Пайвандҳои дастрасӣ

Хабари нав

Хабарҳо

Посгоҳҳои марзии атрофи Сух баста шудаанд

Посгоҳҳои марзӣ дар дохили қаламрави Қирғизистон дар атрофи ноҳияи Сухи Узбакистон рӯзи чаҳоршанбе баста буданд. Маълум нашудааст, ки ин посгоҳҳо чӣ вақт боз мешаванд.

Рӯзи якшанбе байни сокинони Сух ва марзбонони қирғиз ҳангоми кашидани хати интиқоли барқ ба посгоҳи марзии қирғизҳо задухурд ба амал омад. Бино ба хабарҳо се шаҳрванди Узбакистон аз тир захм бардоштаанд ва як корманди пулиси Қирғизистон сахт лату кӯб шудааст.

30 нафар шаҳрвандони Қирғизистон дар Сух гаравгон гирифта шуданд. Рӯзи дигар ҳамаи онҳоро раҳо карданд.

Саидҷон Эратов-муовини намояндаи ҳукумати Қирғизистон дар вилояти Ботканд ба радиои Озодӣ гуфт, роҳҳо ва посгоҳҳои марзии атрофи Сухи Узбакистон замоне боз хоҳанд шуд, ки ҷониби Узбакистон хисороти пешомадаро ҷуброн кунад.

Ҳамаи хабарҳои имрӯзро дар инҷо бихонед

Ҷангҷӯёни Толибон як ноҳияро дар шимоли Афғонистон гирифтаанд

Сарбози афғонистонӣ

Мансабдорони Афғонистон гуфтанд, ки ҷангҷӯёни Толибон баъд аз задухӯрди чандсоата бо нерӯҳои давлатӣ ноҳияи Барака, воқеъ дар шимоли ин кишварро ишғол намуданд.

Охири ҳафтаи гузашта нерӯҳои Амрико хуруҷ аз Афғонистонро оғоз карданд. Муҳаммад Шерзод, раиси ноҳияи Баракаи вилояти Бағлон, рӯзи 5-уми май ба Радиои Озодӣ гуфт, сабаби ақибнишинии нерӯҳои давлатӣ камбуди силоҳу муҳиммот будааст.

Мақомдорони амниятӣ мегӯянд, Толибон бо талафоти бузург рӯ ба рӯ шуданд. Дар айни замон даҳ сарбози афғонистонӣ кушта ва 16 каси дигар ба асорати Толибон афтидаанд.

Бар илова, дар як ҳамла ба посгоҳи нерӯҳои артиши Афғонистон дар вилояти Бағлон 9 сарбоз ба қатл расид.

Бо дастури раиси ҷумҳури Амрико, Ҷо Байден, нерӯҳои Иёлоти Муттаҳида то 11-уми сентябр аз Афғонистон берун мешаванд. Баъзе аз коршиносон ин тасмими Амрикоро танқид карда, аз он нигаронанд, ки Толибон бори дигар қудратро ба даст мегиранд.

Вазорат гуфт, ки хонандагони тоҷик кай ба таътил мераванд

Акс аз бойгонӣ

Вазорати маориф ва илми Тоҷикистон замони таътили тобистонаи хонандагони мактабҳои миёнаро эълон кард. Бино бар он, хонандагони синфи якум аз 7-уми июн ва муҳассилони синфҳои 2-11 аз 14-уми ҳамон моҳ ба истироҳат мераванд.

Дафтари матбуоти Вазорати маориф рӯзи 6-уми май ба Радиои Озодӣ хабар дод, ки таътили тобистона то 31-уми август идома хоҳад кард. “Имсол тағйироте дар шурӯи таътили тобистона нест ва хонандагон дар умум то 14-уми июн дарсро ҷамъбаст карда, ба истироҳат мераванд”, -- гуфт ҳамсуҳбати мо дар вазорат.

Соли гузашта хонандагони мактабҳои миёнаро аз 27-уми апрел то нимаи моҳи август ба таътил фиристоданд. Вазорати маориф ва илми Тоҷикистон ин вазъро ба мавҷудияти коронавирус дар кишвар рабт дода буд.

HRW аз хавфи кам шудани маблағгузорӣ ба низоми тандурустии Афғонистон ҳушдор дод

Human Rights Watch ё Дидбони Ҳуқуқи Башар, қароргоҳаш дар Ню-Йорк, ҳушдор дод, ки коҳиши ҳимояи молии Афғонистон аз сӯи ҷомеаи байналмилалӣ боис ба маҳдуд шудани дастрасии занон ба хадамоти тиббӣ шудааст.

Ин созмонии ҳомии ҳуқуқи башар мегӯяд, дар ояндаи наздик ҳам интизор меравад маблағгузорӣ боз камтар шавад, чун низомиёни хориҷӣ барои берун шудан аз ин кишвар омодагӣ мебинанд.

HRW дар гузорише, ки рӯзи 6-уми май нашр кард, маҳдудиятҳоеро номбар намуд, ки занон афғон ҳангоми гирифтани ёрии тиббӣ бо он рӯ ба рӯ мешаванд. Созмон ҳамчунон аз бад шудани бахши тандурустии Афғонистон бинобар коҳиши кумакҳои байналмилалӣ гузориш додааст.

"Коҳиши маблағгузорӣ аллакай таъсири хатарноке барои ҳаёт ва зиндагии бисёре аз духтарон гузоштааст, чунки дастрасӣ ба хадамоти тиббӣ коҳиш ёфта, сифати он поён рафтааст", -- гуфта мешавад дар гузориш.

Хизер Барр, ҳамраиси бахши ҳуқуқи занони Дидбони Ҳуқуқи Башар мегӯяд, "созмонҳои кумакрасон мунтазир нишастаанд, то бубинанд, ки пас аз хуруҷи нерӯҳои хориҷӣ Толибон бештари қаламрави кишварро зери даст мегиранд ё не."

"Аммо ин барои кам кардани маблағгузорӣ ба хидматрасонии асосии тиббӣ, ки гуруҳои ёрирасон дар минтақаҳои ноамн ва зери дасти Толибон ба мардум мерасонанд, баҳона шуда наметавонад", -- таъкид шудааст дар гузориш.

Вазири пешини тандурустии Қазоқистон ба исрофи $4,1 млн пули буҷа айбдор мешавад

Kazakh Healthcare Minister Yelzhan Birtanov attends a public hearing in Almaty, Kazakhstan February 24, 2020. REUTERS/Pavel Mikheyev

Вазири пешини тандурустии Қазоқистон Елжан Биртанов ва муовинаш Олжас Абишев ба исрофи пулҳои буҷа ва расонидани зарари моддӣ ба давлат дар миқдори 1,5 миллиард танга айбдор мешаванд.

Айбдоркунандаи давлатӣ 5-уми май дар додгоҳи Нурсултон гуфт, Вазорати тандурустии Қазоқистон соли 2015 барои дастрас кардани низоми иттилоотие бо ширкати "Ericsson Nikola Tesla"-и Хорватия қарордод имзо кардааст.

Ба гуфтаи додситон, Биртанов бо вуҷуди он ки медонист, платформаи мазкур корношоям аст, ба раҳбарияти кишвар иттилои дуруғ пешниҳод карда, фармон дар бораи хариди онро имзо кардааст.

"Ин платформа то ҳол мавриди истифода қарор нагирифтааст. Он бо низоми иттилоотии Вазорати тандурустии Қазоқистон пайваст карда нашудааст ва ин ба кори ниҳодҳои тандурустӣ дар давраи пандемияи таъсири манфӣ расонд", - изҳор дошт додситон Толеген Жараспаев.

Бино ба фарзияи тафтишот, Биртанов ва "шахсони дигар" пулҳои буҷаро исроф карда, ба давлати Қазоқистон дар ҳаҷми 1,5 миллиард танга ё 4,1 миллион доллар зарар расондаанд.

Мақомоти Қазоқистон рӯзи 3 ноябри соли 2020 боздошти Биртановро тасдиқ карданд. Додгоҳ Биртановро дар марҳилаи тафтишот ба ҳабси пешакӣ гирифт.

Биртанови 49-сола аз моҳи январи соли 2017 то охири июни соли 2020 вазири тандурустии Қазоқистон буд. Вай дар пасманзари афзоиши гирифторони вабои коронавирус ва норасоии кат дар беморхонаҳои Қазоқистон аз мақомаш истеъфо дод.

Пештар аз он Олжас Абишев, муовини Биртановро бо гумони исрофи наздики 500 миллион тангаи буҷа боздошт карда буданд.

Раиси ҷумҳури Қирғизистон ба деҳаҳои осебдида дар низои марзӣ бо Тоҷикистон рафт

Содир Ҷабборов дар деҳаи Мақсат, 6-уми майи 2021

Президенти Қирғизистон Содир Ҷабборов рӯзи 6-уми май дар доираи як сафари корӣ ба вилояти Бодканди ин кишвар рафт.

Ба иттилои хадамоти матбуотии президенти Қирғизистон, Ҷабборов дар ҷараёни ин сафар аз деҳаҳое дидан хоҳад кард, ки дар натиҷаи низои ахири марзӣ бо Тоҷикистон осеб дидаанд. Мулоқоти ӯ бо сокинони деҳаҳои мазкур низ дар назар аст.

Муҳофизони президенти Қирғизистон ба рӯзноманигорон ва сокинон иҷозат надоданд, ки мулоқот бо ӯро акс ё ба навор гиранд. Хадамоти матбуотии Ҷабборов ин хабарро шарҳ надодааст.

Содир Ҷабборов аллакай бо сокинони деҳаи Мақсат дар назди бинои сӯхтаи мактабе мулоқот карда, ваъда додааст, ки ҳамаи хонаҳои осебдида дар давоми ду моҳ барқарор карда хоҳанд шуд. Ӯ гуфтааст, "то вазифаҳои аввалиндараҷа барои барқарорсозии вилояти Бодканд ба анҷом нарасанд, ба Тоҷикистон сафар нахоҳад кард".

Сафари президенти Қирғизистон ба Тоҷикистон дар нимаи дувуми моҳи майи имсол дар назар буд.

Рӯзҳои 28 ва 29-уми апрел дар сарҳади Тоҷикистону Қирғизистон задухӯрди мусаллаҳона сурат гирифт. Дар натиҷаи он аз ҳарду ҷониб даҳҳо нафар куштаву садҳо кас захмӣ шуданд.

Тибқи иттилои дафтари матбуоти ҳукумати вилояти Суғд, дар ин муноқиша аз ҷониби Тоҷикистон ​19 нафар ба ҳалокат расида, ​87 кас захмӣ шудаанд. Ҷониби Қирғизистон мегӯяд, дар ин ҳодиса 189 шаҳрванди он кишвар маҷруҳ шуда, 36 кас, аз ҷумла ду кӯдак, ҷон бохтанд.

Ҳарду кишвар якдигарро ба оғози ҷанг муттаҳам мекунанд ва Додситониҳои кулли Тоҷикистону Қирғизистон барои пажӯҳиши ҳодиса парвандаҳои ҷиноӣ кушоданд.

Тоҷикистону Қирғизистон 970 километр марз доранд ва аз ин ҳисоб танҳо 519 километри онро муайян ва нишона гузоштаанд. Минтақҳои дигари баҳсӣ, ки аз обу замину чарогоҳ иборатанд, ҳар чанд вақт сабаби занозаниву тирпарронии сокинон ва нерӯҳои ду кишвар мешаванд.

13 май – Иди Фитр дар Тоҷикистон

Шӯрои уламои Маркази исломии Тоҷикистон рӯзи Иди Фитрро эълон кард. Бино ба қароре, ки 6-уми май қабул шуд, Иди Рамазон дар Тоҷикистон 13-уми май таҷлил мешавад. Намози идро соати 6-и субҳ мехонанд.

Шӯрои уламо имсол нисоби закотро 25 ҳазор сомонӣ муқаррар кардааст, ки аз он 625 сомонӣ закот дода мешавад. Садақаи фитрро 6 сомонӣ барои як нафар муайян карданд.

Барои афроде, ки наметавонанд рӯзаи моҳи Рамазонро бигиранд, фидя ба маблағи 360 сомонӣ барои 30 рӯз таъин шудааст.

Шӯрои уламо аз мардуми доро хостааст, закоти худро дар баробари фақирону ниёзмандон ба хонаводаи онҳое низ бидиҳанд, ки дар ҷанҷоли марзӣ бо Қирғизистон кушта шуданд.

Ба иттилои расмӣ, дар задухӯрди мусаллаҳонаи рӯзи 29-уми апрел аз ҷониби Тоҷикистон 19 нафар кушта ва 87 кас захмӣ шуданд. Мақомоти Қирғизистон мегӯянд, дар ин ҳодиса 189 шаҳрванди он кишвар маҷрӯҳ шуда, 36 кас, аз ҷумла ду кӯдак, ҷон бохтанд.

Иди Фитр ва ё анҷоми моҳи Рамазон барои пайравони дини ислом дар Тоҷикистон дар ҳоле фаро мерасад, ки мақомот соли гузашта бо ҳадафи пешгирӣ аз сирояти коронавирус намозҳои таровеҳу ид ва панҷвақтаву ҷумъаро дар масҷидҳо манъ карда буданд.

Ин намози Иди Фитр аз нахустин ибодати идона дар масҷидҳо пас аз хуруҷи пандемия дар Тоҷикистон хоҳад шуд.

Дари масҷидҳоро дар Тоҷикистон соли гузашта, пас аз густариши бемории ҳамагир, баста, танҳо 1-уми феврали имсол боз карданд.

Амрико аз ҳифзи моликияти зеҳнии ваксинаҳои зидди COVID-19 даст мекашад

Маросими сӯзонидани ҷасади қурбониёни COVID-19 дар Ҳинд

Маъмурияти президенти Амрико Ҷо Байден рӯзи 5-уми май гуфт, аз ҳимояи моликияти зеҳнии ваксинаи зидди COVID-19, ба хотири ҳар чи зудтар поён додани пандемия, даст мекашад.

Кэтрин Тай, намояндаи тиҷоратии Амрико, мавқеи ҳукуматашро дар пасманзари музокирот бо Созмони Ҷаҳонии Савдо ва ба хотири содда кардани қоидаҳои тиҷорат эълон кард, “то кишварҳои бештаре имкон ёбанд, ваксинаи наҷотбахшро истеҳсол кунанд”.

Тай гуфт, маъмурияти президент Байден ҷонибдори ҳимояи моликияти зеҳнӣ ҳаст, “аммо ба хотири поён додани пандемия, аз тасмими даст кашидан аз ҳимояи зеҳнии ваксинаи зидди COVID-19 ҷонибдорӣ мекунад”.

Тедрос Адҳаном Гебрейсус, раиси Созмони Ҷаҳонии Тандурустӣ, иқдоми Амрикоро “тасмими сарнавиштсоз” дар амри мубориза бо COVID-19 номид.

Аммо Федератсияи байналмилалии тавлидкунандагони дору, гуфтанд, аз ин тасмим нигаронанд. Масъулони Федератсия гуфтанд, истеҳсоли ваксинаҳоро афзоиш нахоҳанд дод, чунки истеҳсоли ваксина кори мураккаб аст ва бо коҳиш додани ҳифзи моликияти зеҳнӣ намешавад тавлиди ваксинаро бештар кард.

Ҳоло Ҳинд беш аз ҳар кишвари дунё ба ваксина ниёз дорад, чун ба мавҷи шадид ва пурқурбонии коронавирус рӯ ба рӯ шудааст. Ҳинд аз марги боз 3780 нафар аз короновирус хабар дод, ки мизони аз ҳама баланди маргу мир дар як рӯз аст.

Дар ин кишвар рӯзи 5-уми май 382 ҳазор мавриди нави гирифторӣ ба COVID-19 сабт шудааст. Мақомоти тандурустии ин кишвар мегӯянд, нуқтаи авҷи мавҷи кунунии пандемияи ҳафтаҳои наздик фаро нахоҳад расид.

Марги мармузи мунтақиди Илҳом Алиев дар Истамбул

Байрам Мамедов.

Ҷасади фаъоли мадании озарӣ Байрам Мамедовро дар шаҳри Истамбули Туркия пайдо карданд. Мамедов дар шароити мармузе ба ҳалокат расидааст. Ба гуфтаи дустони Мамедов, ҷасади фаъоли озариро чанд рӯз пеш аз баҳр пайдо карданд ва пулиси Туркия ҳоло ҳодисаро таҳқиқ дорад.

Мамедов баъди он машҳур шуд, ки ҳамроҳи Ғиёсиддин Иброҳимов 24-уми майи соли 2016 дар рӯзи зодрӯзи президенти Озарбойҷон Илҳом Алиев пайкараи падари ӯ президенти пешини ин кишвар Ҳайдар Алиевро кашида, дар зери он навиштанд, ки "Нест бод низом!" ва "Рӯзи ғуломон муборак бошад!". Сипас акси расмро дар Интернет нашр карданд. Баъди чанд рӯз ҳар ду боздошт ва бо ҷурми нигаҳдории маводи мухаддир 10 сол аз озодӣ маҳрум гаштанд.

Ҳар ду фаъоли озарӣ ҳамаи иттиҳомот алайҳи худро сохта номиданд. Мамедов гуфт, зери шиканҷа гуноҳро ба гардан гирифт. Додгоҳи ҳуқуқи инсони Аврупо соли 2020 мақомоти Озарбойҷонро вазифадор кард, ки барои таъқиби бидуни асос ба он ду нафар ҷуброн пардозад.

Amnesty International парванда алайҳи фаъолони озариро сохта ва худи онҳоро маҳбуси сиёсӣ номид.

"Шоиста бегуноҳ аст". Сарнавишти узбекистоние, ки дар таркиши Петербург айбдор мешавад

Шоиста Каримова дар додгоҳ.

Дар миёни 11 муҳоҷири Осиёи Марказӣ, ки дар ташкили таркиши метрои Петербург дар рӯзи 3 апрели соли 2017 айбдор мешаванд, Шоиста Каримоваи 49-сола, сокини вилояти Намангони Узбекистон низ ҳаст.

Елена Бабинтсева, сокини шаҳри Петербург ба сарнавишти Шоиста таваҷҷуҳ кардааст, ки вай худро комилан бегуноҳ медонад. Бабинтсева гуфт, ки парвандаи ҷиноии марбут ба таркиши метроро таҳқиқ мекунад ва ба хулоса расидааст, ки Шоиста комилан бегуноҳ аст.

Аз замони таркиши метро дар Петербурги Русия 4 сол гузашт. Рӯзи 3 апрели соли 2017 дар он таркиш 15 кас кушта ва 67 кас маҷруҳ шуданд. Ин ҳамларо ба эҳтимоли зиёд муҳоҷири қирғизистонӣ Акбарҷон Ҷалилов анҷом додааст.

Соли 2019 додгоҳ 11 муҳоҷир аз Узбекистон, Қирғизистон ва Тоҷикистонро аз 19 сол то ҳабси якумрӣ маҳкум кард. Наздикони муҳоҷирон гуфтанд, онҳо дар ҷараёни тафтишот шиканҷа шудаанд.

Шоиста Каримова, муҳоҷири узбекистонӣ ба 20 соли зиндон маҳкум шудааст. Додситонӣ ӯро ба он айбдор кард, ки ба террористон имкон додааст, аз телефонаш гуфтугӯ кунанд. Шоиста айби эъломшударо қабул надорад.

Елена Бабнитсева ба таҳқиқи саргузашти Шоиста шуруъ кардааст.

"Акнун ман шак надорам, ки Шоиста бегуноҳ аст. Дар ду соли охир ман руҳу равони ӯро шинохтаам, бо парвандаи ҷиноӣ комилан шинос шудаам, тамоми наворҳои марбут ба таркишро дидам ва мухолифтаҳои зиёде пайдо кардам. Ҳукми додгоҳро ҳам омӯхтам ва норушаниҳову норасоиҳои зиёдеро ошкор кардам. Дар ҳукмномаи 111-саҳифаӣ шумо ба ин хулоса мерасед, ки додгоҳ ба ин норушаниҳо посухе надорад", - гуфт Елена.

Ин сокини Петербург гуфт, ки дар парвандаи Шоиста Каримова низ иштибоҳҳои зиёдеро ошкор кардааст.

"Бадтар аз ин он аст, ки далелҳои шайъӣ нобуд карда шудаанд ва ба вакилони мудофеъ имкон намедиҳанд, ки онҳоро дубора аз назар гузаронанд. Қатори таркондашуда ҳам нобуд карда шудааст. Ману Шоиста бештар аз 100 мактуб радду бадал кардем. Вай хоҳони адолат аст, вай бовар дорад, ки адолат тантана мекунад", - гуфт Бабинтсева.

Муфаттиши Кумитаи тафтишотии Русия Андрей Жигулин гуфт, ҳангоми кофтукоб аз Каримова як норинҷак, ду детонатор ва дигар лавозимот пайдо шудааст.

Мусо Абдулваҳҳобов, вакили мудофеи Шоиста гуфт, ки парвандаи нафари таҳти ҳимояташ бо роҳи тақаллуб кушода шудааст.

Шоиста Каримова дар додгоҳ гуфт, ки Акбарҷон Ҷалиловро намешинохт, аммо чанд моҳ дар қаҳвахонаи "Лесное" дар Петербург ба ҳайси фаррош кор кардааст.

Рӯзи 6 апрели соли 2017 - се рӯз баъд аз таркиш - Шоиста ва ду шаҳрванди Тоҷикистон ҳамроҳи вай, ки дар қаҳвахонаи мазкур кор мекарданд, боздошт шуданд.

Дар Туркманистон иштирокчиёни Ҷанги дувуми ҷаҳонӣ туҳфаҳои президентиро мехаранд

Собиқадорони Ҷанги дувуми ҷаҳонӣ аз Туркманистон. Акс аз бойгонӣ.

Аз иштирокчиёни Ҷанги дувуми ҷаҳонӣ ва ақибгоҳ талаб шудааст, ки барои туҳфаҳои президентӣ маблағ ҷамъ оваранд. Чун анъана, ҳамасола рӯзи 9 май ба иштирокчиёни Ҷанги дувуми ҷаҳонӣ аз номи президент туҳфа тақдим мекунанд.

Ин соли дувум аст, ки аз иштирокчиёни ҷанг барои туҳфаҳои президент маблағ ҷамъ меоваранд.

Ба навиштаи расонаҳо, дар вилояти Лебапи он кишвар ҷамъоварии маблағ сурат гирифтааст. Аксари иштирокчиёни ҷанг бештар аз 90 сол умр доранд.

Соли гузашта иштирокчиён барои туҳфаҳои президент 1000 манатӣ супориданд ва дар иваз медали 75-солагии пирӯзӣ дар Ҷанги дувуми ҷаҳонӣ дарёфт карданд.

Дар соли 2017 ба иштирокчиёни Ҷанги дувуми ҷаҳонӣ дар Туркманистон дар ҳаҷми 26 доллари ИМА туҳфа дода буданд.

Дар ҳоли ҳозир маълум нест, ки дар Туркманистон чи теъдод иштирокчии ҷанг боқӣ мондааст.

Эмомалӣ Насриддинзода ба ҷойи Абдуҷаббор Раҳмонзода ёвари президент шуд

Эмомалӣ Насриддинзода

Эмомалӣ Насриддинзода, вакили порлумон, рӯзи 5-уми май ёрдамчии президенти Тоҷикистон дар мавриди масъалаҳои рушди иҷтимоӣ ва робита бо ҷомеа таъин карда шуд. Ӯ то ин дам раёсати Кумита оид ба қонунгузорӣ ва ҳуқуқи инсони Маҷлиси Намояндагонро ба уҳда дошт. Эмомалӣ Насриддинзодаи 55 сола, зодаи шаҳраки Кангурти ноҳияи Темурмалик ва доктори илми ҳуқуқ аст. То соли 2016 ба ҳайси устоди ҳуқуқ дарс мегуфт ва мудири факултаи ҳуқуқшиносии Донишгоҳи миллии Тоҷикистон буд. Рӯзи 4-уми май Абдуҷаббор Раҳмонзодаи 62-сола аз симати ёрдамчии президент оид ба масъалаҳои рушди иҷтимоӣ ва робита бо ҷомеа барканор гардид. Ӯро сафири Тоҷикистон дар Узбекистон таъин карданд. Мухолифони тоҷик шеваи тағйироти кадриро дар идораҳои давлатии Тоҷикистон танқид мекунанд. Онҳо мегӯянд, ин тағийрот на бар асоси шоистасолорӣ, балки бештар бар асоси садоқат ба раҳбарият сурат мегирад.

Бист сол ҳукми зиндони дипломати баландпояи Эрон дар Белгия

Дипломати Эрон Асадуллоҳ Асадӣ

Ҳукми 20 сол зиндони дипломати эронӣ дар Белгия баъди он ки аз шикоят бурдан ба додгоҳи зинаи болоӣ даст кашид, ба иҷро даромад. Ӯро ба қасди бомбгузорӣ дар тазоҳуроти мухолифон дар Париж гунаҳкор карданд.

Вакили дифоъ рӯзи 5-уми май гуфт, ҳукми додгоҳ пас аз он ба иҷро даромад, ки Асадуллоҳ Асадӣ, дипломати эронӣ дар Вена, аз шикоят бурдан даст кашид. Асадӣ рӯзи 4-уми феврал пас аз таҳрезии бомгузорӣ дар тазоҳуроти Шӯрои Миллии Муқовимати Эрон (ШММЭ), як гуруҳи мухолифони фирорӣ дар Париж, моҳи июни соли 2018 гунаҳкор дониста шуд.

Се айбдоршавандаи дигар низ, ба ин ҷурм аз озодӣ маҳрум карда шуданд. Бомбгузории қаблан таҳрезишуда дар пайи як амалиёти ҳамоҳангшудаи мақомоти амнияти Фаронса, Олмон ва Белгия ҷилавгирӣ карда шуд.

Ҳукумати Эрон ин ҳукмро шадидан маҳкум карда, иттиҳом алайҳи дипломатро рад кард ва гуфт, иттиҳомоти Шӯрои Миллии Муқовимати Эрон, ки Теҳрон ин гуруҳро террористӣ мехонад, дурӯғ аст.

Шӯрои Миллии Муқовимати Эрон, як ҷиноҳи мухолифони дар табъид қарордоштаи "Муҷоҳидини Ҳалқ" аст, ки мехоҳад ҷумҳурии исломиро сарнагун кунад. Додситон Ҷорҷ-Анри Боте рӯзи 5-уми май дар Антверпен гуфт, мақомоти Белгия кафолат доданд, ки Асадиро бо шаҳрвандони кишварҳои ғарбӣ, ки дар Эрон дар боздошт ҳастанд, иваз намекунад.

"Ҳукумати Белгия ин гуна табодулро (манзур табодули зиндониён) ҳеҷ гоҳ матраҳ нахоҳад кард", -- гуфт ӯ.

Асадӣ нахустин мансабдорӣ эронӣ аст, ки бо ҷурми терроризм дар Аврупо пас аз инқилоби исломӣ дар соли 1979 дар додгоҳ муҳокима шуд.

Асадӣ нахуст дар Олмон боздошт шуда, баъдан барои муҳокима ба Белгия супурда шуд. Дар ҳукми додгоҳи Белгия гуфта мешавад, Асадӣ шабакаи ҷосусии Эронро роҳбарӣ дошт ва бо амри Теҳрон амал мекард.

Барои блогер Отабек Сатторӣ дар Узбекистон 11 сол зиндон хостанд

Отабек Сатторӣ

Додситон ё айбдоркунандаи давлатӣ дар Узбекистон барои блогер Отабек Сатторӣ 11 сол зиндон талаб кард. Сатторӣ, ки бо наворҳои танқидиаш маъруф аст, дар асоси 3 моддаи Кодекси ҷиноии Узбекистон айбдор мешавад.

Додситон гуфт, Отабек Сатторӣ айбҳоро эътироф накарда, зарари расонидаашро низ ҷуброн накардааст. Ба ин далел, ҳолатҳои сабуккунанда нисбат ба ӯ татбиқ карда намешавад. Ҳукми ниҳоии додгоҳ рӯзи 10-уми май эълом хоҳад шуд.

Сатториро рӯзи 30-юми январи имсол дастгир карданд. Ӯ ба тамаъҷӯӣ, туҳмат ва таҳқир муттаҳам аст.

Чанде аз созмонҳои байналмилалӣ аз мақомоти Узбекистон даъват карданд, ки блогер Отабек Сатториро аз ҳабс озод кунанд. Созмонҳо мегӯянд, вай бо айбҳои беасос боздошт шудааст.

Дипломатҳои G-7 чигунагии тақсими ваксинаи зидди COVID-19-ро баррасӣ мекунанд

Вазирони корҳои хориҷии ҳафт кишвари саноатӣ ё сарватманди ҷаҳон рӯзи 5-уми май дар Лондон дар мавриди чигунагии тақсими ваксинаи зидди COVID-19 баҳс мекунанд.

Амрико, Бритониё, Канада, Фаронса, Олмон, Италия ва Ҷопон узви G-7 мебошанд.

Ин кишварҳо дар ҳоли ҳозир бо фишори афзоянда рӯ ба рӯ ҳастанд, то ваксинаро дар ихтиёри кишварҳои нодоре бигузоранд, ки дар заминаи ваксингузаронӣ бар шаҳрвандони худ ақиб мондаанд.

Кишварҳои сарватманди ҷаҳон бештар бар барномаи COVAX-и Созмони Ҷаҳонии Тандурустӣ такя кардаанд. Ин барнома ваксинаи зидди COVID-19-ро бештар дар ихтиёри кишварҳои камтар рушдёфта қарор медиҳад.

Президенти Қирғизистон Конститутсияи навро имзо кард

Содир Ҷабборов, раиси ҷумҳури Қирғизистон, ҳангоми имзои Конститутсияи нав. Бишкек, 5-уми майи 2021

Рӯзи 5-уми май, дар рӯзи қабули Конститутсияи Қирғизистон, президенти он кишвар Содир Ҷабборов Қонуни асосии навро имзо кард.

Маросими имзои Конститутсияи нав бо иштироки вакилони порлумон, додрасҳо, аъзои ҳукумат ва фаъолони ҷомеаи Қирғизистон сурат гирифт. Раъйпурсӣ барои қабули Конститутсияи нави он кишвар рӯзи 11-уми апрел баргузор шуда буд.

Рӯзи 17-уми ноябри соли 2020 дар сомонаи порлумони Қирғизистон тарҳи қонуни баргузории раъйпурсӣ барои қабули Конститутсияи нав нашр шуд. Дар хабари порлумон омада буд, ки тарҳи навро 90 вакил таҳия кардаанд.

Тарҳи қонун то 2-юми феврал таҳриру коркард шуда, ба порлумон ирсол гардид. Рӯзи 9-уми феврал тарҳи Конститутсияи нав дар сомонаи расмии порлумони Қирғизистон интишор шуд. Ҳамин тарҳи қонун рӯзи 11-уми апрел ба раъйдиҳӣ гузошта шуда, аз сӯи шаҳрвандони Қирғизистон қабул гардид.

Ҳуқуқшиносон ва коршиносон дар Қирғизистон борҳо зидди қабули ин тарҳ садо баланд карданд. Ба гуфтаи онҳо, тарҳи нав кишварро ба худкомагӣ мерасонад.

Кишоварзонро дар Тоҷикистон як сол аз пардохти андози замин озод карданд

Рофеъ Раҳмонов, кишоварзи тоҷик аз Ҳисор

Вакилони Маҷлиси Намояндагони Тоҷикистон аз тарҳе, ки кишоварзони тоҷикро аз андоз ё молиёти ягонаи замин озод мекунад, ҷонибдорӣ карданд.

Файзиддин Қаҳҳорзода, вазири молияи Тоҷикистон, рӯзи 5-уми май дар ҷаласаи порлумон гуфт, "бо мақсади дастгирии кишоварзон ва таъмини бозори истеъмолӣ дар шароити пандемияи COVID-19 кишоварзон соли 2021 аз пардохти андози ягонаи замин озод мешаванд."

Қабули ин тарҳ аз сӯи вакилон дар ҳолест, ки кишоварзон муҳлати имтиёзро хеле кӯтоҳ медонанд. Деҳқонон мегӯянд, агар пардохт аз андози ягонаи замин на барои як сол, балки дастикам барои панҷ сол бекор карда мешуд, шояд дар танзими нархи маҳсулоту афзоиши тавлидоти кишоварзӣ мусоидат мекард.

Юсуф, деқоне аз ноҳияи Ваҳдат, гуфт, барои кишт дар майдони як гектар замин наздики 300 сомонӣ андози ягонаи заминро пардохт мекунад. "Ин хуб аст, вале танҳо барои як сол бисёр кам аст", -- гуфт ӯ.

Тарҳи озод намудани деҳқонон аз пардохти андози ягонаи замин, ҳанӯз се моҳ қабл эълон шуда буд. Эмомалӣ Раҳмон, раиси ҷумҳурии Тоҷикистон, рӯзи 26-уми январ дар паёми солонааш гуфт, имсол кишоварзонро аз андози ягонаи замин озод мекунанд.

Маблағи андози замин дар Тоҷикистон солона ҳудуди 200 миллион сомонӣ ё муодили тақрибан 20 миллион доллар аст. Раиси ҷумҳури Тоҷикистон ба ҳукумат дастур дод, ки барои пӯшонидани ин қисми буҷети давлат чора ҷӯянд, зеро ин маблағи каме нест.

Рӯзи 5-уми май Файзиддин Қаҳҳорзода, вазири молия, дар порлумон гуфт, ҷуброни ихтисори сарчашмаи даромадҳои буҷети маҳаллӣ аз ҳисоби андози ягонаи замин 139,8 миллион сомонӣ буда, аз ҳисоби пардохтҳои гумрукӣ пешбинӣ шудааст.

"Зиёд намудани нақшаи воридоти пардохтҳои гумрукӣ ба маблағи 139,8 миллион сомонӣ бо дар назардошти дурнамои афзоши ҳаҷми воридот бо афзоши арзиши гумрукии мол дар соли 2021 ва тағйирёбии қурби миёнаи пули миллӣ нисбат ба доллари амрикоӣ пешбинӣ шудааст", -- афзуд Қаҳорзода.

Тоҷикистон бинобар молиёт ё андозҳои баланди худ аз сӯйи созмонҳои байнулмилалӣ танқид шудааст. Андозсупорандагон аз зиёд будани навъу миқдор ва печидагиҳои молиётдиҳӣ ва тафтишҳои пайиҳами нозирон шиква мекунанд.

Беш аз як сол аст, ки ваъдаи аз нав қабул кардани Кодекси андоз ва сабукӣ додан ба андоздиҳандагон садо медиҳад, аммо ҳанӯз амалӣ нашудааст.

Байден дар ҷараёни сафараш ба Аврупо бо Путин вохӯрданист

Ҷо Байден

Президенти Амрико, Ҷо Байден, гуфт, омодааст, ки дар ҷараёни сафараш ба Аврупо дар моҳи июни имсол бо ҳамтои русаш Владимир Путин мулоқот кунад.

"Ман ба ин бовар дорам. Мо бар сари он кор мекунем", - посух дод Байден ба суоли рӯзноманигорон рӯзи сешанбе. Байден дар доираи нахустин сафари хориҷияш ба ҳайси президенти Амрико ба Бритониё рафта, аз 11 то 13-уми июни имсол дар вохӯрии сарони кишварҳои узви "Ҳафтгонаи бузург" иштирок хоҳад кард.

Сипас, 14-уми июн, барои иштирок дар саммити кишварҳои НАТО ба Брюссел рафта, бо раҳбарони аъзои эътилоф ҳам мулоқот мекунад.

Идеяи баргузории мулоқоти раҳбарони Русия ва Амрико, ки Байден моҳи апрел пешниҳод карда буд, барои нозирони амрикоӣ ғайриинтизор буд. Байден гуфта буд, омодааст, ки бо ҳамтои русаш дар кишвари севум мулоқот ва афзоиши ташаннуҷ миёни ду кишварро баррасӣ кунад.

Ба гуфтаи Юрий Ушаков, мушовири президенти Русия, омодагиҳо барои мулоқоти раҳбарони ду кишвар идома доранд. Интизор меравад, ин мулоқот моҳи июни соли равон баргузор шавад.

Мақомоти Тоҷикистон кушта шудани 10 сокини Исфараро дар ҷанҷоли марзӣ тасдиқ карданд

Мақомот мегӯянд, ба хонаводаҳои қурбониёни ҷанҷоли марзӣ дар Исфара кумаки молӣ карданд

Мақомоти вилояти Суғд рӯзи 5-уми май рӯйхати даҳ сокини шаҳри Исфараро нашр карданд, ки дар ҷанҷоли ахири марзӣ бо Қирғизистон ҳалок шудаанд. Ин номҳоро Радиои Озодӣ дар шаш рӯзи гузашта бо истифода аз манобеи худ ва наздикони фавтидаҳо гирд оварда буд.

Феҳристи пурраи ҷонбохтагон дастрас нест.

Радиои Озодӣ то ин дам мустақилона номи 18 қурбонии ҷанги ахир дар марз бо Қирғизистонро ошкор кард. Даҳ нафари онҳо низомӣ ҳастанд ва аз минтақаҳои гуногуни кишваранд.

Рӯйхати даҳ сокини кушташудаи Исфара рӯзи 5-уми май ва замоне нашр шуд, ки ҳукумати вилояти Суғд эълон кард, ба оилаи онҳо дар умум 700 ҳазор сомонӣ (ба ҳар як оила 70 ҳазор сомонӣ) ёрӣ карданд.

Рӯйхати 10 қурбонии ҷанҷоли марзӣ аз Исфара

Ҷамоати деҳоти Сурх:

Бахтовар Маҳмудов

Ҷамоати деҳоти Чоркӯҳ:

Собир Ваҳҳобов,
Манучеҳр Қаландаров,
Ҳакимбой Ниёзов,
Нусратулло Набиев,
Ҳасанхон Шаропов,
Далер Эшонов,
Иброҳим Ҳошимзода,
Ҳикматулло Маҳкамов.

Ҷамоати деҳоти Ворух:

Меҳрӯзиддин Болтаев.

Раҷаббой Аҳмадзода, раиси вилояти Суғд, дар вохӯрӣ бо хонаводаи қурбониён дар шаҳри Исфара гуфтааст, ки ҳукумат онҳоро "ҳеч гоҳ танҳо намегузорад".

Мақомот ваъда кардаанд, ки барои тарбияи фарзандони фавтидагон ва таҳлсили онҳо дар мактабҳои олӣ тавассути ҷудо кардани квота мусоидат хоҳанд кард. Ҳамзамон, ба гуфтаи мақомот, “барои поси хотири шаҳидон” лавҳаи ёдбуд гузошта мешавад.

Дар ҷангу ҷидоле, ки рӯзҳои 28 ва 29-уми апрел дар сарҳади Тоҷикистону Қирғизистон рух дод, аз ҳарду ҷониб даҳҳо нафар куштаву садҳо кас захмӣ шудаанд.

Мақомоти Тоҷикистон шумораи захмиёну қурбониёнро намегӯянд, вале Радиои Озодӣ мустақилона то ин дам номи 18 қурбонии задухӯрди мусаллаҳонаро ошкор кард. Даҳ нафари онҳо низомӣ ҳастанд.

Ҷониби Қирғизистон эълон кард, ки дар ин ҳодиса 189 шаҳрванди он кишвар маҷруҳ шуда, 36 кас, аз ҷумла ду кӯдак, ҷон бохтаанд.

Ҳарду кишвар якдигарро ба оғози ҷанг муттаҳам мекунанд ва Додситониҳои кулли Тоҷикистону Қирғизистон барои пажӯҳиши ҳодиса парвандаҳои ҷиноӣ кушоданд.

Тоҷикистону Қирғизистон 970 километр марз доранд ва аз ин ҳисоб танҳо 519 километри онро муайян ва нишона гузоштаанд. Минтақҳои дигари баҳсӣ, ки аз обу замину чарогоҳ иборатанд, ҳар чанд вақт сабаби занозаниву тирпарронии сокинон ва нерӯҳои ду кишвар мешаванд.

Роҳбари ҳизби навтаъсиси сиёсиро дар Узбекистон барои туҳмат ҷарима бастанд

Хидирназар Оллоҳқулов

Додгоҳе дар шаҳри Тошканди Узбекистон роҳбари ҳизби навтаъсиси "Ҳақиқат ва тараққиёт" Хидирназар Оллоҳқуловро барои туҳмат наздик ба 470 доллар ҷарима баст.

Оллоҳқуловро дар асоси шикояти шахсоони ношиносе ҷарима бастанд, ки рӯзи 31-уми март ба ӯ дар даҳлези манзили зисташ ҳамла карда буданд.

Оллоҳқулов гуфт, дар бораи шурӯи муҳокимаи додгоҳӣ ба ӯ чанд соат пеш аз ҷаласа хабар доданд, аммо имкон надоданд, бо парванда шинос шавад. Ин ҷаласаи додгоҳӣ паси дарҳои баста сурат гирифтааст.

Қарор аст, дар Узбекистон моҳи октябри имсол интихоботи президентӣ баргузор шавад. Мухолифони Узбекистон эълом карданд, ки дар ин интихобот ширкат мекунанд.

Эмомалӣ Раҳмон ба Маскав меравад

Эмомалӣ Раҳмон ва Владимир Путин. Акс аз бойгонӣ

Раиси ҷумҳури Тоҷикистон рӯзи 9-уми май ба Маскав хоҳад рафт.

Абдуфаттоҳ Шарифзода, роҳбари хадамоти матбуоти президенти Тоҷикистон, рӯзи 5-уми май ба Радиои Озодӣ гуфт, Эмомалӣ Раҳмон дар маросими бахшида ба Иди Ғалаба иштирок мекунад.

Ӯ афзуд, дар ҳошияи гашти низомӣ мулоқоти раиси ҷумҳури Тоҷикистон бо Владимир Путин, президенти Русия, дар назар аст ва эҳтимол мавзӯи ҷанҷолҳои охир дар марз бо Қирғизистон баррасӣ шавад.

"Тоҷикистону Қириғизистон узви Созмони Паймони Амнияти Дастҷамъӣ (ОДКБ) ҳастанд ва, аз ин рӯ, ин мавзуъ дар мулоқот баррасӣ хоҳад шуд", -- шарҳ дод Шарифзода.

Дар ҳамин ҳол, сафари Содир Ҷабборов раисҷумҳури Қирғизистон ба Маскав дар назар нест. Дмитрий Песков, сухангӯи Путин дар суҳбат бо расонаҳо гуфтааст, "ширкати президенти Қирғизистон Содир Ҷабборов дар ҷашни Рӯзи ғалаба дар назар нест".

Қаблан Владимир Путин барои миёнравӣ дар ҳалли ҷанҷолҳои марзӣ миёни Тоҷикистону Қирғизистон ибрози омодагӣ карда буд.

Дар ҷангу ҷидоле, ки рӯзҳои 28 ва 29-уми апрел дар сарҳади Тоҷикистону Қирғизистон рух дод, аз ҳарду ҷониб даҳҳо нафар куштаву садҳо кас захмӣ шудаанд.

Мақомоти Тоҷикистон омори захмиёну қурбониёнро намегӯянд, вале Радиои Озодӣ мустақилона то ин дам номи 20 қурбонии задухӯрди мусаллаҳонаро ошкор кард. Ёздаҳ нафари онҳо низомӣ ҳастанд.

Ҷониби Қирғизистон эълон кард, ки дар ин ҳодиса 189 шаҳрванди он кишвар маҷруҳ шуда, 36 кас, аз ҷумла ду кӯдак ҷон бохтаанд.

Ҳарду кишвар якдигарро ба оғози даргирӣ муттаҳам мекунанд ва Додситониҳои кулли Тоҷикистону Қирғизистон барои таҳқиқи ҳодиса парвандаҳои ҷиноӣ кушодаанд. Тоҷикистону Қирғизистон оташбаси доимӣ эълон карда, нерӯҳои худро аз минтақаҳои наздисарҳадӣ берун бурданд.

Тоҷикистону Қирғизистон 970 километр марз доранд ва аз ин ҳисоб танҳо 519 километри онро мушаххасу аломатгузорӣ кардаанд. Минтақҳои боқимонда, иборат аз обу замину чарогоҳ, баҳсӣ ҳастанд ва сари чанд вақт сабаби занозаниву тирпарронии сокинону нерӯҳои ду кишвар мешаванд.

Вазорати тандурустии Қазоқистон сокинонро ба гирифтани мояи дувуми ваксина даъват кард

Алексей Тсой

Вазири тандурустии Қазоқистон, Алексей Тсой, рӯзи 5-уми май дар порлумон хабар дод, ки то ин дам ба 1,48 миллион шаҳрванди он кишвар як моя ва ба беш аз 400 ҳазор кас ду моя ваксинаи зидди коронавирус гузаронида шудааст.

Ба гуфтаи ӯ, фосила миёни гузаронидани ду мояи ваксина аз 45 шабонарӯз бештар нахоҳад шуд. Вазири қазоқ гуфт, агар ваксина думояӣ бошад, ба сокинон бояд ҳар ду мояи он гузаронида шавад.

Қазоқистон аз охирҳои моҳи апрел фосила миёни гузаронидани ду мояи ваксинаи русии "Спутник V"-ро бештар кард. Пештар сокинон баъд аз 21 рӯзи дарёфти мояи аввали ваксина бо мояи дувум эм мешуданд. Ҳоло ин муҳлат то ба 45 шабонарӯз боло бурда шудааст.

Баъзе аз корбарон ва маркази мустақили илмии тиббии Medsupportkz аз афзоиши муҳлати фосила миёни гузаронидани ду моя изҳори нигаронӣ карда, мегӯянд, эҳтимол дорад, сокинон то дарёфти мояи дувуми ваксина ба коронавирус мубтало шаванд.

Рафтани нирӯҳои амрикоӣ озодии занонро дар Афғонистон зери суол бурдааст

Занони Бомиён

Бар пояи як гузориши ниҳодҳои иктишофии Амрико, ки рӯзи 4-уми май нашр шуд, пас аз берун рафтани нерӯҳои амрикоӣ аз Афғонистон дастовардҳои бист соли охир дар бахши ҳимоят аз ҳуқуқи занон бо таҳдид рӯ ба рӯ мешаванд.

Шӯрои миллии иктишофи Иёлоти Муттаҳида, як ниҳоди пажӯҳишгар, менависад, агар Толибони афғон сари қудрат биоянд, ҳуқуқи занонро маҳдуд хоҳанд кард.

Ин боз як ҳушдор аз пайомади беруншавии нерӯҳои Амрико аз Афғонистон аст, ки бо дастури президент Ҷо Байден то 11-уми сентябри имсол амалӣ мешавад.

Дар солҳои ҳукмронии Толибон, аз 1996 то 2001-ум, занони афғон аз таҳсил маҳрум ва асосан хонанишин буданд.

Моҳи гузашта Толибон изҳороте пахш намуда, ваъда доданд, ки ба шуғли занон дар соҳаҳои маориф, тандурустӣ ва иҷтимоӣ мухолифат нахоҳанд кард, ба шарте ки занон ҳиҷоб бипӯшанд.

Гузориши ҷомеаи иктишофии Амрико ин ваъдаи Толибонро зери шубҳа қарор додааст.

Вазири корҳои хориҷии Амрико барои ибрози пуштибонӣ аз Украина роҳии Киев шуд

Энтони Блинкин, вазири корҳои хориҷии Амрико

Энтони Блинкин, вазири корҳои хориҷии Амрико, барои пуштибонӣ аз Украина рӯзи 5-уми май озими ин кишвар шуд. Ин сафар пас аз он сурат мегирад, ки Русия моҳи гузашта нерӯҳои худро дар марзи Украина ва Қрим ҷамъ овард ва сипас дур кард.

Нед Прайс, сухангӯи Вазорати корҳои хориҷии Амрико, дар баёнияе гуфт, сафари Блинкин ба Украина нишон медиҳад, ки Иёлоти Муттаҳида дар баробари ҳуҷуми феълии Русия, аз истиқлол ва тамомияти арзии Украина ҷиддӣ пуштибонӣ мекунад.

Ҷойгиршавии нерӯҳои Русия дар наздикии марзҳои шимолӣ ва шарқии Украина ва низ дар Қрим, ки Маскав дар соли 2014 онро ишғол кард, боис ба нигаронии Киев, Брюссел ва Вашингтон аз боло гирифтани танишҳо шудааст.

Маскав рӯзи 23-юми апрел эълон кард, ки ба берун бурдани нерӯҳояш оғоз намуд ва ҳафтаи гузашта низомиёни Русия гуфтанд, бештарин қувваҳо ба қароргоҳҳои доимии худ баргаштанд.

Филипп Реекер, як дипломати баландпояи амрикоӣ барои Аврупо, ҳафтаи гузашта ба хабарнигорон гуфт, Иёлоти Муттаҳида вазъро аз наздик муроқибат мекунад.

Ба қавли сухангӯи Вазорати корҳои хориҷии Амрико, Блинкин бо Владимир Зеленский, раиси ҷумҳури Украина, дидору гуфтугӯ мекунад.

Тоҷикистон барои бозбинии нархи нерӯи барқ як гуруҳи корӣ ташкил дод

Дар Тоҷикистон барои бозбинии нархи истифодаи нерӯи барқ бо дастури нахуствазир Қоҳир Расулзода як гуруҳи корӣ таъсис ёфтааст.

Хадамоти зиддиинҳисории Тоҷикистон мегӯяд, ба ҳайати ин гуруҳ намояндагони вазоратҳо ва ниҳодҳои зиддахл шомил шудаанд. Тули солҳои 2010-2019 нархи як киловатт/соат нерӯи барқро барои сокинон Тоҷикистон аз 9 дирам то 22 дирам гарон карда шуд. Ба ҳисоби ширкати "Барқи Тоҷик", нархи ҳар як киловатт/соат барқи тавлидкардааш 28 дирам арзиш дорад, вале бо нархи аз ин арзонтар ба сокинон барқ фурӯхта мешавад ва аз ин рӯ ба ҷойи фоида зарар мебинад.

Тоҷикистон бо машварат ва тавсияҳои созмонҳои байналмилалӣ, аз ҷумла Бонки Ҷаҳонӣ дар баробари боло бурдани нархи нерӯи барқ барои хонаводаҳое, ки расман нодор эътироф шудаанд, бояд моҳе пули то 250 киловатт/соат нерӯи барқро ҷуброн кунад, аммо ин тарҳ то кунун на дар ҳама минтақаҳои кишвар иҷро шудааст. Гузашта аз ин, солҳост сокинони Тоҷикистон дар фасли сармо аз камбуди нерӯи барқ азият мекашанд.

Қирғизистон гуфт, воҳидҳои низомиро аз марз бо Тоҷикистон берун кашид

Харобиҳо дар деҳаи Хоҷаи Аълои Исфара пас аз муноқишаи 29-уми апрел дар марз бо Қирғизистон

Вазъ дар марзи Тоҷикистону Қирғизистон, ки ҳафтаи гузашта шоҳиди бархӯрдҳои хунин буд, ором аст. Вазорати корҳои дохилии Қирғизистон рӯзи 4-уми май гуфт, ки дар марзи вилояти Бодканди Қирғизистон ва вилояти Суғди Тоҷикистон назорат барқарор шудааст ва воҳидҳои низомӣ аз минтақаи марзӣ берун шудаанд. Муовини вазири тандурустии Қирғизистон рӯзи сешанбе иброз дошт, ки дар бархӯрди ахир 36 шаҳрванди Қирғизистон ба ҳалокат расид, 189 нафари дигар ҷароҳат бардошта, наздики 58 ҳазор нафар ба манотиқи амн кӯчонида шуд. Ҷанҷолу сангандозӣ дар марзи Тоҷикистону Қирғизистон, ки рӯзи 29-уми апрел боиси муноқишаи хунин шуд, бинобар насби камераи назоратӣ дар Маркази тақсими об сурат гирифт, ки барои обёрии киштзорҳои ду тарафи марз дар замони Шӯравӣ сохта шудааст. Ҳоло Тоҷикистону Қирғизистон оташбаси доимӣ эълон карда, нерӯҳои худро аз минтақаҳои наздисарҳадӣ берун бурдаанд. Радиои Озодӣ тавонист исми 20 қурбониии муноқишаро аз дақиқ кунад, ки 10 нафарашон низомиёни мебошанд. Теъдоди маҷруҳон 88 кас гуфта мешавад.

Ёфтҳои бештар

XS
SM
MD
LG