Дар натиҷаи сӯхтори ду мошини ҳомили бензин дар ноҳияи Ҷаббор Расулови вилояти Суғд 3 сокини маҳаллӣ ҷароҳатҳои вазнин бардоштаанд. Яке аз ин мошинҳо ба Қирғизистон тааллуқ доштааст.
Бино ба иттилои пулиси Суғд, ҳодиса рӯзи 10 июн дар ҳавлии сокини 32-солаи деҳаи Зарафшони ҷамоати Сомониёни ноҳияи мазкур рух додааст. “Дар мошини тамғааш “Ман”, бо рақами давлатии Қирғиғзистон ва як “Камаз”-и мансуб ба Тоҷикистон, ки 2 ҳазор литр бензин доштанд, сӯхтор сар задааст,” – гуфт манбаъ.
Сӯхтор масоҳати 100 метри мураббаъро фаро гирифта, 3 марди сокини ин маҳал ҷароҳатҳои мухталиф бардоштаанд. Ба гуфтаи манбаъ, ин афрод, ки аз 5 то 70 дарсади баданашон сӯхтааст, дар беморхонаи маҳаллӣ бистарианд.
Як гурӯҳи фаврию тафтишотии пулиси Суғд дар маҳалли ҳодиса ба маълум кардани сабаби сар задани сӯхтор ва зарарҳои воридшуда машғул аст.