Пайвандҳои дастрасӣ

Хабари нав

Хабарҳо

Бозхонди 3 литсензия аз ширкатҳои иктишофи маъдан дар Тоҷикистон

Азим Иброҳим, раиси Саридораи геологияи Тоҷикистон рӯзи сешанбе дар ҷамъи хабарнигорон гуфт, ин ниҳод тасмим гирифтааст, ки се иҷозатномаи қаблан ба ду ширкати байналмиалии иктишофи маъдан додаашро, бозхонд кунад.

Азим Иброҳим афзуд, ки ду муҷаввиз барои иҷозаи фаъолият дар Тоҷикистон ба ширкати МАРВИС-и Сингапур дода шуда буд, аммо ба далели нокифоягии тарҳи мукамал барои кашфу иктишофи нафту газ дар вилояти Хатлон, бозхонда хоҳад шуд. Сарфи назар аз тамосҳои мукаррари Идораи геологияи Тоҷикистон, дар масъалаи шеваи кор дар Тоҷикистон, ширкати мазкур вокуниш нишон надодааст.

Ширкати дигар «Сенержӣ»-и Чин мебошад, ки барои коркарди санги мармар муҷаввиз дарёфт карда буд, аммо ба далели таъхир дар оғози кор, аз тарафи Саридораи геология бозхонда шуд.

Азим Иброҳим, раиси Саридораи геологияи Тоҷикистон мегӯяд, ки мувофиқи қонунугузориҳои Тоҷикистон, дарёфти муҷаввиз ва ҳам ҷараёни бозхонди он бисёр тӯлонӣ ва марҳиладор аст, аз ин рӯ ин ниҳод ба додгоҳ муроҷиат карда, аз тариқи он қарордоди ҳамкориро бекор хоҳад кард.

Ҳамаи хабарҳои имрӯзро дар инҷо бихонед

Иштироки ҳазорон нафар дар тазоҳуроти 20-уми сентябр дар Беларус

Эътирози сокинон дар Беларус

Ин эътироз дар ҳоле сурат мегирад, ки рӯзи 19-уми сентябр садҳо зани эътирозгар дар Минск боздошт шуд.

Мақомот бо мошинҳои зиреҳпуш роҳи ҳаракати эътирозгаронро бастанд. Хабаргузории ТАСС бо такя ба мақомоти Беларус навишт, ки 10 эътирозгар боздошт шудааст.

Эътирозгарон талош доштанд, бо шиорҳое ба назди додгоҳи олии Беларус ва манзили зисти Лукашенко бираванд, вале пулис монеи онҳо шуд.

Эътирозҳо дар Беларус замоне оғоз шуд, ки Александр Лукашенкоро, ки 26 сол боз раҳбари Беларус аст, барандаи интихоботи 9-уми август эълон карданд.

Эътирозгарон Светлана Тиханвоская, рақиби Лукашенко дар интихоботро ғолиб медонанд ва бештар аз як моҳ боз эътироз доранд.

Мақомоти Афғонистон аз кушта шудани 30 узви Толибон хабар доданд

Нерӯҳои ҳукумати Афғонистон дар Кундуз

Вазорати мудофиаи Афғонистон хабар медиҳад, ки беш аз 30 ҷангии Толибон бар асари зарбаи ҳавоии неруҳои ҳукуматӣ кушта шудаанд.

Масъулони вилояти Кундуз мегӯянд, дар миёни кушташудаҳо сокинони мулкӣ низ ҳастанд.

Вазорати дифои Афғонистон иттилоъ дод, ки 19-уми сентябр ду зарбаи ҳавоӣ ба пойгоҳи Толибон дар ноҳияи Хонобод шимоли Кундуз зада шудааст.

Масъулини вилояти Кундуз мегӯянд, бар асари ин зарбаҳо дасти кам 12 шаҳрванди мулкӣ кушта ва беш аз 10 нафар захмӣ шудааст.

Зарбаҳои маргбор дар ҳоле зада шуданд, ки гуфтушуниди намояндаҳои ҳукумати Афғонистон бо Толибон дар Қатар идома мекард.

Фотима Азиз, узви порлумони Афғонистон аз вилояти Кундуз гуфтааст, зарбаи аввали ҳавоӣ ба пойгоҳи Толибон зада шуд, аммо зарбаи дуввум ба шаҳрвандони мулкӣ, ки дар маҳалли таркиш ҷамъ омада буданд, асобат кардааст.

Вазорати дифоъи Афғонистон кушта шудани афроди мулкиро рад кард ва гуфтааст, ки ин ҳодиса таҳқиқ мешавад.

Толибон дар баёнияи худ марги ҷангиёни худро рад кардаанд ва гуфтанд дар ин ҳодиса 23 шаҳрванди мулкӣ кушта шудааст.

Нигаронӣ аз эътирози зидди маҳдудият барои эҳтиёт аз коронавирус

Фурудгоҳи Лондон

Тазоҳургарони норозӣ аз маҳдудсозӣ барои эҳтиёт аз “Ковид 19” рӯзи якшанбеи 19 сентябр бо кормандони пулис дар Ландан бархурд карданд.

Ин дар ҳолест ҳазорҳо нафар аз одамон ба хотири ширкат дар намоиши эътирозӣ дар Дюселдорфи Олмон таҷамуъ кардаанд. Чуноне шумораи гирифторони коронавирус дар Аврупо ба якборагӣ афзоиш ёфтааст.

Тазоҳурот дар Ландан дар замоне оғоз шуд, ки Содиқ Хон шаҳрдори Ландан аз эҳтимоли ҷорӣ намудани қуюди шабгардӣ хабар дод ва барои барвақтар бастани дари пивахонаҳо амр дода, равуои меҳмонӣ ба хонаҳоро манъ кард.

Ин тадобир ба хотири ҷилавгирӣ аз афзоиши ябораи гирифторӣ ба бемории "Ковид-19" гирифта шудааст.

Ҳукумати Бритониё дар ин ҳафта ҷамъшудани беш аз шаш нафар дар ҷойҳои ҷамъиятиро манъ кард.

Борис Ҷонсон нахуствазири Бритониё гуфт бидуни тардид бо назардошти афзоиши гирифторони ин беморӣ кишвар ба мавҷӣ дуввуми “Коувид 19” рӯ ба рӯ хоҳад шуд.

Маҳдудиятҳои алоҳидаи шадидтар дар шаҳрҳои Бритониё 13,5 миллион одамро фаро хоҳад гирифт.

Ҳамчунин дар Руминия вокуниши манфии мардум ба маҳдудсозӣ барои эҳтиёт аз коронвирус ба мушоҳида мерасад.

Садҳо нафар одамон дар Бухарест, пойтахти Руминия алайҳи маҳдудиятсозиҳо зидди коронавирус, аз ҷумла барои доштани ниқоби тиббӣ ва таҳсили фосилавии талабаҳои мактаб эътироз кардаанд.

Сарфи назар аз афзоиши мизони пандемияи “Ковид 19” дар Фаронса, рӯзи 20-уми сентябр марҳилаи ниҳоии "Тур де Франс" баргузор хоҳад шуд.

ИМА аз бозгашти таҳримҳои СММ алайҳи Эрон хабар дод

Майк Помпео, вазири умури хориҷии Иёлоти Муттаҳидаи Амрико

Иёлоти Муттаҳидаи Амрико сарфи назар аз мухолифати баъзе аз муттаҳидони аврупоиаш таҳримҳои Созмони Милали Муттаҳид алайҳи Эронро якҷониба барқарор кард.

Майк Помпео, вазири умури хориҷии Амрико ҳушдор дод, ки хилофи таҳримҳо дигар кишварҳо набояд бо Эрон ҳамкорӣ кунанд.

Ӯ гуфт, ки агар кишварҳои узви Созмони Милали Муттаҳид ӯҳдадориҳои худро оид ба иҷро кардани ин таҳримот риоя накунанд, ИМА чора хоҳад дид.

"Рӯзҳои наздик Иёлоти Муттаҳида як қатор чораҳои иловагиро барои пурзӯр намудани татбиқи таҳримоти СММ ва ба ҷавобгарӣ кашидани қонуншиканон эълон хоҳад кард", - афзуд ӯ.

Соли 2015 дар замони президентии Барак Обама, ИМА, Бритониё, Фаронса ва Олмон бо Эрон созиши ҳастаӣ имзо карда буданд. Бар асоси ин созиш Эрон аз ғанисозии уран, ки эҳтимоли сохтани бомбаи ҳастаиро бештар мекунад, даст мекашад ва дар иваз ин кишварҳо ваъдаи сабуктар кардани таҳримҳоро дода буданд.

Доналд Трамп, президенти кунунии Амрико аз ин созишнома берун шуд. Бритониё, Фаронса ва Олмон ҳанӯз ба ин созиш пойбанд ҳастанд ва рафторҳои ИМА-ро танқид мекунанд.

Омодагии ҳазорон зан барои эътирози навбатӣ дар Беларус

Эътирози занон дар Минск, пойтахти Беларус

Интизор меравад, ки нисфирӯзии 20-уми сентябр, як рӯз пас аз он, ки пулис садҳо занро дар Беларус барои эътирози зидди Александр Лукашенко, президенти кишвар боздошт кард, ҳазорон зани дигар ба хиёбонҳо бароянд.

Видео аз эътирози рӯзи 19-уми сентябр дар Беларус

Дар эътирози рӯзи гузашта садҳо зан, ки талаби истеъфои Александро Лукашенко, президенти кунунии Беларусро мекарданд, аз ҷониби пулис боздошт шуданд. Ҳоло дар пойтахт ва дигар минтақаҳои Беларус занон тасмими ширкат дар эътирозӣ имрӯз, 20-уми сентябрро доранд.

Эътирозҳо дар Беларус пас аз анҷоми интихоботи президентии рӯзи 9-уми август то кунун давом доранд.

Эътирозгарон ба натиҷаи расмии интихобот, ки Александр Лукашенкоро барандаи он эълон кардааст, розӣ нестанд.

Онҳо бар ин назаранд, ки интихобот шаффоф набуд ва дар асл, барандаи он Светлана Тихановская, рақиби Лукашенко мебошад.

Лукашнеко, ки 26 сол боз раҳбарии Беларусро дар даст дорад, ба ин назар розӣ нест ва бо амри ӯ эътирозгарон саркуб мешаванд.

"Ковид-19" ё "илтиҳоби шуш"? Устоди риштаи журналистика даргузашт

Дӯстмурод Бобоев, устоди факултаи журналистикаи Донишгоҳи миллии Тоҷикистон

Дӯстмурод Бобоев, устоди кафедраи "Телевизион ва радиошунавонӣ"-и факултаи журналистикаи Донишгоҳи милии Тоҷикистон дар синни 60 солагӣ даргузашт.

Ҳамкорони ӯ сабаби маргашро бемории “КОВИД-19” номидаанд, вале пайвандонаш гуфтанд, ки бар асари бемории “илтиҳоби шуш” фавтид.

Наздикони Дӯстмурод Бобоев гуфтанд, ки ӯро як ҳафта пеш ҳангоми нафастангӣ ба беморхонаи “Якум советский” бурданд.

Ҷовид Муқим, устоди факултаи журналистикаи Донишгоҳи миллӣ дар саҳифаи фейсбукиаш навиштааст, ки Дӯстмурод Бобоев, дотсенти кафедраи "Телевизион ва радиошунавонӣ"-и ДМТ бар асари бемории кутоҳмуддати "КОВИД-19" аз олам гузашт.

Масъулони беморхонаи “Якум советский" ҳанӯз сабаби аслии марги ӯро шарҳ надодаанд.

Сангин Гулов, устоди Кафедраи "Телевизион ва радиошунавонӣ"-и факултаи журналистикаи Донишгоҳи миллӣ гуфт, ҷасади Дӯстмурод Бобоев дар қабристони маҳаллаи 7-ум километри шаҳри Душанбе ба хок супурда шуд.

Дӯстмурод Бобоев тайи чанд соли ахир дар кафедраи "Кинопублитсистика: воқеият ва муаммои тасвири инсон"-и факултети журналистикаи Донишгоҳи миллӣ фаъолият дошт.

Ӯ дар мавзуи "Филмҳои ҳуҷҷатӣ дар публисистика" рисолаи доктории худро навишта, дар садади ҳимояи он буд.

Таҳдиди фармондеҳи эронӣ ба амрикоиҳо дар робита ба қатли генерал Сулаймонӣ

Ҳусейн Саломӣ

Ҳусейн Саломӣ, фармондеҳи Сипоҳи посдорони инқилоби исломии Эрон, таҳдид кард, аз ҳар касе, ки дар қатли Қосими Сулаймонӣ нақш дорад, интиқом хоҳанд гирифт. Генерал Сулаймонӣ, фармондеҳи собиқи Сипоҳ, моҳи январи имсол дар ҳамлаи ҳавопаймои бесарнишини амрикоӣ дар наздикии фурудгоҳи байналмилалии Бағдод кушта шуд. Вебсайти Сипоҳи посдорон рӯзи 19-уми сентябр аз Ҳусейн Саломӣ иқтибос овард, ки гуфтааст, “Ҷаноби Трамп, интиқом гирифтани мо барои шаҳодати генерал возеҳ, ҷиддӣ ва қатъӣ аст.” Вай афзудааст, ба шахсоне, ки мустақим ё ғайримустақим дар кушта шудани Сулаймонӣ нақш доштанд, зарба хоҳанд зад. Доналд Трамп, раиси ҷумҳури Амрико дар аввали ин ҳафта ҳушдор дода буд, ки Вашингтон ба ҳар талоши Эрон барои гирифтани интиқоми марги генерал Сулаймонӣ ҷавоби сахте хоҳад дод. Таҳдиди Трамп баъди он садо дод, ки дар гузорише гуфта мешуд Эрон ҳамчун интиқоми қатли Сулаймонӣ қасд дорад сафири Амрикоро дар Африқои Ҷанубӣ бикушад. Ҳусейн Саломӣ қасди куштани сафири Амрикоро рад кард, аммо рӯшан кард, ки Эрон интиқоми фармондеши пешинро гирифтанист.

Дар Минск даҳҳо нафари норозӣ, аксаран занҳо дастгир шудаанд

Минск, 19-уми сентябри 2020

Пулиси Белорус рӯзи 19-уми сентябр даҳҳо нафари норозиро дар Минск боздошт кардааст. Онҳо бо роҳпаймоӣ дар пойтахт хостори истеъфои раиси ҷумҳурӣ Александр Лукашенко шудаанд. Эътирозҳо аз рӯзи 9-уми август, замони интихоботи президентӣ дар Белорус идома дорад. Норозиён натиҷаҳои интихоботро, ки бино бар он Лукашенко баранда эълон шуд, намепазиранд. Дар натиҷаи тазоҳуроти беш аз як моҳи ахир ҳазорон нафар боздошту лутукӯб шуда, тақрибан ҳамаи роҳбарони асосии мухолифин маҷбур кишварро тарк кардаанд ва ё дастгир шудаанд. Садҳо нафари норозӣ, ки бисёре аз онҳо зан буданд, рӯзи 19-уми сентябр дар маркази Минск роҳпаймоӣ карданд ва муддати кӯтоҳе бо пулиси зидди шӯриш даргир шуданд. Пулиси зидди шӯриш даҳҳо занро боздошт кард. Дар миёни дастгиршудагон Нина Баҳинскаяи 73-сола низ ҳаст.

Шӯрои ҳуқуқи башари СММ дар мавриди вазъи Белорус эъломия қабул кард

Светлана Тихановская

Шӯрои ҳуқуқи башари Созмони Милали Муттаҳид дар мавриди вазъи Белорус эъломия қабул кард. Дар он дар хусуси даҳҳо ҳолати таҳқири инсон, дуздӣ, ихроҷи одамон ва зӯроварии ҷинсӣ зикр карда шудааст, ки аз тарафи кормандони мақомоти ҳифзи ҳуқуқ нисбат ба тазоҳургарони мусолиматомез сурат гирифтааст. Кишварҳои узви Шӯро даъват карданд, ки дар Белорус зӯроварӣ нисбат ба тазоҳургарон қатъ шуда, ба боздоштҳои худсарона хотима диҳанд ва маҳбусони сиёсиву журналистҳо, ҳомиёни ҳуқуқ ва афроди дигареро, ки дар ҷараёни гирдиҳамоӣ боздошт шудаанд, озод кунанд. Шӯрои ҳуқуқи башари СММ аз ҳукумати Белорус даъват намуд, ки бо мухолифини сиёсиаш паси мизи музокира нишинад. Рӯзи ҷумъа дар ҷараёни баррасии вазъи Белорус иштирокдорони Шӯрои ҳуқуқи башар барои тасдиқи ҳолатҳои таҳқиру зӯроварӣ ва нақзи ҳуқуқи шаҳрвандон талаб карданд, ки гуруҳи нозир ҷалб карда шавад. Дар ин бора номзади собиқ ба мақоми президентии Белорус Светлана Тихановская ҳангоми суханронии онлайни худ зикр кард. Вай зарурати дахолати ҷомеаи ҷаҳониро ба Белорус таъкид кард, аммо намояндаи расмии Минск дар Женева гуфт, дар Белорус маҳбуси сиёсӣ нест ва нисбат ба тазоҳургарон зӯроварии ҷинсӣ сурат нагирифтааст.

Як навраси 11-сола дар Узбекистон аз COVID-19 ҷон бохтааст

Бар асари бемории коронавирус дар вилояти Тошканд як навраси 11-сола фавтидааст. Ӯ қурбонии хурдсолтарин аз COVID-19 дар Узбекистон ба шумор меравад. Қаблан дар Узбекистон аз марги хурдсолҳо бар асари бемории ҳамагир иттилоъ дода намешуд. Масъулони Вазорати тандурустии Узбекистон 18-уми сентябр иттилоъ доданд, ки дар рӯзҳои ахир се нафар аз бемории COVID-19 ҷон бохтаанд. Ба ин тартиб, шумори фавтидаҳо дар ин кишвар ба 423 нафар баробар шуд.

Амрико замимаҳои WeChat ва TikTok-ро манъ мекунад

Иёлоти Муттаҳидаи Амрико аз 20-уми сентябр паҳну истифодаи WeChat ва TikTok, барномаҳои мутааллиқ ба Чинро дар фурӯшгоҳҳои замимаҳо, аз ҷумла App Store ва Google Play манъ мекунад. Ин тасмим ба корбарони хориҷ аз Амрико таъсир надорад. Вазорати бозаргонии Амрико дар ин бора рӯзи 18-уми сентябр изҳорот дод. Дар ин ниҳод гуфтанд, барномаҳо бо Хадамоти махсуси Чин ҳамкорӣ дошта, дар бораи корбарон маълумот ҷамъ меоранд ва бино бар ин истифодаашон ба амнияти миллии Амрико хатар дорад. Уилбур Росс, ноиби вазири бозаргонии Амрико гуфт, "иқдоми имрӯза бори дигар собит мекунад, ки президент Трамп ҳама кори мумкинро мекунад, то амрикоиҳоро аз таҳдиди Ҳизби коммунисти Чин ҳифз кунад." Замимаи телефонии ТикТок, ки танҳо чаҳор сол аз умраш гузаштааст ва соли 2016 тавассути ширкати чинии ByteDancе офарида шуд, шабакаи маҳбуби ҷавонону навҷавонон аст. Ҷоест барои нишон додани видеоҳои 15-сониягӣ, як чизи шабеҳи Инстаграм. Бино ба гузоришҳо, ТикТок дар саросари ҷаҳон тақрибан 1 миллиард корбар дорад.

ВКД мегӯяд, як духтари тоҷик дӯстдоштаашро аз рашк оташ задааст

Бинои Вазорати умури дохилии Тоҷикистон

Масъулони Вазорати корҳои дохилии Тоҷикистон хабар доданд, ки як духтари 21-солаи тоҷикро барои оташ задани дӯстдоштааш дастгир карданд. Ҳодиса 26-уми августи имсол дар канори дарёи Кофарниҳон дар шаҳри Ваҳдат рух додааст, вале хабари он рӯзи 19-уми сентябр расонаӣ шуд. Духтарро барои "қасдан расондани зарари вазнин ба саломатӣ" гумонбар медонанд. Назари ҷониби дигар маълум нест. Рӯшан нест, ки ҳодиса дар чӣ шароите иттифоқ уфтодааст. Ба сабаби ошкор нашудани номи гумонбар пайдо кардани наздиконаш то ин дам бенатиҷа буд. Вазорат мегӯяд, духтар "аз ҳиссиёти рашк маъшуқаш, ҷавони 25-солаи сокини шаҳри Ваҳдатро бо истифода аз бензин оташ задааст." Ташхиси тиббиву додгоҳӣ тасдиқ карда, ки ҷавон "ҷароҳати вазнини ҷисмонӣ бардоштааст". Ҳоло духтар дар боздоштгоҳ ва ҷавон дар бемористон будаанд. Мақомот мегӯянд, тафтиши ҳодиса ҷараён дорад.

Санаҳои баргузории бозиҳои ниманиҳоӣ ва ниҳоии Ҷоми Тоҷикистон-2020 маълум шуд

Лигаи футболи Тоҷикистон санаҳои баргузории бозиҳои ниманиҳоӣ ва ниҳоии Ҷоми Тоҷикистон-2020-ро эълон кард. Бозиҳои ниманиҳоӣ рӯзҳои 22-23-юми сентябр ва бозии ниҳоӣ 10-уми октябр баргузор мешаванд. Дар ин бора сомонаи расмии Федератсияи футболи Тоҷикистон (ФФТ) хабар додааст.

Ба иттилои манбаъ, бозии аввали ниманиҳоии Ҷоми Тоҷикистон-2020 рӯзи сешанбе, 22-юми сентябр, дар Варзишгоҳи марказии шаҳри Кӯлоб доир мегардад. Дастаи «Равшан» дар майдони худ бо тими «Регар-ТадАЗ»-и Турсунзода рақобат мекунад.

Дар бозии дигари ниманиҳоии Ҷоми Тоҷикистон, ки рӯзи чоршанбе, 23-юми сентябр, дар варзишгоҳи «Пахтакор»-и шаҳри Бохтар баргузор мешавад, дастаи мизбон - «Хатлон» бо тими «Истаравшан»-и шаҳри Истаравшан рӯ ба рӯ хоҳад шуд.

Ҳарду бозии ниманиҳоии Ҷоми Тоҷикистон-2020 соати 15:00 оғоз меёбад.

Бозии ниҳоии Ҷоми Тоҷикистон-2020 бо иштироки ду дастаи ғолиби нимфинал рӯзи шанбе, 10-уми октябр, дар Варзишгоҳи марказии Душанбе барпо мегардад. Оғози бозии ниҳоӣ – соати 16:00.

Бозиҳои ниманиҳоӣ ва ниҳоии Ҷоми Тоҷикистон-2020 дар варзишгоҳҳо бе ҳузури тамошогарон баргузор мешаванд.

Бояд гуфт, ки имсол андозаи мусобиқа барои Ҷоми Тоҷикистон тағйир ёфт. Агар солҳои қаблӣ дар ҳар марҳила дастаҳо ду бозӣ (дар хона ва меҳмонӣ) анҷом медоданд, дар мавсими соли 2020 ҳар як марҳила аз як бозӣ иборат аст.

Агар замони асосии бозӣ бо ҳисоби мусовӣ ба поён расад, онгоҳ ду қисми 15-дақиқаӣ таъйин мегардад. Агар дар замони изофӣ ғолиб муайян нашавад, онгоҳ бар асоси дастури FIFA (Федератсияи байналмилалии футбол) ғолибро силсилаи пеналтӣ маълум хоҳад кард.

Ҷоми Тоҷикистон-2020

1/2 финал

22-юми сентябр (сешанбе)

Оғози бозӣ – соати 15:00

«Равшан» – «Регар-ТадАЗ»

Кӯлоб, Варзишгоҳи марказӣ

23-юми сентябр (чоршанбе)

Оғози бозӣ – соати 15:00

«Хатлон» – «Истаравшан»

Бохтар, варзишгоҳи «Пахтакор»

Финал

10-уми октябр (шанбе)

Оғози бозӣ – соати 16:00

Ғолиби ҷуфти нимфинал «Равшан»/«Регар-ТадАЗ» - Ғолиби ҷуфти нимфинал «Хатлон»/«Истаравшан»

Душанбе, Варзишгоҳи марказии ҷумҳуриявӣ

Гуруҳи Шодиев ширкатҳои энержии Узбекистонро дар ихтиёр гирифт

Кобул Шодиев (аз тарафи чап)

Ҳадди ақал шаш ширкати бузурги саноативу энержии Узбекистон таҳти мудирияти ширкати SFI Management Group даромаданд.

Солҳои 2017-2018 Корхонаи металлургии Узбекистон, Корхонаи куҳиву металлургии Олмалиқ ва Корхонаи металлургии Тошканд дар ихтиёри ширкати SFI Management Group гузошта шуданд. Аммо ҷомеаи Узбекистон то кунун огоҳӣ надошт, ки се корхонаи дигари бахши энержӣ низ дар ихтиёри ширкати SFI Management Group гузошта шудааст.

Кобул Шодиев, роҳбари ширкати SFI Management Group ахиран гуфтааст, ки ширкатҳои "Узбекангишт", "Неругоҳи Ангрен" ва "Неругоҳи нави Ангрен" ҳам шомили ширкати SFI Management Group ҳастанд.

Аммо ин амр ҷомеаи Узбекистонро нигарон кардааст.

"Чаро ширкатҳои давлатӣ, ки даромади онҳо ҳадди ақал 10 дарсади буҷаи давлатро ташкил медоданд, ба ихтиёри ширкати хусусие гузошта шуданд? Агар барои мудирияти дурустӣ онҳо ин тасмим гирифта шудааст, пас чаро озмун баргузор нашуд ва ин кор шаффоф сурат нагирифт?", - гуфт як манбаъ дар ҳукумати Узбекистон.

Қарзи хориҷии Қирғизистон ба 56,2 дарсади ММД расидааст

Вазорати молияи Қирғизистон хабар дод, ки то 31-уми июли имсол қарзи давлатии хориҷии ин кишвар ба беш аз 4 миллиарду 169 миллион доллар расидааст.

"Корҳо барои коҳиши сатҳи вобастагии хориҷӣ ба таври доимӣ идома доранд", - омадааст дар иттилоияи вазорат.

Мизони қарзи хориҷии Қирғизистон соли 2019 то ба 45,5 дарсади Маҷмуи маҳсулоти дохилӣ (ММД) кам карда шуда буд, вале соли равон ба далели пандемияи коронавирус он дубора ба 56,2 дарсади ММД расидааст.

Вазорати молияи Қирғизистон хабари вакилони порлумон дар бораи онро ки гӯиё соли равон қарзи хориҷии ин кишвар 1 млрд доллар зиёд шудааст, рад мекунад. Ба иттилои вазорат, Қирғизистон имсол 337 млн доллар кумаки молӣ дарёфт кардааст, ки танҳо 269 миллиони он қарз аст.

Русия парвозҳоро ба Қазоқистону Қирғизистон аз сар гирифт, ба Тоҷикистон кай?

Фурудгоҳи "Шереметево"-и Маскав

Бино ба хабари расонаҳои Русия, Маскав эълон кардааст, ки аз 21-уми сентябр парвозҳои мунтазами ҳавопаймоҳоро ба Қазоқистону Қирғизистон ва Белорус аз сар мегирад, вале дар ин қатор аз Тоҷикистон ном бурда нашудааст.

Хабаргузории ТАСС рӯзи 18-уми сентябр навишт, бино ба қарори Ситоди фаврии муқобила бо коронавирус дар Русия парвозҳо ҳафтае як бор ба шаҳри Нурсултон, Бишкек ва Минск дар назар аст.

Дар Ситоди фаврии муқобила бо коронавирус дар Русия рӯзи ҷумъа ба хабарнигорон гуфтаанд, аз 27-уми сентябр парвозҳоро ба Куриёи Ҷанубӣ низ ба роҳ мемонанд.

Парвозҳои мунтазами ҳавопаймоҳо байни Русия ва кишварҳои дигар, аз ҷумла Тоҷикистон, дар моҳи марти имсол бо сабаби густариши бемории коронавируси нав қатъ шуд.

Аз он замон то кунун Тоҷикистон барои овардани шаҳрвандонаш аз Русия даҳҳо парвози чартерӣ ба роҳ монд, вале муҳоҷирон ҳамвора мегӯянд, дарёфти билети бозгашт осон нест ва беҳтар аст парвозҳои доимӣ барқарор шавад.

Вазорати корҳои хориҷии Тоҷикистон рӯзи 16-уми сентябр эълон кард, ки то охири моҳ ба Русия 71 парвози чартерӣ дар назар аст.

Русия моҳи августи имсол парвозҳоро ба Бритониё, Танзания, Туркия ва Швейтсария аз сар гирифт. Хабаргузории "Интерфакс" рӯзи 15-уми сентябр бо такя ба манобеи огоҳаш дар ниҳодҳои Русия иттилоъ дод, ки мумкин аст, Маскав аз моҳи октябр парвози ҳавопаймоҳоро ба кишварҳои узви Иттиҳоди Давлатҳои Мустақил (СНГ) аз сар бигирад. Тоҷикистон узви ин иттиҳод аст.

Қаблан ҷониби Тоҷикистон гуфта буд, ки ба дархости Маскав дар бораи эҳтимоли азсаргирии парвозҳои мунтазам посухи мусбат додааст.

Тихановская хостори ба Беларус ирсол шудани ҳайати байналмилалӣ шуд

Тихановская дар интихоботи президентӣ мағлуб эълон шуд, вале ӯву тарафдоронаш интихоботро тақаллубшуда меҳисобанд

Раҳбари мухолифони Беларус Светлана Тихановская аз Минск тақозо кард, ки ба кишвар як ҳайати байналмилалиро роҳ бидиҳад, то ҷиноятҳои эҳтимолии президент Александр Лукашенко ва ҳукумати ӯро, ки барои саркӯби эътирозгарон танқид мешавад, таҳқиқ бикунад. СММ аз бунёди “девори дигари оҳанӣ” дар Аврупо ҳушдор додааст.

Тихановская рӯзи 18-уми сентябр зимни суханрониаш дар ҷаласаи изтирории Кумитаи ҳуқуқи башари СММ дар Женева аз Литва тавассути хати онлайнии видеоӣ пайваст шуд. Ӯ ба хатми хушунат нисбати эътирозгарон ва даъвати интихоботи нави озоду одилона даъват кард. Ӯ бори дигар аз ҳукумат хост, ки ба муколама биёяд, то, ба гуфтааш, бӯҳрони баамаломада аз роҳи сулҳомез ҳалли худро пайдо кунад.

Ин ҷаласа як рӯз баъди он баргузор шуд, ки дар Парлумони Аврупо бо раъйи оро қатъномае қабул шуд, ки Лукашенкоро ба ҳайси президенти Беларус эътироф намекунад. Мӯҳлати кунунии раҳбарии ӯ моҳи ноябр ба анҷом мерасад. Қатъномаи Парлумони Аврупо натиҷаҳои интихоботи рӯзи 9-уми августро ҳам эътироф намекунад, чун онро мухолифон ва ғарб тақаллубшуда номиданд. Ҳатто баъди шаш ҳафта эътирозҳои садҳо ҳазор сокини Беларус аз натиҷаҳои интихобот ва бо талаби истеъфои Лукашенко ӯ ба муколама бо онҳо розӣ нашуд ва бо ёрии нирӯҳои қудратӣ ба саркӯбу ҳабсу шиканҷаи эътирозгарон даст зад.

Тарҳи нави USAID ба хотири таъмини амнияти ғизо дар Тоҷикистон

Як корманди USAID дар фурудгоҳи Русия

Оҷонсии ИМА оид ба рушд гуфт, барномаи нави панҷсолаи худ “оид ба амнияти озуқаворӣ бо маблағи 36 миллион доллари амрикоӣ"-ро дар чаҳорчӯби ташаббуси ҳукумати ИМА бо номи “Озуқаворӣ ба хотири оянда” роҳандозӣ мекунад. Ҳадафи ин барнома мубориза бо фақру гуруснагӣ ва кӯмак дар таъмини ғизо дар Тоҷикистон аст. Фаъолияти ин тарҳ аз таҳияи низоми “самараноки кишоварзӣ” иборат мешавад, ки “истеҳсол ва истеъмоли ғизоро беҳтар месозанд, институтҳои маҳаллӣ ва шарикони бахши хусусиро тақвият хоҳад бахшид ва муҳити кишоварзиро, алалхусус дар идоракунии замин, беҳтар хоҳад намуд”. Дар ин бора рӯзи 18-уми сентябр дар як иттилоияи расмии Сафорати ИМА дар Тоҷикистон хабар дода шудааст. Дар хабар омадааст, ки тарҳи пешини Оҷонсии рушди ИМА дар заминаи амнияти озуқаворӣ дар Тоҷикистон ба манфиати хоҷагиҳои хурд буд ва 120 ҳазор кишоварз дар Тоҷикистон “даромади худро 194% афзоиш доданд, беш аз 3 миллион доллар даромадро аз фурӯши маҳсулот ба даст оварданд”.

Тоҷикистон як кишвари кишоварзӣ мебошад ва мизони фақру бенавоӣ дар ин кишвар бо ҳисобҳои Бонки Ҷаҳонӣ тахминан 30 дарсадро ташкил медиҳад.

Тими Навалний ошкор шудани оби заҳролудро шарҳ дод

Reuters рӯзи 17-уми сентябр аксро бо шишаҳои эҳтимолии заҳролудшудаи об дар утоқи меҳмонхонаи Навалний дар Томск нашр кард

Муттафиқони Алексей Навалний рӯзи 17-уми сентябр гуфтанд, ки нишонаҳои заҳре, ки бо он сиёсатмадори мухолифи Кремлин заҳролуд шудааст, дар дохили як шишаи обе дар утоқи як меҳмонхонаи Сибир ошкор шуд. Парлумони Аврупо дар паи ин ҳодиса ба ҷорӣ кардани таҳрими бештар нисбати Русия даъват карда ҳукумати ин кишварро дар нақзи ҳуқуқи инсон гунаҳгор намуд. Дар як блоги Навалний дар Инстаграм рӯзи 17-уми сентябр гуфта шудааст, ки вақте бемор шудани ӯ расонаӣ шуд, ҳамкоронаш ҳанӯз дар дохили меҳмонхонаи “Xander”-и шаҳри Томск буданд. Онҳо ҳамон замон ба утоқе, ки он ҷо Навалний истода буд, рафтанд ва ҳама гуна ашёи шубҳаомез, аз ҷумла як шишаи бозшудаи оби минералиро бо номи “Святой источник” (“Чашмаи муқаддас”) бо худ бурданд. Вебсайти “Проект” бо такя ба як муттафиқи Навалний навишт, ки шишаи мазкур аз ҷониби Мария Певчих, як узви тими сиёсатмадори заҳролудшуда ба Берлин бурда шуд. Певчих як сокини Бритониё мебошад. Дар ҳамин ҳол дар Брюссел Парлумони Аврупо дар робита бо қазияи Навалний ба ҷорӣ кардани таҳримҳои шадиди Русия даъват карда гуфт, ки Кремлин бо ҳадафи бастани даҳони Навалний талош кард ӯро бикушад. Аъзои парлумон гуфтанд, ки қазияи Навалний як бахше аз “талошҳои доимии” ҳукумати президент Владимир Путин барои саркӯби мухолифон мебошад. Дар ҳамин ҳол рӯзи 17-уми сентябр як муфаттиш аз Томск ба Маскав рафта аз дафтари Навалний дидан кардааст.

Марзбонҳои Полшаву Украина: марз бо Беларус боз аст

Як гузаргори марзии Беларус

Кумитаи давлатии марзбонии Беларус гуфт, ки назорати марзи давлатӣ сахттар шудааст, вале ҳама гузаргоҳҳои марзӣ боз мемонанд. Ин дар ҳолест, ки президенти ин кишвар Александр Лукашенко, ки шаш ҳафта инҷониб дар муқобили мардуми эътирозгари талабгори истеъфояш қарор дорад, гуфт, ин кишвар бояд дар марзҳои ғарбиаш тадбирҳое биандешад. Кумитаи марзбонӣ рӯзи 18-уми сентябр гуфт, ки “хадамоти марзбонӣ назорати марзҳои давлатии Ҷумҳурии Беларусро аз роҳи ҷалби нирӯҳои тактикии захиравӣ тақвият додааст”. Ин ниҳод гуфт, ки тамоми гузаргоҳҳои марзӣ ба қудрати пурра кор мекунанд.

Марзбонҳои Полша ба оҷонсии Reuters рӯзи 18-уми сентябр гуфтанд, ки дар марзи Полшаву Беларус ҳеҷ мушкиле намебинанд ва сухангӯи марзбонии Украина Андрей Демченко тавассути телевизион гуфт, дар ҷониби Беларус ҳеҷ нирӯи иловагӣ ваё васоили фанние гузошта нашудааст, ки аз баста шудани марз аломат медода бошанд. Рӯзи 17-уми август президенти Беларус Александр Лукашенко Полшаву Литва ва Украинаро дар он гунаҳгор кард, ки ба гуфтааш, дар талоши доман задани “як низои доғ” ҳастанд ва гуфт, ки марзҳо бо ин кишварҳо бояд баста шаванд. Мухолифон ва сокинони зиёди Беларус Лукашенко ва мақомотро дар тақаллуби натиҷаҳои интихоботи президентии рӯзи 9-уми август гунаҳгор мекунанд.

Беш аз 30 миллион нафар. Рекорди нави олудашавиҳо ба коронавирус дар ҷаҳон

Белград. Марде озмоиши коронавирусро мегузарад

Шумори нафарони олуда ба коронавирус дар ҷаҳон аз 30 миллион нафар гузашт. Ин омори 17-уми сентябр дар ҳоле нашр шуд, ки Созмони ҷаҳонии тандурустӣ гуфт, дар қораи Аврупо мизони олудашавӣ ба вируси нав «ташвишовар» мешавад. Зоҳиран, оморе, ки аз ҷониби донишгоҳи Ҷон Ҳопкинс нашр мешавад, боз ҳам поинтар аз сатҳи воқеии олудагӣ аст, чунки бисёр ҳодисаҳои гирифторӣ ба вируси нав қайдношуда боқӣ мемонад. Марги инсонҳо бар асари коронавирус дар ҷаҳон 942,989 нафарро ташкил дода, ҳамчунин гумон аст, ки ин омор ниҳоиву пурра мебошад. Ҳанс Клюге, раиси СҶТ дар Аврупо гуфт, ҳолате, ки як моҳи охир мушоҳида мешавад, “барои ҳамаи мо бояд ҳушдоре бошад”. Ба иттилои ин созмон, дар 53 кишваре, ки ба ҳавзаи аврупоии СҶТ шомил мешаванд, 5 миллион ҳодисаи олудагӣ ба Covid-19 ва беш аз 227 ҳазор ҳолати марг ба қайд гирифта шудааст. Ҳоло ИМА бо беш аз 6,6 миллион ҳолати олудагӣ ва беш аз 197 ҳолати марг дар садри феҳристи кишварҳои осебдида аз коронавирус қарор дорад. Дар Ҳинд беш аз 5 миллион олудашуда ва беш аз 83 ҳазор ҳолати марг сабт шудааст. Баъди он Бразилия, минтақаи Ховари Миёна ва Африқо қарор доранд.

Узбекистон аз 1 октябр марзҳояшро мекушояд. Номи Тоҷикистон ҳам ҳаст

Як гузаргоҳи марзии Тоҷикистону Узбекистон

Мақомоти Узбекистон гуфтанд, ки аз 1-уми октябри имсол марзҳои кишварро пурра боз карда, ҳаракати мошину қатор ва ҳавопаймоҳоро барқарор мекунанд. Дар ин бора рӯзи 17-уми сентябр қарори вижаи Комиссияи ҷумҳуриявии мубориза бо коронавирус дар Узбекистон содир шуд.

Шарти асосии кушода шудани марзҳо ва вуруди хориҷиҳо ба Узбекистон ин аст, ки меъёрҳои бехатарии беҳдоштӣ риоя шаванд.

Бино ба он, мусофироне, ки 14 рӯзи ахир дар кишварҳои ба истилоҳ “сабз" қарор доштанд, ба Узбекистон бе маҳдудият ворид мешаванд. Ба рӯйхати ин кишварҳо Чин, Тайланд, Малайзия, Куриёи Ҷанубӣ, Гурҷистон, Маҷористон, Финляндия, Латвия, Австрия ва Ҷопон шомиланд.

Шаҳрвандони кишварҳои дигар, ки дар харитаи эпидемиологӣ бо хатти зард ишора шудаанд (Озарбойҷон, Белорус, Имороти Муттаҳидаи Арабӣ ва кишварҳои Иттиҳоди Аврупо ба ҷуз аз Бритониё ва Испания) ва инчунин "кишварҳои сурх" (кишварҳои боқии ҷаҳон) танҳо дар асоси натиҷаи манфии озмоиши коронавирус, ки на дертар аз 72 соат гирифта шудааст, ба Узбекистон роҳ дода мешаванд.

Агар чунин тест набошад, онҳоро ба ҳавопаймо роҳ намедиҳанд ва агар мусофир нишонаҳои коронавирус дошта бошад, дар фурудгоҳ аз ҳисоби худ аз санҷиш мегузарад.

Онҳое, ки тавассути роҳҳои заминӣ аз Қазоқистон, Туркманистон, Тоҷикистон ва Афғонистон ба Узбекистон ворид мешаванд, баъд аз супоридани санҷиши коронавирус ё экспресс-тест ба карантини 14-рӯза дар меҳмонхона ё манзили шахсӣ фиристода хоҳанд шуд.

Дар Узбекистон аз моҳи март ба ин сӯ марзҳо, аз ҷумла марз бо Тоҷикистон бастааст. Шумори гирифторони бемории коронавируси нав дар ин кишвар аз марзи 49 ҳазор гузашт.

Тихановская дар Шӯрои амнияти СММ суханронӣ хоҳад кард

Светлана Тихановская, раҳбари мухолифони Беларус

Рӯзи 18-уми сентябр раҳбари мухолифони Беларус Светлана Тихановская дар Шӯрои амнияти СММ дар мавзӯи саркӯби эътирозгарони норозӣ аз натиҷаҳои интихоботи президентии моҳи август суханронӣ мекунад. Ин ҷаласа бо даъвати Иттиҳоди Аврупо барпо мешавад ва Тихановская дар он тавассути тамоси онлайнии видеоӣ баромад мекунад. Иттиҳоди Аврупо аз раҳбари ҳуқуқи башари СММ Мишел Бачелет даъват кард, ки вазъ дар Беларусро аз наздик мушоҳида бикунад, чун дар ин кишвар то ҳол ҳазорҳо нафар боздошт, садҳо нафар аз ҷониби полис латукӯб шуданд ва ҳам гузоришҳо дар бораи шиканҷаҳои фаровон ба даст мерасад. Бачелет оғози ҳафтаи ҷорӣ гуфт, ки ин иттиҳомот бояд “сабту ҳуҷҷатгузорӣ шаванд, то ки гунаҳгоронро ба ҷавобгарӣ бикашанд”. Интихоботи рӯзи 9-уми август, ки бо пирӯзии президент Александр Лукашенко анҷомид, ба бовари мухолифонаш тақаллуб шудааст. Тихановская, ки ба қавли мақомоти комиссиюни интихоботӣ дар интихобот мағлуб шуд, ба Литва фирор кард. Ӯ рӯзи 17-уми август гуфт, ки гурӯҳҳои мухолифон ва ҳомиёни ҳуқуқ ният доранд, ки феҳристи мақомот ва кормандони амнияти дастдошта дар хушунати алайҳи эътирозгаронро нашр кунанд. Ӯ гуфт, ки ин феҳрист бо ИМА, ИА ва дигарҳо тақсим карда мешавад. Тихановская хитоб ба кормандони сохторҳои ҳифзи қонун гуфт, беҳтараш аз хушунат даст кашанд, чун як рӯз ҳатман дар баробари қонун посух хоҳанд дод.

Порлумони Аврупо ба таҳқиқи байналмилалии заҳролудшавии Навалний даъват кард

Алексей Навалний.

Порлумони Аврупо ба таҳқиқи байналмилалии заҳролудшавии мухолифи рус Алексей Навалний бо иштироки Иттиҳоди Аврупо (ИА), СММ, Созмони манъи силоҳи кимиёӣ ва Шӯрои Аврупо даъват кард.

Вакилони порлумони Аврупо ҳамчунин аз Русия даъват карданд, ки ба хотири таъмини тафтиши беғаразона ва ба ҷавобгарӣ кашидани дастандаркорон ҳамкорӣ кунад.

Дар қатънома гуфта шудааст, "кушиши куштори Навалний як ҷузъи талошҳои системавиест, ки ба хомуш сохтани ӯву садоҳои дигари интиқодӣ дар Русия" равона карда шудаанд.

Порлумони мазкур ба ИА таҳияи стратегияи нав дар муносибат ба Русия, рӯйхати маҳдудиятҳои нав зидди ин кишвар ва афзоиши таҳримҳои амалкунанда зидди Кремлро пешниҳод кард. Ҳамчунин аз ИА хостааст, мансабдоронеро, ки ҳадафи таҳқиқоти Бунёди мубориза бо фасоди Навалний қарор гирифтанд, таҳрим кунад.

Як банди алоҳидаи қатънома ба зарурати дастгирии ҷомеаи маданӣ ва расонаҳои мустақили Русия бахшида шудааст. Ҳамчунин гуфта шуда, ки барои таҳсили ҷавонони Русия дар ИА шароит фароҳам карда шавад. Аз ҷумла, барои ин ҷавонон дар яке аз кишварҳои ИА "Донишгоҳи Русия дар хориҷ" таъсис дода шавад.

Раҳбари ниҳоди дипломатии ИА Жозел Боррел ҳангоми суханронӣ дар порлумони Аврупо пешниҳод кард, низоми таҳриме, ки барои нақзи ҳуқуқи инсон дар ҳоли омодашавӣ аст, ба номи Навалний гузошта шавад.

Навалний рӯзи 20-уми август ногаҳон худро бад ҳис кард ва баъди ду рӯз бо дархости ҳамсараш барои муолиҷа ба Олмон интиқол дода шуд. Мутахассисони олмонӣ гуфтанд, ки сиёсатмадори 44-сола ва як муборизи зидди фасод бо “Новичок”, ки ба гурӯҳи заҳрҳои низомӣ шомил мешавад, заҳролуд шудааст. Баъди ин ҳодиса бисёр кишварҳо аз Русия тақозо карданд, ки таҳқиқи мустақилонаи ин қазияро ба роҳ монад.

Русия гуфт, ки бо сабаби набуди далели қотеи заҳролудшавии Навалний парвандаи ҷиноӣ боз намешавад.

Белорус марзашро бо Литва ва Лаҳистон мебандад

Марзи Белорус бо Лаҳистон.

Президенти Белорус гуфт, марзҳои кишвараш бо Литва ва Лаҳистон баста ва назорат дар марз бо Украина пурзӯр карда мешавад.

"Мо маҷбур ҳастем, ки нерӯҳоро аз кӯчаҳо барорем, ними артишро мусаллаҳ гузорем ва марз бо Ғарбро бандем", - изҳор дошт Лукашенко.

Бахши белорусии Радиои Озодӣ навиштааст, ки ин гуфтаҳои президент Лукашенко дар амал чи гуна иҷро мешаванд, маълум нест.

Президенти Белорус афзуд, ки эътироф шудани интихоботҳои кишварашро аз сӯи давлатҳои дигар зарур намешуморад ва маъмурони ОМОН-ро барои амалҳояшон дар ҷараёни эътирозҳо тавсиф кард.

Эътирозҳо дар Белорус баъди он оғоз шуданд, ки Комиссияи марказии интихоботи ин кишвар дар интихоботи президентии 9 август раисҷумҳур Александр Лукашенкоро дубора баранда эълом кард. Садҳо эътирозгар боздошт ва дар бораи таҳқиру шиканҷа шудани дастгиршудаҳо низ хабар дода шуд.

Ёфтҳои бештар

XS
SM
MD
LG