Амрико мегӯяд, аз Теҳрон ҳанӯз дар мавриди замону макони музокироти барномаи баҳсбарангези ҳастаии Эрон таъйиди мушаххасе нагирифтааст. Сухангӯи вазорати хориҷаи Амрико Виктория Нуланд гуфт: “Ҷолиб ин аст, ки мо аз ҷониби Эрон аломатҳои мухталиф мегирем, вале ҷузъиёт тамоман баста аст.” Вазири хориҷаи Амрико Ҳилларӣ Клинтон рӯзи шанбе гуфта буд, музокироти Эрон бо гурӯҳи 5+1, ки 5 узви доимии Шӯрои Амният ва Олмонро дар бар мегирад, рӯзҳои 13-14 апрел дар Истамбул доир хоҳад шуд. Русия дирӯз гуфт, ҷузъиёти нишаст ҳанӯз ниҳоӣ нашудаст ва он шояд дертар аз 14 апрел доир шавад.
