Пайвандҳои дастрасӣ

Хабари нав

Хабарҳо

Дар Мурманск рӯзи мотам эълон шудааст

Имрӯз дар шаҳри Мурмански Русия мотам эълон шудааст. Рӯзи якшанбе дар обҳои наздикии ҷазираи Сахалин як киштии нафткаш ғарқ шуд ва 14 нафар сарнишинони он ба мусибат дучор шуданд. Дар ин киштӣ 67 нафар нишаста буданд ва туфони шадид дар нимҷазираи Камчатка дар баҳри Сахалин онҳоро ба мусибат дучор кард. 39 нафари дигар т о ҳол бедараканд.

Ҳамаи хабарҳои имрӯзро дар инҷо бихонед

Дар Суғд 19 шаҳрванди Қирғизистонро бо гуноҳи марзшиканӣ ҷазо додаанд. ВИДЕО

Сарҳади байни Тоҷикистону Қирғизистон

Дар шаш моҳи аввали имсол дар шимоли Тоҷикистон 19 шаҳрванди Қирғизистонро боздошту муҷозот кардаанд. Бахтиёр Оқилзода, раиси Додгоҳи вилояти Суғд, 30-юми июл гуфт, ин афрод "барои бе санад ва ғайриқонунӣ гузаштан аз сарҳади давлатии Тоҷикистон" гунаҳкор шуданд.

"Додгоҳ бар асоси моддаи 335-и Кодекси ҷиноии Тоҷикистон 18 нафарро аз 500 то 1 ҳазор сомонӣ ҷарима баст ва як нафарро зиндонӣ кард", -- шарҳ дод ӯ дар нишасти матбуотӣ дар Хуҷанд.

Муҷозоти 19 шаҳрванди Қирғизистон барои убури ғайриқонунӣ ба Тоҷикистон
лутфан мунтазир бошед

Феълан кор намекунад

0:00 0:01:52 0:00

Мақомоти Тоҷикистону Қирғизистон ҳар чанд вақт шаҳрвандони якдигарро бо гуноҳи убури ғайриқонунии марз ё додугирифти ғайрирасмӣ дастгир мекунанд. Зоҳиран ин масъала пас аз ҷанҷоли хунини моҳи апрели имсол ва баста шудани гузаргоҳҳои сарҳадӣ ҷиддӣ шудааст.

Мақомоти Қирғизистон рӯзи якуми майи имсол сокини 55-солаи шаҳри Исфара Саидмурод Ишановро бо гумони убури ғайриқонунии сарҳад дастгир кардаанд. Наздиконаш мегӯянд, ба ӯ ё пардохти 55 ҳазор сомонӣ ҷарима ё як сол зиндон таҳдид мекунад.

Бахши қирғизии Радиои Озодӣ рӯзи 16-уми июл гузориш дод, ки мақомоти Тоҷикистон шаҳрванди Қирғизистон Ойбек Маҳмудови 35-соларо бо гуноҳи ғайриқонунӣ гузаштан аз сарҳад ба панҷ сол зиндон маҳкум кардаанд. Ба иттилои манбаъ, ӯ моҳи апрел дар ҳудуди ноҳияи Лахш дастир шуда буд.

Бисёре аз деҳаҳои наздимарзии Тоҷикистону Қирғизистонро як роҳ ё наҳр аз ҳам ҷудо мекунад. Пештар сокинон барои рафтан ба қисмати дигари ноҳияи худ бемамониат аз маҳалҳои якдигар мегузаштанд, вале ҳоло як "қадами ноҷо" онҳоро ба дардисар гирифтор мекунад.

Дарозии марзи Тоҷикистону Қирғизистон 970-980 километрро ташкил медиҳад, ки аз он то имрӯз танҳо 519 километр муайян ва нишонагузорӣ шудаасту бас. Минтақаҳои дигари баҳсӣ, ки аз обу замину чарогоҳ иборатанд, ҳар чанд вақт сабаби занозаниву тирпарронии сокинон ва нерӯҳои ду кишвар мешаванд.

Пас аз як чунин задухӯрд дар рӯзҳои 28 ва 29-уми апрели имсол муносибати ду кишвар ба сардӣ печид. Бино ба иттилои мақомоти Тоҷикистон, дар ин муноқиша 19 нафар кушта, 87 каси дигар захмӣ шуданд. Қирғизистон аз кушта шудани 36 нафар ва маҷруҳ шудани 189 нафар дар ин даргириҳо хабар дод.

Амрико як посгоҳро дар наздикии сарҳади Тоҷикистону Афғонистон бозсозӣ кард

Амрико аз соли 2007 ба ин сӯ ба нерӯҳои марзбонӣ ва бозсозии посгоҳҳои сарҳадӣ дар Тоҷикистон даҳҳо миллион доллар ёрӣ кардааст

Иёлоти Муттаҳидаи Амрико бо харҷи 570 ҳазор доллар як посгоҳро дар наздикии марзи Тоҷикистону Афғонистон таъмиру бозсозӣ кардааст. Маросими ба истифода додани посгоҳ рӯзи 30-юми июл баргузор шуд.

Сафорати Амрико дар Душанбе гуфт, дар маросим кордори сафорат Ҷон Гинкел ва муовини фармондеҳи Нерӯҳои марзбонии Тоҷикистон, Раҷаб Саодатзода, иштирок карданд.

"Ин посгоҳи марзӣ барои сарҳадбонон имконоти иловагиро барои назорат ва посбонии марз бо Афғонистон дар минтақаи Шаҳритуси вилояти Хатлон фароҳам меорад", - гуфтанд дар сафорати Амрико.

Ба иттилои манбаъ, иншооти мазкур "иқтидори нерӯҳои марзбониро барои пайгирӣ ва пешгирӣ аз убури ғайриқонунии сарҳад (тақрибан 15-20 километр) ва мубориза бо таҳдидҳои фаромиллӣ, аз ҷумла қочоқи маводи мухаддиру ифротгароӣ ба таври чашмрас боло мебарад".

"Иёлоти Муттаҳида ҳамчунон ҷонибдори шарикӣ бо Тоҷикистон, барои дастгирии соҳибихтиёрӣ, амният ва нақши он дар ҳифзи сулҳ ва шукуфоии дарозмуддат дар Афғонистон, мебошад", -- гуфта шудааст дар иттилоияи намояндагии расмии Амрико дар Душанбе.

Иёлоти Муттаҳида дар гузашта низ барои таъмиру бозсозии посгоҳҳои сарҳадӣ ва таъмини нирӯҳои марзбонии Тоҷикистон ёрии моливу техникӣ кардааст. Аз ҷумла, Барномаи мубориза бар зидди маводи мухаддири Дафтари Ҳамкориҳои Ҳарбӣ аз соли 2007 ба ин сӯ ба Тоҷикистон беш аз 155 миллион доллар кумак расондааст.

Дар умум Амрико дар 30 соли ҳамкорӣ бо Тоҷикистон тавассути барномаҳои гуногун ба кишвар ба маблағи беш аз 1,8 миллиард доллар ёрӣ кардааст.

Сангандозии навбатӣ дар марзи Қирғизистон бо Тоҷикистон

Марзи байни Тоҷикистону Қирғизистон

Бахши қирғизии Радиои Озодӣ рӯзи 30-юми июл навишт, ки мошини намояндаи президенти Қирғизистон дар умури барқарорсозӣ ва рушди деҳаҳои наздисарҳадии вилояти Бодканд Мамурҷон Раҳимов дар марзи ин кишвар бо Тоҷикистон сангборон шудааст.

Маъмурияти вилояти Бодканд гуфтаанд, ҳодиса 29-уми июл дар деҳаи Тош-Тумшуқи ноҳияи Бодканд рух дод ва ҳоло таҳқиқи он оғоз шудааст.

Ҳодиса замоне рух додааст, ки Раҳимов ҳамроҳи муовини аввали намояндаи президенти Қирғизистон дар Бодканд ва муовини раиси ҷамоати деҳоти Оқсой аз хонаҳои барқароршуда дар деҳаи мазкур боздид карда, ба самти деҳаи Тош-Тумшуқ мерафтанд.

Ба огаҳии маъмурияти Бодканд, вақте мансабдорони қирғиз аз хонаҳои сӯхта боздид мекарданд, гуиё 15-20 сокини деҳаи Хоҷаи Аълои Тоҷикистон ба назди онҳо омадаанд. Миёни ҷонибҳо баҳс сар зада, дар натиҷа мошини муовини раиси ҷамоати Оқсой сангборон шудааст.

"Намояндагони мақомоти ҳифзи ҳуқуқи ду кишвар баъди ҳодиса дар марз вохӯрдаанд. Сардори пулиси Исфара ваъда додааст, ки амалкарди шаҳрвандони Тоҷикистон санҷида шуда, ҷуброни зарари расида пардохт хоҳад шуд. Ҳамчунин дар доираи қонун зидди шаҳрвандони Тоҷикистон, ки сангандозӣ карданд, чора андешида мешавад", - афзудааст манбаъ.

Ҷониби Тоҷикистон то ҳол ин ҳодисаро шарҳ надодааст.

Мақомоти Исроил коргоҳи таҳиягари барномаи ҷосусиро бозҷӯӣ карданд

FILES-ISRAEL-US-TECH-RIGHTS-SPYWARE

Хадамоти махсуси Исроил коргоҳи ширкати "NSO Group", таҳиягари барномаи тиҷории ҷосусии "Pegasus"-ро, ки дар рахна шудани телефони зиёда аз даҳ раҳбари давлат истифода шудааст, бозҷӯӣ кардаанд.

Дар ин бора Вазорати дифои Исроил хабар додааст. Худи "NSO Group" хабари бозҷӯӣ шудани коргоҳи худро тасдиқ карда, гуфт, аз он истиқбол мекунад. Ширкат хабари расонаҳо дар бораи истифода шудани барномаи Pegasus-ро дар таъқиби рӯзноманигорон ва сиёсатмадорон дуруғ номид. Масъулони ширкат гуфтанд, ин барнома барои мубориза бо террористон ва ҷинояткорон сохта шудааст.

Нашрияи Calcalist бо истинод ба манбаи худ хабар дода, ки ба "NSO Group" аз эҳтимоли анҷоми тафтишот ҳушдор дода шудааст. Ҳамчунин хадамоти махсуси Исроил санадҳои ширкатро мушикофона таҳқиқ накардааст. Ба гуфтаи рӯзноманигорон, Вазорати дифои Исроил аз фаъолияти "NSO Group" манфиатдор буда, қаблан онро аз баҳсҳои додгоҳӣ "наҷот" додааст. Эҳтимол меравад, бозҷӯии коргоҳи ширкат ба сафари вазири дифои Исроил Бени Гантс ба Фаронса рабт дорад.

Аз барномаи Pegasus мақомоти Озарбойҷон, Маҷористон, Мексика, Баҳрайн, Ҳинд, Индонезия, Марокаш, Руанда, Ҷумҳурии Конго, Арабистони Саудӣ - дар маҷмуъ наздики 50 давлат истифода кардаанд. Расонаҳо дар бораи рахна шудани телефонҳои 18 роҳбари кишварҳои дунё аз Аврупо, Африқо, Осиё ва Шарқи Наздик бо шумули президентҳои Фаронса Эммануэл Макрон, шоҳи Марокаш Муҳаммади Шашум ва президенти Мексика хабар додаанд.

Барномаи Pegasus имкон дорад, тавассути паёмакҳои одӣ вориди телефон шуда, маълумотро рабояд ва муколамаҳоро хонад.

Байден ба тарҷумонҳои афғон: "Ба хонаи худ хуш омадед"

Президенти ИМА Ҷо Байден

Президент Ҷо Байден нахустин ҳавопаймоеро, ки субҳи 30 июл даҳҳо шаҳрвандони Афғонистон - ҳамкорони нирӯҳои амрикоиро ба ИМА расонид, истиқбол кард. Хабаргузории АР бар пояи санадҳои расмӣ гуфт, ки аввалин парвози ҳавопаймои интиқолӣ гурӯҳи беш аз 200-нафарии тарҷумонҳову дигар кормандони ҳамкори амрикоиҳо дар Афғонистонро ба Вашингтон расонид. Дар миёни мусофирон 57 кӯдак ва 15 навзод мебошанд.

Кохи Сафед бо нашри изҳороте гуфт, ки Байден ин парвозро ҳодисаи муҳиме номид, ки баёнгари “иҷрои ӯҳдадориву ваъдаҳои амрикоиҳо дар баробари ҳазорҳо шаҳрвандони Афғонистон барои хидмати шона ба шонаашон бо низомиёну дипломатҳои Амрико дар давоми 20 соли ахир дар Афғонистон” мебошад. Байден гуфт, “бештар аз ҳама мехоҳам ба ин шаҳрвандони ҷасури Афғонистон барои дар канори ИМА буданашон ташаккур бигӯям ва имрӯз ман бо эҳсоси ифтихор ба онҳо мегӯям, ки “Ба хонаи худ хуш омадед”.

Ҳавопаймо субҳи 30 июл дар фурудгоҳи байналмилалии Далласи Вашингтон фуруд омад. Мақомоти амрикоӣ гуфтанд, ки ин ҳайат чанд рӯз дар қароргоҳи Форт Лии аёлати Вирҷиния қарор мегирад.

Бо иҷро шудани нақшаи хуруҷи нирӯҳои амрикоӣ, мақомоти ин кишвар он шаҳрвандони Афғонистонро, ки бо онҳо ҳамкорӣ кардаанд, аз тарси қассосгирии Толибон баъди рафтани онҳо дар Амрико сарпаноҳ медиҳанд. Дар давоми солҳои зиёд Толибон бисёр афғонистониҳову аъзои оилаи онҳоро, ки бо амрикоиҳо ҳамкорӣ мекарданд, ба қатл расонидаанд. Толибон дар як иддаое ҳафтаи гузашта гуфтанд, онҳое, ки дар гузашта бо нирӯҳои байналмилалӣ ҳамкорӣ кардаанд, ҳадаф қарор намедиҳанд.

Аз соли 2001 тахминан 300 ҳазор шаҳрвандони мулкии Афғонистон бо нирӯҳои байналмилалӣ ҳамкорӣ кардаанд.

Асет Абишев - маҳбуси сиёсии қазоқ пеш аз муҳлат озод шуд

Асет Абишеш. 30 июл, 2021.

Фаъоли мадании қазоқ Асет Абишев, ки ҳомиёни ҳуқуқи Қазоқистон ӯро маҳбуси сиёсӣ меноманд, 30 июл аз зиндони Заречнии вилояти Алмато озод шуд.

Гуруҳе аз ҷонибдорони Абишев ӯро дар назди дарвозаи зиндон пешвоз гирифтанд. Фаъоли мадании қазоқ ба ҳамаи онҳое, ки ӯро дастгирӣ карданд, миннатдорӣ баён намуд.

"Будани шумо дар инҷо муҳим аст. Ингуна корҳо хеле кумак мекунанд. Инро дар худ таҷриба кардаам. Вақте мардум мехоҳанд, кореро анҷом диҳанд, иттиҳод хеле кумак мекунад. Неру дар иттиҳод аст", - изҳор дошт Абишев дар суҳбат бо ҷонибдоронаш.

Ҷонибдорони Асет Абишев субҳи 29 июл пушти дари маҳбаси Заречнии вилояти Алмато ҷамъ шуда, озодии пеш аз муҳлати ӯро интизор буданд. Аммо сардори маҳбас Нурлан Бидайбеков ба ҷамъомадагон хабар дод, ки озодии пеш аз муҳлати Абишев фардо - 30 июл иҷро мешавад.

Абишев моҳи июли соли 2018 дар шаҳри Алмато боздошт шуд. Ӯро дар "сармоягузории созмони ҷиноӣ" ва "иштирок дар фаъолияти созмони мамнуъ" айбдор карданд. Моҳи ноябри соли 2018 додгоҳ Абишевро чаҳор сол зиндонӣ кард. Вай пештар аз ин хост, пеш аз адои муҳлат аз маҳбас озод шавад. Додгоҳ ахиран ин дархостро қонеъ кард.

Машқи сарбозони эҳтиётӣ дар тамрингоҳи Леваканд

Машқи сарбозони эҳтиётӣ. Наворро корбарон фиристоданд

Мақомоти шаҳри Леваканд (Сарбанди собиқ) дар вилояти Хатлон рӯзи 29-уми июл ҳудуди ҳазор сарбози эҳтиётиро ба машқҳои ҳарбӣ ҷалб кардаанд.

Машқи ҳарбӣ, аз ҷумла тирандозӣ аз "Калашников", дар тамрингоҳи қисми ҳарбии Файзалӣ Саидов доир шудааст. Корбарони Радиои Озодӣ бо фиристодани чанд порча навор аз ҷараёни машқу тирандозиҳо гуфтанд, "бо даъвати комиссариати ҳарбии шаҳри Леваканд ба машқҳо ҳозир шуданд".

Ин машқу тамринҳои афсару сарбозони эҳтиётӣ дар Тоҷикистон дар ҳолест, ки Эмомалӣ Раҳмон, президенти Тоҷикистон, рӯзи 5-уми июл супориш дод, 20 ҳазор афсари эҳтиётӣ ба марзи кишвар бо Афғонистон ҷалб шаванд.

Дар ду моҳи охир ҷанг миёни Толибон ва нерӯҳои давлатӣ дар марзи Афғонистон бо Тоҷикистон афзоиш ёфтааст. Толибон чандин минатқаи ҳаммарз бо Тоҷикистонро тасарруф карданд.

Мақомоти Тоҷикистон мегӯянд, беш аз 900 километр хатти марзи Афғонистон бо Тоҷикистон зери назорати Толибон қарор дорад ва эҳтимол паноҳҷӯёни бештаре вориди кишвар шаванд.

ФСБ гуфт, аз як ҳамлаи эҳтимолии террористӣ дар Русия пешгирӣ кардааст

Акс аз бойгонӣ

Хадамоти амнияти федеролии Русия (ФСБ) хабар дод, ки дар натиҷаи як амалиёт дар Тюмен ду гумонбар ба терроризмро нобуд кардаанд.

Дар хабари расмӣ омадааст, кушташудаҳо шаҳрвандони Тоҷикистон буда, гуё нақша доштаанд дар маконҳои серодам ҳамлаҳои террористӣ анҷом бидиҳанд. Санҷидани дурустии ин иддао имкон надорад.

Мақомоти Русия ному ҷузъиёти дигари марбут ба гумонбаронро нашр намекунанд. То ҳоло мавқеи наздикони кушташудаҳо дар бораи ин ҳодиса дастрас нашудааст.

Ба навиштаи Хадамоти амнияти федеролӣ, гуё ин афрод узви эҳтимолии гуруҳи тундрави "Давлати исломӣ" буда, шаби 28-уми июл дар амалиёти боздошт ба ходимони ҳифзи ҳуқуқ муқовимат кардаву норинҷакро таркондаанд. Ба иттилои расмӣ, "ҳарду гумонбар ҳангоми задухӯрд нобуд карда шуданд. Аз онҳо лавозимоти ҷангӣ, силоҳҳои оташфишон, маводи омодаи тарканда ва адабиёти динӣ дарёфт шуд."

То куҷо воқеият доштани ин ҳодиса маълум нест, чун дар гузашта ҳомиёни ҳуқуқи муҳоҷирон дар бораи саҳнасозӣ будани баъзе аз чунин боздоштҳо таъкид кардаанд.

Ҳомиёни ҳуқуқ мегӯянд, полис ба хотири боло нишон додани омори пешгириву боздошти гумонбарони терроризм гоҳо даст ба сохтакорӣ мезанад ва заифтарин қишри ҷомеа - муҳоҷирони кориро дар қабои террористу ҷинояткор муаррифӣ мекунад.

Афзоиши бесобиқаи нархи бензин дар Тоҷикистон

Як нуқтаи фурӯши сӯзишворӣ. Акс аз бойгонӣ

Дар давоми 6 моҳи соли ҷорӣ дар Тоҷикистон нархи сӯзишворӣ ба таври бесобиқа боло рафтааст. Тибқи рақамҳои Кумитаи омор, танҳо дар як моҳи охир дар тамоми нуқтаҳои фурӯши сӯзишворӣ арзиши бензин 2,2 дарсад афзуд. Аз аввали сол нархи чаканаи ин навъи маводи сӯхт беш аз 44 фоиз гарон шудааст. Ронандагон дар Тоҷикистон бештар аз ҳама бензини навъи 92-ро мехаранд, зеро нархи он нисбат ба навъҳои 95 ва 98-и бензин арзонтар аст. Феълан арзиши як литр бензини навъи 92 дар пойтахт 9,5 сомониро ташкил медиҳад. Ҳамчунин дар нимсолаи аввали соли ҷорӣ арзиши гази моеъ беш аз 20 дар сад ва аз сӯзишвории дизелӣ ҳудуди 32 дар сад гарон шудааст.

Боздошти даҳҳо нафар баъд аз ҷанги гурӯҳии тоҷикону чеченҳо

Екатеринбург. Моҷарои гурӯҳии миёни муҳоҷирон. Акс аз бойгонӣ

Мақомоти ҳифзи ҳуқуқ дар шаҳри Санкт-Петербурги Русия баъд аз занозании гурӯҳӣ миёни зодагони Тоҷикистону Чеченистон 70 нафарро боздошт намуда, 13 тани онҳоро ба шуъбаи пулис бурдаанд.

Хабаргузории русии "Фонтанка" менависад, ҷанҷол субҳи 29-уми июл дар наздикии меҳмонхонаи "Белые ночи" ба амал омадааст.

Тибқи иттилои мақомот, ҷанҷол миёни бошандагони меҳмонхона - шаш марди чечен ва чор шаҳрванди Тоҷикистон сар задааст. Муноқишаи лафзӣ ба задухӯрд печидааст, ки дар натиҷа ду нафар аз сарашон осеб дида, ба бемористон бурда шуданд.

Ба 6 нафари дигар дар ҷойи ҳодиса ёрии тиббӣ расонда шудааст.

Кормандони пулис иштирокдорони ҷанҷол ва 70 бошандаи меҳмонхонаро, ки зодагони Тоҷикистон ва Узбекистон буданд, дастгир карданд. Як рӯз пеш аз ин Вазорати корҳои дохилии Русия гуфт, ки минбаъд муҳоҷирон барои иштирок дар занозаниҳои гурӯҳӣ аз қаламрави кишвар "депорт" ё ихроҷ шуда, роҳашон ба ин давлат барои як умр баста мешавад.

HRW ба мақомоти Эрон: эътирозгаронро озод кунед

Исфаҳони Эрон. Сокинон оби ошомиданиро аз мошин мегиранд

Созмони Дидбони Ҳуқуқи Башар (Human Rights Watch) аз мақомоти Эрон тақозо кард, шахсонеро, ки барои иштирок дар намоиши эътирозӣ дар Хузистону минтақаҳои дигари ин кишвар ҳабс шудаанд, озод кунанд. Дар изҳороти созмон аз 30-юми июл талаб шудааст, ки истифодаи нирӯ бар зидди эътирозгарон ҳам таҳқиқ шавад.

Рӯзи 15-уми июл дар даҳҳо шаҳру манотиқи вилояти Хузистони Эрон, ки ҷамъияти калони арабҳо дар он зиндагӣ мекунанд, эътирозҳо бархост ва базудӣ ба манотиқи дигар ин кишвар, аз ҷумла, баъзе қисматҳои Теҳрон паҳн шуд.

Эътирози мардум аз он ҷо сарчашма мегирад, ки дар давоми 50 соли охир мушкили дастрасӣ ба об ва таъмини аҳолӣ бо барқ ҳал нашудаву баръакс амиқтар шудааст.

Ҳазорҳо корманди соҳаи нафти Эрон ҳам бо талаби даромад ва маоши беҳтар даст ба коршиканӣ заданд.

Дар ду ҳафтаи охир дар Эрон дастикам нӯҳ эътирозгар кушта шуданд. HRW дар изҳороти худ мегӯяд, амалкарди мақомоти эронӣ нисбат ба эътирозгарон дар Хузистон ва дигар манотиқ мояи нигаронии амиқ шудааст.

Ҳукми додгоҳ аз рӯи китоб дар бораи одамони Путин охири сол содир мешавад

Муқоваи китоби Кетрин Белтон “Одамони Путин: Чигуна КГБ Русияро дубора ба дасти худ гирифт ва ба Ғарб чашм дӯхт”

Як додраси бритониёӣ гуфт, ҳукм аз рӯи баҳси таҳқир дар китобе дар бораи сари қудрат омадани президенти Русия Владимир Путин охири соли ҷорӣ содир мешавад. Додрас Аманда Типплз рӯзи 29 июл ба Додгоҳи олии Лондон гуфт, ки ҳукмро моҳи октябр содир хоҳад кард.

Қазия ба шикояти як гурӯҳ сарватмандони рус, аз ҷумла, миллиардери зодаи Русия Роман Абрамович рабт дорад, ки Кетрин Белтон ва ношири китобаш бо номи “Одамони Путин: Чигуна КГБ Русияро дубора ба дасти худ гирифт ва ба Ғарб чашм дӯхт”-ро ба додгоҳ додааст. Абрамович дорои шаҳрвандии Русия ва Исроил аст ва дар шикояти худ иддаои муаллифи китоб дар бораи инро, ки соли 2003 клуби футболи “Челси”-ро бо дастури Путин харидааст, ба чолиш кашидааст.

Вакили Абрамович Ҳю Томлинсон рӯзи 28 июл дар Додгоҳи олӣ гуфт, ки дар китоб иттилои “носаҳҳеҳ” дар бораи иртибот бо Кремлин ҷой дорад. Вале ҷониби ҷавобгар ба дурустиву ботавозун иншо шудани иттилои китоб пойфишорӣ мекунад ва мегӯяд, ки он бар пояи гузоришҳои таҳқиқотӣ ва мусоҳибаҳо навишта шудааст. Китоб апрели соли 2020 нашр шуд ва унвони китоби пурфурӯши нашрияи Sunday Times-ро касб кард. Кетрин Белтон, собиқ хабарнигори Financial Times, рӯзи 28-уми июл ҷараёни мурофиаро шарҳ надод.

Ҷопон бо сабаби афзоиши бемории COVID-19 ҳолати фавқулодда ҷорӣ карданист

Деҳаи олимпии Токио. 29 июли соли 2021

Ҷопон,и мизбони Бозиҳои Олимпӣ, ният дорад, 30-юми июл дар шаҳри Токио ва чаҳор минтақаи дигар ҳолати фавқулодда ҷорӣ бикунад. Мақомоти он кишвар гуфтанд, мавридҳои гирифторӣ ба бемории COVID-19 "рекордӣ шудааст".

Йошиҳиде Суга, нахуствазири Ҷопон, пас аз ҷаласаи коршиносони кишвар дар ин замина изҳорот хоҳад дод. Ҳолати фавқулодда то 31-уми август дар минтақаҳои Саитама, Канагава, Осака ва Чиба, ки дар наздикии Токио мебошад, ҷорӣ мешавад. Чунин чораҳо аллакай дар Токио ва ҷазираи ҷанубии Окинава амал мекунанд.

Ҷопон дар давраи пандемия тавонист, ки аз гирифторшавии сартосарӣ ба коронавирус пешгирӣ кунад, вале ҳоло ба монанди бисёре аз гӯшаҳои ҷаҳон аз навъи бисёр босуръат паҳншавандаи бемории ҳамагир азият мешавад.

Рӯзи 29-уми июл Токио гузориш дод, ки бори аввал дар давраи пандемия дар як рӯз 10 ҳазор кас ба коронавирус гирифтор шудааст. Беморхонаҳо дар ҳолати сангин кор мекунанд ва нисфи 6 ҳазор кати беморӣ дар ин муассисаҳои тиббӣ бо беморони COVID-19 пур шудааст.

Масъулини бозиҳои олимпӣ ва ҳукумат гуфтанд, Олимпиада ба афзоиши мавридҳои гирифторӣ ба коронавирус ҳеч рабт надорад. Бозиҳо 23-юми июл сар шуда, то 8-уми август натиҷагирӣ мешаванд. Аз оғози моҳи июл дар деҳаи олимпӣ 220 ҳолати гирифторӣ ба коронавирус ба қайд гирифта шуд. Дар маҷмӯъ дар бозиҳои олимпӣ 40 ҳазор варзишгар ва кормандону ёрирасонон иштирок мекунанд.

Хадамоти гумрук: Баъди ба дасти Толибон гузаштани Шерхон Бандар "гардиши мол хеле кам шуд". ВИДЕО

Пули "Дӯстӣ" дар марз миёни Тоҷикистону Афғонистон

Мақомоти Тоҷикистон гуфтанд, гардиши мол тавассути гузаргоҳи Панҷи Поён (Шерхон Бандар) дар сарҳад бо Афғонистон ба таври чашмрас кам шудааст. Гузаргоҳи Шерхон Бандар, ки масири асосии интиқоли мол миёни Тоҷикистону Афғонистон ба шумор меравад, 21-уми июни имсол ба дасти Толибон афтод.

Хуршед Каримзода, раиси Хадамоти гумруки Тоҷикистон, рӯзи 30-юми июл гуфт, "агар пеш дар як рӯз 35-40 мошин ворид мешуд, ҳоло 3-4 мошин ворид мешавад. Инҳо ҳамон мошинҳое ҳастанд, ки қабл аз афзоиши ноамниҳо дар роҳ буданд. Ҳоло қариб, ки гардиши мол нест".

Бӯрӣ Ҳамроҳзода, сардори Раёсати таҳлил ва омори гумрукӣ, гуфт, гардиши мол агар моҳи январи имсол 86 ҳазору 492 тоннаро ташкил медод, дар моҳи июн ба 37 ҳазору 987 тонна расид.

Чанд рӯз пеш мақомоти Афғонистон эълон карданд, ки бинобар ба дасти Толибон афтодани гузаргоҳҳои марзии ин кишвар давлат 33 миллион доллар зарар дидааст.

Тоҷикистон бо Афғонистон беш аз 1400 километр марз дорад. Роҳи аслие, ки Тоҷикистонро бо Афғонистон мепайвандад, гузаргоҳи Шерхон Бандар (аз тарафи Афғонистон) ва Панҷи Поён (аз тарафи Тоҷикистон) аст.

Хадамоти гумрук мегӯяд, марзҳои баста гардиши молро коҳиш дод
лутфан мунтазир бошед

Феълан кор намекунад

0:00 0:03:08 0:00

Мушкил бо Қирғизистон пас аз моҷарои моҳи апрел

Масъулони Хадамоти гумрук гуфтанд, имсол дар баробари Афғонистон, гардиши мол миёни Тоҷикистону Қирғизистон низ кам шудааст. Рӯзи 24-уми май ҳукумати Қирғизистон бо як қарори худ вуруд, баромадан, транзит ва будубош дар қаламрави худро барои шаҳрвандони Тоҷикистон, то замони ҳалли масъалаҳои марзӣ, боздошт.

"Баъди ҳодисаҳо дар марз, хато накунам, 60 воситаи нақлиёт бо бори Тоҷикистон дар ҳудуди Қирғизистон монданд. Оид ба ин масъала Вазорати корҳои хориҷӣ корҳои муайянеро анҷом дод, аксари борҳое, ки ба шаҳрвандони мо тааллуқ доштанд, ворид шуданд. Лекин гардиши мол ва равуои шаҳрвандон манъ карда шудааст", -- шарҳ дод Хуршед Каримзода, раиси Хадамоти гумруки Тоҷикистон.

Ин дар ҳолест, ки тибқи иттилои ҷониби Тоҷикистон, табодули мол миёни Тоҷикистону Қирғизистон дар соли 2020 тақрибан 37 миллион долларро ташкил додааст.

Таъсири додугирифти кам ба нарх дар бозор

Баъзе аз коршиносон гуфтанд, коҳиши табодули мол тавассути Афғонистону Қирғизистон ба нархи маҳсулот дар бозорҳои Тоҷикистон ва зиндагии мардум бе таъсир намемонад. Фирӯз Қодиров, иқтисоддони тоҷик, дар суҳбат бо Радиои Озодӣ гуфт, "вақте дар бозор пешниҳод кам шуд, якбора нархи ҳамон гурӯҳи маҳсулот метавонад, баланд шавад. Нарх, ки баланд шуд, ба сатҳи зиндагӣ таъсир дорад."

Намояндагони Хадамоти гумрук мегӯянд, пас аз баста шудани марзи Қирғизистон, тоҷирон масири табодули молу колоро тавассути Узбекистон ба роҳ мондаанд. Ба қавли, раҳбарияти ин ниҳод, ҳарчанд гардиши савдо миёни Тоҷикистон ва ду ҳамсоякишвар кам шудааст, дар умум табодули тиҷорати хориҷӣ коҳиш наёфтааст.

Тибқи иттилои Хадамоти гумруки Тоҷикистон, дар 6 моҳи аввали имсол гардиши тиҷорати хориҷии Тоҷикистон ба тақрибан 3 миллирад доллар расид, ки нисбат ба ҳамин давраи соли гузашта 36% зиёд аст.

Дар савдои хориҷии Тоҷикистон тавозуни содирот бар воридот тафовути зиёд дорад. Аз ҳаҷми умумии гардиши мол, 1 миллираду 870,2 миллион доллар ба воридот ва 1 миллиарду 48,5 миллион доллар ба содирот рост меояд. Дар гузашта коршиносон борҳо таъкид намудаанд, ки аксар молҳои ниёзи аввал аз хориҷи кишвар ба ватан оварда мешавад ва ин яке аз сабабҳои гаронии нарх дар бозорҳо мебошад.

Нигаронии ИМА ва ИА аз ояндаи демократияи Гурҷистон

Шарл Мишел, президенти Шӯрои Аврупо ва президенти Гурҷистон Саломе Зурабишвили

ИМА ва Иттиҳоди Аврупо рӯзи 29 июл аз ояндаи демократияи Гурҷистон изҳори нигаронӣ карданд. Ин дар ҳолест, ки созиши сиёсии қаблан ҳосилшудаи миёни мухолифону ҳизби ҳокими "Орзуи Гурҷистон" бекор шуд ва демократияи Гурҷистонро дучори як бӯҳрони амиқтар кард. Иракли Кобахидзе, раҳбари ҳизби “Орзуи Гурҷистон” рӯзи 28-уми июл созиши бо мухолифон ва миёнҷигии ИА ҳосилшудаи се моҳ пешро бекор кард ва мухолифонро дар ноком шудани он айбдор намуд. Шарл Мишел, президенти Шӯрои Аврупо дар як музокироте тавонист гурӯҳҳои мухолифин ва ҳам ҳизби “Орзуи Гурҷистон” -ро ба ҳам оварад ва онҳоро водор кунад, ки ба парлумон ворид шуда аз паи татбиқи ислоҳоти интихоботӣ шаванд. Сафорати ИМА дар Тифлис бо нашри изҳороте гуфт, ки “ИМА аз қарори якҷонибаи ҳизби “Орзуи Гурҷистон” барои хориҷ шудан аз созиши 19-уми апрел, ки дар натиҷаи музокираҳои муштарак ва хеле душвори шашмоҳа ба даст омад ва ҳам як санади зарурии изтирорӣ барои идомаи пешрафти мардуми Гурҷистон ва демократияи он шумурда мешавад, амиқан ноумед шудааст”. Сафорат навиштааст, ки “Вашингтон аз нокомиҳои афзоянда дар ояндаи демократияи Гурҷистон то рафт нигарон мешавад”.

Дар изҳороте, ки Мишел рӯзи 29 июл дар Брюссел нашр кард, созишномаро роҳи беҳтарини бунёди демократияи қавитар ва ҳукумати қонун дар Гурҷистон номидааст. Мишел гуфт, ки бо чандин бозигарони сиёсии Гурҷистон ва ҳам президент Саломе Зурабишвили машваратҳо доир мекунад.

Анҷумани журналистон: Скурко бояд ба беморхонаи мулкӣ интиқол ёбад

Андрей Скурко, раиси бахши таблиғот ва бозорёбии нашрияву вебсайти маъруфи “Наша Нива“ 8 июл дар дафтари кориаш дар шаҳри Минск боздошт шуд. Ӯ бемори диабети қанд аст

Анҷумани журналистони Беларус аз мақомоти Минск тақозо кард, ки корманди матбуот Андрей Скуркоро, ки дар шароити боздоштгоҳ ба нишонаҳои коронавирус гирифтор шудааст, барои дарёфти ёрии тиббӣ ба беморхона интиқол диҳанд. Дархости анҷуман рӯзи 29 июл ба унвонии раёсати зиндонҳои вазорати умури дохилӣ ва вазорати тандурустии Беларус ирсол шуд. Дар номаи журналистон тақозо шудааст, ки Скурко ба таври оҷил ба як беморхонаи мулкӣ интиқол ёбад.

Скурко, раиси бахши таблиғот ва бозорёбии нашрияву вебсайти маъруфи “Наша Нива“ ҳамроҳ бо чанд ҳамкораш рӯзи 8 июл дар дафтари кориаш дар шаҳри Минск боздошт шуд. “Наша Нива” гуфт, ки Скуркои 43-сола бо сабаби ошкоршавии мушкили марбут ба тағйироти сохторӣ дар шушҳояш ба боздоштгоҳи низомие интиқол дода шуд. Дар гузориш омадааст, ки бо сабаби ба COVID-19 гумонбар шудани Скурко ҳамутоқони ӯро дар карантин ҷой карданд. Қабл аз ин 13 рӯз Скурко дар як боздоштгоҳи дигаре нигаҳдорӣ мешуд, ки бо қоидаҳои сахту сангинаш маъруф аст. Дар ин боздоштгоҳ катҳои хоб кӯрпаву болишт надоранд ва Скурко аз дастрасӣ ба доруҳои зидди диабети қандаш маҳрум буд. Анҷумани журналистони Беларус навиштааст: “Андрей Скурко як бемори диабети қанд аст, ки пайваста ба инсулин ниёз дорад. Барои нафарони мисли ӯ олудашавӣ ба коронавирус марговар буда метавонад”.

Муқаррароти нав дар ИМА дар заминаи пешгирӣ аз олудашавиҳо

Бархе идораҳои низомӣ, мисли ин, ҳанӯз ҳам кори худро фосилавӣ анҷом медиҳанд

Президент Ҷо Байден рӯзи 29 июл гуфт, ки тамоми кормандони сохторҳои федеролии ИМА, ки аз COVID-19 эм нашудаанд, бояд дар маҳалли кор ниқоб пӯшида фосилаи иҷтимоиро риоя кунанд ва ҳам ба таври мунтазам тести зидди коронавирус супоранд. Байден, ки сокинони Амрикоро ба эмкунии ҳатмӣ даъват кардааст, гуфт, ҳамаи эмшудаҳо бояд аз санҷиши воксинасия ҳам гузаранд. Сиёсати нави ҷоришуда аммо эмкунии ҳатмии кормандони сохторҳои федеролиро пешбинӣ намекунад. Ин қарор инчунин ба низомиёне рабт надорад, ки ҳоло дар хидмати ҳарбӣ ҳастанд, вале Байден гуфт, ки аз вазорати дифои кишвараш тақозо мекунад, ки эмкунӣ бар зидди COVID-19 ба феҳристи воксинаҳои ҳатмии ходимони низомӣ ворид карда шавад.

Президенти ИМА гуфт, дар ним соли охир, ки маъракаи эмгузаронӣ ба таври фаъол ҷараён дорад, 164 миллион амрикоиҳо аз коронавирус эм карда шуданд, вале пайдоиши навъи босуръат паҳншавандаи вирус, ки онҳо “Делта” номгузорӣ кардаанд, мавҷи нави олудашавиҳо дар саросари сайёраро ба миён овардааст. Байден гуфт, ҳар қадар шумори бештари мардум эм карда шавад, хуб аст, вале боз ҳам “мо ҳанӯз пурра аз ин анбӯҳ берун нашудаем”.

Даъват ба кӯмаки Литва дар пешорӯи бӯҳрони муҳоҷират

Литва, деҳаи марзии Веребияй. Муҳоҷирони ироқӣ дар як урдугоҳе ба сар мебаранд. Июли соли 2021

Як мақоми баландпояи Комиссиюни Аврупо оид ба муҳоҷират аз аъзои Иттиҳоди Аврупо тақозо кард, ки дар заминаи таҷаммӯи ҳазорҳо муҳоҷирони ғайриқонунии аз хоки Беларус ба Литва гузашта мусоидат кунанд. Вазоратҳои дифои кишварҳои Балтика ҳамзамон Беларусро дар “ҳамлаҳои гибридӣ” ё омехта айбдор карданд. Литва ва мақомоти ИА гуфтанд, ки Беларус муҳоҷирон, асосан сокинони Ироқро ба хоки кишварҳои Балтика роҳ медиҳад ва ин амалаш қассосгирӣ барои пуштибонии Аврупо аз мухолифони режими саркӯбгари Александр Лукашенко мебошад.

Илва Йоҳанссон, мудири умури дохилии ИА дар номае ба унвонии вазирони умури дохилии кишварҳои ИА рӯзи 29-уми июл навишт, “истифодаи инсонҳо ҳамчун абзори ҳадафҳои сиёсӣ бояд хотима дода шавад. Бартарияти аввали мо ин аст, ки барои таъмини амнияти марзӣ бо Беларус ба Литва мусоидат кунем”.

Мақомоти Литва гузориш доданд, ки соли ҷорӣ 3 ҳазор муҳоҷири ғайриқонунӣ марзи ин кишварро убур кардааст, дар ҳоле, ки соли гузашта шумори онҳо ҳамагӣ 81 нафар буд. Тибқи гузоришҳо, Лукашенко дар вокуниш ба таҳримҳои болои Минск баъди интихоботи баҳсбарангези президентии августи порсол ва саркӯби эътирозгарон батакрор таҳдид кардааст, ки ба муҳоҷирон барои убур ба хоки ИА роҳро боз мекунад. Дар натиҷа, рӯзи 29 июл вазирони се кишвари назди Балтика – Литва, Латвия ва Эстонияву аъзои НАТО ба мувофиқа расиданд, ки барои расидагии беҳтар ба бӯҳрони муҳоҷират амалҳои худро беҳтар ҳамоҳанг хоҳанд кард. Арвидас Арусаускас, вазири дифои Литва гуфт, “вазъияти дар марз баамаломада як бӯҳрони маъмулии муҳоҷират нест, ин як ҷанги гибридӣ ба хотири ба ҳам задани суботи ИА, НАТО ва, ба вижа, давлатҳои Балтика мебошад.

Бонки миллии Қирғизистон ширкати мобилии "Мегаком"-ро мехарад

Бонки миллии Қирғизистон мумкин аст, ки ширкати мобилии "Мегаком"-ро харидорӣ кунад. Дар ин бора Мирлан Бакиров, раиси Бунёди идораи амволи давлатии Қирғизистон рӯзи 29 июл хабар дод.

Ҳукумати Қирғизистон тасмим гирифтааст, саҳмияҳои чаҳор ширкати давлатӣ: "Мегаком", "Бунёди кафолат", "Бонки каромат" ва "Бонки амонатгузории Авруосиё"-ро фурӯшад.

Бакиров гуфт, комиссияи вижа муайян мекунад, ки саҳмияҳои ин ширкатҳо чи гуна фурӯхта шаванд: аз тариқи музояда, озмун ё мустақим.

"Яке аз муштариҳои асосӣ барои харидани ширкати мобилӣ Бонки миллии Қирғизистон аст. Агар бонк ширкати мобилиро харидорӣ кунад, пас ширкат дар тавозуни давлат боқӣ мемонад", - гуфт Бакиров.

Ҳукумати Қирғизистон борҳо талош кард, ки ширкати мобилии "Мегаком"-ро фурӯшад. 100% саҳмияҳои ин ширкат дар ихтиёри давлат аст.

Муҳоҷирони узбек дар Калининград аз шароити сахти корӣ шикоят доранд

Муҳоҷирони узбек дар Калининград.

Гуруҳе аз муҳоҷирони Узбекистон, ки дар корхонаи коркарди моҳӣ дар вилояти Калинингради Русия кор мекунанд, аз маоши кам ва мусодира шудани шиносномаҳояшон аз сӯи корфармо, шикоят доранд. Ин муҳоҷиронро аз вилоятҳои Андиҷон ва Қашқадарёи Узбекистон ба корхонаи “За Родину!” бурдаанд.

Ба гуфтаи яке аз коргарони андиҷонӣ, раҳбарияти ширкати "Григорян", ки онҳоро ба кор дар корхонаи коркарди моҳӣ қабул кард, шиносномаҳояшонро гирифтааст.

"Дар аввал гуфтанд, ки дар корхонаи парандапарварӣ кор мекунед, вале ба корхонаи коркарди моҳӣ оварданд. Инҷо моҳӣ тоза мекунем. Мо гуфтем, ки шароити корӣ ба мо писанд нест. Вале корфармо дар посух гуфт, то 50-ҳазоррублӣ пули билети ҳавопайморо напардозем, шиносномаҳои моро намедиҳанд. Бархеҳо бояд 100 ҳазор рубл пардозанд", - афзуд ӯ. Дар ҳоле, ки ба гуфтаи худи муҳоҷирон, пули чиптаи онҳо на 50 ҳазор, балки 16 ҳазор рубл аст.

Ҳамсуҳбати мо мегӯяд, дар корхонаи "За Родину" беш аз 500 муҳоҷир кор мекунад ва онҳо маҷбур ҳастанд, талаби корфарморо иҷро кунанд, чун тавони пардохти пули гуфтаи ӯро надоранд.

Миллиардери чинӣ барои интиқоди ҳукумат 18 сол зиндонӣ шуд

Сун Даву, тоҷири маъруфи чинӣ.

Мунтақиди машҳури Ҳизби коммунистии Чин, миллиардер Сун Даву бо ҷурми "ангехтани бадбинӣ" се миллион юан ҷарима ва 18 сол аз озодӣ маҳрум шуд.

Ба иттилои расонаи хабарии South China Morning Post, додгоҳи шаҳри Гаобейдяни Чин Сунро ба он айбдор донистааст, ки гӯё ӯ гуруҳи одамонро барои ҳамла ба муассисаҳои давлатӣ таҳрик дода, тиҷорати ғайриқонунӣ доштааст. Ҳамчунин вай гӯё заминҳоро ғайриқонунӣ ғасб карда, "мушкил эҷод менамудааст".

Суни 67-сола раҳбари як корхонаи кишоварзие аст, ки дар он 9 ҳазор одам кор мекунад. Ӯ аз камтарин одамоне дар Чин буд, ки соли 2019 ҳукумати ин кишварро ба пинҳон кардани паҳншавии зукоми африқоии хук ошкоро танқид кард. Он замон беш аз 100 миллион хук бар асари ин беморӣ ҳалок шуда буд. Вай дар суҳбат бо телефизиони CNN гуфт, мақомот танҳо баъд аз нашр шудани акси ҳайвонҳои ҳалокшуда розӣ шудаанд, чорвои ӯро аз санҷиш гузаронанд.

Бино ба гузориши Reuters, соҳибкор дар пайи ин кори худ бо як корхонаи давлатӣ вориди баҳси замин шуд. Ҳомиёни ҳуқуқи Чин гуфтанд, "Сун ба хотири дастгирии ҳуқуқи инсон муҷозот шудааст".

Қирғизистон 60 хонаи осебдидаро дар низои марзӣ бо Тоҷикистон барқарор кардааст

Деҳаи Мақсат, ноҳияи Лайлаки Қирғизистон, моҳи июли 2021

Муовини вазири иқтисод ва молияи Қирғизистон рӯзи 29-уми июл дар ҷаласаи порлумони он кишвар гуфт, сохтмони 60 манзили зист дар вилояти Бодканд, ки дар натиҷаи низои марзӣ бо Тоҷикистон осеб дида буданд, ба поён расидааст.

Дониёр Имоналиев, дар ин бора дар посух ба интиқодҳои як вакил дар мавриди ба дарозо кашидани бунёди хонаҳои осебдида хабар дод.

Ба гуфтаи ӯ, сохтмони хонаҳои мазкур ба далели дер расидани маҳсулоти сохтмонии онҳо аз Туркия тӯл кашид.

"Аз 140 хона сохтмони 60-тоаш ба поён расидааст. 15 хонавода аллакай ба манзилҳои нави худ даромадаанд", -- афзуд ӯ.

Пештар намояндаи махсуси президенти Қирғизистон дар вилояти Бодканд, Маъмурҷон Раҳимов, гуфта буд, теъдоди хонаҳое, ки дар натиҷаи низои марзӣ бо Тоҷикистон тахриб шудаанд, ба 140 расидааст. Пештар шумори онҳо 136 адад гуфта мешуд.

Ба гуфтаи Раҳимов, тамоми ин хонаҳо то ҷашни 30-солагии Истиқлоли давлатии Қирғизистон мавриди истифода қарор хоҳанд гирифт.

Рӯзҳои 28-29-уми апрели имсол дар марзи Қирғизистону Тоҷикистон низоъ сар зада, дар натиҷаи он аз ҳар ду ҷониб даҳҳо манзили зист ба коми оташ фурӯ рафтанд.

Раҳбарони нави "Имон" гуфтанд, саҳмияҳои муассисаро бо нархи бозор харидаанд. ВИДЕО

Раҳбарони нави "Имон Интернешнл" мегӯянд, ин муассисаро бо нархи бозор харидаанд
лутфан мунтазир бошед

Феълан кор намекунад

0:00 0:03:37 0:00

Моликони нави “Имон интернешнл” дар шаҳри Хуҷанд мегӯянд, бастаи саҳмияҳои ин ташкилоти молиро аз соҳибони пешинаи он бо нархи бозор харидаанд. Ин нукта дар як нишасти хабарӣ дар Хуҷанд рӯзи 28-уми июл садо дод.

Пештар муҳаққиқони OCCRP, Маркази пажӯҳиши фасод ва ҷиноятҳои созмонёфта, ошкор карда буданд, ки "Имон интернешнл" дар як амалиёти печида ва шубҳанок аз дасти муассисони тоҷикистониаш бо нархи арзон гирифта шуда, соҳибкори итолиёвӣ Винчензо Транӣ бастаи асосии саҳмияҳоро ба даст овард.

Муаллифони таҳқиқ навиштаанд, дар харидани саҳмияҳо, соҳибкори итолиёвӣ аз пуштибонии Ҷамолиддин Нуралиев, муовини аввали раиси Бонки Миллӣ ва домоди раиси ҷумҳурии Тоҷикистон бархӯрдор буд.

Моликони нав фошкориҳои журналистони таҳқиқгарро бепоя хонданд. Александр Ерёмин, раиси Шӯрои нозирони “Имон интернешнл” гуфт, “мефаҳмед, агар ин матлаб асос медошт, мо ҳоло шоҳиди бозпас гирифтани амонатҳо мешудем. Зеро агар туро ба фаъолиятҳои ношаффоф айбдор кунанд, муштариҳо безобита шуда, мераванд."

Дар тақвияти ин иддао худи Ерёмин гуфт, сармоягузорони “Имон интернешнл” ҳамкориро бо ин ташкилот қатъ накарда, балки идома медиҳанд. Ӯ афзуд, ахиран Бонки Аврупоии Таҷдид ва Рушд барои “Имон интернешнл” 4 миллион доллар қарз ҷудо кард.

Дар ин нишаст ҳамчунон гуфта шуд, хариду фурӯши саҳмияҳои Имон интернешнл” зери назари мақомоти Тоҷикистон сурат гирифт ва хилофкорие дар он рӯй надодааст.

Хариду фурӯши "Имон интернешнл", ки баҳсҳои зиёдро ба миён овардааст, моҳи марти соли 2021 анҷом шуд. Бар асоси он, ширкати Mikro Kapital, Бонки Аврупоии Таҷдид ва Рушд ва Бонки рушди соҳибкории FMO-и Ҳолланд ба сурати умум 43,5 дарсади саҳмияҳои Imon International-ро, ки дар дасти саҳоми асосии он -- Фонди хурди қарздиҳии "Имон" буд, ба 5,4 миллион доллар хариданд.

"Имон интернешл" яке аз ниҳодҳои фаъоли қарзӣ дар Тоҷикистон мебошад, ки соли 2005 аз сӯйи Гулбаҳор Маҳкамова ва Санавбар Шарифова ташкил шуд. Ҳадафи онҳо аз ибтидо расондани хадамоти молиявӣ ба занони соҳибкор буд.

Ташкилоти "Имон интернешнл" дар солҳои охир ба яке аз иштирокчиёни асосии бозори бонкии Тоҷикистон табдил шуд ва аз сармоягузорони хориҷӣ маблағҳои калони қарзӣ ҷалб кард. Мушкил дар кори "Имон интернешл" соли 2017 оғоз шуд.

Дар он сол Бонки Миллӣ эълон кард, ки дар кори "Имон" ва бонки "Эсхата" камбудҳои зиёд ошкор шудааст. Дар пайи эълони Бонки Миллӣ, роҳбарияти онвақтаи "Эстаха" ва "Имон" аз мақомҳояшон барканор шуданд. Чанде баъд Бонки миллӣ бо судури як қарор фондҳоеро мисли «Имон» уҳдадор кард саҳмияҳошонро фурӯшанд. Ин қарори Бонки миллӣ ба Гулбаҳор Маҳкамова ва Санавбар Шарифова интихоберо ҷуз фурӯхтани саҳмияҳояшон нагузошт.

"Барқи тоҷик" қарзи аҳолиро 1,3 миллиард сомонӣ шумурд. Хабарнигорон эътироз карданд. ВИДЕО

Намояндагони ширкати "Барқи тоҷик" гуфтанд, аҳолӣ аз истифодаи нерӯи барқ 1,3 миллиард сомонӣ қарздор аст. Баъзе аз хабарнигорон дар нишасти матбуотии масъулони ширкат ин оморро ба баҳс кашиданд.

Исмоил Маликов, масъули “Шабакаҳои тақсими барқ”, рӯзи 29-уми июл гуфт, имсол қарзи аҳолӣ дар назди барқ зиёд нашуда, 1,3 миллиард смонӣ қарзе аст, ки солҳои пеш ҷамъ шудааст. «Имсол, баръакс, аҳолӣ пешпардохт доштанд», -- афзуд ӯ.

Мавзӯи қарзи аҳолӣ аз истифодаи барқ миёни хабарнигорон ва масъулони “Барқи тоҷик” баҳси гармеро ба миён овард. Чанд хабарнигор худашонро мисол оварда, гуфтанд, «агар ҳаққи барқро пардохт накунӣ, нозири барқ симро мебурад.»

"Барқи тоҷик" исрор меварзад, ки аҳолӣ қарздор аст
лутфан мунтазир бошед

Феълан кор намекунад

0:00 0:01:27 0:00

Масъулини “Барқи тоҷик” чанд дафъа талош карданд, собит кунанд, ки омори қарзи аҳолӣ аз истифодаи барқ дуруст аст. Даъвоҳои ширкат дар бораи қарздории аҳолӣ солҳои пеш ҳам шубҳаву гумонҳои зиёдро ба миён оварда буд. Аз рӯи омори “Барқи тоҷик” аҳолӣ бузургтарин қарздор аст.

Инҳо низ аз «Барқи тоҷик» қарздор будаанд:

  • Талко – 422 миллион сомонӣ;
  • Оҷонси беҳдошти замин – 333 миллион сомонӣ;
  • Хоҷагиҳо – 201 миллион сомонӣ;
  • Соҳаи обу корез – 52 миллион сомонӣ.

Дар ҳамин ҳол, як масъули ширкати "Барқи тоҷик" гуфт, қисми асосии қарзи аҳолӣ маблағе аст, ки 10-20 сол пеш ҷамъ шуда, бояд бахшида шавад.

"Масалан, як қисми маблағ қарзи колхозҳо аст. Колхозу совхозҳо дигар нестанд. 10 сол пеш аудиторони байналхалқӣ тавсия доданд, ки як қисми ин қарз ҳамчун қарзи беэътимод бахшида шавад. Вале ин кор то ҳол сурат нагирифтааст", -- гуфт масъули «Барқи тоҷик» бе зикри номаш.

Коршиносон сабабҳои ин мушкилро ба мудирияти нодуруст рабт медиҳанд. Айни замон баъзе аз кормандони ширкат бе зикри номи худ мегӯянд, қарзҳои зиёд умдатан аз корхонаву шахсонест, ки ба хешовандони мансабдорон тааллуқ доранд.

Дар "Барқи тоҷик" гуфтанд, нархи барқ боло меравад, аммо нагуфтанд, ки чӣ қадар

Бинои ширкати "Барқи тоҷик"

Масъулони ширкати “Барқи тоҷик” гуфтанд, нархи истифодаи барқ имсол дар Тоҷикистон гарон мешавад, аммо нагуфтанд, ки чӣ қадар.

Рустам Маҷидзода, сардори департаменти иқтисод ва молияи ширкати “Барқи тоҷик”, рӯзи 29-уми июл гуфт, нархи барқро «як гуруҳи корӣ дар назди Хадамоти зиддиинҳсорӣ муайян мекунанд».

Масъули “Барқи тоҷик” афзуд, онҳо хароҷоти худро ба ин гуруҳи корӣ пешниҳод кардаанд ва дар ниҳоят ҳукумат тасмим мегирад, ки нархи барқ чӣ қадар бошад.

Рустам Маҷидзода дар посух ба суоли Радиои Озодӣ гуфт, арзиши асосии истеҳсоли як киловат барқ дар Тоҷикистон бе назардошти хароҷоти интиқол 20 дирам мебошад. Маҳмадумар Асозода, муовини аввали раиси “Барқи тоҷик”, шарҳ дод, ки «арзиши аслии истеҳсоли барқ вобаста ба хароҷот метавонад зиёдтар бошад.»

Дар бораи боло рафтани нархи барқ рӯзи 12-уми июл вазири энержӣ ҳам суҳбат кард. Пештар баъзе аз сокинон аз ҳаргуна тасмими мақомот барои боло бурдани нархи барқ танқид кардаанд. Мақомот ҳамвора мегӯянд, нархи истифода аз барқ дар Тоҷикистон дар муқоиса ба кишварҳои дигари пасошӯравӣ хеле поин аст.

Чанд созмони молии байналмилалӣ, аз ҷумла Бонки Ҷаҳонӣ дар чанд шарти худ ба Тоҷикистон боло бурдани қимати барқро зикр кардаанд.

Нархи барқ пайваста дар Тоҷикистон боло меравад ва танҳо соли гузашта ба хотири пандемия ҳукумат афзоиши нархи барқро манъ кард.

Ёфтҳои бештар

XS
SM
MD
LG