Пайвандҳои дастрасӣ

Хабари нав

Хабарҳо

Адлӣ Мансур чун раҳбари муваққати Миср савганд ёд кард

Адлӣ Мансур, раиси Додгоҳи Қонуни асосии Миср, ба ҳайси кафили раёсатҷумҳурии Миср савганд ёд кард. Шоми чаҳоршанбе низомиён раисиҷумҳур Муҳаммад Мурсиро барканор ва Мансурро раҳбари муваққати Миср таъин карданд. Онҳо ҳамчунин Қонуни асосии Мисрро мутаваққиф ва ваъдаи интихоботи нави парлумониву президентиро намуданд.

Намояндаи расмии “Ихвон-ул-муслимин” Ҷиҳод ал-Ҳаддод рӯзи панҷшанбе ба хабаргузориҳо гуфт, ки Муҳаммад Мурсӣ ҳамроҳ бо 12 тан аз ҳамсафҳояш таҳти ҳабси хонагӣ қарор дорад. Бархе хабаргузориҳо навиштаанд, ки Мурсӣ дар як пойгоҳи низомӣ нигаҳ дошта мешавад. Нашрияи давлатии “Ал-Аҳром” хабар додааст, ки низомиён барои ҳабси 300 тан аз раҳбарон ва фаъолони “Ихвон-ул-муслимин” дастур содир кардаанд. Муҳаммад Мурсӣ ва ҷонибдоронаш ҳаводиси ахирро “кудатои низомӣ” номидаанд.

Бар пояи хабарҳо, шаби гузашта бар асари бархӯрд миёни мухолифон ва ҷонибдорони Мурсӣ дар чанд шаҳри Миср дасти кам 9 нафар ба ҳалокат расидаанд.

Рӯзи панҷшанбе Барак Обама, раисиҷумҳури ИМА, изҳор намуд, ки аз тасмими артиши Миср барои аз мақом барканор кардани раисиҷумҳур ва мутаваққифсозии Қонуни асосии кишвар сахт нигарон аст. Ӯ аз раҳбарони низомии Миср даъват кард, ки ҳарчӣ зудтар қудратро ба раисиҷумҳури аз роҳи демократӣ интихобшуда ва ҷонибдорони ӯ баргардонад. Барак Обама афзуд, ки ба хадамоти давлатии Амрико дастур додаст, ки бо такя ба қонун паёмадҳои ҳаводиси Миср ба барномаи кӯмаки ИМА ба ин кишвари арабиро арзёбӣ кунанд.

Ҳамаи хабарҳои имрӯзро дар инҷо бихонед

Санаи мурофиаи додгоҳии Сергей Тихановский маълум шуд

24 маи соли 2020, Сергей Тихановский

Додгоҳе дар Беларус рӯзи 24 июн мурофиаи додгоҳии видео-блоггер Сергей Тихановскийро шурӯъ мекунад, ки баъди изҳори омодагиаш барои ширкат дар интихоботи президентии соли 2020 ва ба чолиш кашидани раҳбари худкома Александр Лукашенка боздошт шуд. Дар баробари Тихановский чандин намояндаи дигари мухолифон ҳам дар мурофиа ҳозир мешаванд. Мурофиа дар дохили боздоштгоҳи шаҳри ҷанубушарқии Ҳомел баргузор мешавад. Дар миёни онҳо: Михаил Статкевич, Игор Лосик, Владимир Тиханович, Артём Саков ва Дмитрий Папов мебошанд. Дар бораи санаи расмии шурӯи мурофиа наздикону дӯстони Тихановский огоҳонида шуданд.

Тихановскийро дар ташкили беназмиҳои ҷамъиятӣ, эҷоди нафрати иҷтимоӣ, монеъ шудан ба кори Комиссиюни марказии интихоботҳо ва ташкили фаъолиятҳое, ки интизоми ҷамъиятиро ба ҳам мезанад гунаҳгор мешавад. Ҳамаи ин иттиҳомот то 15 соли зиндонро пешбинӣ мекунад. Тихановский муаллифи шабакае бо номи “Кишвар барои зиндагӣ” дар YouTube буд ва барои ширкат дар интихоботи президентӣ изҳори омодагӣ кард. Тавассути ҳамин шабакааш ӯ режими Лукашенкоро интиқод мекард ва моҳи марти соли 2020 вақте номзадиаш барои сабтином рад шуд, боздошт гардид. Аз ҳамон замон то кунун ӯ дар боздоштгоҳ ба сар бурдааст.

Додгоҳ даъвои муовини раиси ҳокими "Нур отан"-ро қонеъ кард

Додгоҳе дар шаҳри Алмато даъвои Баурҷон Байбек, муовини аввали раиси Ҳизби ҳокими "Нур Отан" алайҳи фаъоли маданӣ Ҷонболат Мамай ва ҳамсараш Инга Имонбойро қонеъ кард. Муовини раиси ҳизби ҳоким "барои ҳимоят аз шаъну шараф ва эътибори корӣ" ба додгоҳ шикоят бурда буд.

Дар қарори додгоҳ омадааст, филми фаъоли маданӣ, ки дар он Баурҷон Байбек ба фасодкорӣ ва нақзи ҳуқуқи инсон айбдор мешавад, воқеият надорад ва шаъну шарафи ӯро паст хоҳад зад. Додгоҳ Мамайро вазифадор кардааст, ки филмро пок кунад.

Ҳамсари фаъоли маданӣ Инга Имонбой гуфт, аз қарори додгоҳ розӣ нестанд ва ба зинаҳои болоӣ шикоят хоҳанд бурд. Додгоҳ ҳамчунин матолиби Имонбой дар бораи фасодкории Байбекро беасос хондааст. Ҳамсари фаъоли маданӣ ба нашри раддия муваззаф шудааст.

Ҳамакнун Мамай ва ҳамсараш бояд 438 201- тангаӣ ($1025) харҷи додгоҳӣ ва наздики 75 000 танга ($175) ҳаққи ташхиси равоншиносӣ-забониро супоранд.

Мамай моҳи апрели соли равон дар саҳифаи худ дар Ютуб видеоеро нашр ва Баурҷон Байбекро ба фасодкорӣ айбдор карда буд.

Дипломати амрикоӣ гуфт, ИМА Афғонистонро бо шеваи "қавӣ ва ҷиддӣ" пуштибонӣ мекунад

Росс Уилсон, кордори сафорати ИМА дар Кобул

Як дипломати калони амрикоӣ дар Кобул гуфт, ки баъди тарки кишвари ҷангзадани Афғонистон кардани нирӯҳо ҳам ИМА ироаи кӯмакҳои “қавӣ ва ҷиддӣ” ба ин кишварро идома медиҳад. Росс Уилсон, кордори сафорати ИМА дар Кобул рӯзи 14 июн дар як сӯҳбат бо Радиои Аврупои Озод/Радиои Озодӣ гуфт, ки “меҳвари сиёсати ИМА дар Афғонистон” ин аст, ки ИМА тамоми кори имконбахшро ба хотири беҳбуди вазъи ҳукумати аз ҷониби ҷомеаи байналмилалӣ ҳимоятшудаи Афғонистон равона кунад. Уилсон гуфт, ин ба он маъност, ки “аз роҳи қавӣ ва ҷиддӣ” ироаи кӯмакҳои амниятӣ ва ҳам “ёриҳои иқтисодию башарӣ” идома меёбад. Дар ҳоле, ки дар Афғонистон аз 1-уми май хуруҷи нирӯҳои байналмилалӣ ҷараён дорад, Толибон чанд ноҳияи стратегӣ дар наздикиҳои Кобулро ишғол карданд. Ин гурӯҳи шӯришӣ инчунин маконҳои низомии ҳукумати Афғонистон ва ҳам чандин минтақаву шаҳрҳоро дар саросари кишвар забт кардааст. Ин ҳама таҳаввулот нигарониҳое ба вуҷуд овардааст, ки эҳтимолан Толибон дар ниҳоят ҳукумати аз ҷониби Ғарб ҳимоятшавандаи Афғонистонро сарнагун мекунад. ИМА ваъда додааст, ки маблағгузории артиши 237 ҳазорнафарии Афғонистон ва полиси милллии ин кишварро идома медиҳад.

Мухолифон: Пратасевичро ҳамчун “нишони пирӯзӣ” ба намоиш гузоштанд

Раман Пратасевичро барои ширкат дар нишасти матбуотие оварданд, ки он ҷо аз ҷузъиёти фуруд овардани ҳавопаймои ширкати Ryanair дар Минск сӯҳбат шуд

Мақомот дар Беларус рӯзи 14 июн дар як ҳамоиши журналистон дар Минск блоггери ҳабсшуда Раман Пратасевичро ба назди ширкатдорон оварда, мисли як “нишони пирӯзӣ” ба намоиш гузоштанд. Пратасевич рӯзи 23-юми май аз ҳавопаймои тиҷоратии ширкати Ryanair, ки аз хаттсайти Атен ба Вилнюс маҷбуран фуруд оварда шуд, боздошт гардид. Ин кори мақомоти беларусӣ маҳкумияти ғарбу Аврупоро ба бор овард ва ҳам боиси ҷорӣ кардани таҳримҳои нав шуд. Пратасевич ҳамроҳ бо чор мақоми дигар, ки ду нафарашон бо либоси низомӣ буданд, дар минбар нишаст. Мухолифон ин саҳнаро ҳамчун “рӯҳшикан” маҳкум карданд. Франак Вечёрка, ки мушовири раҳбари мухолифони Беларус Светлана Тихановская аст, гуфт, “ҳеҷ муҳим нест, ки ӯ чӣ гуфт: фаромӯш накунед: ӯ як гаравгон аст. Режим ӯро ба ҳайси нишони пирӯзӣ истифода мекунад”.

Лаҳзаҳое, ки Пратасевич - як боздоштшудаи КГБ, ба сӯҳбат кардан пардохт, чандин дипломат ва журналистон толорро тарк карданд. Ҷона Фишер, гузоришгари BBC дар саҳифааш дар Твиттер навишт: “Мо берун рафтем. Вақте ӯ он ҷо таҳти фишор қарор дорад, дар ҷаласа иштирок накардем”. Пратасевичи 26-сола ҳамроҳ бо дӯстдухтараш София Сапега, як шаҳрванди Русия аз дохили ҳавопаймо боздошт шуданд.

СҶТ аз коҳиши чандҳафтаинаи COVID-19 дар ҷаҳон истиқбол кард

Дабири кулли СҶТ Тедрос Аданом Гебреусес

Созмони ҷаҳонии тандурустӣ (СҶТ) коҳиши ҳодисаҳои олудашавӣ ба коронавирус дар саросари ҷаҳонро истиқбол карда, айни замон ҳушдор додааст, ки ҳамоно ҳар рӯз беш аз 10 ҳазор нафар аз COVID-19 ҷон медиҳанд. Дабири кулли СҶТ Тедрос Аданом Гебреусес рӯзи 14 июн гуфт, ки аз замони шурӯи пандемия коҳиши мазкур тӯлонитарин будааст. Ӯ гуфт, ки дастрасии нобаробар ба воксинаҳои зидди коронавирус пешрафт дар ин соҳаро дучори мушкил мекунад. Тедрос дар нишасти хабарии рӯзи 14 июн аз раҳбарони сиёсӣ даъват кард, ки ӯҳдадории худ барои таъмини кишварҳои ҷаҳон бо дастикам 70 дарсади воксинаи заруриро ба субут расонанд.

Мушовири Кремлин дар бораи мулоқоти Путину Байден "умедвории созанда" баён кард

Юрий Ушаков ёвари умури хориҷии президент Владимир Путин. Акс аз соли 2019

Як мақоми Кремлин гуфт, эҳтимол аст, ки мулоқоти миёни президентони ИМА ва Русия - Ҷо Байден ва Владимир Путин дар таърихи 16-уми июн бо созишҳои мушаххасе ба анҷом расад, вале ба ҳар сурат, муфид хоҳад буд. Дар ҷараёни нишасти матбуотии рӯзи 14-уми июн дар Брюссел вақте аз Байден хостанд, ки дар бораи ҷузъиёти гуфтугӯҳои 16 июн бо Путин сӯҳбат кунад, нахост дар ин бора ва ҳам интизориҳо аз мулоқоти дарпешистода ҳарфе гӯяд. Ӯ ишора кард, ки масоили мавриди созиш бо Путинро арзёбӣ мекунад, вале ҳамзамон ӯро аз рафтори хашин бо ИМА ва муттафиқонаш ҳушдор дод. Мулоқоти фардо нахустин гуфтугӯи рӯбарӯи президент Ҷо Байден бо ҳамтои русаш Владимир Путин мешавад. Бори охир онҳо соли 2011 дар мақоми муовини президенти ИМА ва нахуствазири Русия дидору гуфтугӯ кардаанд.

Ёвари сиёсати хориҷии Путин Юрий Ушаков рӯзи 15 июн дар сӯҳбат бо журналистон гуфт, ки машваратҳои ниҳоӣ бо мушовири амнияти миллии Кохи Сафед Ҷейк Салливан дирӯз баргузор шуд. Ба қавли Ушаков, дар маркази таваҷҷӯҳи ду раҳбар масъалаҳои суботи ҳастаӣ, тағйироти иқлим, амнияти интернетӣ ва сарнавишти ду шаҳрванди ИМА ва Русия қарор дорад, ки дар зиндонҳои кишварҳои ҳамдигарӣ нигаҳдорӣ мешаванд. Ушаков гуфт, “мутмаин нестам, ки оё кадом созише ба даст оянд. Ман ба ин мулоқот бо умедвории созанда нигоҳ мекунам”.

Даргузашти шоири шинохта Салимшо Ҳалимшо

Шоири шинохтаи тоҷик Салимшо Ҳалимшо рӯзи 15-уми июн дар сини 85-солагӣ дар шаҳри Душанбе даргузашт. Ин шоири тоҷик тайи чаҳор соли ахир аз бемории фаромушхотирӣ ранҷ мебурд. Дар Итифоқи Нависандагон гуфтанд, ки тибқи васияти шоир ҷасади ӯ дар канори ҳамсараш дар оромгоҳи "Сариосиё" ба хок супурда мешавад.

Ато Мирхоҷа, муовини раиси Иттифоқи нависандагони Тоҷикистон рӯзи 15-уми июн ба Радиои Озодӣ гуфт, Салимшо Ҳалимшо аз шоирони тозагӯй дар адабиёти муосир буд.

Ин шоири тоҷик 16-уми феврали соли 1936 дар деҳаи Риваки Шуғнон ба дунё омадаст. Соли 1960 Донишгоҳи давлатии Тоҷикистонро хатм карда, дар рӯзномаҳои "Тоҷикистони советӣ", ҳафтаномаҳои "Адабиёт ва санъат" ва "Пайванд" кор кардааст. Муддате дар мақоми мудири Шӯрои назми Иттифоқи навистандагони Тоҷикистон кор карда буд. Салимшоҳ Ҳалимшоҳ аз соли 1965 узви Иттифоқи Нависандагони Тоҷикистон буд.

"Роҳи қуллаҳо", "Киштии инқилоб", "Оинаи виҷдон", "Бурҷи Инсон", "Ҳафт хони Бадахшон", "Хонаи Офтоб", "Оби шаҳд", "Зодагони ҳафт тӯфон" ва драмаи "Кабутарони сафед" аз ҷумлаи осори ӯ ба шумор мераванд. Намунаҳое аз ашъори Салимшоҳ Ҳалимшоҳ ба забонҳои гуногун тарҷума ва чоп шудааст ва ӯ намунаҳоеро аз осори адибони ҷаҳон ба тоҷикӣ тарҷума кардааст.

Салимшоҳ Ҳалимшоҳ унвони "Корманди шоистаи Тоҷикистон"-ро дошт ва соли 1997 бо ордени "Дӯстӣ" қадрдонӣ шуд.

ФФТ як бозигари "Хуҷанд"-ро аз 3 бозӣ маҳрум ва 500 сомонӣ ҷарима кард

Дастаи "Хуҷанд"-и Хуҷанд. Акс аз бойгонӣ.

Кумитаи назорати интизоми Федератсияи футболи Тоҷикистон як бозингари дастаи "Хуҷанд"-ро барои "суханони қабеҳ ва таҳқиркунанда", аз се бозӣ маҳрум ва 500 сомонӣ ҷарима кардааст.

Ба иттилои Федератсияи футболи Тоҷикистон, ниммуҳофизи ин даста Нозим Бобоҷонов дар бозии Coca-Cola – чемпионати Тоҷикистон-2021 байни дастаҳои "Хуҷанд"-и Хуҷанд ва “Файзканд”-и Восеъ аз ҳукми доварон норозигӣ карда, ҳакамон ва дигар афроди расмӣ дар ин вохӯриро суханҳои қабеҳ гуфтааст.

Ин бозӣ рӯзи 2-юми июн дар варзишгоҳи "20-солагии Истиқлолияи Ҷумҳурии Тоҷикистон" дар Хуҷанд баргузор шудааст.

Кумитаи назорати интизоми Федератсияи футболи Тоҷикистон ҳамчунин Абдухалил Боронов -- бозигари дастаи "Файзканд"-ро аз ҳаққи иштирок дар 2 бозӣ маҳрум карда, 250 сомонӣ ҷарима бастааст.

Назари Нозим Бобоҷонов ва Абдухалил Боронов дар нисбати ин қарори Кумитаи назорати интизоми Федератсияи футболи Тоҷикистон ҳанӯз маълум нест.

Дар мавзеи баҳсии марзи Тоҷикистон бо Қирғизистон сохтмони девор қатъ шуд

Марзи миёни Тоҷикистон ва Қирғизистон

Сокинони деҳаи Хоҷаи Аълои ҷамоати Чоркӯҳ аз сохтани як девор дар мавзеи баҳсӣ дар марзи Тоҷикистон бо Қирғизистон ҷилавгирӣ кардаанд.

Сохтмони ин девор, ба гуфтаи мақомоти тоҷик, аз ҷониби як сокини маҳалаи "Учтеппа"-и деҳаи Оқсой ду рӯз пеш оғоз шуд, вале дар машварат бо ҷониби Қирғизистон қатъ шуд. Мақомоти қирғиз ҳанӯз дар ин бора назар надодаанд.

Навори оғози сохтмони ин девор рӯзи 14-уми июн дар Инстаграм нашр шуд ва норизоии сокинони деҳаи Хоҷаи Аълоро ба бор овард. Сокинон ва мақомоти тоҷик маҳали сохтмони деворро баҳсӣ медонанд.

Абдухалил Шарифов, раиси собиқи маҳаллаи Хоҷаи Аъло рузи 15-уми июн ба Радиои Озодӣ гуфт, сокинони деҳа шоми дирӯз ҷамъ шуда, бо соҳиби ин манзил суҳбат карданд ва ӯ аз идомаи деворсозӣ даст кашид.

“Суҳбати мо бо соҳиби хона дар рӯҳияи ҳамсоядорӣ буд ва мо якдигарро хуб фаҳмидем.”,--гуфт Шарифов.

Сокинони Хоҷаи Аъло мегӯянд, аз миёни деҳаи онҳо ва Оқсой канали "Масчоҳӣ" мегузарад ва ҳанӯз хатти байни ин ду мавзеъ ташхису аломатгузрӣ нашудааст. Аз ин рӯ, бар асоси созишномаҳо, на аз ҷониби ҳамсоя ва на аз ин тараф, ҳеҷ сохтмон иҷоза нест.

Як намояндаи ҳукумати шаҳри Исфара рузи 15-уми июн гуфт, баъди шикояти сокинон аз сохтмони девор дар рӯ ба рӯи маҳаллаи Имом Аъзами деҳаи Хоҷаи Аъло бо масъулони деҳаи Оқсой суҳбат шуд ва онҳо розӣ шуданд, ки дигар сохтмони девор идома наёбад.

Ин манбаъ гуфт, дарозии пойдевор ҳудуди 30 метр аст ва бо семент дуруст шудааст. Ӯ афзуд, ки ҳоло аз идомаи сохтани он ҷилавгирӣ шуд ва талош аст, ки аслан дар ин мавзеъ девор сохта нашавад. То ҳол дар ин мавзеъ девор нест ва фақат як канал ду деҳаро ҷудо мекунад.

Рӯзи 28-29-уми апрели имсол баҳси сокинони ду ҷонибд дар марз ба муноқишаи мусаллаҳона печид. Аз ду ҷониб беш аз 50 нафар кушта ва зиёда аз 200 нафар маҷрӯҳ шуданд. Даҳҳо хона аз ду тараф осеб дид.

Мақомоти ду кишвар ҳамдигарро дар оғози муноқиша айбдор карданд.

Муолоқоти Байден бо раҳбарони аврупоӣ

14 июн Ҷо Байден, президенти ИМА дар ҷаласаи сарони кишварҳои НАТО ширкат кард

Рӯзи 15-уми июн президенти ИМА Ҷо Байден дар Брюссел қарор аст бо президенти Шӯрои Аврупо Шарл Мишел ва президенти Комиссиюни Аврупо Урсула вон дер Лейен масъалаҳои марбут ба тиҷорат, тағйироти иқлим ва ташкили як нирӯи муттаҳида дар баробари рафтори хашини афзояндаи Русияву Чинро баррасӣ мекунад. Баъди раҳбарии чорсолаи президенти пешин Доналд Трамп ҳоло Байден талош дорад муносибатҳои ИМА бо ҳамкорони фароатлантикиро тақвият диҳад. Як аз масъалаҳое, ки бояд ҳал шавад, ин ихтилофи миёни ширкатҳои Airbus ва Boeing аст, ки 17 сол инҷониб ҳамдигарро дар пуштибонӣ аз саноати ҳавопаймосозии маҳаллӣ гунаҳгор мекунанд.

Бархе манбаъҳои дипломатӣ гуфтанд, ки интизор меравад моҳи оянда дар ин замина созише ба даст ояд. Масъалаи душвортари дигар – таҳмили соли 2018 ҷорикардаи Трамп дар бораи андозмандии 25-дарсадӣ ба пӯлод ва 10-дарсадӣ ба алюминии истеҳсоли Аврупо мебошад.

Инчунин қарор аст Байден дар остонаи мулоқоташ бо президенти Русия Владимир Путин дар Женева пуштибонии васеи аврупоиҳоро ба даст оварад. Ин мулоқот 16-уми июн барпо мешавад.

Дар Ҷайҳун қатли чанд аъзои як хонаводаро таҳқиқ мекунанд

Бохтар, маркази вилояти Хатлон

Дар Тоҷикистон таҳқиқи қатли бераҳмонаи як хонаводае идома дорад, ки мардуми ноҳияи Ҷайҳун дар вилояти Хатлонро ваҳшатзада кард.

Ба таҳқиқи ҳодиса Раёсати корҳои дохилии Вазорати корҳои дохилии Тоҷикистон ҷалб шудааст.

Мақомот то кунун сабабҳои қатли панҷ узви хонаводаи Маҳмадовҳо аз деҳаи Тарғоқро шарҳ надодаанд. Дар миёни панҷ қурбоние, ки номашон ба Радиои Озодӣ маълум шуд, Саодати 13-сола ва Саломати 14-сола низ ҳастанд. Панҷ узви оиларо субҳи 12-уми июн афроди номаълум, бо табар ё дос зада куштаанд. Як узви хонавода бо ҷароҳатҳои вазнин дар бемористон аст.

Дар Тоҷикистон чунин ҳодисаҳо аҳёнан рух медиҳад.

Ширкати зери итоати Бег Сабур аз пардохти қариб як миллион доллар озод шуд

Ширкати "Тоҷиктелеком" зери назари Бег Сабур кор мекунад

"Тоҷиктелеком"-ширкате, ки воридоти интернетро дар инҳисор ё монополияи худ дорад, аз пардохти қариб як миллион доллар андозу ҷарима озод шуд. Ин ширкат тобеи Хадамоти алоқаи Тоҷикистон аст, ки раҳбари он Бег Сабур, қудои Эмомалӣ Раҳмон, президенти Тоҷикистон мебошад.

Хабаргузории "Азия Плюс" менависад, дар ин бора қарори ҳукумат содир шудааст.

Пештар Нусратулло Давлатзода, раиси Кумитаи андоз гуфта буд, ширкати "Тоҷиктелеком" яке аз қарздорҳои калон аз андоз мебошад. Ба гуфтаи Давлатзода, ин ширкат дар назди будҷаи кишвар 86 миллион сомонӣ ё 7,6 миллион доллар қарздор аст.

Бар асоси қарори нави ҳукумат, "Тоҷиктелеком" аз пардохти 5,5 миллион сомонӣ қарзи андоз ва 5,5 миллион сомонӣ фоиз ва ҷаримаҳо озод шудааст.

Ба озод шудани “Тоҷиктелеком” аз андозу ҷарима, инчунин як ширкате бо номи “Медимпекс”, ки дар борааш маълумоти зиёд нест, аз супурдани 312 ҳазор сомонии қарзи андоз озод шудааст. Тибқи ин қарор инчунин ҷамъияти "Саноати Нақлиёти No2" ва баъзе корхонаҳои дигари дар шаҳри Кӯлоб сабтиномшуда, мисли корхонаи фаръии обтаъминкунӣ ва канализатсияи шаҳри Кӯлоб, корхонаи "Пахтаи Кӯлоб", ҷамъияти "Фаридун-К", корхонаи "Хишти Кулоб", "Суғдиён", корхонаи "Кӯлобгаз" ва ширкати "Лоиқ" аз андоз ва пардохти ҷаримаҳо ба андозаи беш аз 4, 5 миллион сомонӣ озод шудаанд.

"Тоҷиктелеком"-ширкати зертобеи Хадамоти алоқа ягона воридкунандаи интернет ба Тоҷикистон аст. Вале сарфи назар аз ин ширкат солҳои ахир вазъи молие хубе надорад ва андозу дигар ширкатҳо қарздор шудааст.

Қаблан идораи барқи Душанбе ва ширкати Тселл ба хотири напардохтани қарз, аз болои "Тоҷиктелеком" ба додгоҳ шикоят бурда буданд.

Бег Сабур аз соли 2011 раҳбари Хадамоти алоқаи Тоҷикистон аст, ки "Тоҷиктелеком" зертобеи он мебошад.

Моҳи апрели имсол Бонки Ҷаҳонӣ ба Тоҷикистон тавсия дод, ки барои рушди иқтисоди рақамӣ ва Интернет, бояд ширкати ("Тоҷиктелеком")-ро аз тобеияти танзимгари соҳа, яъне Хадамоти алоқа бароранд. Ин нуктаро Ян Петерс Олтерс, раиси дафтари Бонки Ҷаҳонӣ дар Тоҷикистон рӯзи 22-юми апрел дар нишасти онлайни "Иқтисоди рақамӣ дар Ҷумҳурии Тоҷикистон" баён дошт.

Ширкати "Тоҷиктелеком" зертобеи Хадамоти алоқа ва ягона дастраскунандаи Интернет ба Тоҷикистон аст.

Ҳоло Тоҷикистон аз назари суръати Интернет дар миёни кишварҳои Осиёи Марказӣ дар мақоми аз ҳама охир қарор дорад, аммо нархи он баръакс гарон аст. Дар кишвар нархи 1 гигабайт интернети мобилӣ ба ҳисоби миёна ба беш аз 20 сомонӣ баробар аст.

Эмомалӣ Раҳмон ба Хатлон рафтааст, то аз минтақаҳои зарардида аз селу боронгарӣ дидан кунад

Минтақаи навбунёд барои осебдидагон дар ноҳияи Абдураҳмони Ҷомӣ.

Эмомалӣ Раҳмон, раиси ҷумҳури Тоҷикистон ба вилояти Хатлон рафтааст, то аз минтақаҳое, ки баҳори имсол аз селхезӣ ва лағзиши замин осеб дида буданд, дидан кунад. Дар пайи боронгариҳои моҳи май 9 нафар дар кишвар ҷон бохтанд, ки 8 нафари онҳо сокинони ноҳияҳои Шамсиддин Шоҳин, Кӯшониён, Вахш ва шаҳри Кӯлоби вилояти Хатлон буданд.

Дафтари матбуоти раёсати ҷумҳури Тоҷикистон хабар дод, ки Эмомалӣ Раҳмон субҳи 15-уми июн аз деҳаи Навободи деҳоти Ифтихори ноҳияи Абдураҳмони Ҷомӣ (собиқ Куйбишев) дидан кард. Шаби 8 ба 9-уми май дар ин деҳа лағзиши замин шуруъ шуд ва беш аз 100 гектар замини кишоварзии сокинон ва 20 манзили онҳо фурӯ бурд.

Пас аз ин ҳодиса, мақомот барои 20 хонаводаи зарардида аз лағзиши замин қитъаҳои замин ҷудо кардаанд. Ба гуфтаи КҲФ, 167 хоҷагӣ ба ҷойҳои бехавф кӯчонида шуданд ва Ситоди ҷумҳуриявии рафъи оқибатҳои ин офати табиӣ тасмим гирифт, барои ҳар як оилаи зарардида дар маҳалли амни ҳамин деҳа 10-сотихӣ замин ҷудо карда, манзили навро дар муддати як моҳ бунёд кунад.

Дафтари матбуоти раёсати ҷумҳури Тоҷикистон мегӯяд, ки оқои Раҳмон рӯзи 15-уми июн "калиди нахустин хонаҳои омодагардидаро ба соҳибонаш супоридааст". Сокинони зарардида то кунун дар хаймаҳои муваққатӣ ба сар мебаранд. Мақомот мегӯянд, ки онҳо то соҳиби хонаву дар шудан, аз сӯи ҳукумат бо рахти хоб, сару либос ва маводи хӯрокворӣ таъмин мешаванд. Вале бархе аз сокинони зарардида пештар гуфтанд, барояшон маҳсулоти сохтмонӣ надоданд, то манзилҳояшонро барқарор кунанд.

Дар ин муддат ҳамчунин созмонҳои байналмилалии имдодӣ ва шахсони хайрхоҳи маҳаллӣ низ ба осебдидагони ин ҳодиса ёрирҳо ироа кардаанд. Мақомоти тоҷик қаблан гуфтанд, ки аз ҷумла барои зарардидаҳо кумакҳои USAID ва ЮНИСЕФ дастрас карда шудааст.

Дар ҳамин ҳол, манобеи Радиои Озодӣ гуфтанд, ки қарор аст имруз, 15-уми июн оқои Раҳмон ба шаҳри Кӯлоб сафар кунад ва аз минтақаҳои осебдида дидан намояд. Пеш аз сафар ба Кӯлоб, Эмомалӣ Раҳмон аз ноҳияи Вахш ҳам дидан кард. Селу обхезии моҳи гузашта ба ин ноҳия низ осеби зиёд расондааст.

Селу боронгариҳои рӯзи 11-уми май аз ҳама беш ба шаҳри Кӯлоб харобӣ овард ва тибқи ҳисобҳои муқаддамотӣ, садҳо хона зарар дид. Бархе аз сокинони офатзада дар рӯзҳои гузашта шикоят доштанд, ки бо гузашти ду ҳафта ҳеч кӯмаки сохтмонӣ нагирифтанд, то манзилҳояшонро дубора бозсозӣ кунанд.

Намояндагони мақомот ҳамвора мегӯянд, ки барои рафъи оқибатҳои сели харобиовар ба мардум ҳам кумаки ғизоӣ ва ҳам маҳсулоти сохтмонӣ мерасонанд. Бино ба арзёбиҳои мақомоти Кӯлоб, тақрибан 600 хонавода бар асари сел осеб дида ва ба кумак муҳтоҷ шудаанд.

Мақомот мегӯянд, офати табиии рӯзи 11-уми май дар умум ба 15 шаҳру ноҳияи кишвар зарар расонда, дар чаҳор шаҳру ноҳия боис ба марги 9 нафар шуд. Намояндагони Кумитаи ҳолатҳои фавқулода гуфтанд, фалокати табиӣ асосан ба минтақаҳои Хатлон ва ноҳияҳои тобеи маркази ҷумҳурӣ осеб расонд.

Тибқи иттилои масъулини КҲФ Тоҷикистон, соли 2020 дар пайи офатҳои табиӣ дар кишвар 41 бинои маскунии сокинони пурра ва 102 бинои дигар қисман тахриб шуда буданд. Ин ҳодисаҳо ба 18,5 ҳазор гектар заминҳои кишоварзӣ хисорот ворид карда, шаш пули иртиботӣ комилан тахриб шуда буданд.

Тоҷикистон, яке аз кишварҳои осебпазир дар баробари фалокатҳои табиист. Аз аз соли 1992 то соли 2020, обхезиву селу заминларза ва лағжиши хок ба 7 миллион нафар осеб ва ба иқтисоди кишвар тақрибан 2 миллиард доллар зарар расондааст.

ЮНИСЕФ ба Қирғизистон дар дастрас кардани ваксинаи зидди COVID-19 кӯмак мекунад

Ваксиназанӣ дар Қирғизистон.

150 ҳазор вояи ваксинаи зидди COVID-19 мумкин аст, то 20 июн аз Чин ба Қирғизистон оварда шавад. Дар ин бора вазири тандурустии Қирғизистон Олимқодир Бейшаналиев хабар дод. Вай гуфт, дар дастрас кардани ваксинаҳо ЮНИСЕФ кӯмак мерасонад.

Чанде пеш хабар дода шуд, ки Қирғизистон дар дастрас кардани бастаи дувуми ваксинаҳои Sinopharm ба мушкилӣ рӯ ба рӯ шудааст. Он кишвар барои дастрас кардани ваксинаҳо ёрии башарӣ дархост кардааст.

Моҳи марти соли ҷорӣ Чин дар ҳаҷми 150 ҳазор воя ваксинаи Sinopharm ба Қирғизистон кӯмак расонид. Рӯзи 11 май хабар дода шуд, ки Чин бастаи дувуми ваксинаҳоро ба Қирғизистон ҷудо кардааст.

Қирғизистон ҳамзамон ваксини русии "Спутник V" истифода мекунад. Ваксиназанӣ дар он кишвар 29 марти соли ҷорӣ шуруъ шуд. То ин замон наздики 90 ҳазор кас ваксина гирифтааст.

Дар Туркманистон гимназияҳо пулакӣ шуданд

Мактабхонҳои туркман. Акс аз бойгонӣ.

Расонаи туркмании Turkmen.news бо истинод ба қонуни маорифе, ки 9 июн дар Туркманистон нашр шуд, навиштааст, таҳсил дар мактабҳои махсус ва гимназияҳои он кишвар пулакӣ шуданд.

Дар банди 39-и қонуни нав манбаи сармоягузорӣ ду навъ - пули буҷа ва пули таҳсил зикр карда шудааст. Аввалӣ ба "муассисаҳои томактабӣ ва муассисаҳои миёнаи умумии таълимӣ" дахл дошта, дувумӣ ба "муассисаҳое рабт дорад, ки дар онҳо барномаи омӯзиши амиқи фанҳо ба роҳ монда шуда, барои хонандагон хидматрасониҳои иловагии омӯзишӣ пешниҳод карда мешавад".

Банди 30-и қонуни пешини Туркманистон дар бораи маориф низ сармоягузории низоми омӯзишро ба танзим медаровард, вале дар он манбаи сармоягузории таҳсил ҷудо карда нашуда буд.

Пештар дар шаҳри Ишқободи Туркманистон нахустин мактаби пулакӣ муассисаҳои умумии рақами 21-ро карда буданд. Онро дар ибтидои соли хониши 2020-2021 дубора боз карданд. Нархи як моҳи таҳсил дар он 250 манат (71,5 доллар)-ро ташкил медод.

Дар Алмато сохтмонҳои марбут ба домоди Назарбоев қатъ шуданд

Алмато, Қазоқистон.

Раёсати банақшагирӣ ва шаҳрсозии ҳукумати шаҳри Алматои Қазоқистон иҷозаи меъмориву нақшакашии тарҳи сохтмони бинои боҳашаматеро дар кӯчаи Достики он шаҳр бекор кард.

Молики замин ва ширкати сохтмонӣ ба Тимур Қулибоев, домоди президенти пешини Қазоқистон Нурсултон Назарбоев рабт дорад.

Шаҳрдори Алмато гуфтааст, ки ширкати сохтмонӣ шартнома дар бораи роҳи вурудӣ ва хуруҷӣ ба майдони сохтмониро иҷро накардааст. Ба ин далел, шаҳрдорӣ иҷозаи сохтмонро бекор кардааст.

Ширкати Enterprise Development Group сохтмонро чанде пеш шуруъ кард. Майдони бештар аз ҳашт ҳазор метри мураббаъ ҳанӯз дар соли 2003 хусусӣ гардонида шуда буд.

Евгений Зеленский, ҳуқуқшиноси ширкат рӯзи 7 июн дар суҳбат бо расонаҳо гуфта буд, ки ҳамаи ҳуҷҷатҳои онҳо дуруст аст ва сохтмонро идома хоҳанд дод.

Байден моддаи 5-и созишномаи НАТО-ро "ӯҳдадории муқаддас" номид

Ширкатдорони ҷаласаи НАТО дар Брюссел. 14-уми июн

Президенти ИМА Ҷо Байден гуфт, ки НАТО барои манфиатҳои ИМА «фавқулодда муҳим» аст ва талабот оид ба дифои ҳамдигарӣ “ӯҳдадории муқаддас” мебошад. Байден, ки рӯзи 14-уми июн барои ширкат дар ҷаласаи НАТО ба Брюссел рафт, гуфт, мехоҳад, ки Аврупо бидонад, ки ИМА дар тарафи он истодааст. “Моддаи 5 – як ӯҳдадории муқаддас аст”, гуфт Байден. Манзури ӯ ҳимояти дастаҷамъии кишварҳо аст, ки дар созишнома оид ба таъсиси НАТО зикр шудааст. “Мехоҳам, ки тамоми Аврупо бидонад, ки ИМА ба ин созиш пойбанд аст”, гуфт ӯ.

Ҳузури Байден дар ҷаласаи НАТО як бахше аз сафари аврупоии ӯ аст, ки баъди чор соли пуршебу фарози раёсатҷумҳурии Доналд Трамп ҳадафаш барқарории муносибатҳо ва ҳам тазмини шарикони фароатлантикии Вашингтон мебошад.

Як мулоқоти хусусии Байден бо президенти Туркия Раҷаб Тайиб Эрдуғон ҳам дар назар аст. Дар се соли охир, ки раҳбарони кишварҳои узв бо сабаби пандемияи коронавирус бо ҳам гуфтугӯи рӯбарӯ накардаанд ва дар ин муддат як бастаи масоили доғе ҷамъ шудааст, ки барои баррасии ҳама ҷонибҳо нигаронида шудааст. Дар миёни ин масъалаҳо ҳам Афғонистон ва хуруҷи нирӯҳо, ҳам Русия ва Чин ва ҳам хароҷоти дифоӣ ёд мешавад.

Йенс Столтенберг, дабири кулли НАТО зимни сӯҳбаташ бо журналистон рӯзи 14-уми июн гуфт, ки ҳеҷ Ҷанги сарде бо Чин вуҷуд надорад. Ӯ гуфт:

NC061403

“Мо ба аҳди Ҷанги нави сард бо Чин ворид намешавем ва Чин на рақиб ва на душмани мо аст. Вале ба ҳайси як эътилоф мо бояд ба таҳдидҳое, ки Чин ба амнияти мо эҷод мекунад, дар ҳамбастагӣ посух бидиҳем”.

Столтенберг гуфт, мавзӯъҳои мисли назорати силоҳ ва тағйироти иқлим аз масоили мавриди ҳамкорӣ бо Чин буда метавонад. Вале, ба гуфтааш, дар ин охирҳо ҳама шоҳиди тақвияти низомии ахири Чин ва сармоягузории ин кишвар ба тавонмандиҳои низомӣ, аз ҷумла ҳастаиаш мешаванд. “Инчунин Чин арзишҳои моро намепазирад, - гуфт раҳбари НАТО, ки – ин саркӯби эътирозҳои демократӣ... ва аққалиятҳо” мебошад.

Дар Мянмар муҳокимаи Аун Сансуҷӣ шурӯъ шуд

Ғасби қудрат аз ҷониби низомиҳо ва зиндонӣ шудани раҳбарияти мадании Мянмар садҳо ҳазор сокинонро ба хиёбонҳо баровард. Мянмар аз моҳи феврал ба ин сӯ дар умқи беназмиҳо қарор дорад

Раҳбари барканоршудаи Мянмар Аун Сансуҷӣ рӯзи 14-уми июн дар аввалин мурофиаи додгоҳӣ ҳозир шуд. Мурофиа баъди панҷ моҳи кудатои низомӣ дар ин кишвари Осиёи Ҷанубӣ барпо мешавад, ки замоне низоми демократиро таҷриба кардааст. Мурофиаи Сансуҷӣ дар пойтахт, шаҳри Нейпйидо барпо мешавад ва иттиҳоми ӯ ин аст, ки дар давраи пандемияи коронавирус муқаррароти меҳдудкунандаро нақз карда, дастгоҳҳои мухобиротиро ба берун содир кардааст. Ин замоне буд, ки ҳизби ӯ Лигаи миллӣ барои демократия дар интихобот пирӯз шуд.

Сансуҷиро инчунин дар гуноҳҳои дигар ҳам гумонбар медонанд, аз ҷумла, ба қавли мақомоти низомии кишвар, ӯ тиллову пули нақдро ҳамчун пора қабул кардааст. Ҳамроҳ бо ӯ дар курсии айбдорӣ президент ва собиқ шаҳрдори барканоршуда ҳам нишастаанд.

Баъди он ки моҳи феврали имсол ҳунтаи низомӣ ҳукумати қонуниро барканор кард, Мянмар дар як бебандубории сиёсӣ қарор дорад.

SIPRI гуфт, тамоюли коҳиши силоҳҳои ҳастаӣ ба охир мерасад

Як созмони бонуфузи муҳаққиқи силоҳ ҳушдор дод, ки зоҳиран тамоюли коҳиш дар силоҳи ҳастаӣ, ки аз охири Ҷанги сард шурӯъ шуд, хотима ёфт ва Русия ва ҳам ИМА дар сиёсати дифоии худ ба аҳамияти силоҳҳои ҳастаӣ таъкид мекунанд. Рӯзи 14-уми июн Пажӯҳишгоҳи таҳқиқоти байналмилалии сулҳи Стокҳолм (SIPRI ) гуфт, нӯҳ давлати дорои силоҳҳои ҳастаӣ – ИМА, Русия, Бритониёи Кабир, Фаронса, Чин, Ҳинд, Покистон, Исроил ва Кореяи Шимолӣ дар аввали соли 2021 дар маҷмӯъ 13080 силоҳи ҳастаӣ доштанд, ки дар қиёс бо соли 2020 коҳиши андак аст. Дар ин омор силоҳҳои қадима ҳам ҳастанд ва бидуни онҳо, ба қавли муҳаққиқон, шумори силоҳ аз 9,380 ба 9,620 афзоиш ёфтааст.

Ҳанс Кристенсен, мутахассиси калони SIPRI мегӯяд, ҳоло тамоюли умумии афзоиши кулоҳакҳои ҳастаӣ дар ҷаҳон мушоҳида мешавад. Дар маҷмӯъ, беш аз 90 дарсади силоҳҳои ҳастаии ҷаҳон дар ихтиёри Русия ва ИМА мебошад.

Додгоҳи Минск дархости озодии София Сапегаро рад кард

25 маи соли 2021. София Сапега дар як видеои мақомоти беларусӣ, ки дар он гӯё гуноҳро ба гардан мегирад, ҳозир шуд

Додгоҳе дар Минск дархости шаҳрванди Русияро, ки ҳамроҳ бо дӯстписараш Раман Пратасевич аз дохили ҳавопаймои ба таври маҷбурӣ дар Минск фурудовардашуда ҳабс шуд, рад намуд. Рӯзи 14-уми июн додгоҳи ноҳияи Партизанский ҳукм кард, ки ҳабси София Сапега мутобиқ ба қонунҳои Беларус дуруст буд ва ӯ бояд дар боздоштгоҳи муваққатӣ бимонад. Александр Филанович, вакили дифои Сапега рӯзи 13-уми июн гуфт, ки шаҳрванди Русия дар нақзи Кодекси ҷиноии Беларус гумонбар мешавад. Ӯ бо баҳонаи ин ки додгоҳ барояш нашри ҷузъиёти парвандаро манъ кардааст, нагуфт, ки зерҳимояаш мушаххасан дар чӣ айбдор мешавад.

Маркази ҳуқуқи башари “Весна” гуфт, ки Сапегаро дар ташкил ва омодагӣ ба фаъолиятҳое айбдор мекунанд, ки боиси нақзи тартиботи ҷамъиятӣ шудааст.

Сапега ва Пратасевичро рӯзи 23-юми май аз дохили ҳавопаймои ширкати Ryanair берун оварда гуфтанд, ки иттилое дарёфт намуданд, ки гӯё дар дохили ҳавопаймои хатсайти Атен-Вилнюс бомба ҷойгузорӣ шудааст. Ин фарзия ҳеҷ гоҳ тасдиқ нашуд, вале ғарбу Аврупо Беларусро дар “роҳзании сатҳи давлатӣ” гунаҳгор карданд. Дар посух мақомоти беларусӣ бо таҳримҳои ҳадафмандона муҷозот шуданд. Ба илова, Аврупо парвоз ба Беларусро қатъ карда ба ҳавопаймоҳои беларусӣ нишастан дар фурудгоҳҳои ин қаламравро манъ намуд.

Мақомоти беларусӣ видеоҳои ҷудогонае нашр карданд, ки дар он зоҳиран эътирофҳои маҷбурии Сапега ва Пратасевич дар робита бо пӯшиши эътирозҳои зидди Лукашенко тавассути шабакаи мухолифон дар Телеграм пурсида мешавад.

Шарҳи зиддунақизи мақомоти Чеченистон дар бораи рабоиши Тарамова

Аҳмад Дудаев, вазири ҳукумати Чеченистон

Мақомот дар Чеченистон, як ҷумҳурие дар Қафқози Шимолӣ иддао карданд, ки ба хотири пешгирии "аз ҷониби фаъолони ҳуқуқ рабуда шудани” як зан, ӯро аз дохили паноҳгоҳи қурбониёни хушунати хонаводагӣ берун оварданд. Ҳалимат Тарамова, духтари як муттафиқи деринаи раҳбари Чеченистон Рамазон Қодировро полис рӯзи 10-уми июн бо зӯр аз дохили як паноҳгоҳе дар Махачқалъа, пойтахти Доғистон берун бурданд. Баъди ин Тарамова ба Чеченистон бурда шуд ва ҳоло, ба қавли фаъолони ҳуқуқ, ӯ метавонад як қурбонии “куштори номусӣ” шавад. Дар як видеое, ки ҳафтаи гузашта аз ҷониби фаъолон нашр шуд, Тарамова гуфт, ки хонаашро дар Чеченистон бо сабаби “латукӯбу таҳдидҳои зиёд” тарк кард. Дар ҳамин навор Тарамова дар муроҷиат ба мақомоти Чеченистон гуфтааст, ки ӯро ба феҳристи афроди нопадидшуда ворид накунанд.

Дар як изҳороти шабакаи ҳомии аққалиятҳои ҷинсӣ гуфта шуд, ки Тарамова ба хотири тамоюлҳои ҷинсиаш мавриди таъқиб қарор гирифтааст. Ба қавли фаъолон, Тарамова дар дохили паноҳгоҳ ҳамроҳ бо дӯстдухтараш Анна Манилова нигаҳдорӣ мешуд.

Вале дар изҳороти рӯзи 13-уми июни вазири Чеченистон дар умури сиёсати дохилӣ, равобити байналмилалӣ ва иттилоот дар бораи ин қазия иттилои зиддунақиз нашр шуд. Дудаев иддао кард, ки “дар натиҷаи амалиёти ҳамоҳангшудаи полиси Чеченистону Доғистон “аз талоши рабудани” Тарамова пешгирӣ карданд. Дудаев гуфт, ки ҳеҷ қонуншикание аз ҷониби ходимони ҳифзи қонун ваё хонаводаи Ҳалимат Тарамова рӯй надодааст. Ӯ иддао кард, ки Тарамова гӯё мушкилоти саломатӣ дорад ва доимо зери назари табибон буд.

Дудаев бо ин ки ҳомиёни ҳуқуқ ва Ғарбро гунаҳгор кард, иддао кард, ки дар Чеченистон “ҳамҷинсгароӣ вуҷуд надорад”.

Рамазон Қодиров беш аз даҳ сол мешавад, ки раҳбарии Чеченистонро ба ӯҳда дорад ва пайваста дар одамрабоӣ, шиканҷа ва ҳам кушторҳои худсарона айбдор мешавад.

Столтенберг гуфт, бо Чин "ҳеҷ Ҷанги сарде вуҷуд надорад"

Брюссел, ҷаласаи сарони НАТО

Президенти ИМА Ҷо Байден дар Брюссел дар ҷаласаи сарони кишварҳои узви НАТО ширкат мекунад. Баъди чор соли раёсатҷумҳурии пуршебу фарози Доналд Трамп сафари Байден ҳамчун аломати барқарор шудани равобити Вашингтон бо ҳамкорони фароантикиаш арзёбӣ мешавад. Байден ва ҳамаи сӣ раҳбари кишварҳои узви ин паймони низомӣ дар ҷаласа ширкат мекунанд.

Як мулоқоти хусусии Байден бо президенти Туркия Раҷаб Тайиб Эрдуғон ҳам дар назар аст.

Дар се соли охир, ки раҳбарони кишварҳои узв бо сабаби пандемияи коронавирус бо ҳам гуфтугӯи рӯбарӯ накардаанд, як бастаи масоили доғе ҷамъ шудааст, ки барои баррасии ҳама ҷонибҳо нигаронида шудааст. Дар миёни ин масъалаҳо ҳам Афғонистон ва хуруҷи нирӯҳо, ҳам Русия ва Чин ва ҳам хароҷоти дифоӣ ёд мешавад.

Йенс Столтенберг, дабири кулли НАТО зимни сӯҳбаташ бо журналистон рӯзи 14-уми июн гуфт, ки ҳеҷ Ҷанги сарде бо Чин вуҷуд надорад. Ӯ гуфт:

“Мо ба аҳди Ҷанги нави сард бо Чин ворид намешавем ва Чин на рақиб ва на душмани мо аст. Вале ба ҳайси як эътилоф мо бояд ба таҳдидҳое, ки Чин ба амнияти мо эҷод мекунад, дар ҳамбастагӣ посух бидиҳем”.

Столтенберг гуфт, мавзӯъҳои мисли назорати силоҳ ва тағйироти иқлим аз масоили мавриди ҳамкорӣ бо Чин буда метавонад. Вале, ба гуфтааш, дар ин охирҳо ҳама шоҳиди тақвияти низомии ахири Чин ва сармоягузории ин кишвар ба тавонмандиҳои низомӣ, аз ҷумла ҳастаиаш мешаванд. “Инчунин Чин арзишҳои моро намепазирад, - гуфт раҳбари НАТО, ки – ин саркӯби эътирозҳои демократӣ... ва аққалиятҳо” мебошад.

Дар Исроил ҳукумати нав ба кор шурӯъ кард

Нахуствазири нави Исроил Нафталӣ Беннетт

Баъди он ки рӯзи якшанбе парлумон аъзои ҳукумати нави эътилофии Исроилро тасдиқ кард, рӯзи 14-уми июн аъзои нави ҳукумат ба кор шурӯъ кард. Бо ҳамин, давраи нахуствазирии 12-солаи Бенямин Нетаняҳу дар Исроил ба охир расид. Рӯзи 13-уми июн аъзои Кнессет дар натиҷаи як овоздиҳии бисёр танготанг, бо бартарии 60 бар 59 овоз, ҳукумати навро тасдиқ карданд.

Нахуствазири нави Исроил Нафталӣ Беннетт раҳбари ҳизби миллатгарои “Ямина” 49 сол дорад ва шоми 13-уми июн ба мақоми нахуствазирӣ тасдиқ шуд. Субҳи душанбе таъини вазирони ҳукуматӣ оғоз гардид.

Баъди тасдиқи аъзои ҳукумати нави Исроил, президент Ҷо Байден гуфт, ки давлати яҳудӣ муттафиқи аслии ИМА аст ва ҳамеша як пуштибони амниятии Исроил боқӣ мемонад. Байден гуфт, ки бо ҳукумати Беннетт ҳамаҷониба ҳамкорӣ хоҳад кард. Беннетт 13-умин нахуствазири Исроил шуд.

Домоди Мирзиёев бо $6 ҳазори андозсупорандагон лавозимоти рӯимизӣ харидааст

Аввал аз тарафи рост Ойбек Турсунов, домоди президенти Узбекистон Шавкат Мирзиёев

Хабари аз сӯи вазорати мудофиаи Узбекистон харидани ду худкори тилоӣ, ки ҳар кадоме наздики 3 ҳазор доллар арзиш доранд, корбарони узбекистонии шабакаҳои иҷтимоиро ба баҳс кашид.

Вазорати мудофиаи Узбекистон дар шарҳи хабар навишт, худкор (ручка)-ҳо бо маблағи буҷаи вазорат харида мешаванд.

Ойбек Турсунов, мақомдори дастгоҳи президент ва ҳамзамон домоди президенти Узбекистон Шавкат Мирзиёев низ бо маблағи буҷаи он кишвар дар ивази 6221 доллари ИМА ду дона худкори навъи Montblanc харидааст.

Ин худкорҳо 15 октябри соли 2018 харида шудаанд.

Худкорҳои харидаи домоди Мирзиёев гаронарзиштар аз худкорҳое ҳастанд, ки вазорати мудофиаи Узбекистон рӯзи 9 июни соли ҷорӣ харидааст.

Халилзод эҳтимоли таъсиси пойгоҳи ИМА дар Қазоқистонро шарҳ дод

Залмай Халилзод, намояндаи вижаи ИМА дар умури Афғонистон

Залмай Халилзод, намояндаи вижаи ИМА дар умури Афғонистон дар як нишасти маҷозии рӯзи 13 июн ҳадафи сафарашро ба Қазоқистон шарҳ дод.

Халилзод дар Қазоқистон бо мақомоти баландпояи расмӣ мулоқот ва "раванди сулҳ дар Афғонистон, хуруҷи неруҳои амрикоӣ, инчунин рушди ояндаи робитаҳои минтақа, тиҷорату ҳамкориро баррасӣ мекунад".

Рӯзи 15 апрели соли ҷорӣ нашрияи New York Times навишт, ки мақомоти расмии ИМА бо мақомоти Қазоқистон, Узбекистон ва Тоҷикистон тамос гирифта, дар мавриди ҷойгирсозии пойгоҳи низомии амрикоӣ дар минтақа гуфтугӯ кардаанд.

Намоянди вижаи Амрико гуфт, ҳанӯз дар мавриди таъсиси пойгоҳи низомӣ дар минтақа ба хулосае нарасидаанд.

Халилзод дар мавриди ояндаи Афғонистон гуфт, "артиши амрикоӣ хориҷ мешавад, аммо Амрико мемонад". Вай илова кард, ки беҳтарин роҳи ҳалли низоъ дар Афғонистон роҳи ҳалли сиёсист, на низомӣ.

Залмай Халилзод 21 сентябри соли 2018 намояндаи вижаи ИМА дар умури Афғонистон таъйин шуд.

Ёфтҳои бештар

XS
SM
MD
LG