Пайвандҳои дастрасӣ

Хабари нав

Хабарҳо

Дар инфиҷори бами роҳ 2 корманди полиси Ироқ кушта шуд

Полиси Ироқ ва кормандони тибби ин кишвар мегӯянд, дар инфиҷори бами роҳ дастикам ду афсари полис кушта шудаанд. Инфиҷор замоне рух додааст, ки дастаи нозирони полис аз хиёбони марказии Тикрит мегузаштанд. Як корманди дигари полис ҷароҳат бардоштааст. Касе ё нируе масъулияти ин инфиҷорро бар ӯҳда нагирифтааст.

Ҳамаи хабарҳои имрӯзро дар инҷо бихонед

Маҳмуди Аҳмадинажод: Қонуни ҳиҷоб бояд бо хости аксарияти мардум мутобиқ бошад

Маҳмуди Аҳмадинажод

Раиси ҷумҳури пешини Эрон гуфтааст, қонуни ҳиҷоб дар Эрон бояд бо хости аксарияти мардум мутобиқ карда шавад. Маҳмуди Аҳмадинажод дар суҳбат бо Меҳдии Насирӣ, сардабири собиқи рӯзномаи "Кайҳон" бо ишора ба қонуни ҳиҷоби иҷборӣ дар Эрон гуфтааст, "агар Маҷлис як қонун гузоштаву аксарияти ҷомеа мегӯяд, ман қабул надорам, метавонед бигӯед, ки ба ҳар қимате ҷорӣ мекунам?" Радиои Фардо, бахши форсии Радиои Озодӣ, навишт, мусоҳибаи Аҳмадинажод рӯзи 26-уми ноябр тавассути Ютюб ва шабакаи иҷтимоии Телеграм нашр шуд. Қаблан Оятуллоҳ Алии Хоманаӣ, раҳбари Ҷумҳурии Исломӣ аз ҳиҷоби иҷборӣ дар Эрон дифоъ карда, онро монеи "озори ҷинсӣ" номида буд. Дар солҳои поёнии давраи дувуми раёсати ҷумҳурии Маҳмуди Аҳмадинажод нишонаҳое аз ихтилофи миёни ӯ ва Хоманаӣ пайдо шуд. Вай дар интихоботи раёсати ҷумҳурии се сол пеш номзадиашро пешниҳод кард, ки гуфта мешуд "бар хилофи тавсияи раҳбари Ҷумҳурии Исломӣ" буд ва ба ҳамин далел Шӯрои нигаҳбон номзадии ӯро рад кард.

Дагир Хасавов, вакили хонаводаи Ҳувайдо Тилозода, 6 сол зиндонӣ шуд

Дагир Хасавов. 13-уми ноябри 2020

Дагир Хасавов, вакили мудофеи шинохтаро дар Русия ба 6 сол зиндон маҳкум кардаанд. Хабаргузории ТАСС навишт, ҳукми додгоҳи Измайловои шаҳри Маскав рӯзи 26-уми ноябр содир шуд. Ӯро барои шаҳодат ё баёноти бардурӯғ айбдор кардаанд. Қаблан намояндаи додситонӣ барояш тақрибан 7 соли маҳрумӣ аз озодиро талаб карда буд. Александр Лебедев, вакили мудофеи Дагир Хасавов, ба хабаргузории ТАСС гуфтааст, бино ба ҳукми додгоҳ "ӯ давраи ҷазоро дар зиндони низомаш умумӣ адо хоҳад кард". Вале айни замон афзудааст, аз рӯйи ҳукм шикоят мекунанд, чун ба бегуноҳии нафари зери ҳимояташ бовар доранд. Ин вакили шинохта рӯзи 17-уми сентябри соли 2019 дастгир шуд. Вай он замон аз ҳаққи хонаводаи Ҳувайдо Тилозода, кӯдаки қатлшудаи тоҷик дар Русия ҳимоят мекард. Ҳамзамон вакили дифои раҳбари пешини ҳукумати Доғистон Абдусамад Ҳомидов ва муовини ӯ Раюдин Юсуфов буд. Ӯро дар доираи ҳамин парванда боздошт карданд. Худи Хасавов иттиҳомро беасос дониста, боздоштро дорои ангезаҳои сиёсӣ донистааст. Дагир Хасавов моҳи январи соли 2016 барои суҳбат бо аъзои он замон боздоштшудаи ҳизби наҳзати исломӣ ба Душанбе рафта буд, аммо пас аз як нишасти матбуотӣ зуд баргашт.

Парвозҳои Fly Dubai-ро ба Тоҷикистон кам кардаанд

Акс аз бойгонӣ

Ширкати ҳавопаймоии Fly Dubai парвози доимиашро ба Тоҷикистон кам кардааст. Аз ин ба баъд ҳавопаймои ширкат ҳафтае як бор дар масири Дубай - Душанбе ва баръакс парвоз анҷом медиҳад. Чунин тасмимро Ситоди мубориза бо COVID-19 дар Тоҷикистон ва бо ҳадафи пешгирӣ аз паҳншавии бемории ҳамагир гирифтааст. Намояндагони Оҷонси авиатсияи шаҳрвандии Тоҷикистон мегӯянд, ҳоло гуфтушунид дар бораи барқарории парвозҳои доимӣ бо Чину Тошканд ва Русия идома дорад.

Ҳасани Рӯҳонӣ дар бораи муносибатҳои ояндаи Эрону Амрико гуфт

Ҳасани Рӯҳонӣ

Ҳасани Рӯҳонӣ, раиси ҷумҳури Эрон гуфт, Эрону Иёлоти Муттаҳидаи Амрико агар бихоҳанд, метавонанд ба шароите, ки ду кишвар то 20-уми январи соли 2017 ба он мувофиқа карда буданд, баргарданд. Яъне шароити қабл аз ба қудрат расидани Доналд Трамп. Рӯҳонӣ рӯзи 25-уми ноябр дар ҷаласае дар Теҳрон гуфт, Эрон ба ин иқдом омода аст, агар Амрико ҳам хоста бошад. Вай мегӯяд, "умед дорем, давлати ояндаи Амрико дар аввалин қадам сиёсатҳои Трампро нисбат ба Эрон маҳкум кунад." Ҳасани Рӯҳонӣ ҳамчунон гуфт, ҳукумати нави Амрико бояд сиёсатҳои, ба қавли ӯ, нодурустеро, ки ҳукумати пешина дар тӯли чаҳор сол ҷорӣ карда буд, ҷуброн кунад. Раиси ҷумҳур Доналд Трамп дар соли 2018 кишварашро аз созиши ҳастаии қудратҳои бузург бо Эрон хориҷ карда, таҳримҳоро алайҳи Эрон аз нав оғоз кард.

Трамп мушовири пешини амнияти миллиашро афв кардааст

Майкл Флин

Доналд Трамп, раиси ҷумҳурии Амрико, мушовири пешини амнияти миллиаш Майкл Флинро афв кард. Бо бахшида шудани Флин, ба таъқиби додгоҳии ӯ дар робита ба таҳқиқот дар мавриди мудохилаи Русия дар интихоботи президентии соли 2016 низ поён дода шуд. Майкл Флин муттаҳам аст, ки барои иртиботаш бо русҳо дар ин қазия ба идораи таҳқиқоти федеролии Амрико дурӯғ гуфтааст. Трамп рӯзи 25-уми ноябр дар Твиттер навишт, "ифтихори бузург аст, ки афви комили генерал Флинро эълом мекунам." Ин иқдом сабаби интиқоди вакилони демократ, аз ҷумла Ненси Пелоси, раиси Маҷлиси Намояндагони Амрико, шуд.

Сокинони осебдидаи Сардоба мегӯянд, ки ҳанӯз ҳам бехонаанд

Сокинони осебдидаи Сардоба 23-юми ноябр ба мақомоти маҳаллӣ муроҷиат карда, талаб намуданд, ки ба онҳо хонаи нав диҳанд.

Соҳибони манзилҳое, ки дар натиҷаи рахнашавии садди обанбори Сардобаи Узбекистон зарар дидаанд, мегӯянд, бо вуҷуди фаро расидани фасли сармо ҳанӯз ҳам бехона ва дар мактабу боғчаҳо ҳастанд.

"Бо се фарзандам дар кӯча мондаам. Мақомоти маҳаллӣ дар як боғи техникӣ манзили муваққатӣ додаанд, вале ҳамроҳи фарзандон дар рӯйи бетон хоб меравем. То имрӯз ба ҳама чиз тоқат кардем, вале баъди оғози сардиҳои шадид косаи сабри мо лабрез шуд. Аз ваъдаҳои холӣ хаста шудем", - гуфт Одина Расулова, як сокини Сардоба.

Сокинони осебдидаи Сардоба 23-юми ноябр ба мақомоти маҳаллӣ муроҷиат карда, талаб намуданд, ки ба онҳо хонаи нав диҳанд.

"Вақте ба вакили мудофеъ муроҷиат кардам, ба ман гуфтанд, ки мақомоти маҳаллӣ ҳақ надоштанд, хонаи Шуморо вайрон кунанд. Он танҳо дар ҳолати розигӣ додани ман бояд тахриб мешуд. Дар ҷойи манзили ман бинои панҷошёна сохтанд, вале хонаводаи ман бесарпаноҳ аст", - изҳор дошт сокини дигари Сардоба бо номи Сайёра Холбоева.

Як корманди ҳукумати ноҳияи Сардоба зиёд шудани шикоятҳои шаҳрвандонеро тасдиқ кард, ки дар натиҷаи обхезӣ хонаҳои худро аз даст додаанд.

Обанбори Сардобаи Узбекистон моҳи майи соли 2018 мавриди истифода қарор гирифта, барои обёрии заминҳо бунёд шуда буд. Дар оғози моҳи майи имсол садди он рахна шуд. Дар натиҷа ба камияш 70 ҳазор сокини атрофи обанбор ба ҷойҳои бехавф кӯчонида шуданд.

Русия ба маблағи 8 миллион доллар ба Қирғизистон кумаки ғизоӣ додааст

Акс аз бойгонӣ

Русия ба маблағи 8 миллион доллар ба Қирғизистон кумаки ғизоӣ фиристодааст. Дар ин бора аз Вазорати меҳнат ва рушди иҷтимоии Қирғизистон рӯзи 26-уми ноябр хабар доданд. Ин кумак аз 9 миллион тонна маҳсулот иборат аст ва ба хонаводаҳое, ки аз пайомадҳои бемории COVID-19 зиён дидаанд, тақсим карда мешавад. Дар моҳи июли имсол Муассисаи ғизоӣ ва кишоварзии Созмони Милали Муттаҳид аз бадшавии амнияти ғизоӣ дар саросари дунё, аз ҷумла кишварҳои Осиёи Марказӣ ҳушдор дода буд. Дар моҳи октябр нисбат ба моҳи декабри соли 2019 дар Қирғизистон қимати маҳсулоти ғизоӣ 9,6 дарсад афзудааст. Ҳукумати Қирғизистон хабар дод, ки арзиши баъзе аз маҳсулоти ғизоиро ба танзим хоҳад даровард.

Идораи таъминкунандаи барқро дар Узбекистон ба додгоҳ кашиданд

Сокинони баъзе аз минтақаҳои Узбекистон аз набудани барқу газ шикоят доранд

Кумитаи зиддиинҳисорӣ (зиддимонополӣ)-и Узбекистон идораи таъминкунандаи барқи пойтахти он кишвар, шаҳри Тошкандро ба додгоҳ кашид. Кумитаи зиддиинҳисорӣ мегӯяд, идораи таъминкунандаи барқ қонун "Дар бораи ҳифзи ҳуқуқҳои истеъмолгарон"-ро вайрон кардааст. Ба гуфтаи кумита, дар моҳҳои октябр ва ноябр ширкати таъминкунандаи барқ ба далели қарздорӣ барқи сокинонро қатъ, аммо баъд аз пардохти қарз барқи сокинон дубора таъмин нашудааст. Бино ба хабарҳо, ҳафтаи гузашта 17 ҳазор истифодабарандаи барқ дар пойтахти Узбекистон бе барқ мондаанд. Дар ҳафтаҳои охир дар Узбекистон дар пайи сардтар шудани ҳарорати ҳаво қатъшавии барқ ва гази сокинон зиёд мушоҳида мешавад.

Дар як шабонарӯз дар Амрико марги 2400 касро аз коронавирус сабт кардаанд

Акс аз бойгонӣ

Дар як шабонарӯзи ахир дар Иёлоти Муттаҳида марги 2400 касро аз бемории коронавирус сабт кардаанд. Ин омори баландтарини маргумир аз бемории ҳамагир дар ним соли гузашта дар Амрикост. Ин рақам дар ҳоле сабт шудааст, ки амрикоиҳо рӯзи 26-уми ноябр аз ҷашни шукргузорӣ таҷлил мекунанд ва хонаводаҳо гирдиҳам меоянд. Ҷо Байден, раиси ҷумҳури мунтахаби Амрико, шаби 25-уми ноябр дар суханронияш ба муносибати иди шукргузорӣ аз мардум хост, талошҳоро барои муқобила бо вируси нав шиддат бахшанд ва ҳангоми таҷлил аз ид фосилаи ҷисмониро риоя кунанд. Ӯ афзуд, "мо бо вирус дар ҷангем, на бо ҳамдигар".

Ба Барнои Бекматзода иҷозат надодаанд, бинои комиссариати ҳарбии Кӯлобро навор гирад. ВИДЕО

Барнои Бекматзода аз тарафи чап

Ба хабарнигори тоҷик, Барнои Бекматзода, иҷоза надодаанд, ки бинои комиссариати ҳарбии Кӯлобро ба навор гирад. Комиссариатҳои ҳарбӣ дар фасли баҳору тирамоҳ ба далели вуҷуди “облава” ё “сарбозшикор” дар маркази таваҷҷуҳ қарор мегиранд.

Хабаранигорон ин ҳолатро ба маҳдуд шудани озодии баёну фаъолияти рӯзноманигорони мустақил рабт доданд. Комиссари комиссариати ҳарбии Кӯлоб мегӯяд, танҳо дар сурати доштани иҷозати Вазорати дифоъ, банаворгирии бино имконпазир хоҳад буд.

Барнои Бекматзода рӯзи 25-уми ноябр гуфт, “комиссар ҳангоми ба навор гирифтан бо ман муноқиша кард. Ҳатто муттаҳам кард, ки гуё барои душманони бегона кор мекунем ва аз ин рӯ ҳаққи ба навор гирифтани биноро надоштаем.”

Баҳс баъди ним соли он рух дод, ки шаҳрдори Кӯлоб ба раҳбарони ҳамаи идораҳо дастур дода буд, бо хабарнигорон ҳамкорӣ кунанд ва робитаи хуб дошта бошанд. Ӯ гуфта буд, “мардак дар ҳамин ҷо зиндагӣ мекунад, проблемаро бо чашми худ мебинад, инъикос мекунад. Мову шумо вазифадорем, ки иҷро карда, баррасӣ кунем.”

Гузориши видеоиро дар инҷо бинед:

Баҳси комиссари ҳарбии Кӯлоб бо хабарнигори маҳаллӣ
лутфан мунтазир бошед

Феълан кор намекунад

0:00 0:02:05 0:00

Сӣ Ҷинпин дар паёме ба Ҷо Байден ба рушди муносибатҳо ибрози умед кард

Сӣ Ҷинпин

Сӣ Ҷинпин, раиси ҷумҳурии Чин, пирӯзии Ҷо Байден, президенти мунтахаби Амрикоро дар интихоботи ахир табрик гуфтааст. Расонаҳои давлатии Чин рӯзи 25-уми ноябр гузориш доданд, ки Ҷинпин ибрози умедворӣ кардааст, робитаҳо бо дарназардошти манфиатҳои ду кишвар ва тибқи орзуҳои ҷомеаи ҷаҳонӣ пеш равад. Пештар Вазорати корҳои хориҷии Чин ба Ҷо Байден паёми табрикӣ фиристода буд. Сӣ Ҷинпин баъд аз он ба Байден паём фиристод, ки Доналд Трамп, президенти феълӣ мувофиқа кард, раванди интиқоли қудрат расман оғоз шавад, ҳарчанд шикасти худро дар интихобот напазируфтааст. Натиҷаҳои овоздиҳии ҳайати интихоботии Амрико рӯзи 14-уми декабр эълон хоҳад шуд. Раиси ҷумҳури нави Иёлоти Муттаҳида 21-уми январи соли 2021 савганд ёд мекунад.

Сенати Фаронса ба эътирофи истиқлоли Қаробоғи Кӯҳӣ даъват кард

Сенати Фаронса аз ҳукумати ин кишвар даъват кард, ки Қарабоғи Куҳиро ҳамчун ҷумҳурии мустақил эътироф кунад.

Сенаторҳои фаронсавӣ гуфтаанд, яке аз сабабҳое, ки истиқлоли Қарабоғи Куҳӣ бояд эътироф шавад, ин "сиёсатҳои тавсиаталабонаи Туркия" аст.

Ба бовари сенаторҳо, амалкардҳои Туркия дар минтақаи шарқии баҳри Миёназамин, Шарқи Наздик ва Қафқоз "яке аз омилҳои асосии бесуботсозӣ аст". Дар даъвати сенаторҳои фаронсавӣ омадааст, ки ин амалҳо барои Фаронса ва Аврупо дар маҷмуъ хатаровар ҳастанд.

Сенати Фаронса "хушунати низомии Озарбойҷонро, ки бо кумаки мақомоти Туркия анҷом шудааст", маҳкум мекунад.

Муаллифони даъватнома гуфтаанд, Фаронса якҷо бо Русияву ИМА аз ҷумлаи кишварҳои танзимгари вазъ дар Қарабоғи Куҳӣ аст. Дар ин робита сенаторҳо пешниҳод кардаанд, ки ҳукумати Фаронса барои ҷойгир кардани нерӯҳои посдори сулҳи байналхалқӣ дар Қарабоғи Куҳӣ талош варзад.

Боку дар посух ба даъвати сенаторҳои фаронсавӣ гуфтааст, ки Озарбойҷон истиқлоли Қарабоғро эътироф нахоҳад кард. Дар вазорати корҳои хориҷии Озарбойҷон гуфтанд, ки даъватномаи сенаторҳои фаронсавӣ қувваи ҳуқуқӣ надорад.

Вазъ дар Қарабоғи Куҳӣ субҳи 27-уми сентябри соли равон якбора шиддат гирифт. Дар ин минтақа амалиёти низомӣ шуруъ гашт ва дар Арманистону Озарбойҷон вазъи низомӣ эълом карданд.

Низои Озарбойҷону Арманистон бар сари Қабароғи Куҳӣ аз охирин солҳои мавҷудияти Иттиҳоди Шӯравӣ идома дорад. Минтақаи мазкур, ки бештари бошандагонаш арманӣ ҳастанд, дар соли 1991 эълом кард, ки аз Озарбойҷон ҷудо ва мустақил мешавад. Аммо ҳеч кадом давлати дунё ин минтақаро эътироф накард.

Қатъи сартосарии барқ дар Қазоқистонро ба мушкилот дар Узбекистон рабт доданд

Акс аз бойгонӣ

Вазири энержии Қазоқистон Нурлан Ногаев қатъи ногаҳонии интиқоли барқ ба шаш вилояти ин кишвар бо шумули шаҳрҳои Чимкент ва Алматоро шарҳ дод.

Ӯ рӯзи 25-уми ноябр гуфт: "Миёни низомҳои барқии Узбекистону Қазоқистон номувозинатӣ ба вуҷуд омад. Бо шарофати маҳорати мутахассисони мо, аз ҷумла кормандони KEGOC тавонистем, мушкилро дар кӯтоҳтарин муддат - 17 дақиқа бартараф намоем. Рӯзи баъдӣ ҳам дар вилоятҳои мазкур барқ ду соат хомӯш шуд, вале онҷо симҳо канда буданд. Сабаби пешакӣ - номувозинатӣ байни низомҳои барқии ду кишвар ба қисми техникие, ки нерӯи барқро интиқол медиҳад, таъсири манфӣ расонд. Шояд, барои ҳамин интиқоли барқ қатъ шуд."

Рӯзи 17-уми ноябр якбора дар чанд вилояти Қазоқистон, аз ҷумла Ҷамбил, Алмато, Қазоқистони Шарқӣ, Туркистон, Қарағанда, Қизилорда ва шаҳрҳои Чимкенту Алмато нерӯи барқ қатъ шуд.

Сокинони Алмато мегӯянд, давоми чанд дақиқа дар кӯчаву хиёбонҳои шаҳр чароғакҳо кор намекарданд, троллейбусҳо аз ҳаракат боз монда, дар роҳҳо танбашавӣ ба миён омада буд.

Мақомот дар Узбекистон талош доранд, ки сокинони норозӣ аз бебарқиву гармиро ором созанд

Сокинони минтақаҳои гуногуни Узбекистон, ки дар фасли сармо бе барқу гази табиӣ мондаанд, ба нишони эътироз дар назди биноҳои маъмуриятҳои маҳаллӣ ҷамъ мешаванд.

Ба гуфтаи сокинони норозии вилоятҳои Андиҷон, Намангон, Фарғона ва Қашқадарё мақомоти маҳаллӣ кӯшиш кардаанд, онҳоро ором созанд ва ҳамчунин ҳушдор додаанд, ки ба таври гуруҳӣ ҷамъ нашаванд.

Дар баъзе аз минтақаҳои Узбекистон мақомоти маҳаллӣ тавонистаанд, мушкилро ҳал кунанд, вале дар бештари минтақаҳои дигар сокинон ҳанӯз ҳам бе барқу гази табиӣ ҳастанд.

Бино ба хабарҳои дарёфтӣ, мақомоти вилоятҳои Намангону Қашқадарё сокинонро огаҳ кардаанд, ки имсол дар интиқоли газу барқ ҳатман маҳдудият сурат мегирад ва онҳо бояд ангишту чӯб захира кунанд.

Дар ноҳияи Гузар, ки 300 ҳазор аҳолӣ дорад, ҳудуди 60 нафар дар назди шабакаи барқии ноҳия ҷамъ шуданд. Ин сокинони бебарқу гармӣ мулоқот бо раҳбарияти шабакаи барқиро талаб намуданд.

Як гуруҳи сокинони шаҳри Намангон, ки ба далели набудани барқу гази табиӣ эътироз карда буданд, 23-юми ноябр бо муовини шаҳрдор Ҷобирҷон Абдуллоев мулоқот карданд. Видеое, ки дар Telegram нашр шуд, нишон медиҳад, Абдуллоев ба сокинон тавсия медиҳад, ки ангишту чӯбро захира намоянд. Вале ба суоли сокинон дар бораи норасоии барқу газ посух намедиҳад.

Дар Узбекистон аз 18-уми ноябр, баъди якбора сард шудани ҳаво интиқоли барқу гази табиӣ на танҳо ба сокинони вилоятҳо, балки ба бошандагони шаҳри Тошканд низ маҳдуд гашт.

Боз як ноҳияи дигари Қарабоғи Кӯҳӣ ба Озарбойҷон дода шуд

Қаробоғи Кӯҳӣ

Ноҳияи Калбаҷари Қарабоғи Куҳӣ дар асоси созишномаи сеҷонибаи эъломи қатъи даргириҳо дар минтақаи мазкур аз рӯзи 25-уми ноябр дар ихтиёри Озарбойҷон хоҳад буд.

Арманистон ахиран марҳилаи берун бурдани воҳидҳои худро аз Калбаҷар бо маҳви тамоми зербиноиҳои низомӣ ба поён расонид. Ҳукумати Арманистон 23-юми ноябр рӯйхати беш аз 120 минтақаи аҳолинишинеро дар Қарабоғи Куҳӣ нашр кард, ки ба ихтиёри Озарбойҷон мегузаранд. 16 минтақаи аҳолинишин дар ҳудуди Калбаҷар аст.

Арманистон дар асоси созишномаи сеҷониба қарор буд, Калбаҷарро то 15-уми ноябр ба Озарбойҷон таслим кунад. Вале ҷониби Боку барои ба таъхир гузоштани он то ба 25-уми ноябр розӣ шуд. Зеро сокинони осоишта натавонистанд, то 15-уми ноябр минтақаро тарк кунанд.

Ноҳияи Агдами Қарабоғи Куҳӣ низ 20-уми ноябр ба ихтиёри Озарбойҷон гузашта буд ва қарор аст, то 1-уми декабри соли равон Лачинский низ ба Озарбойҷон дода шавад.

Зери созишномаи сеҷониба раҳбарони Русия, Озарбойҷон ва Арманистон имзо гузоштаанд.

Аз "буҷавиҳо"-и Туркманистон барои Рӯзи бетарафӣ пул ҷамъ мекунанд

Акс аз бойгонӣ

Мақомоти вилояти Лебап (Лабиоб)-и Туркманистон барои чорабинии расмии навбатии худ дубора аз кормандони муассисаҳои буҷавӣ маблағ ҷамъоварӣ мекунанд.

Чанд тан аз кормандони муассисаҳои давлатии Лебап ба шарти ифшо нашудани номашон гуфтанд, ҷамъоварии маблағ аллакай дар ноҳияҳои Фороб ва Дарганата ҳафтаи гузашта оғоз шудааст. Аз ҳар корманди пулис, маориф, мактаб, боғча, беморхона ва дармонгоҳҳо вобаста ба андозаи маошашон аз 70 то 100 манат ($20-$28) ҷамъ мекунанд.

"Раҳбарони муассисаҳо мегӯянд, ин пулҳо ба лавҳаву шиорҳое харҷ мешаванд, ки ба 25-умин солгарди бетарафии Туркманистон бахшида шудаанд. Ин санаро дар Туркманистон 12=уми декабр ҷашн мегиранд ва лавҳаҳо дар кӯчаву хиёбонҳо насб хоҳанд шуд", - изҳор дошт як ҳамсуҳбати бахши туркмании Радиои Озодӣ дар Фороб.

Ба гуфтаи мусоҳибон, як қисми пулҳо ба лавҳаҳои даъват ба пешгирии коронавирус, пӯшидани ниқоби тиббӣ, риояи фосилаи ҷисмонӣ ва истифодаи маводи беҳдоштӣ харҷ хоҳад шуд.

Кормандони муассисаҳои буҷавии вилоят таҳдид шудаанд, ки дар сурати напардохтани маблағ ҷои кори худро аз даст хоҳанд дод. Талошҳо барои дарёфти назари мақомоти Лебап дар ин замина бенатиҷа буданд.

Қалби Марадона баъди 60 сол аз тапидан монд. АКС, ВИДЕО

Диего Марадона

Диего Марадона, футболбози машҳури ҷаҳон, дар 60-солагӣ даргузашт. Вакили ӯ гуфт, Марадона рӯзи 25-уми ноябр бар асари сактаи қалбӣ ҷони худро аз даст дод. Вай чанд ҳафта пеш амалиёти ҷарроҳиро паси сар карда буд.

Видеоро дар инҷо бинед:

Ситораи футбол Диего Марадона вафот кард
лутфан мунтазир бошед

Феълан кор намекунад

0:00 0:02:09 0:00

Марадона аз бозигарони дастаи мунтахаби Аргентина буд, ки соли 1986 дар бозии қаҳрамонии ҷаҳон оид ба футбол пирӯз шуд. Ӯ, инчунин, дар ҳайати тими "Барселона", "Наполи" ва "Севиля" бозӣ кардааст.

Бар пояи овоздиҳӣ дар сомонаи Федератсияи Байнулмилалии Футбол, беҳтарин футболбози асри бист эътироф шудааст. Аз соли 2008 то 2010 мураббии тими мунтахаби Аргентина буд ва бо он ба чаҳорякфиналии бозиҳои қаҳрамонии ҷаҳон расид.

Аксҳои Диего Марадона дар ҳолатҳои гуногун аз бойгонӣ:

Шумори гирифторони коронавирус дар Тоҷикистон аз 12 ҳазор гузашт

Акс аз бойгонӣ

Шумори гирифторони бемории коронавирус дар Тоҷикистон рӯзи 25-уми ноябр ба 12 ҳазору 8 кас расид. Намояндагони Вазорати тандурустии Тоҷикистон гуфтанд, дар шабонарӯзи охир бемории 37 нафарро тасдиқ карданд. Ба иттилои расмӣ, дар ҳафт моҳи гузашта 86 кас аз бемории ҳамагир ҷон бохта, 11395 нафар шифо ёфтаанд. Вазорат аз ин бештар ҷузъиёт намедиҳад. Мунтақидон ба омори расмӣ бо шубҳа менигаранд. Ба бовари онҳо, омори воқеӣ бамаротиб бештар аст. Радиои Озодӣ рӯзи 25-уми ноябр рӯйхати 225 нафарро нашр кард, ки бино бар тасдиқи пайвандон, пизишкон ва навиштаи расонаҳо аз коронавируси нав ва илтиҳоби шуш фавтидаанд.

Рӯйхатро дар инҷо бинед ва барои пурра шудани он ёрӣ кунед

Дар соҳили Зеландияи Нав ҷасади 100 наҳангу делфин пайдо шуд

Як соҳили Ҷазираи Ҷанубӣ, Зеландияи Нав, 10-уми феврали соли 2017. Анбӯҳи наҳангҳоро мавҷи об ба соҳил задааст. Ихтиёриён талош доранд ҷони онҳоро наҷот дода дубора ба об баргардонанд

Мақомот дар Зеландияи Нав гуфтанд, ки анбӯҳи ҷасадҳои наҳангу делфинҳо дар соҳилҳои ҷазираи Чатемро ошкор кардаанд. Раёсати ҳифзи ҷонварон рӯзи 25-уми ноябр гуфт, ки наҳангу делфинҳо дар соҳилҳои ҷазира дар натиҷаи ба ҳам бисёр наздик шино ва ба ҳам бархӯрд карданашон ҷон додаанд. Азбаски макони ҷойгиршавии ҷазираи Чатем дар 800-километрии Ҷазираи Ҷанубӣ аст, гурӯҳҳои ёрирасон натавонистанд сари вақт ба ёрии ҷонварон бирасанд. Маълум нест, ки сабаби дар як анбӯҳ ё издиҳоме ба ҳам омадани ҷонварон чӣ будааст, вале зоҳиран онҳоро мавҷи об ба соҳил партофтааст. Донишмандон мегӯянд, ки сабабҳои рӯй додани издиҳом дар об дар миёни ҷонварон то охир омӯхта нашудааст.

Марҳилаи пешбарии номзадҳо ба мақоми президентии Қирғизистон ба охир расид

Бинои Комиисияи марказии интихобот ва раъйпурсии Қирғизистон.

Комисияи марказии интихоботӣ ва раъйпурсии (КМИР) Қирғизистон марҳилаи пешбарии номзадҳоро ба мақоми президентии он кишвар ба анҷом расонид ва рӯйхати 47 даъвогари курсии президентиро нашр кард.

То рӯзи 14 ноябр КМИР аризаи 65 шаҳрвандро дарёфт кард, ки 64 тани онҳо даъвогарони худпешбар буданд.

Ба иттилои КМИР, 30 тан аз даъвогарон кормандони созмонҳои ғайритиҷорӣ ҳастанд. 24 тан аз даъвогарон муваққатан бекоранд, 5 тан корманди давлатӣ, 3 тан вакили порлумон ва 3 тани дигар нафақахӯранд. Бештари даъвогарони курсии президентӣ аз 35 то 45 сол доранд.

Пештар расонаҳо хабар дода буданд, ки 9 тан аз онҳо санади донистани забони давлатиро пешкаш накардаанд ва 3 тани дигар доғи судӣ доштаанд. Рӯзи 19 ноябр КМИР ҳуҷҷатҳои ин 12 даъвогари курсии президентиро баргардонид.

КМИР ҳамчунин хабар дод, то рӯзи 24 ноябр 6 тани дигар аз даъвогарон изҳор доштаанд, ки аз ширкат дар интихобот худдорӣ меварзанд. То субҳи 24 ноябр ҳамагӣ 47 даъвогар боқӣ мондааст.

Дариға Назарбоева аз ҳизби падараш ба мақоми вакилии порлумон номзад шуд

Дариға Назарбоева.

Дариға Назарбоева, духтари калонии президенти пешини Қазоқистон Нурсултон Назарбоев ба мақоми вакилии порлумон аз ҳизби "Нур Отан" номзад шуд. Ин ҳизбро падари вай роҳбарӣ мекунад.

Рӯйхати 126 номзад ба мақоми вакилӣ аз сӯи ҳизби "Нур Отан" рӯзи 25 ноябр дар анҷумани онлайнии ҳизби мазкур тасдиқ шуд.

Дариға Назарбоева дар рӯйхат дар мақоми 49 қарор дорад. Раиси кунунии порлумони Қазоқистон Нурлан Нигматулин ва сарвазири кунунии он кишвар Аскар Мамин низ дар рӯйхати номзадҳои ҳизби "Нур Отан" шомил шудаанд.

Дариға Назарбоева узви шӯрои сиёсии "Нур Отан" аст.

Баъди рафтан аз мақоми раиси сенати порлумони Қазоқистон дар моҳи майи соли ҷорӣ Дариға Назарбоева ба нудрат дар мазҳари ом пайдо мешавад.

ФСБ аз боздошти афроди марбут ба ДОИШ хабар дод. Як нафар аз Осиёи Марказӣ будааст

Саҳнаи боздошти нафароне, ки ба қавли ФСБ, марбут ба гурӯҳи "Давлати исломӣ" мебошанд. 25-уми ноябр

Дар миёни панҷ касе, ки бо гумони узвият дар гурӯҳи тундрави “Давлати исломӣ” ё ДОИШ дар вилояти Маскав дастгир шуданд, як зодаи Осиёи Марказӣ ҳам будааст.

ФСБ ё Хадамоти федеролии амнияти Русия рӯзи 25-уми ноябр гуфт, аз фаъолияти як гурӯҳи минтақавии марбут ба ДОИШ пешгирӣ кард.

Дар изҳороти ин ниҳод гуфта мешавад, ширкатдорони гурӯҳ мехостанд, дар метрои Маскав “харобкорӣ” кунанд. “Инчунин, ҳадафи онҳо ҷалби шахсони бештар ба сафи гуруҳи “Давлати исломӣ” ва маблағгузор ба терроризм буд”, -- омадааст дар баёнияи ФСБ.

Хабаргузории ТАСС навишт, яке аз боздоштшудаҳо иқрор шудааст, ки узви гуруҳи террористии “Давлати исломӣ” аст. ФСБ ҳамзамон аз ошкор ва мусодира шудани як бомбаи худсохт хабар дод.

Гурӯҳи тундрави “Давлати исломӣ” аз соли 2014 дар Русия мамнуъ ва террористӣ шинохта шудааст.

Дар гузашта ҳомиёни ҳуқуқ аз ношаффоф будани чунин парвандаҳо интиқод карда, гуфтаанд, ҳолатҳои сохтакорӣ дар чунин ҷиноятҳои сангин кам нест. Чизе, ки мақомоти Русия ҳамвора рад кардаанд.

Модари духтаре, ки "фавқулода шабеҳи Путин" аст, миллионер шудааст

Соли 2011. Президенти Русия Владимир Путин аз як зоишгоҳи шаҳри Калининград дидан мекунад

Як шиноси деринаи президенти Русия Владимир Путин – Светлана Кривоногих саҳмияҳои бонки “Россия”-ро дар ихтиёр дорад, ки моликаш яке аз дӯстони Путин мебошад. Ба ҷуз ин, Кривоногих соҳиби як осоишгоҳи лижаронӣ аст, ки дар он соли 2013 тӯи арӯсии Катерина Тихонова баргузор шудааст. Ин зан ҳамчунин соҳиби як маркази фарҳангӣ дар маркази шаҳри Санкт-Петербург мебошад. Соли 2003 Кривоногих соҳиби духтарчае шуд, ки ба навиштаи тарҳи таҳқиқотии “Проект”, “фавқулода ба Путин монанд аст”. Дар ин бора Радио Свобода хабар медиҳад.

“Проект” менависад, ки Кривоногих бо Путин дар охири солҳои 1990-ум шинос шуда, ҳамон давра аз як хонаи коммуналӣ ба ҷои дигар кӯчид ва ба бонки “Россия” ба кор даромад. Ин бонк ба Юрий Ковалчук, дӯсти деринаи Путин марбут аст. Соли 2007 Криновогих 3,6 дарсади саҳмияҳои бонкро ба даст оварда, яке аз соҳибони он шуд. Оғози соли 2019 моликияти ӯро дар бонк дар ҳаҷми 800 миллион рубл ҳисоб кардаанд.

Осоишгоҳи лижаронии “Игора”, ки дар 40-километрии гузари бӯстонсароҳои “Озера” ҷойгир аст, ҳамчунин моли Кривоногих мебошад. Ин маҳалларо Путин ва дӯстонаш дар миёнаҳои солҳои 1990-ум ташкил кардаанд. Путин дар ин осоишгоҳ истироҳат карда дар маросими ифтитоҳи он ҳам иштирок карда буд. Ҳамон ҷо соли 2013 духтари Путин – Катерина Тихонова ҳам базми арӯсии худро барпо кардааст. “Проект” менависад, 25 дарсади осоишгоҳ ба Ковалчук ва ҳамсараш марбут аст, ҳарчанд бонки ӯ сармоягузори аслии ин осоишгоҳ буд.

Тамоми моликияти оилаи Кривоногихро журналистон дар ҳаҷми 7,7 миллиард рубл (муодили 100 миллион доллар) ҳисоб кардаанд. Моликияти Кривоногих, бино ба таҳқиқи журналистон, ба дӯсти дигари Путин – Сергей Ролдугин, ректори донишгоҳи кӯҳӣ Владимир Литвиненко (президент он ҷо рисолаи илмӣ ҳимоя кардааст) ва ҳам дӯсти дигари қадимаи Путин – Олег Руднев рабт мегирад.

Дӯстони Путин аз солҳои 1990 нахостанд ба саволҳои “Проект” дар бораи Кривоногих посух диҳанд. Сабаби пинҳонкории онҳо метавонад духтари ӯ Елизавета бошад, менависанд журналистон. Ӯ соли 2003, замоне таваллуд шудааст, ки Путин барои ширкат дар интихоботи президентӣ омодагӣ мегирифт. Дар нусхаҳои санадҳои марбут ба Елизавета фамилия ё исми падар зикр нашудааст, вале номи падар Владимир зикр шудааст.

“Проект” мегӯяд, дар аксҳое, ки ба дасти онҳо расид, шабоҳати “фавқулодаи Елизавета ба Путин” дида мешавад. Таҳлили компютерии акс шабоҳати Елизавета ва Путинро аз 70 дарсад боло нишон медиҳад. Акси духтари ноболиғро журналистон нашр намекунанд.

Сухангӯи Кремл Дмитрий Песков ба “Проект” посух дод, ки исми Кривоногихро бори аввал мешунавад. Худи зан нахост бо журналистон сӯҳбат кунад. Дар бонки “Россия” ба номаи журналистон посух надоданд.

Попи Рум гуфт, "ҳуқуқи уйғурҳо дар Чин поймол мешавад"

Поп Франсис

Попи Рум Франсис бори аввал дар маҳзари ом аз уйғурҳои Шинҷон ҳамчун қавми бумие дар Чин ёдовар шуд, ки мавриди таъқиб қарор доранд ва ҳуқуқашон поймол мешавад.

Франсис дар як китоби наваш бо номи “Биёед, орзу бикунем: Роҳи ояндаи беҳтар”, ки 23-юми ноябр чоп шуд, мегӯяд: “Ҳамеша дар бораи одамоне фикр мекунам, ки таҳти таъқиб ҳастанд: дар Роҳинҷа, уйғурҳои бечора, язидиҳо – коре, ки гурӯҳи “Давлати исломӣ” кард, як ваҳшоният аст, ва ё масеҳиён дар Миср ва Покистон ҳангоми намозхонӣ дар калисо бо бомба кушта шудаанд”.

Созмони Милал ҳисоб кардааст, ки дар Шинҷон 1 миллион уйғурҳо ва мусалмонҳои дигар дар “қароргоҳҳои зиддиифротгароӣ” нигаҳдорӣ мешаванд. СММ инчунин мегӯяд, як миллион аҳолии дигар маҷбуран ба "марказҳои бозтарбия" андохта шудаанд.

Вазорати корҳои хориҷии Амрико ҳам гуфтааст, тахминан 2 миллион уйғурҳову намояндагони дигари қавму миллатҳои бумии Шинҷон ба муассисаҳои бо номи "марказҳои бозтарбия" дар қаламрави ин вилоят бурда шудаанд.

Чанд нафар аз онҳое, ки дар чунин муассисаҳо нигаҳдорӣ шудаанд, ба Радиои Озодӣ нақл карданд, ки онҳо ва ҳам наздиконашон мавриди шустушӯи мағзӣ ё идеологӣ қарор гирифта, нисбат ба онҳо зӯроварии ҷисмонӣ раво дидаанд ва занҳо гуфтанд, ки онҳоро аз амалиёти безурёткунӣ гузарониданд.

Чин пойфишорӣ мекунад, ки ин муассисаҳо “марказҳои тарбиявӣ” буда, барои аз терроризму ифротгароӣ поккорӣ шудани инсонҳо ва ба ҷомеаи маҳаллӣ мутобиқ кардани онҳо амал мекунанд.

Жао Лиян, сухангӯи Вазорати корҳои хориҷии Чин дар вокуниш ба изҳори назарҳои Попи Рум андешаҳои ӯро “беасос” номид. Ӯ рӯзи 24-уми ноябр дар изҳороте гуфт: “Мардуми ҳама гурӯҳҳои миллӣ аз ҳуқуқи пурра барои рушд, озодӣ ва эътиқоди динӣ бархӯрдор ҳастанд”.

Баъди дар соли 1949 сари қудрат омадани коммунистҳо дар Чин, дар ин кишвар рӯҳониёни католик боздошт шуданд ва Чину Ватикан ҳеч гоҳ бо ҳам равобити расмии дипломатӣ надоштанд.

Уйғурҳо гурӯҳи азимтарини туркзабон дар вилояти Шинҷони Чин ҳастанд ва дар ҷойи дуюм аз назари шумора қазоқҳо мебошанд. Дар ин минтақа ҳамчунин қирғизҳо, тоҷикҳо ва намояндагони қавми ҳуй ва ё дунганҳо зиндагӣ мекунанд.

Ҳанҳо, ки дар Чин қавми аксарият ба шумор мераванд, дар Шинҷон баъди уйғурҳо дуюмин қавми серҷамъият ба шумор мераванд.

Пайомадҳои COVID-19 дар суҳбати вазирони корҳои хориҷии Кореяи Ҷанубӣ ва ОМ

Форуми ҳамкориҳои Кореяи Ҷанубӣ ва Осиёи Марказӣ аз соли 2007 баргузор мешавад ва ҳадафаш тақвияти ҳамкориҳои иқтисодӣ, фарҳангӣ ва маърифатӣ мебошад

Вазирони хориҷаи Кореяи Ҷанубӣ ва кишварҳои Осиёи Марказӣ масоили марбут ба рушди устуворро дар пасманзари пандемияи коронавирус баррасӣ карда ва дар ҷаласаҳои ҷудогона мавзӯъҳои марбут ба “стандартизатсия, тандурустии ҷамъиятӣ, муҳити зист ва таҳсилоти фосилавӣ”-ро матраҳ намуданд. Ҳамоиши 13-уми ҳамкориҳои Ҷумҳурии Корея ва Осиёи Марказӣ бо ҳузури вазирони хориҷаи кишварҳои минтақа рӯзи 25-уми ноябр дар шаҳри Сеул ҷараён гирифт. Дар кори он вазири хориҷаи Тоҷикистон Сироҷиддин Муҳриддин ҳам иштирок кард.

Оҷонсии Yonhap гуфт, ки таъсири пандемия ба кишварҳои ОМ ва паёмадҳои он яке аз масоили калидии ин ҳамоиш буд. Айни замон, вазири хориҷаи Кореяи Ҷанубӣ Кан Ген Хва кишварҳои ОМ-ро ба идомаи пуштибонӣ аз сулҳи нимҷазираи Корея даъват карда гуфтааст, ки тақвияти сулҳ гарави субот дар минтақаи Авруосиё мебошад. Ҳамсоякишвари Кореяи Ҷанубӣ - Кореяи Шимолӣ аст, ки давлати дорои силоҳи ҳастаӣ мебошад ва баъди ҷанги солҳои 1950-ум дар нимҷазира равобити ду кишвар мушкил боқӣ мемонад.

Вазорати хориҷаи Тоҷикистон рӯзи 25-уми ноябр хабар дод, ки ҳамоиш ё форуми баъдии Осиёи Марказиву Кореяи Ҷанубӣ дар шаҳри Душанбе баргузор шавад. Ҷузъиёти дигари дидору гуфтугӯҳои дипломатҳои баландпояи кишварҳои ширкатдори ҷаласа нашр намешавад. Форуми ҳамкориҳои Кореяи Ҷанубӣ ва Осиёи Марказӣ аз соли 2007 баргузор мешавад ва ҳадафаш тақвияти ҳамкориҳои иқтисодӣ, фарҳангӣ ва маърифатӣ мебошад.

Ҳамоиши Сеул дар ҳоле бо ширкати вазирони хориҷаи кишварҳои ОМ баргузор мешавад, ки пандемияи коронавирус ба нақшаву барномаҳои кории бисёр ҳукуматҳо таъсиргузор шуда, аксар ҷаласаву ҳамоишҳои муҳим ба таври фосилавӣ барпо мешаванд.

Форуми ОМ ва Кореяи Ҷанубӣ инак бори 13-ум баргузор мешавад ва ҳадафи аслии он пешбурди ҳамкориҳои иқтисодиву тиҷоратӣ аст.

Кореяи Ҷанубӣ – кишваре дар Осиёи Шарқӣ ва мустақар дар нимҷазираи Корея яке аз давлатҳои босуръат пешраванда ба ҳисоб меравад ва дар даҳсолаҳои охир ба макони кору муҳоҷирати хориҷиҳои зиёд, аз ҷумла тоҷикистониҳо табдил шудааст. Садҳо тоҷикистонии муқими Корея бештар ҷавонону донишҷӯён ваё муҳоҷирони кориро ташкил медиҳанд. Тоҷикистон бо ин ки соли 1992 бо Кореяи Ҷанубӣ ҳамкориҳои дипломатӣ барпо кардааст, ҳамкориҳои наздиктари миёни ду кишвар тарҳо дар чанд соли охир эҳсос мешавад.

Умеди Тоҷикистон аз ин ҳамкориҳо пеш аз ҳама сармоягузорӣ ба иқтисоди кишвар ва фаъол шудани созишномаи муҳоҷирати корӣ аст. Созишномаи фароҳамкунандаи шароити кор барои шаҳрвандони Тоҷикистон дар Кореяи Ҷанубӣ, ки сӯҳбаташро мақомот чанд соли пеш шурӯъ карданд, то ҳанӯз ниҳоӣ нашудааст ва шаҳрвандони Тоҷикистон ҳамоно вобастаи бозори кори Русия мемонад.

Иқтисодшиносон мегӯянд, мизони додугирифти молу коло ҳам миёни ду кишвар дар сатҳи поин аст – 25,5 миллион доллар, ки бештар аз ҳисоби маҳсулоти аз Корея ба Тоҷикистон воридшаванда ҳисоб шудааст. Тобистони соли ҷорӣ раҳбари Кумитаи сармоягузорӣ ва амволи давлатии Тоҷикистон гуфт, ки бо сабаби пандемияи коронавирус мувофиқаҳои қаблан ҳосилшуда миёни Тоҷикистону Кореяи Ҷанубӣ барои сармоягузорӣ дар ҳафт тарҳ бо маблағи умумии 320 миллион доллар муаллақ мемонад. Яке аз ин тарҳҳо бунёди корхонаи истеҳсоли мошинҳои барқиро дар назар мегирад.

Ёфтҳои бештар

XS
SM
MD
LG