Пайвандҳои дастрасӣ

Хабари нав

Хабарҳо

Мурофиаи додгоҳии Исмоилова дар Боку оғоз шуд

Хадиҷа Исмоилова

Дар Боку мурофиаи додгоҳии Хадиҷа Исмоилова-рӯзноманигори муҳаққиқ оғоз шудааст. Толори додгоҳ 7 август пур аз фаъолони ҳуқуқи башару рӯзноманигорон буд ва баъзе аз намояндагони дипломатӣ натавонистанд вориди толор шаванд.

Мурофиаи ибтидоии Исмоилова 24 июл оғоз шуда буд. Вай ҳамаҷониба дар бораи ришвахории мақомоти расмии Озарбойҷон гузориш медод. Исмоиловаро барои аз худ кардани моли дигарон, саркашӣ аз пардохти андоз ва суистифода аз мақом муттаҳам медонанд.

Вале вай ин иттиҳомотро рад мекунад ва онҳоро дорои ангезаи сисёсӣ арзёбӣ мекунад. Фаъолони ҳуқуқи башар ва ҳукуматҳои кишварҳои Ғарбӣ борҳо боздошти вайро маҳкум кардаанд.

Ин мурофиа баъд аз 8 моҳи боздошти Исмоилова баргузор мешавад. Вай бо бахши озарии Радиои Озодӣ ҳамкорӣ дошт. Гурӯҳҳои ҳуқуқи башари байналмиллалӣ борҳо раҳоии вайро тақозо кардаанд.

29 июл Бошгоҳи мабуоти миллии Амрико Исмоиловаро барандаи ҷоизаи худ эълон кард.

Ҳамаи хабарҳои имрӯзро дар инҷо бихонед

Муовини пешини вазири умури дохилии Қирғизистон 2 моҳ ҳабс шуд

Курсан Асанов, муовини пешини вазири корҳои дохилии Қирғизистон.

Додгоҳе дар Қирғизистон муовини пешини вазири корҳои дохилии ин кишвар Курсан Асановро, ки рӯзи 14 сентябр дар доираи парвандаи ғасби қудрат боздошт шуда буд, ба муҳлати ду моҳ ҳабс кард. Ӯ дар боздоштгоҳи муваққатии вилояти Чуй нигаҳдорӣ мешавад.

Бино ба гуфтаи мақомоти қирғиз, Асанов гӯё барои ғасби қудрат дар он кишвар бо шахсони дигар "омодагии сахт" медид. Зидди вай бо банди "Ғасби хушунатомези ҳукумат" айб эълом карда шудааст.

Пеш аз боздошти Асанов сабти гутугӯи телефоние дар Интернет нашр шуд, ки гӯё дар он муовини пешини вазири умури дохилии Қирғизистон бо Алмос Сарибоев суҳбат мекунад. Худи Сарибоев, ки узви шӯрои мудирони бонки "Толубай" буд, ҳабс шудааст.

Вакилони дифои Асанов гуфтанд, ӯ гуноҳе надорад ва бар асоси иттилои дуруғ дастгир шудааст.

Путин "афсӯс хӯрд", ки натавонист дар саммити Душанбе иштирок кунад

Владимир Путин, раиси ҷумҳури Русия рӯзи панҷшанбеи 16-уми сентябр гуфт, бинобар гирифтории даҳҳо нафар аз атрофиёни наздикаш ба бемории КОВИД-19, карантини ӯ чандин рузи дигар идома хоҳад дошт.

Раиси ҷумҳури Русия рӯзи панҷшанбе ба таври маҷозӣ ё онлайнӣ дар нишасти Шӯрои сарони Созмони паймони амнияти дастаҷамъӣ, ки дар Душанбе баргузор шуд, суханронӣ кард. Оқои Путин гуфт, "орзу доштам ҳамон тавр, ки аз қабл барномарезӣ шуда буд, шахсан дар нишаст иштирок кунам ва дасти шуморо бифишорам".

Раиси ҷумҳури Русия афзуд, "ҳамон тавр ки медонед, мутаассифона маҷбур шудам дар охирин лаҳза сафар ба Душанберо лағв кунам ва аз ин ҷиҳат афсус мехурам. Сабаби лағви сафар ин аст, ки на фақат як ё ду нафар, балки даҳҳо нафар аз атрофиёни наздики ман ба КОВИД-19 гирифтор шудаанд. Бо ин сабаб бояд чандин рузи дигар дар карантин бимонам".

Қабл аз ин суханони Путин дар рузи панҷшанбе, ҷузъиёти гирифтории кормандони Кохи Кремл ва муддати карантини раиси ҷумҳури Русия мушаххас нашуда буд.

Номҳо ва мақоми афроде, ки ба коронавирус гирифтор шудаанд, эълон нашудааст. Дмитрий Песков, сухангӯи раёсати ҷумҳури Русия рузи чаҳоршанбе гуфт, "ҳоли Владимир Путин хуб аст ва натиҷаи озмоиши КОВИД-19-и ӯ манфӣ будааст".

Дар ҷаласаи Шӯрои сарони СПАД, ки рузи 16-уми сентябр дар шаҳри Душанбе баргузор шуд, президентҳо Тоҷикистон, Белорус, Қирғизистон, Қазоқистон, нахуствазири Арманистон ҳузурӣ ва Владимир Путин онлайнӣ суҳбат карданд.

Созмони Паймони Амнияти Дастҷамъиро соли 1992 таъсис доданд ва феълан Арманистон, Беларус, Русия, Тоҷикистон, Қазоқистон ва Қирғизистон узви онанд. СПАД бо ҳадафи "тақвияти сулҳ, амнияту устуворӣ дар минтақа ва ҷаҳон, ҳифзи дастаҷамъии истиқлол, ягонагии марзӣ ва тамомияти арзии кишварҳои узв таъсис шудааст", вале онро як созмони зери нуфузи Русия меноманд.

Сарфи назар аз қарори додгоҳ, Путин ба Олимпиадаи Пекин меравад

Владимир Путин, президенти Русия даъвати Чинро ҷиҳати сафар ба Олимпиадаи зимистонии 2022 дар Пекин пазируфт. Дар ин бора вазири корҳои хориҷии Русия Сергей Лавров хабар дод. Ба гуфтаи Лавров, Путинро ҳамтои чиниаш Си Ҷинпин дар гуфтугӯи ахири телефонӣ ба бозиҳо даъват кардааст.

Моҳи декабри соли 2020 Додгоҳи ҳакамии варзишӣ (CAS) роҳбарияти Русия, аз ҷумла президентро аз иштирок дар Олимпиадаҳо ва мусобиқаҳои ҷаҳонӣ дар ду соли оянда манъ карда буд. Ин қарори додгоҳ ба ҷанҷоли истеъмоли доруҳои нируафзо ё допинг аз сӯи варзишкорони Русия марбут аст. Додгоҳ гуфт, мақомоти Русия дар тақаллуби натиҷаи ташхисҳои варзишкорони рус даст доштанд. Даъвати роҳбарони давлатҳо аз сӯи мизбони бозиҳо, бино ба қарори додгоҳ, истисно ба ҳисоб меравад.

Ба ҷуз ин, додгоҳи ҳакамии варзишӣ қарор қабул кардааст, ки варзишкорони Русия ду соли оянда иҷоза надоранд, ки дар мусобиқаҳои байналхалқӣ бо парчами миллии худ ширкат кунанд. Суруди миллии Русия низ, бино ба қарори додгоҳ, дар мусобиқаҳо садо нахоҳад дод.

Ҷанҷоли истеъмоли допинг дар варзиши Русия чанд сол аст, ки идома дорад. Мақомоти Русия мавҷудияти барномаи допингро дар сатҳи ҳукумат рад мекунанд.

Акбаршоҳ Искандаров хост, ба дигар шудани "Толибон" бовар накунанд

Акбаршоҳ Искандаров

Раиси собиқи Шӯрои олии Тоҷикистон аз сарони кишварҳои узви Созмони Паймони Амнияти Дастҷамъӣ ва Созмони Ҳамкориҳои Шонгҳой хостааст, ки аз мавқеи Душанбе дар қазияи Афғонистон пуштибонӣ кунанд.

Акбаршоҳ Искандаров рӯзи 16-уми сентябр дар номае ба онҳо гуфтааст, "баъзеҳо муътақиданд, ки "Толибон" дигар шудаанд. Имкон надорад, ки зеҳн ва мафкураи як гурӯҳи террористие, ки тайи даҳсолаҳо шакл гирифтааст ва пешаи он фақат куштор ва даҳшатафканӣ мебошад, якбора дигар шавад."

Гуруҳи "Толибон" пас аз бист соли сарнагунии ҳокимияташ моҳи август дигарбора назорат бар Афғонистонро ба даст гирифт. То кунун ҳеч кишвар ҳукумати "Толибон"-ро, ки "аморати исломӣ" меномад, эътироф накардааст, аммо баъзе аз давлатҳо аз ташкили ҳукумати муваққат дар Афғонистон истиқбол карданд.

Содир Ҷабборов, раиси ҷумҳурии Қирғизистон, рӯзи 16-уми сентябр дар нишасти Душанбе барои ҳарчи зуд ба эътидол овардани вазъ дар Афғонистон ба зарурати гуфтугӯ бо намояндагони ҳукумати нав дар ин кишвар таъкид кард.

Акбаршоҳ Искандаров мегӯяд, "агар имрӯз наззорагари шикастан ва ба хун нишастани муқовимати мардуми Афғонистон бошем, мутмаин бошед, фардо ин вабо, яъне таҳдиди истибдоди мазҳабӣ ва қавмӣ ба минтақаи мову Шумо ҳам густариш ёфта, домани моро ҳам хоҳад гирифт."

"Мутмаин бошед, ки дер ё зуд ба пайкори сирф террористии ин созмон қоил хоҳед шуд. Музокира кардан бо онҳо ин хати батлон кашидан ба шараф ва ҳайсияти инсонӣ аст. Хоҳиш мекунем, нагузоред, ки ин хатари эҳтимолӣ ба хавфи воқеӣ табдил ёбад", -- афзуд ӯ.

Ҷаласаи якҷояи сарони кишварҳои узви Созмони Паймони Амнияти Дастҷамъӣ ва Созмони Ҳамкориҳои Шонгҳой, ки яке зери нуфузи Русия ва дувумӣ зери чатри Чин аст, рӯзи 17-уми сентябр дар Душанбе баргузор хоҳад шуд. Яке аз мавзуъҳои асосии он қазияи Афғонистон аст.

Як табиби тоҷикро барои ба артиш фиристодани ҷавони бемор ҷарима бастанд

Акс аз бойгонӣ

Додгоҳи низомии шаҳри Душанбе як табиби тоҷикро барои ба артиш фиристодани ҷавони бемор ҷарима бастааст.

Додгоҳ рӯзи 14-уми сентябр бо нашри баёнияи расмӣ гуфт, Рустам Умбатов моҳи апрели соли 2020 Парвиз Ҷалиловро, ки “сутунмуҳрааш бемор буд”, ҳамчун “фарди солим ва муносиб ба хидмати ҳарбӣ” тавсия додааст.

“Бо вуҷуди пойфишории ҷавон ба бемориаш, табиб ба гуфтаҳои ӯ эътибор надодааст. Дар натиҷа бемории ҷавон ҳангоми хидмат дар як воҳиди низомии Вазорати дифоъ авҷ гирифтааст”, -- омадааст дар хабари Додгоҳи ҳарбии пойтахт.

Миқдори ҷарима ва рӯзи судури ҳукмро нагуфтаанд. Назари табиб ҳам дастрас нест.

Дар Тоҷикистон борҳо шудааст, ки ҷавонони бемору маъюбро ба сафи нерӯҳои мусаллаҳ фиристодаанд ва баъзе аз онҳо ҳангоми хидмат фавтидаанд. Мақомот вуҷуди ин мушкилро инкор намекунанд, аммо мегӯянд, саросарӣ нест.

Сарони СПАД розӣ шудаанд, ки ба кишварҳои хориҷ аз созмон нерӯ фиристанд

Нишасти сарони кишварҳои узви СПАД (ОДКБ) дар Душанбе, 16-уми сентябри 2021

Созмони Паймони Амнияти Дастҷамъӣ ё ОДКБ бо дарназардошти таҳавуллоти охир дар Афғонистон заминаи ҳуқуқии ширкати нерӯҳои посдори сулҳашро дар кишварҳои берун аз созмон тасвиб кард. Нишасти сарони кишварҳои узв 16-уми сентябр дар Душанбе баргузор шуд.

Таҳлилгари тоҷик Рашид Ғанӣ Абдулло аз ин тасмим истиқбол кард, аммо ҳамзамон гуфт, гумон аст, ки бозигарони аслии қазияи Афғонистон имкон диҳанд, нерӯҳои посдори сулҳ барои таъмини субот дар он кишвар мусоидат кунанд.

"Толибон" эълон карданд, ки Чин шарики стратегии Афғонистон мешавад. Чин дар Афғонистон ба чанд кони фулузоти нодир таваҷҷуҳ дорад. СПАД аз нерӯи бузурге бархурдор нест, ки тавонад бо абарқудратҳо мубориза барад”, -- афзуд Ғанӣ Абдулло.

Набӣ Юсуфӣ, коршинос ва муассиси сомонаи таҳлилии “Нуқта.Тҷ” ин суолро гузошт, ки хароҷоти интиқоли нерӯҳои посдори сулҳи СПАД аз кадом ҳисоб мешавад? Зеро, ба гуфтаи вай, фиристодани ин миқдор нерӯ ва лавозимоти ҷангӣ бо пули андак имконпазир нест.

Ӯ афзуд: “Суоли дигар ин аст, ки нерӯҳои посдори сулҳ киро дар Афғонистон ба сулҳ водор мекунанд? Афғонистон кишвари бузург ва ҳатто сафи “Толибон” аз гурӯҳҳои гуногун ва ба ҳам зид иборат аст. Афғонистон Қаробоғи Кӯҳӣ нест, ки ба он ҷо як баталйон низомиҳоро фиристода, сулҳро пойдор созед. Афғонҳо худ аз нерӯҳои аҷнабӣ хаста шуда, хостори он ҳастанд, ки ҳеч нерӯи ғайр ба кишвари онҳо ворид нашавад.”

Созмони Паймони Амнияти Дастҷамъиро соли 1992 таъсис доданд ва феълан Қирғизистону Қазоқистон, Русия, Тоҷикистон, Арманистон ва Беларус узви созмон ҳастанд.

Марги як хонандаи мактаб пас аз пахтачинӣ дар Зафаробод

Меҳронаи Фурӯзон. Аксро наздиконаш дар ихтиёри Радиои Озодӣ гузаштанд

Як хонандаи мактаб ҳангоми ширкат дар маъракаи пахтачинӣ дар ноҳияи Зафарободи вилояти Суғд ба ҳалокат расидааст.

Наздикони ӯ 16-уми сентябр ба Радиои Озодӣ гуфтанд, ки Меҳронаи Фурӯзон "ҳангоми бозгашт аз пахтачинӣ аз бордон (тележка)-и трактор афтода, ҷон бохт".

Ҳодиса шоми 14-уми сентябр дар ҳоле рух додааст, ки он рӯз Меҳронаи 15-сола ҳамроҳ бо гуруҳе аз хонандагони мактаби рақами дуи ноҳияи Зафаробод "бо хоҳиши кормандони милиса ва ризоияти омӯзгорон" барои пахтачинӣ ба заминҳои назди шаҳраки Меҳнатободи Зафаробод бурда шудаанд.

Хешовандони Меҳрона марги ӯро "натиҷаи беаҳамиятии омӯзгороне" номиданд, ки низ мактабиёнро ҳамроҳӣ мекардаанд.

Маъмурияти мактаби рақами 2-и ноҳияи Зафаробод ба суоли Радиои Озодӣ дар ин робита посух надод. Маълум нест, зимни чӣ муқаррароте ба пахтачинии мактабиён иҷоза додааст.

Баъзе аз манбаъҳо гуфтанд, заминҳое, ки дар он хонандагони мактаб пахта ҷамъоварӣ карданд, ба яке аз мансабдорони баландпояи мақомоти қудратӣ тааллуқ доштаанд. Вале касе омода нашуд, номи ин мансабдорро зикр кунад.

Мавсими ҷамъоварии пахта, яке аз маҳсулоти асосии содиротии Тоҷикистон, охири моҳи август сар шуда, то охири моҳи ноябр идома мекунад.

Дар гузашта мақомот дар ин кор аз нерӯи хонандагони мактаб ва донишҷӯён фаровон истифода мекарданд. Чанд сол пеш барои халал нарасондан ба ҷараёни таълим ва пешгирӣ аз меҳнати кӯдакон ин кор манъ шуд. Бо ин вуҷуд, хонандагонро зери номи ҳашар ё кумак ба кишоварзон ба саҳрои пахта мебаранд.

WADA мехоҳад мариҳуанаро аз рӯйхати доруҳои мамнуъ хориҷ кунад

Оҷонси ҷаҳонии зиддидопингӣ (WADA) имкони хориҷ кардани мариҳуанаро аз рӯйхати доруҳои мамнуъ баррасӣ хоҳад кард. Дар ин бора france24.com хабар медиҳад.

Тадқиқоти илмии ин масъала соли оянда гузаронида мешавад. Возеҳ аст, ки истифодаи мариҳуана ҳатман то охири соли 2022 манъ карда мешавад.

Ин созмон дар ин бора пас аз маҳрум шудани варзишгари амрикоӣ Шаъкарри Ричардсон аз ҳаққи ширкат дар мусобиқот фикр кардааст. Ташхиси давандаи 21-сола барои истеъмоли каннабис натиҷаи мусбат додааст.

Ин варзишгари амрикоӣ як моҳ аз сабқат маҳрум шуд ва натавонист дар Олимпиадаи Токио ширкат кунад. Он замон бархе аз мутахассисон ва варзишгарон манъ кардани ин маводро кӯҳна ва бефоида меҳисобиданд. Худи Ричардсон изҳор дошт, ки вай бинобар ҳолати вазнини равонӣ пас аз марги модараш мариҳуанаро истифода кардааст.

Мариҳуана номи расмии каннабис як доруи равонӣ аст, ки аз бангдона гирифта мешавад. Он ба бадани инсон бо моддаҳои равонии дар бангдона мавҷудбуда – каннабиноидҳо, дельта-9-тетрагидроканнабинол - таъсир мерасонад. Мутахассисон бангдонаро ба се намуди асосӣ ҷудо мекунанд: бангдонаи тухмӣ, бангдонаи ҳиндӣ ва бангдонаи алафҳои бегона.

Даъвати Ҷабборов ба "амал дар ҳолати ҳамлаи мусаллаҳонаи кишварҳои узви СПАД"

16-уми сентябр, Душанбе. Раҳбарони кишварҳои узви СПАД

Президенти Қирғизистон Содир Ҷабборов зимни суханрониаш дар ҷаласаи сарони кишварҳои узви Созмони паймони амнияти дастаҷамъӣ зарурати “коркарди механизми амал дар ҳолати ҳамлаи мусаллаҳонаи як кишвари узви ин созмон ба дигараш”-ро пешниҳод кардааст. Дафтари матбуоти президенти Қирғизистн 16-уми сентябр гуфт, Ҷабборов дар суханрониаш дар Душанбе аз низои ахири марзии миёни Тоҷикистон ва Қирғизистон дар охири моҳи апрел ёдовар шуда гуфтааст, ки “вазъи марзи давлатӣ пуртаниш боқӣ мемонад ва таваҷҷӯҳи аъзои дигари ин созмонро тақозо мекунад”. Айни замон ӯ гуфтааст, ки Қирғизистон “ҳамеша ҷонибдори ҳалли дипломатии баҳсҳо бо кишварҳои ҳамсоя мебошад”.

Маълум нест оё ба ин ҳарфҳои Ҷабборов вокунише аз ҷониби Тоҷикистон ваё раҳбарияти СПАДу дигар аъзои ин созмон садо додааст ё на. Дар ҷаласаи сарони ин созмон дар Душанбе раҳбарони Беларус, Қазоқистон, Тоҷикистон, Арманистон - Алксандр Лукашенко, Қосимҷомарт Тоқаев, Эмомалӣ Раҳмон, Никол Пашинян ҳузур доранд ва президенти Русия Владимир Путин тавассути онлайн иштирок намуд.

Дар низои ахири мусаллаҳонаи марзии миёни Тоҷикистону Қирғизистон аз ҳарду тараф даҳҳо нафар куштаву захмӣ шуданд, даҳҳо манзили сокинони рустоҳои марзӣ аз ду ҷониб хароб ё пурра нобуд шуданд. Аз моҳи май бо қарори Қирғизистон сарҳад бо Тоҷикистон баста мебошад. Баъди ин низоъ аксар аъзои кишварҳои узв ҳама вокуниш карда, ҳама гуна низоъҳои мусаллаҳона дар марзро маҳкум ва кишварҳоро ба муколамаву ҳалли мусолиҳатомези баҳсҳо даъват карда буданд.

Хабарнигорон аҳамият доданд, ки ба фарқ аз дигар раҳбарони кишварҳои меҳмони Тоҷикистон, рӯзи панҷшанбе мулоқоти ҷудогонаи президентон Эмомалӣ Раҳмон ва Содир Ҷабборов ҳанӯз баргузор нашудааст.

Қаблан мақомоти ҳарду ҷониб гуфтанд, ки кори комиссияҳои байни давлатии аломатгузории марз идома дорад.

Имрон Хон, нахуствазири Покистон ба Душанбе омад

Имрон Хон. Акс аз моҳи июни 2021

Имрон Хон, нахуствазири Покистон, рӯзи 16-уми сентябр ба шаҳри Душанбе омад. Ба гуфтаи мақомот, ӯ 17-уми сентябр дар ҷаласаи сарони кишварҳои узви Созмони Ҳамкориҳои Шонгҳой иштирок мекунад. Мулоқоти ҷудогонааш бо раиси ҷумҳури Тоҷикистон Эмомалӣ Раҳмон низ дар назар аст. Манобеи Радиои Озодӣ қаблан гуфта буданд, мавзӯи калидии гуфтугӯҳои Раҳмон бо нахуствазири Покистон ва вазири корҳои хориҷии он кишвар Шоҳ Маҳмуд Қурайшӣ вазъи Афғонистон ва ба сари кор омадани гурӯҳи усулгарои исломии "Толибон" хоҳад буд. Дар ҳоле ки Покистонро пуштибони ин гурӯҳ меноманд, Тоҷикистон гуфтааст, ҳукуматеро эътироф хоҳад кард, ки тоҷикон дар он ҷойгоҳи шоиста дошта бошанд. Дар сафари раҳбарони Покистон ба Тоҷикистон имзои як баста санадҳои ҳамкорӣ дар назар аст. Инчунин, бояд ҷаласаи чоруми Шӯрои кории Тоҷикистону Покистон барпо шавад.

СПАД дар марзи Тоҷикистон бо Афғонистон машқи васеи низомӣ мегузаронад

Станислав Зас, раиси Созмони паймони амнияти дастаҷамъӣ (СПАД) рӯзи 16-уми сентябр дар поёни ҷаласаи Шӯрои сарони кишварҳои узви ин созмон гуфт, яке аз пурсишҳои асосӣ, ки имруз раҳбарони кишварҳо баррасӣ карданд, вазъияти Афғонистон буд, ки баъди хуруҷи неруҳои ИМА вазъият дар онҷо якбора тағйир ёфт.

Ҷаласаи сарони кишварҳои узви Созмони паймони амнияти дастаҷамъӣ бо ҳузури президентҳои Тоҷикистон, Белорус, Қазоқистон, Қирғизистон, нахуствазири Арманистон ва вазири корҳои хориҷии Русия дар Душанбе баргузор шуд.

"Омадани якбораи ҳаракати Толибон ва якбора зери назорат гирифтани тамоми хоки Афғонистон, аз ҷумла шаҳри Кобул ва минтақаҳои марзӣ, инчунин тағйири қудрат дар он кишвар, нигаронии ҷиддии моро ба миён овардааст",-афзуд Станислав Зас.

Ба гуфтаи оқои Зас, кишварҳои СПАД вазъияти тағйирёбанда дар марзи Тоҷикистону Афғонистонро ҷиддӣ пайгирӣ доранд ва мақсади асосии созмон ҳамчунон таъмини амният ва бехатарӣ дар кишварҳои узв аст. "Ҳамзамон мо дар фаъолияти худ чун пештара ба роҳи ҳалли сиёсӣ-дипломатӣ бартарӣ медиҳем",-гуфт ӯ.

Раиси СПАД ҳамзамон афзуд, ки ҳама кишварҳои узв ба созиш расиданд, ки як моҳ пас дар марзи Тоҷикистон бо Афғонистон машқи муштараки низомӣ баргузор мекунанд.

Раҳбарии давраии ин созмони зери нуфузи Русия барои як сол ба Арманистон гузашт. Никола Пашинян, нахуствазири Арманистон дар ин ҳамоиш гуфт, ки кишварҳои СПАД ба тавсеаи нерӯҳои худ бо фановариҳои навин, аз ҷумла дронҳо ниёз дорад.

Қарор аст фардо раҳбарони СПАД ва Созмони ҳамкориҳои Шанхай дар як ҷаласаи муштарак вазъи Афғонистонро баррасӣ кунанд.

Созмони Паймони Амнияти Дастҷамъиро соли 1992 таъсис доданд ва феълан Арманистон, Беларус, Русия, Тоҷикистон, Қазоқистон ва Қирғизистон узви онанд. СПАД бо ҳадафи "тақвияти сулҳ, амнияту устуворӣ дар минтақа ва ҷаҳон, ҳифзи дастаҷамъии истиқлол, ягонагии марзӣ ва тамомияти арзии кишварҳои узв таъсис шудааст", вале онро як созмони зери нуфузи Русия меноманд.

Президенти Қирғизистон дар бораи муколама бо "Толибон" гуфт

Содир Ҷабборов (Содир Жапаров)

Содир Ҷабборов (Содир Жапаров), раиси ҷумҳурии Қирғизистон, барои ҳарчи зуд ба эътидол овардани вазъ дар Афғонистон ба зарурати гуфтугӯ бо намояндагони ҳукумати нав дар ин кишвар таъкид кард.

Гуруҳи "Толибон" пас аз бист соли сарнагунии ҳокимияташ моҳи август дигарбора назорат бар Афғонистонро ба даст гирифт. То кунун ҳеч кишвар ҳукумати "Толибон"-ро, ки "аморати исломӣ" меномад, эътироф накардааст.

Ҷабборов рӯзи 16-уми сентябр дар нишасти сарони кишварҳои узви Созмони Паймони Амнияти Дастҷамъӣ дар Душанбе гуфт: "Мо барои ҳарчи зуд ба эътидол омадани вазъ дар Афғонистон ва ташкили ҳукумати нави фарогир, ки ба ҳама мардуми ин кишвар қобили қабул бошад, умед дорем."

Ӯ ҳамзамон ба пойбандии Қирғизистон ба муносибатҳои дӯстона бо Афғонистон ва дахолат накардан ба корҳои дохилии он таъкид кард, аммо гуфт, "ташкили давлати динӣ дар минтақаи мо бешак ба вазъи кишварҳои узви СПАД таъсир мерасонад".

Нишасти Созмони Паймони Амнияти Дастҷамъӣ ё ОДКБ дар шароите баргузор мешавад, ки баъди ба қудрат расидани “Толибон” дар Афғонистон нигарониҳо аз ин кишвар бештар шудааст.

Созмони Паймони Амнияти Дастҷамъиро соли 1992 таъсис доданд ва феълан Арманистон, Беларус, Русия, Тоҷикистон, Қазоқистон ва Қирғизистон узви онанд. СПАД бо ҳадафи "тақвияти сулҳ, амнияту устуворӣ дар минтақа ва ҷаҳон, ҳифзи дастаҷамъии истиқлол, ягонагии марзӣ ва тамомияти арзии кишварҳои узв таъсис шудааст", вале онро як созмони зери нуфузи Русия меноманд.

Парлумони Қазоқистон қонуни кӯмакҳои низомӣ ба Тоҷикистонро баррасӣ мекунад

Парлумони Қазоқистон

Дар ҳоле ки раиси ҷумҳурии Қазоқистон Қосимҷомарт Тоқаев бо ҳадафи ширкат дар ҷаласаҳои сарони СПАД ва СҲШ дар Душанбе қарор дорад ва дирӯз бо президенти Тоҷикистон Эмомалӣ Раҳмон оиди ҳамкориҳои дуҷониба ва вазъияти сиёсию низомии Афғонистон сӯҳбат кардаанд, парлумони Қазоқистон тарҳи қонуни кӯмаки низомӣ ба Тоҷикистонро баррасӣ мекунад.

Лоиҳаи қонун дар бораи интиқоли ройгони силоҳ аз ин кишвар ба Тоҷикистон ба парлумон пешниҳод шудааст. Дар ин бора раиси Кумитаи умури байналмилалӣ ва дифои порлумони Қазоқистон хабар дод. Созишномаи мазкур моҳи июли имсол дар шаҳри Нурсултон ба имзо расидааст.

Вазорати дифои Қазоқистон гуфт, ки кӯмакҳои низомиаш ба Тоҷикистон, ки бо ин кишвар аъзои СПАД мебошанд, ба хотири мусоидат дар тақвияти марзи Тоҷикистон ва Афғонистон карда мешавад. Бино ба иттилои расмӣ, тобистони имсол Қазоқистон дар чаҳорчӯби кӯмаки якдафъаина ба Тоҷикистон захираҳои тиру хумпора додааст.

Мулло Бародар дар видео захмӣ шуданашро рад кард

Дар видео гуфта шуд, ки Абдулғанӣ Бародар дар Қандаҳор суҳбат мекард

Иҷрокунандаи вазифаи муовини нахуствазири "Толибон", Абдулғанӣ Бародар, дар як навори видеоӣ пайдо шуд ва овозаҳоро дар бораи кушта ё захмӣ шуданаш дар кадом моҷарое рад кард.

Ӯ дар суҳбат бо телевизиони миллии Афғонистон, ки рӯзи 15-уми сентябр дар Твиттер нашр шуд, гуфт: “Ин ҳақиқат надорад, ман хуб ва саломат ҳастам”.

Дар навори мухтасари видеоӣ Бародар овозаҳоро дар бораи ин ки сари ташкили ҳукумати нав дар Кобул бо гурӯҳҳои шӯришии дигар ихтилофе бархоста, боис ба хушунат шудааст, рад кард. Ӯ гуфт, "матбуот дар бораи вуҷуди ихтилофҳои дохилӣ навиштааст, вале ин ҳақиқат надорад."

Изҳорот дар ҳоле нашр шуд, ки чанд рӯз пеш овозаҳое паҳн шуд, ки дар натиҷаи як даъво барои тақсими вазифаҳо миёни ҷонибдорони Мулло Бародар ва шабакаи Ҳаққонӣ тирандозӣ рух дода, гуё ӯ захмӣ ё кушта шудааст.

Рӯзи 15-уми сентябр Анас Ҳаққонӣ, бародари хурдии иҷрокунандаи вазифаи вазири корҳои дохилии “Толибон” Сироҷиддин Ҳаққонӣ бо нашри изҳороте вуҷуди ихтилофҳоро дар миёни ин ду гурӯҳ рад кард.

Сенатори амрикоӣ талош дорад ба Солеҳ ва Масъуд кумак кунад

Сенатори амрикоӣ Линдсӣ Греҳем

Як сенатори амрикоӣ талош дорад, Вашингтонро ба ҳимоят аз Ҷабҳаи муқовимати миллии Афғонистон таҳти сарварии ноиб-президенти барканоршудаи ин кишвар Амруллоҳ Солеҳ ва фармондеҳ Аҳмад Масъуд ҷалб намояд. Ҷумҳурихоҳ Линдсӣ Греҳем ба нашрияи Politico гуфтааст, мехоҳад, садои мухолифони “Толибон” дар берун шунида ва аз онҳо ҳимоят шавад. Ин дар ҳолест, ки пас аз ишғол шудани дараи Панҷшер аз тарафи “Толибон” дар аввалҳои ин моҳ аз ду раҳбари ҷабҳаи муқовимат садое шунида намешавад. Ҳамчунин талошҳои ин сенатори амрикоӣ, ки гуфта мешавад, тарафдории чеҳраҳои бонуфузи Ҳизби ҷумҳурихоҳро ҷалб кардааст, дар ҳоле ҷараён доранд, ки ҳукумати президент Ҷо Байден майле ба мудохила дар вазъи афғонистон нишон намдиҳад ва ҳадафаш низ берун кашидани пойи ИМА аз буҳрони кишвар будааст. Вале Линдсӣ Греҳем бар ин аст, ки Афғонистон даргири як ҷанги шаҳрвандӣ мешавад ва вазъи оянда вокуниши Амрикоро тақозо хоҳад кард. Сенатор Линдсӣ Греҳем бо баёнияҳои ситезаҷӯёна ва баҳсбарангезаш дар мавриди Сурия ва Эрон маъруф мебошад.

Макрон: нирӯҳои фаронсавӣ раҳбари ДОИШ дар Саҳрои Кабирро нобуд карданд

Президенти Фаронса Эммануэл Макрон

Президенти Фаронса Эммануэл Макрон гуфт, ки низомиёни кишвараш раҳбари гурӯҳи “Давлати исломӣ” дар Саҳрои Кабирро нобуд карданд. Макрон дар як изҳороти Твиттериаш рӯзи 16-уми сентябр навишт, Аднон Абу Валид Ас-Саҳравӣ “аз ҷониби нирӯҳои фаронсавӣ безарар карда шуд”. Ӯ гуфт, “ин як муваффақияти калони дигари мо дар муқобила бо гурӯҳҳои террористӣ дар Соҳил аст”.

Ҳанӯз ҷузъиёти тарзи кушта шудани Саҳравӣ нашр намешавад. Фаъолияти гурӯҳи “Давлати исломӣ” дар Саҳрои Кабир бештар дар қаламравҳои кишварҳои мустамликаи собиқи фаронсавии Буркина Фасо, Малӣ ва Нигер мушоҳида мешавад. Ҷангиён бештар нирӯҳои амниятӣ ва афроди мулкиро ҳадаф қарор медиҳанд.

Ас-Саҳравӣ иддао кардааст, ки соли 2017 чор ходими низомии амрикоӣ ва чор намояндаи артиши Нигерро куштааст. Августи соли 2020 Саҳравӣ шахсан амр дода буд, ки шаш корманди як созмони хайрияи фаронсавӣ ва ҳам ронандаи онҳо – шаҳрванди Нигер ба қатл расонида шаванд.

Фаронса дар ҷабҳаи пеши амалиёти зиддитеррористии минтақаи Соҳил қарор дошта, аз соли 2012 панҷ ҳазор низомиаш дар Малӣ барои муқобила бо ҷангиёни исломӣ кӯмак мекунанд. Каме пештар Фаронса эълон кард, ки шумори нирӯҳояшро дар солҳои наздик дар ин қаламрав 2,5 то 3 ҳазор нафар коҳиш медиҳад.

Созиши нави амниятии ИМА, Бритониё ва Австралия Чинро асабонӣ кард

Сӯҳбати президенти ИМА Ҷо Байден ва нахуствазирони Бритониёву Австралия - Борис Ҷонсон ва Скотт Моррисон аз Кохи Сафед, 15-уми сентябр.

ИМА, Бритониё ва Австралия дар бораи як созиши нави ҳамкории амниятӣ дар қораи Ҳинду Уқёнусия хабар доданд, ки мавриди интиқоди Чин қарор гирифт. Президенти ИМА Ҷо Байден, нахуствазирони Бритониё ва Австралия - Борис Ҷонсон ва Скотт Моррисон рӯзи 15-уми сентябр дар бораи созиши нав хабар доданд, ки номи AUKUS-ро гирифтааст. Дар доираи ин ҳамкориҳо табодули дифоии бештари байниҳамдигарӣ, аз ҷумла, кӯмак ба мусаллаҳсозии Австралия бо киштиҳои зериобии ҳастаӣ пешбинӣ шудааст.

Дигар бахшҳои ҳамкорӣ марбут ба маводи иктишофии маҷозӣ, интернетӣ ва зериобӣ мебошад. Ҳарсе кишвар таъкид карданд, ки Австралия фанновариҳои ҳастаиро барои киштиҳои зериобӣ ба даст оварда, вале аз паи пешбурди барномаи силоҳҳои ҳастаӣ нахоҳад буд. Ҳеҷ як кишваре, ки дар бораи шурӯи чунин як барнома хабар дод, исми Чинро ба забон наовард. Вале ба эҳтимоли ғолиб, мушорикати нави се кишвар дар Пекин ба ҳайси як иқдоми таҳрикомез арзёбӣ шудааст, чун равобити ҳарсе кишвар сари мушкилоти ҳуқуқи башар, тиҷорат ва мақоми Ҳонгконг бо Чин пуртаниш мебошад. Дар изҳороте, ки сафорати Чин дар Вашингтон нашр кард, омадааст, ки кишварҳо “набояд ташкилоте таъсис диҳанд, ки бар зарари ҷониби сеюм равона шудааст”. Дар идома омадааст, “бахусус, онҳо бояд аз тафаккури даврони Ҷанги Сард ва ҳам пешдоварии идеологӣ даст бикашанд”.

Таҳаввулоти ахир боз ба ин маъност, ки созиши 40 миллиарддолларӣ барои сохтмони киштиҳои нави зериобие, ки Австралия бо Фаронса имзо кардааст, бекор мешавад.

Путин гуфтааст, чанд рӯзи дигар маҷбур аст дар карантин монад

Президенти Русия Владимир Путин аз қароргоҳаш дар Ново-Огарёво дар ҷаласаи сарони СПАД иштирок мекунад. 16-уми сентябр, Маскав

Президенти Русия Владимир Путин, ки ба ҷаласаи сарони Созмони Паймони амнияти дастаҷамъӣ аз қароргоҳаш дар Ново-Огаревои Маскав фосилавӣ пайваст, гуфт, ки чанд рӯзи наздик бояд карантин ё режими фосилагирии иҷтимоиро риоя кунад. Ӯ дар оғози ҷаласа, ки субҳи 16-уми сентябр дар шаҳри Душанбе шурӯъ шуд, барои ҳузур надоштанаш дар Тоҷикистон узрхоҳӣ кард. ТАСС менависад, Путин гуфтааст, ки дар миёни шахсони атрофаш ҳолатҳои олудашавӣ ба коронавирус ба қайд гирифта шудаанд. Ӯ афзуд: “Як не, ду не, даҳҳо нафар ба коронавирус гирифтор шудаанд”.

Дар Тоҷикистон, ки соли 2021 раҳбарии давраии СПАД ва Созмони ҳамкориҳои Шонгҳойро ба ӯҳда дорад, аз моҳҳо пеш ба баргузории ҷаласаи сарони кишварҳои узв омодагӣ медиданд ва раҳбари Русия ҳам қарор буд ба Душанбе сафар кунад. Раҳбари Чин Сӣ Ҷинпин қаблан гуфт, ки дар ҷаласаи раҳбарон фосилавӣ иштирок мекунад.

Эмомалӣ Раҳмон дар мулоқот бо Ван И: "Нисбат ба сарнавишти Афғонистони ҳамсоя бетараф буда наметавонем"

Тоҷикистон бори дигар аз вазъи сиёсӣ ва низомӣ дар Афғонистон нигаронӣ кардааст. Эмомалӣ Раҳмон, раиси ҷумҳури Тоҷикистон гуфтааст, ки кишвараш нисбат ба сарнавишти Афғонистони ҳамсоя бетараф буда наметавонад.

Ин матлабро оқои Раҳмон рӯзи 16-уми сентябр дар мулоқот бо Вин И, вазири умури хориҷии Чин баён кардааст. Вазири умури хориҷии Чин дар ҳоли ҳозир ҷиҳати ширкат дар нишасти Шӯрои сарони кишварҳои аъзои Созмони ҳамкориҳои Шанхай, дар Душанбе ҳузур дорад.

Раиси ҷумҳури Тоҷикистон ҳамзамон таъкид кардааст, ки кишвараш хостгори барқарории сулҳу суботи пойдор дар Афғонистон мебошад. Дафтари раёсати ҷумҳури Тоҷикистон мегӯяд, ки Эмомалӣ Раҳмон ва Вин И ҳамчунин роҷеъ ба таҳкими ҳамкориҳои ду кишвар дар арсаҳои сиёсӣ, иқтисодӣ, фарҳангӣ ва амниятӣ низ гуфтугӯ карданд.

Ин мулоқот дар ҳоле баргузор мешавад, ки аз суқути Кобул ба дасти Толибон як моҳ мегузарад ва ҳукумати Тоҷикистон комилан мавзеи мухолифи Толибонро гирифтааст. Мавзеи Душанбе дар чанд муносибат аз забони раиси ҷумҳур ва вазири хориҷӣ садо дод ва Эмомалӣ Раҳмон ва Сироҷиддин Муҳриддин гуфтанд, ки танҳо ҳукумати ҳамашумулро дар Афғонистон ба расмият мешиносад.

Сироҷиддин Муҳриддин, вазири корҳои хориҷии Тоҷикистон рӯзи 8-уми сентябр дар як ҷаласаи онлайни вазирони корҳои хориҷии кишварҳои ҳамсояи Афғонистон гуфт, "мо ҳеч ҳукуматеро, ки бидуни раъйпурсӣ ва бе ҳузури ҳамаи қавмҳо ташкил шудааст, эътироф намекунем". Қаблан Эмомалӣ Раҳмон дар мулоқот бо Шоҳ Маҳмуд Қурайшӣ, вазири умури хориҷии Покистон, низ ҳамин гуна изҳорот дода буд.

Аммо мавзеъгирии Чин дар баробари қазияи Афғонистон, бештар ба мавқеи Покистон ҳамсӯӣ дорад. Чанд руз қабл сафири Чин дар Кобул бо мақомоти баландпояи ҳукумати Толибон мулоқот кард ва ба онҳо ваъдаи ҳамкорӣ дод. Толибон умедвори кӯмаку сармоягузории Чин ҳастанд ва Пекин ҳам мехоҳад аз сарватҳои то ҳануз дастнохурдаи Афғонистон истифода барад. Ин гумонзаниҳо вуҷуд дорад, ки Чин шояд аз ҷумлаи кишварҳое бошад, ки ҳукумати Толибонро ба расмият бишносад.

Тоҷикистон ва Чин бо Афғонистон марзи муштарак доранд. Ҳам Тоҷикистон ва ҳам Чин дар гузашта аз ҳузури шаҳрвандони худ дар суфуфи гурӯҳҳои тундрав дар Афғонистон нигаронӣ карда буданд.

Порлумони Қазоқистон тарҳи қонуни кумаки низомӣ ба Тоҷикистонро баррасӣ мекунад

Акс аз бойгонӣ.

Лоиҳаи қонуни Қазоқистон дар бораи интиқоли ройгони силоҳ аз ин кишвар ба Тоҷикистон барои баррасӣ ба порлумон пешниҳод шудааст. Дар ин бора раиси кумитаи умури байналмилалӣ ва дифои порлумони Қазоқистон Ойгул Куспан хабар дод.

Раиси порлумони Қазоқистон Нурлан Нигматуллин гуфтааст, лоиҳаи қонун "Тасвиби созишнома байни ҳукуматҳои Қазоқистону Тоҷикистон дар бораи мусоидати техникию низомӣ барои таъмини амният дар минтақаҳои марзии Тоҷикистон бо Афғонистон" номгузорӣ шудааст.

Ба гуфтаи Куспан, созишномаи мазкур 12 июли соли 2021 дар шаҳри Нурсултони Қазоқистон ба имзо расидааст.

"Қазоқистон ба Тоҷикистон кумаки ройгони техникӣ ва низомӣ мерасонад. Комиссия омодааст, хулосаҳои худро роҷеъ ба лоиҳаи қонун баён кунад", - изҳор дошт вай.

Туркманистон узви комилҳуқуқи Шӯрои туркӣ мешавад

Моҳи ноябри имсол Шӯрои ҳамкориҳои кишварҳои туркзабон ба "Созмони кишварҳои туркзабон" табдили ном хоҳад кард.

Интизор меравад, ки Туркманистон низ узви комилҳуқуқи ин созмон шавад.

Дар ин бора нашрияи озарбойҷонии Report.az ​бо такя ба сарвазири Туркия Биналӣ Йилдирим хабар медиҳад.

Саммити VIII Шӯрои туркӣ рӯзи 12 ноябр дар шаҳри Истамбули Туркия дар назар аст.

Айни замон Озарбойҷон, Қазоқистон, Қирғизистон, Узбекистон ва Туркия шомили шӯрои мазкур ҳастанд. Шӯрои соли 2009 таъсис шудааст.

Парвозҳо миёни Эрон ва Афғонистон дигарбора оғоз шуд

Ҳавопаймои ширкати "Моҳон". Фурудгоҳи Кобул, 15 сентяб, 2021.

Парвозҳои мусофирбарӣ байни Эрон ва Афғонистон дигарбора оғоз шудааст. Дар пайи суқути Кобул ба дасти Толибон дар миёнаҳои моҳи август, парвозҳо миёни ду кишвар қатъ шуда буд. Хабаргузории эронии "Форс" рузи чаҳоршанбеи 15-уми сентябр хабар дод, ки дар ин руз ширкати ҳавопаймоии "Моҳон" як парвози чартерӣ анҷом дод ва 19 мусофирро ба фурудгоҳи Кобул бурд. Ба гуфтаи манбаъ, дар ҳоли ҳозир ин ҳавопаймои мусофирбар бо 26 мусофир дар ҳоли баргашт ба Теҳрон аст. Дар рузҳои ахир ширкатҳои ҳавонавардии Қатар, Имороти Муттаҳидаи Араб ва Покистон ба Кобул парвозҳо доштанд. Пас аз тасарруфи Кобул аз сӯи Толибон, Амрико дар ду ҳафта беш аз 100 ҳазор нафарро аз тариқи Фурудгоҳи Кобул ба берун бурд. Дар рузҳои ахир як ширкати ҳавопаймоии Қатар дар ду парвоз беш аз се сад тан шаҳрвандони хориҷиро, ки дар Афғонистон монда буданд, ба Давҳа интиқол дод.

Путин намеояд. Раҳмон бо Лаврову Шойгу мулоқот кард

Акс аз соли 2019

Дар остонаи нишасти сарони кишварҳои узви Созмони ҳамкориҳои Шонгҳой дар Душанбе, ки 16-17-уми сентябр баргузор мешавад, шоми чоршанбе президенти Тоҷикистон Эмомалӣ Раҳмон бо ҳайати Русия дидору гуфтугӯ кард. Маскавро дар ин нишаст вазири хориҷаи Русия Сергей Лавров, вазири дифоъ Сергей Шойгу ва дигар мақомот намояндагӣ мекунанд. Ба навиштаи вебсайти президенти Тоҷикистон, дар ин мулоқот вазъи ҷории низомиву сиёсии Афғонистон ва масоили ҳамкориҳои дуҷониба баррасӣ шудааст. Ҷузъиёти гуфтугӯҳо нашр намешавад.

Ин мулоқот дар ҳоле баргузор шуд, ки қарор буд дар ҷаласаи сарони СҲШ президенти Русия Владимир Путин иштирок мекард, вале рӯзи 14-уми сентябр Кремлин гуфт, ки бо сабабҳои бехатарии тиббӣ қарор шуд, ки Путин дар ин нишаст ба таври фосилавии онлайнӣ иштирок кунад. Кремл гуфт, ки дар атрофи Путин нафарони олудашуда ба COVID-19 зиёд ҳастанд ва хатари паҳн кардани беморӣ ба дигарон вуҷуд дорад. Бархе мақомот дар Тоҷикистон дар сӯҳбат бо Радиои Озодӣ гуфтанд, ки аз сафар ба Душанбе худдорӣ кардани Путин онҳоро дар ҳайрат гузошт, вале иттилои бештар аз он ки дар матбуоти расмӣ гузаштааст, дар дасти онҳо ҳам вуҷуд надорад. Сухангӯи Путин зоҳиран ба шоеаҳо дар бораи ин ки шояд худи Путин ба коронавирус олуда шудааст, посухи манфӣ дода гуфтааст, ки президенти Русия баъди эмшавӣ дар баробари ин беморӣ муқовимат пайдо кардааст.

Зимнан, шоми 15-уми сентябр матбуоти расмии Тоҷикистон аз расидани дигар раҳбарони кишварҳои узви СҲШ ба Душанбе, аз ҷумла, президентони Беларус ва Қазоқистон хабар доданд. Интизор меравад, ки Си Ҷинпин, раҳбари Чин дар нишасти СҲШ ба таври фосилавӣ иштирок кунад. Сафари нахуствазири Покистон Имрон Хон ба Тоҷикистон аз пеш тасдиқ шудааст.

Афғонистон, ба дасти “Толибон” гузаштани ҳукумати ин кишвари ҳамсарҳари Тоҷикистон ва ҳам ихтилофи назарҳои кишварҳои узви СҲШ ба ин масъала дар маркази таваҷҷӯҳи нишаст хоҳад буд.

Лукашенко ва Тоқаев ба Тоҷикистон расиданд

Александр Лукашенко ва Қосимҷомарт Тоқаев

Александр Лукашенко, раиси ҷумҳурии Беларус ва Қосимҷомарт Тоқаев, президенти Қазоқистон, шоми 15-уми сентябр ба Душанбе омадаанд. Қарор аст, Лукашенко ва Тоқаев дар ҷаласаҳои Созмони Паймони Амнияти Дастҷамъӣ ва Созмони Ҳамкориҳои Шонгҳой иштирок кунанд. Ҷаласаҳо 17 ва 18-уми сентябр баргузор мешаванд.

Дафтари матбуоти президенти Қирғизистон гуфт, Содир Ҷабборов (Содир Жапаров) низ дар роҳ ба пойтахти Тоҷикистон аст. Дар назар аст, нахуствазири Арманистон Никол Пашинян ҳам ба Душанбе биояд.

Иброҳим Раисӣ – раиси ҷумҳурии Эрон, Имрон Хон – нахуствазири Покистон, Шавкат Мирзиёев – раиси ҷумҳурии Узбекистон ва Қурбонқулӣ Бердимуҳаммедов – раиси ҷумҳурии Туркманистон рӯзи 16-уми сентябр вориди Душанбе хоҳанд шуд.

Владимир Путин, раиси ҷумҳури Русия ва Си Ҷин Пин, роҳбари Чин дар ҷаласаи Созмони Ҳамкориҳои Шонгҳой ба таври онлайн иштирок мекунанд.

Дигаргунӣ дар Афғонистон аз мавзуъҳои асосии гуфтугӯи роҳбарони СПАД ва СҲШ дар Душанбе гуфта мешавад.

Гардиши мол миёни Тоҷикистону Русия дар қиёс бо соли 2020 бештар шудааст

Дар 7 моҳи соли 2021 гардиши мол миёни Тоҷикистон ва Русия 640 миллион долларо ташкил дод, ки ба иттилои мақомот, 74 миллион доллар бештар назар ба ҳамин давраи соли гузашта будааст. Соли 2020 давраи авҷи пандемияи коронавирус ва маҳдудият дар ҳаракати одамон ва бору мол ба шумор меравад. Хабаргузории “Ховар” менависад, ин омор рӯзи 15-уми сентябр дар Душанбе аз забони муовини Вазири рушди иқтисод ва савдои Тоҷикистон Абдураҳмон Абдураҳмонзода дар Форуми доираҳои тиҷоратии Тоҷикистон ва Русия садо додааст, ки дар кори он, аз ҷумла, президенти Палатаи савдо ва саноати Русия Сергей Катирин иштирок кард.

Абдураҳмонзода изҳори медворӣ кардааст, ки ин ҳамоиш ба ҳамкории доираҳои тиҷоратии ду кишвар дар давраи пас аз буҳрон такони нав мебахшад. Ӯ гуфтааст, аз соли 2007 то 2021 ҳаҷми сармоягузории Русия ба иқтисоди Тоҷикистон 1,6 миллиард долларро ташкил додааст.

«Соли 2020 ҳаҷми сармоягузории мустақими Русия ба иқтисоди Тоҷикистон беш аз 14 миллион долларро ташкил дод, ки ба иқтидори мавҷудаи ҳамкории дуҷониба ва рӯҳияи муносибатҳои мутақобилаи мо мувофиқат намекунад», — афзуд Абдураҳмон Абдураҳмонзода.

Ёфтҳои бештар

XS
SM
MD
LG