Фурудгоҳи Душанбе муваққатан қабули парвозҳоро қатъ кард

Муҳаммадюсуф Шодиев, сухангӯи Фурудгоҳи байналмилалии Душанбе рӯзи 1-уми феврал дар сӯҳбат ба радиои «Озодӣ» гуфт, ки «танзимгарон гуфтанд, бинобар вазидани шамоли сахт аз ғарб, яъне аз қибла, қабули ҳама парвозҳо дар фурудгоҳи Душанбе муваққатан ба таъхир андохта мешавад. Вале аз фурудгоҳи Душанбе парвозҳо иҷозат ҳаст ва идома доранд.»

Ба гуфтаи сухангӯи Фурудгоҳи байналмилалии Душанбе, парвоз дар хатсайри Хуҷанд-Душанбе алъон ба таъхир андохта шуд, аммо дар ҷадвали парвозҳо ба берун тағйироти ҷиддӣ ворид нашудааст.

Сар аз субҳи рӯзи шанбеи 1-уми феврал дар Душанбе -- пойтахти Тоҷикистон барфи шадид меборад ва ҳаво низ ниҳоят сард шудааст. Ба гуфтаи ҳавошиносон, Тоҷикистонро дар давоми 3 рӯзи оянда ҳавои сарду пурбарф интизор аст.

Тибқи иттилои Муассисаи давлатии ҳавосанҷии Тоҷикистон аз якум то 3-юми феврал дар шаҳри Душанбе резиши барф дар назар аст ва дамои ҳаво 10-12 дараҷа пас мефарояд.

Назар ба хабари ин ниҳод, рӯзи 1-уми феврал дар аскари манотиқи кишвар барф меборад ва дар минтақаҳои кӯҳӣ хавфи сар задании сел вуҷуд дорад.