӣ баъдиро доранд”, - иброз доштааст Мӯҳсин Муҳаммадиев.
Дар бозии дигари гурӯҳи “D” имрӯз дастаи “Дордой”-и Бишкек, ҷоизадори нуқраи қаҳрамонии Қирғизистон, дар майдони худ бо «Олой»-и Ӯш, қаҳрамони ин кишвар, рӯбарӯ хоҳад шуд.
Ёдовар мешавем, дастаи "Истиқлол" дар нахустин бозиаш дар марҳилаи гурӯҳии Ҷоми AFC-2017 дар гурӯҳи “D” бар тими «Дордой» бо ҳисоби 2:0 пирӯз шуда буд. Дар ин бозӣ, ки 14-уми март дар Варзишгоҳи марказии Душанбе барпо гардид, ҳисобро ҳимоятгар Девид Мавутор, легионери африқоӣ аз Гана, дар дақиқаи 17-ум боз кард. Баъд аз панҷ дақиқа Ҷаҳонгир Алиев тӯби дувумро ба дарвозаи “Дордой” ворид намуд.
Ба ин тартиб, баъди натиҷагирии даври аввали мусобиқа дастаҳои “Истиқлол” ва “Олтин Асир” сеимтиёзӣ ба даст овардаанд. Вале тимҳои “Олой” ва “Дордой” имтиёз надоранд.
Ҷоми AFC-2017
Гурӯҳи "D". Минтақаи марказӣ
Даври 1-ум
14 март (сешанбе)
«Истиқлол» (Тоҷикистон) – “Дордой” (Қирғизистон) – 2:0
«Олой» (Қирғизистон) – «Олтин Асир» (Туркманистон) – 1:2
Даври 2-юм
4 апрел (сешанбе)
«Олтин Асир» (Туркманистон) – «Истиқлол» (Тоҷикистон)
“Дордой” (Қирғизистон) – «Олой» (Қирғизистон)
Даври 3-юм
18 апрел (сешанбе)
«Истиқлол» (Тоҷикистон) – «Олой» (Қирғизистон)
“Дордой” (Қирғизистон) – «Олтин Асир» (Туркманистон)
Даври 4-ум
3 май (чоршанбе)
«Олой» (Қирғизистон) – «Истиқлол» (Тоҷикистон)
«Олтин Асир» (Туркманистон) – “Дордой” (Қирғизистон)
Даври 5-ум
17 май (чоршанбе)
“Дордой” (Қирғизистон) – «Истиқлол» (Тоҷикистон)
«Олтин Асир» (Туркманистон) – «Олой» (Қирғизистон)
Даври 6-ум
31 май (чоршанбе)
«Истиқлол» (Тоҷикистон) – «Олтин Асир» (Туркманистон)
«Олой» (Қирғизистон) – “Дордой” (Қирғизистон)
