Бюрои федеролии тафтишоти ИМА (FBI) тирандозӣ дар шаҳри Сан-Бернардинои аёлати Калифорнияро чун ҳамлаи террористӣ арзёбӣ мекунад. Дар ин бора ёвари раиси Бюрои федеролии тафтишот дар Лос-Анҷелес Дэвид Баудич рӯзи ҷумъа хабар дод.
Ба гуфтаи ӯ, яке аз ҳамлагарон – Ташфин Малик ба гурӯҳи “Давлати исломӣ” савганди вафодорӣ ёд карда буд. Дар ин бора ин хонум дар саҳифааш дар шабакаи иҷтимоии Facebook хабар дода буд. FBI ҳамчунин дар бораи тамоси телефонии Ташфин Малик бо шавҳараш Сайёд Форуқ қабл аз тирандозӣ иттилоъ дарёфт кард.
Ҳамла ба маркази кӯмаки иҷтимоӣ дар шаҳри Сан-Бернардино, ки рӯзи чаҳоршанбе, 2 декабр сурат гирифт ва дар он 14 нафар кушта ва беш аз 20 каси дигар маҷрӯҳ шуданд, пешакӣ ҳаматарафа тарҳрезӣ шуда буд, гуфт Дэвид Баудич. Ташфин Малик ва шавҳараш Сайёд Форуқ рӯзи 3 декабр дар тирандозӣ бо пулис кушта шуданд. Ташфин Малик шаҳрванди Покистон ва шавҳараш Форуқ – шаҳрванди Амрико буданд.
Ҳадс зада мешавад, ки зану шавҳар боз ба як ҳамлаи террористии дигар омодагӣ мегирифтанд. Ҳангоми кофтукоб аз манзили онҳо беш аз 3 ҳазор тир ва 12 бомби худсохт мусодира карда шуд.
Дар ҳамин ҳол манбаъҳои хабаргузории Reuters дар FBI гуфтанд, ки робитаи миёни ҳамлагарон ва гурӯҳи “Давлати исломӣ” ошкор нашудааст. Сайёд Форуқ ягон бор мавриди шубҳаи хадамоти махсуси ИМА қарор нагирифта буд.
