Манижа Сангин, овозхони 29-солаи зодаи Тоҷикистон, ки дар озмуни байналмилалии мусиқии "Евровидение" Русияро намояндагӣ мекунад, бо таронаи "Russian woman" ба даври ниҳоӣ роҳ ёфт. Даври натиҷавии озмуни бонуфуз 20-уми май дар Роттердами Ҳолланд баргузор мешавад. Аз миёни кишварҳои Шӯравии собиқ, инчунин, намояндаи Озарбойҷону Украина ба озмуни натиҷавӣ гузаштанд.

Рӯзноманигори тоҷик, Орзу Исоев, достони видеоияшро дар бораи ҷанҷоли ахири марзӣ байни Тоҷикистону Қирғизистон нашр кард. Дар ин ҷанҷол, ки рӯзҳои 28 ва 29-уми апрели имсол рӯй дод, аз ду ҷониб даҳҳо нафар куштаву садҳо кас захмӣ шуданд.

Орзу Исоев мегӯяд, филм зиёда аз сӣ дақиқа аст ва рӯзи 18-уми май дар Ютюб гузошта шуд. Ба қавли ӯ, дар достон аз "таймлайн" ё нақли лаҳза ба лаҳзаи хабарнигори Радиои Озодӣ, ки дар ҷойи ҳодиса буд, низ истифода карданд.

Муаллиф ба мавзеи Маркази тақсими об дар Хоҷаи Аълои Исфара рафта, фарзияҳои оғози муноқишаро баён намудааст. Дар филм лаҳзаҳоеро ҷой додаанд, ки бозгуйи вазъи душвори кори рӯзноманигорон аст.

Орзу Исоев мегӯяд, дар филм пайомадҳои ҷангро ба тасвир кашида, бо онҳое, ки наздиконашонро аз даст доданд ва ё зарари молӣ диданд, суҳбат карданд.

Нашри филм дар ҳолест, ки ҳанӯз ҳам тибқи хабарҳо ва ба гуфтаи сокинон вазъ дар минтақа мураккаб мемонад.

Низоъ дар марзи Тоҷикистону Қирғизистон рӯзҳои 28 ва 29-уми апрел рӯй дод. Мақомоти Тоҷикистон гуфтанд, ки дар ҷанҷоли ахири марзӣ 19 кас кушта ва 87 кас захмӣ шуд. Ҷониби Қирғизистон эълон кард, ки дар ин ҳодиса 189 шаҳрванди он кишвар маҷруҳ шуда, 36 кас, аз ҷумла ду кӯдак, ҷон бохтанд.

Душанбеву Бишкек якдигарро барои оғози даргирии мусаллаҳона айбдор карда, барои таҳқиқи ҳодиса парвандаҳои ҷудогона кушодаанд.

Тоҷикистону Қирғизистон 970 километр марз доранд ва аз ин ҳисоб танҳо 519 километри онро муайян ва нишона гузоштаанд. Минтақҳои дигари баҳсӣ, ки аз обу замину чарогоҳ иборатанд, ҳар чанд вақт сабаби занозаниву тирпарронии сокинон ва нерӯҳои ду кишвар мешаванд.

Президенти Русия Владимир Путин эълон кард, ки рӯзи 24-уми май дар шаҳри Сочи президенти Қирғизистон Содир Ҷабборовро ба ҳузур мепазирад. Рӯзи 18-уми май зимни суханронӣ дар маросими қабули эътиборномаҳои сафирони хориҷӣ Путин гуфт, ки бо вуҷуди ҳамкориҳои “муваффақ” дар чандин бахш, ду ҷониб бояд дар фикри тақвияти шарикии стратегӣ ва ҳамкориҳои дуҷониба бошанд. Ин дуюмин мулоқоти ду раҳбар дар соли ҷорӣ хоҳад буд.

Мулоқоти ду раҳбар дар ҳоле барпо мешавад, ки охири моҳи апрел ва аввали маи имсол дар як муноқишаи марзии байни Тоҷикистону Қирғизистон даҳҳо нафар аз ҳарду тараф кушта шуданд ва баъди ин дар мулоқот бо президнети Тоҷикистон Эмомалӣ Раҳмон дар Русия Путин ҷонибдории худ ба оташбасу субот дар минтақаро таъкид кард. Маълум нест, ки то куҷо дар мулоқоти Путину Ҷабборов мавзӯи низои ахир дар марзи Тоҷикистону Қирғизистон матраҳ мешавад. Маскав шарики деринаи сиёсиву иқтисодии Душанбе ва Бишкек ба шумор меравад ва ин кишварҳо аъзои созмони низомию сиёсии СПАД ҳастанд.

Дар сафари нахустини имсолаи худ ба Русия, ки моҳи феврал баргузор шуд, Содир Ҷабборов бо президент Путин ва нахуствазири Русия Михаил Мишустин мавзӯи ҳамкориҳои дуҷонибаи кишварҳояшонро баррасӣ карда буд.

Бар асоси фармони раиси ҷумҳурии Тоҷикистон, ки рӯзи 18-уми май нашр шуд, шаш додраси тоҷикро аз мансабҳояшон гирифтаанд.

Хадамоти матбуоти президент навишт, ки Мавҷуда Шарифзода, раиси Додгоҳи шаҳри Хуҷанд ва Ҳабибулло Мирбобозода, раиси Додгоҳи ноҳияи Деваштич бознишаста шуданд.

Манбаъ афзуд, Искандар Давлатзода ва Муҳаммад Расулзода, додрасҳои Додгоҳи вилояти Хатлон, Эраҷ Ализода ва Фирӯза Аминзода додрасҳои Додгоҳи шаҳри Хуҷанд бо хоҳиши худ аз кор рафтаанд. Сабаби чунин рафтори додрасҳо маълум нест.

Феълан дар Тоҷикистон 450 додрас кор мекунанд. Дар даҳ соли охир беш аз 25 додраси додгоҳҳои Тоҷикистон ба зиндон маҳкум шудаанд.

Баъзе аз сокинони Тоҷикистон додрасҳоро ба эълони, ба бовари онҳо, ҳукмҳои ноодилона ва суистифода аз мансаб муттаҳам мекунанд. Коршиносон маоши кам ва мустақил набудани додгоҳҳоро аз сабабҳои асосии чунин вазъият мепиндоранд.

Кумисюни байналмилалии ҳуқуқшиносон (иттиҳоди додрасҳои саршинос ва ҳуқуқшиносони ҷаҳон) низ моҳи декабри соли 2020 дар гузорише гуфт, ки додгоҳҳо дар Тоҷикистон мустақил ва беғаразона ҳукм содир намекунанд ва аз ҳукумат хост, низоми додгоҳиро ислоҳ кунад.

Мақомоти Тоҷикистон низоми адлияи худро одилона мешуморанд ва танҳо баъзе аз додрасҳоро ба "фаъолияти ғайрикасбӣ" айбдор мекунад.

Парлумони Қирғизистон рӯзи 17-уми май нақшаи муваққатан ба ихтиёри давлат гузаронидани кони азими тиллои кишварро ҷонибдорӣ кард. Кони Қумтор бар асоси созиши қаблӣ дар ихтиёри ширкати канадаии Centerra Gold гузаштааст ва аз ҳамин хотир ширкат гуфт, ки ҳукумати Қирғизистонро ба додгоҳ кашид.

Ҳукумати Бишкек дар гузашта ширкати канадаиро дар он муттаҳам кардааст, ки даромад ва пулҳои воқеии ин ширкат аз ҳисоби истихроҷи тиллоро аз давлат пинҳон мекунад. Ихтилофи байни ду ҷониб баъди он шиддат гирифт, ки рӯзи 14-уми май президент Содир Ҷабборов қонунеро имзо кард, ки ба ҳукумати Қирғизистон иҷоза медиҳад муваққатан назорат ба кори конро ба ихтиёри худ дарорад. Ҷабборов гуфт, ки ин кор ба хотири ислоҳи мушкилоти марбут ба муҳити зист зарур аст. Бар асоси қонунҳои Қирғизистон, дар сурати аз ҷониби ширкат вайрон шудани қоидаҳои муҳитзистӣ давлат ҳақ дорад, ки дар давоми се моҳ ширкатро ба ихтиёри давлат гузаронад. Як комиссиюни давлатӣ, ки иттиҳомоти вайрон шудани қоидаҳои муҳитзистӣ дар Қумторро тасдиқ кард, рӯзи 17-уми май гуфт, ки дар ин кон ҳолатҳои “фасод ва вайрон кардани муқаррароти муҳитзистӣ” ошкор шудааст. Ҷабборов пешниҳод кард, ки “назорати беруна” аз кори кон се моҳ идома кунад ва парлумон ҳам дар як овоздиҳӣ бо раъйи оро ин пешниҳодро ҷонибдорӣ кард.

Президенти ИМА Ҷо Байден анъанаи раҳбарони гузаштаи кишварро идома дода, гузориши андози худро нашр кард. Дар ин санад дида мешавад, ки ӯву ҳамсараш соли 2020 беш аз 607 ҳазор доллар даромад гирифта, наздики 26 % онро ҳамчун андоз ба давлат супурдааст. Ин санад рӯзи 17-уми май нашр шуд, ки дар ИМА санаи охирини супурдани андоз барои шаҳрвандон ба ҳисоб меравад. Байден дар ҷараёни маъракаи интихоботиаш ваъда дод, ки дар бораи даромадҳои молии худ ба мардум пурра ва рӯшод гузориш медиҳад. Ин гузориш даромади молӣ, манбаи даромад ва ҳам пулҳои барои хайр ирсолшударо дар назар мегирад. Вале президенти пешин Доналд Трамп анъанаи дар ихтиёри ҷомеа гузоштани гузориши андозсупориро вайрон кард. Ӯ пеш аз президент шудан як соҳибкори калон, хонаҷаллоб ва ситораи телевизион буд ва дар як иддаояш гуфт, ки гӯё мақомоти андози ИМА монеи нашри гузориши андози ӯ шуданд. Баъди ин, нашрияи The New York Times моҳи сентябри порсол гузориши андозҳои Трампро ба даст овард ва ошкор кард, ки Трамп дар солҳои 2016 ва 2017 ба андози давлатӣ танҳо 750 доллар супурдааст. Трамп гуфт, ки барои пардохти навъҳои мухталифи андоз миллионҳо долларашро сарф кардааст ва шахсе маҳсуб меёбад, ки ба сабукиҳои андозсупорӣ ҳақ дорад.

Раиси Хадамоти кашфи хориҷии Русия рӯзи 18-уми май иттиҳомоти инро, ки ин сохтор дар пушти ҳамлаҳои рахнагарии SolarWinds қарор дорад, рад кард. Иттиҳоми мақомоти иктишофии ИМА ва Бритониё боис ба таҳрими Русия аз ҷониби ИМА шуд. Ҳамлае, ки моҳи декабр рух дод, аз роҳи фиристодани як кирми рахнагари компютерӣ ба шабакаҳои ширкатҳои амрикоиву аврупоӣ рух дод. Дар натиҷа, кори нӯҳ сохтори амрикоӣ ва садҳо ширкатҳои хусусӣ осеб дид. Сергей Наришкин, раиси Хадамоти кашфи хориҷии Русия дар сӯҳбат бо BBC дар Русия гуфт, «ин иттиҳомот як қиссаи бади детективиро мемонад”. Наришкин як муттафиқи наздики президенти Русия Владимир Путин мебошад. Наришкин ба саволи хабарнигор, ки оё идораи ӯ ин ҳамларо анҷом додааст? – гуфт: “Ба ман хуш меояд, агар чунин баҳодиҳиро ба Хадамоти кашфи хориҷӣ нисбат диҳанд” ва афзуд: “ман одат надорам, ки эҷодкориҳои муаллифони дигарро соҳибӣ кунам”. Раҳбари ҷосусони рус гуфт, ки шеваи амалиёти анҷомшуда монанд ба онест, ки аз ҷониби хадамоти кашфи ИМА ва Бритониё ба кор меравад.

Раҳбари худкомаи Беларус Александр Лукашенко қонунеро имзо кард, ки ба ходимони полис ва нирӯҳои амниятӣ иҷоза медиҳад, ки ба сӯи эътирозгарон тир холӣ карда шавад. Қонуни рӯзи 17-уми май имзокардаи Лукашенко ходимони ҳифзи қонунро аз масъулият дар баробари осеби инсон ба ҳангоми ҳамлаи ҷисмонӣ, оташкушоӣ ваё истифодаи дигар василаву силоҳҳои вижа бар зидди эътирозгарон озод мекунад. Ин қонун бахше аз як қонунгузории азим аст, ки парлумон моҳи апрел онро қабул кард. Дар он инчунин озодиҳои маданӣ шадидан маҳдуд шуда, пахши иттило дар бораи саркӯбҳои демократӣ дар кишвар ҳам бо маҳдудият рӯбарӯ мешавад.

Интихоботи президентии августи соли гузашта дар Беларус бо пирӯзии Лукашенко анҷомид, вале мухолифон бовар доранд, ки барандаи аслӣ раҳбари мухолифон Светлана Тихановская буд ва ин натиҷаҳо шадидан тақаллуб шуданд. Дар пай дар саросари Беларус эътирозҳо бо талаби истеъфои Лукашенко ва баргузории интихоботи нав шурӯъ шуд. Мақомот ва сохторҳои қудратӣ даст ба саркӯб зада, ҳазорҳо нафарро зиндонӣ карданд. Дар давоми ин саркӯбҳо чандин нафар кушта шуданд. Созмонҳои ҳомии ҳуқуқи инсон гуфтанд, ки боздоштшудаҳо аксаран шиканҷа шуданд.

Дар ҳоле ки мақомоти Тоҷикистон натиҷаи музокиротро бо ҷониби Қирғизистон расман эълон накарданд, манобеъ баъзе аз ҷузъиёти онро фош карданд. Мулоқот шаби 17-уми май дар марзи Исфараву Бодканд гузашт.

Як намояндаи Тоҷикистон бе зикри номаш рӯзи 18-уми май ба Радиои Озодӣ гуфт, ки дар музокирот асосан масъалаи таъмини амнияти сокинон дар роҳҳои минтақаҳои баҳснок баррасӣ карда шуд.

Ба иттилои ӯ, "танҳо баъд аз иҷрои шарти ҷониби Қирғизистон, яъне чораҷӯӣ нисбат ба раиси маҳаллаи Тоҷикони Исфара, Ғафур Ҷӯраев, убури амн аз деҳаҳои қирғизнишин таъмин карда шуд. Намояндагони Қирғизистон даъво карданд, ки ӯ дар латту куби сокинони боздоштшудаи қирғиз даст дорад."

Кумитаи давлатии амнияти миллии Қирғизистон хабар додааст, ки дар музокироти шаби гузашта раҳбарони вилоятҳои Суғду Бодканд иштирок доштанд. Ба иттилои ин ниҳод, ду тараф ба хулоса расидаанд, ки он шаҳрвандони Тоҷикистон, ки дар латукӯби сокинони боздоштшудаи Қирғизистон даст доранд, "ба ҷавобгарӣ кашида мешаванд".

Аммо намояндаҳои мақомоти вилояти Суғд ва шаҳри Исфара ба таври расмӣ ба ин тарз ҳал шудани масъалаи роҳбандиро тасдиқ накарданд.

Музокирот рӯзи 17-уми май ва баъд аз он баргузор шуд, ки Тоҷикистону Қирғизистон аз боздошти сокинони якдигар дар қаламравҳояшон хабар доданд. Ин боздошт аввал аз ҷониби қирғизҳо сар зада, дар посух тоҷикон низ шаҳрвандони Қирғизистонро дастгир кардаанд. Дертар ҳарду тараф боздоштшудаҳоро ба ҳамдигар супурданд.

Ҷониби Тоҷикистон дар бораи вазъи шаҳрвандони боздоштшудаи кишвар чизе намегӯяд. Мақомоти Қирғизистон иддао доранд, ки шаҳрвандони Тоҷикистон се сокини боздоштшудаи Оқсойро латукӯб кардаанд ва онҳоро барои муолиҷа ба бемористон бурдаанд.

Як манбаи наздик ба ҳайати музокиракунандаи ҷониби Тоҷикистон низ бо шарти зикр накардани номаш рӯзи 18-уми май гуфт, ҷониби Қирғизистон исрор кардааст, ки аввал шаҳрвандони ин кишвар аз тарафи намояндаҳои мақомоти Тоҷикистон боздошт ва гуё латукӯб шудаанд.

Пас аз музокироти шаби гузашта дар марзи Ворухи Тоҷикистон ва Оқсойи Қирғизистон аз ду тараф постҳои пулис гузошта шудааст.

Як рӯз пеш бошандагони деҳоти ҳарду кишвар, ҳам Тоҷикистон ва ҳам Қирғизистон, аз мақомоти кишварҳои худ таъмини ҳаракат дар роҳҳои наздимарзӣ шудаанд. Онҳо махсусан аз эҳтимоли даргириҳо дар роҳҳое нигаронанд, ки аз қаламрави ду кишвар ва ҳамчунин минтақаҳои баҳснок мегузаранд.

Бахши қирғизии Радиои Озодӣ иттилоъ дод, ки аз соати 6:25 (ба вақти Тоҷикистон)-и рӯзи сешанбе мошинҳо дар масири Хоҷаи Аъло-Ворух ва Оқсой-Тамдиқ ҳаракат мекунанд. Чанде аз сокинони Ворух ва Чоркӯҳ низ рӯзи 18-уми май гуфтанд, ки вақте аз деҳаи Оқсой мегузаштанд, оромӣ буд ва вазъро аз ду ҷониб кормандони милиса назорат мекарданд.

Низоъ дар марзи Тоҷикистону Қирғизистон рӯзҳои 28 ва 29-уми апрел рӯй дод. Мақомоти Тоҷикистон гуфтанд, ки дар ҷанҷоли ахири марзӣ 19 кас кушта ва 87 кас захмӣ шуд. Ҷониби Қирғизистон эълон кард, ки дар ин ҳодиса 189 шаҳрванди он кишвар маҷруҳ шуда, 36 кас, аз ҷумла ду кӯдак, ҷон бохтанд.

Душанбеву Бишкек якдигарро барои оғози даргирии мусаллаҳона айбдор карда, барои таҳқиқи ҳодиса парвандаҳои ҷудогона кушодаанд.

Тоҷикистону Қирғизистон 970 километр марз доранд ва аз ин ҳисоб танҳо 519 километри онро муайян ва нишона гузоштаанд. Минтақҳои дигари баҳсӣ, ки аз обу замину чарогоҳ иборатанд, ҳар чанд вақт сабаби занозаниву тирпарронии сокинон ва нерӯҳои ду кишвар мешаванд.

ИМА миллионҳо дона воксинаҳои иловагии зидди COVID-19-ро ба кишварҳои дигар ирсол мекунад. Ҷо Байден, президенти ИМА рӯзи 17-уми май гуфт, ки ин тасмим ба хотири ҳифзи нақши пешбарандаи ИМА дар ҷаҳон алайҳи пандемия зарур аст ва ҳамзамон ба талошҳои Чин ва Русия ишора кард, ки аз роҳи паҳн кардани воксина мехоҳанд нуфузи худро дар ҷаҳон боло баранд.

Байден тасдиқ кард, ки ИМА дар давоми шаш ҳафтаи оянда 20 миллион адад воксинаи иловагиро ба берун мебарад ва то охири моҳи июн дар маҷмӯъ то 80 миллион адад мерасонанд. Ин шумор ИМА-ро аз назари кишвари хайркунандаи воксина ба ҷои аввал мебарорад. Зимни як суханрониаш дар Кохи Сафед Байден гуфт, ки ҳеҷ кишвари дигар 80 миллион дона воксинаро бо ҳадафҳои хайрия тақдим накардааст.

Байден гуфт: “Русия ва Чин... 15 миллион дона хайр карданд. Шумо медонед, ки гап дар бораи нуфузи Русияву Чин дар ҷаҳон аз роҳи воксина зиёд аст. Мо мехоҳем, ки ҷаҳонро бо арзишҳои худ назири навкориҳо, вижагӣ ва ахлоқи бунёдии мардуми Амрико пеш барем”. Ӯ афзуд, “ҳамонгуна, ки демократияҳо дар тирагиҳои Ҷанги Дуюми Ҷаҳон сайёраро раҳбарӣ кардаанд, демократия ҷаҳонро аз пандемия раҳо мекунад”.

Дар худи ИМА то ҳол 272 миллион дода воксинаи зидди COVID-19 ба мардум фароҳам шуда, мизони олудагӣ ва марг бар асари ин вирус дар қиёс бо чанд моҳи гузашта дар поинтарин сатҳ қарор дорад.

Дар низои миёни Исроил ва Ҳамос бо вуҷуди талошҳои дипломатияи байналмилалӣ, ҳеҷ аломате ба назар намерасад, ки хушунатҳо дар Ғазза хотима меёбанд. Шӯрои амнияти СММ рӯзи 18-уми май дар ҷаласаи изтирорӣ ҳамчун як иқдоми дипломатии оҷил барои хатми ҷангҳо, ки то ҳол боиси марги беш аз 200 нафар шудааст, вазъи минтақаро баррасӣ мекунад. Нахуствазири Исроил Бенямин Нетаняҳу дар суханронии шоми 17-уми маи худ гуфт, ки Исроил «зарба заданро ба ҳадафҳои террористӣ» дар Ғазза «то замоне, ки барои бозгашти оромиш ва амният барои ҳама шаҳрвандони Исроил зарур аст», идома медиҳад. Президенти ИМА Ҷо Байден ба Нетаняҳу шоми душанбе гуфт, ки аз оташбас ҷонибдорӣ мекунад, вале талаби созишро ба забон наовард. AFP гуфт, ки шаби 18-уми май баъди соати 12-и шаб Исроил чандин ҳамлаи мушакӣ анҷом дод, ки ба биноҳои мухталиф дар шаҳри Ғазза асобат кард. Низое, ки тахминан даҳ рӯз аст идома дорад, аллакай ба як бӯҳрони башарӣ табдил мешавад, чун 38 ҳазор фаластиниҳо беҷо шудаанд ва 2500 нафар хонаҳои худро аз даст додаанд. Мақомоти фаластинӣ гуфтанд, ки шумори қурбониҳо аз ҷониби онҳо 212 нафарро ташкил додааст, дар ҳоле, ки аз ҷониби Исроил аз 10 кушташуда хабар медиҳанд.

Дар марзи Ворухи Тоҷикистон ва Оқсойи Қирғизистон аз ду тараф постҳои пулис гузошта шудааст. Ба иттилои Хадамоти марзбонии Қирғизистон, аз субҳи 18-уми май ҷонибҳо ба гаштзанӣ ё посбонии муштараки марз оғоз карданд.

Бахши қирғизии Радиои Озодӣ иттилоъ дод, ки аз соати 7:25 субҳи имруз мошинҳо дар масири Хоҷаи Аъло-Ворух ва Оқсой-Тамдик ҳаракат мекунанд. Ин тасмим пас аз мулоқоти намояндагони марзбонии ду кишвар, ки дар марзи Оқсой ва Ворух доир шуд, гирифта шудааст. Инчунин барои ҳалли саривақтии масоили марзӣ тасмим гирифта шудааст, ки ҳар ҳафта ҷаласаҳо баргузор карда шавад.

Рӯзи гузашта тоҷикҳо ва қирғизҳо аз ҳар тараф сенафариро боздошт карданд. Тибқи гузоришҳо, сокинони деҳаи Оқсой се шаҳрванди Тоҷикистонро боздошт карда, ба пулис супурданд то ҳадафи будубошашон дар Қирғизистон маълум шавад. Ҳамзамон ҷониби Тоҷикистон се шаҳрванди Қирғизистонро боздошт карданд.

Пас аз ин боздоштҳо сарони вилоятҳои Суғду Бодканд телефонӣ суҳбат карданд ва ба раҳбарони мақомоти ҳифзи ҳуқуқи ду ҷониб супориш шуд, ки гуфтушунид кунанд. Пас аз мулоқот бо сокинони маҳаллӣ, афроди боздоштшудаи ду тараф раҳо карда шуданд.

Низоъ дар марзи Тоҷикистону Қирғизистон рӯзҳои 28 ва 29-уми апрел рӯй дод. Мақомоти Тоҷикистон гуфтанд, ки дар ҷанҷоли ахири марзӣ 19 кас кушта ва 87 кас захмӣ шуд. Ҷониби Қирғизистон эълон кард, ки дар ин ҳодиса 189 шаҳрванди он кишвар маҷруҳ шуда, 36 кас, аз ҷумла ду кӯдак, ҷон бохтанд.
Душанбеву Бишкек якдигарро барои оғози даргирии мусаллаҳона айбдор карда, барои таҳқиқи ҳодиса парвандаҳои ҷудогона кушодаанд.

Тоҷикистону Қирғизистон 970 километр марз доранд ва аз ин ҳисоб танҳо 519 километри онро муайян ва нишона гузоштаанд. Минтақҳои дигари баҳсӣ, ки аз обу замину чарогоҳ иборатанд, ҳар чанд вақт сабаби занозаниву тирпарронии сокинон ва нерӯҳои ду кишвар мешаванд.

ИМА ба Исроил дар ивази 735 миллион доллар аслиҳае мефурӯшад. Дар ин бора рӯзномаи The Washington Post бо такя ба манобеи худ иттилоъ додааст.

Нашрия навиштааст, бархе аз демократҳои Конгресси ИМА аз фурӯши аслиҳа ба Исроил нигарон ҳастанд. Ба бовари онҳо, фурӯши аслиҳа метавонад, вазъи Шарқи Наздикро печидатар гардонад.

Нашрияи The Washington Post менависад, Исроил аслиҳаи дақиқ ба ҳадафрасанда дорад. Низомиёни Исроил мегӯянд, зарбаҳои ҳавоии онҳо ба иншооти "Ҳамос" дар Навори Ғазза дақиқ ба ҳадаф мерасанд.

Ҳамлаҳои Исроил ба Навори Ғазза аз 10-уми май то ин замон идома доранд. "Ҳамос" ба Исроил бештар аз 3 ҳазор мушак партоб карда, Исроил дар иваз бештар аз 1000 зарбаи дақиқ задааст.

Мақомоти Фаластин гуфтанд, аз 10 май то имрӯз дар Ғазза 192 кас, аз ҷумла 58 кӯдак ҷон бохтааст. Дар Исроил дар натиҷаи зарбаҳои Ҳаммос 10 кас фавтидааст.

Талоши ҷомеаи ҷаҳонӣ барои барқарории сулҳ ҳанӯз натиҷае наовардааст.

Созмони ҷаҳонии ҳимоят аз рӯзноманигорон "Хабарнигорони бидуни марз" ба ҷонибдорӣ аз Темирлан Енсебеки қазоқистонӣ - муаллифи саҳифаи ҳаҷвии Qaznews24 дар "Instragram" - садо баланд кард.

Мақомоти Қазоқистон Енсебекро дар доираи парвандаи паҳнсозии иттилои бардурӯғ бозпурсӣ мекунанд. Эҳтимол дорад, ки мақомот ҳар лаҳза ӯро боздошт кунанд.

"Хабарнигорони бидуни марз" аз мақомоти Қазоқистон даъват кардааст, ки "озодии суханро эҳтиром кунанд". "Ҳаҷв ҷиноят нест!" - навишта шудааст дар саҳифаи созмон дар шабакаҳои иҷтимоӣ.

Пулиси Қазоқистон рӯзи 15-уми май ин блогерро барои навиштаҳои ҳаҷвӣ дар Instagram боздошт кард.

Мақомот дар шаҳри Алма Ато манзили Темирлан Энсебекро кофтукоб ва таҷҳизоти ӯро мусодира кардаанд. Дар ин бора ҳамсараш ба бахши қазоқии Радиои Озодӣ хабар додааст.

Энсебек узви гурӯҳи "Оян, Қазоқистон" (Қазоқистон бедор шав!) аст, ки ислоҳот дар ин кишвари Осиёи Марказиро мехоҳад.

Чанд тарафдори блогер дар назди идораи полисе, ки ӯро бозпурсӣ мекарданд, эътироз карданд. Ҳамсари Эсенбек гуфт, ки ӯро эҳтимолан бо иттиҳоми паҳн кардани маълумоти бардурӯғ, ки тартиботи ҷамъиятиро дар хатар мегузорад, боздошт кардаанд.

Навиштаҳои ӯ дар "Инстаграм" ҳазф шудаанд. Ӯ воқеаҳои сиёсӣ дар ин кишварро ба риштаи ҳаҷв мекашид ва онҳо дар шабакаҳои иҷтимоӣ баҳс мешуданд.

Як қатораи махсус аз Туркманистон бештар аз 250 қазоқтаборро то вилояти Мангистауи Қазоқистон расонид.

Бисёре аз мусофирони қатора ин сафарро моҳҳо мунтазир буданд: худро дар Туркманистон аз қайди ҷои зист бароварда, анҷомҳояшонро ҷамъ карда буданд.

Бисёре аз қазоқтабороне, ки аз Туркманистон мекӯчанд, дар вилояти Мангистауи Қазоқистон зиндагӣ ихтиёр мекунанд.

Қазоқистон баргардонии қазоқтаборонро аз хориҷ аз соли 1991 шуруъ кардааст. То ин замон бештар аз 1 миллион қазоқтабор ба Қазоқистон баргаштааст.

Бошандагони деҳоти ҳарду кишвар, ҳам Тоҷикистон ва ҳам Қирғизистон, аз мақомоти кишварҳои худ таъмини ҳаракат дар роҳҳои наздимарзӣ шудаанд.

Онҳо махсусан аз эҳтимоли даргириҳо дар роҳҳое нигаронанд, ки аз қаламрави ду кишвар ва ҳамчунин минтақаҳои баҳснок мегузаранд. Намояндагони ҳокимияти давлатии ду кишвар аз нимирӯзии 17-уми май то дери шаб ин масъаларо бо ҳам ва ҳамчунин бо аҳолӣ баррасӣ карданд, вале аз ҳеч гуна натиҷаи муҳиме хабар дода нашудааст.

Интизорӣ дар наздикии Оқсой

Сокинони Ворух мегӯянд, роҳи онҳо ба Исфара боз аст, вале амнияти ҳаракат дар он таъмин нест. Бо айни чунин иддао гуруҳе аз занони деҳаи Оқсойи Қирғизистон ба раиси вилояти Бодканд Абдукарим Алимбоев, ки ҳоло дар минтақа аст, муроҷиат кардаанд.

Саидҷон Ҷӯраев, ронандаи мусофирбари "Газел", шоми 17-уми май дар суҳбат бо Радиои Озодӣ гуфт, даҳҳо нафар дар маҳаллаи Сангтӯдаи Ворух ва дар рӯ ба рӯи деҳаи Оқсойи Қирғизистон мунтазир нишастаанд. Онҳо мунтазири онанд, ки бо замонат дода шудани амнияти роҳ ба самти Исфара ҳаракат кунанд.

"Дар мошини ман 9 нафар нишастааст. Дар миёнашон занону хурдсолон ҳам ҳастанд. Аз он тараф, онҳое, ки аз Исфара ба тарафи Воруху Чоркӯҳ меоянд, низ мунтазиранд", -- нақл кард ӯ.

Ҷӯраев афзуд, ба раиси ҷамоати Ворух тамос гирифтанд, вале ӯ гуфтааст, мунтазири натиҷаи музокироти намояндаҳои ҳарду ҷониб бимонанд.

Баҳодур Баҳоваддинзода, раиси шаҳри Исфара, низ бо баҳонаи он ки музокирот ҷараён дорад, дар ин бора суҳбат накард, аммо нагуфт, ки музокирот бар сари чист ва дар он аз ду тараф кадом мақомот ширкат доранд.

Нигаронии сокинон аз чист?

Нигаронии сокинон дар ҳоле аст, ки рӯзи 17-уми май мақомоти Тоҷикистону Қирғизистон аз боздошти сокинони якдигар дар қаламравҳояшон хабар доданд. Ин боздошт нахуст аз ҷониби қирғизҳо сар зада, дар посух тоҷикон низ шаҳрвандаони Қирғизистонро боздошт кардаанд. Дертар ҳарду тараф боздоштшудаҳоро ба ҳамдигар супурданд.

Зубайдулло Шомадов, сухангӯйи ҳукумати Исфара, гуфт, сокинони Қирғизистон се шаҳрванди Тоҷикистонро дар деҳаи Оқсой аз "Газел" фароварда, "гаравгон гирифтанд”. Кумитаи давлатии амнияти миллии Қирғизистон гуфт, шаҳрвандони Тоҷикистон замоне боздошт шуданд, ки дар ҳудуди Оқсой аз таксӣ берун омаданд. Ба иттилои ин ниҳод, роҳ аз Ворух ба Исфара транзитӣ аст ва мошинҳову мусофирон набояд дар он ҷо биистанд: “Савор шудану фаровардани одамон ва ё бор кардани мол дар роҳи транзитӣ манъ аст.”

Ҳалима Собитова, корманди “Тоҷикобдеҳот”-и Исфара, низ ба Радиои Озодӣ гуфт, роҳ аз тарафи Қирғизистон расман баста нест, вале сокинон аз бими он ки мавриди ҳамла қарор нагиранд, аз ин рҳ намегузаранд.

Ҳоло чашмҳо ба сӯйи мақомоти ду ҷониб дӯхта шудааст, ки амнияти роҳҳоро дар минтақаҳои баҳсӣ таъмин ва убури бемамониати сокинони ду тарафро кафолат диҳанд.

Низоъ дар марзи Тоҷикистону Қирғизистон рӯзҳои 28 ва 29-уми апрел рӯй дод. Мақомоти Тоҷикистон гуфтанд, ки дар ҷанҷоли ахири марзӣ 19 кас кушта ва 87 кас захмӣ шуд. Ҷониби Қирғизистон эълон кард, ки дар ин ҳодиса 189 шаҳрванди он кишвар маҷруҳ шуда, 36 кас, аз ҷумла ду кӯдак, ҷон бохтанд.

Душанбеву Бишкек якдигарро барои оғози даргирии мусаллаҳона айбдор карда, барои таҳқиқи ҳодиса парвандаҳои ҷудогона кушодаанд.

Тоҷикистону Қирғизистон 970 километр марз доранд ва аз ин ҳисоб танҳо 519 километри онро муайян ва нишона гузоштаанд. Минтақҳои дигари баҳсӣ, ки аз обу замину чарогоҳ иборатанд, ҳар чанд вақт сабаби занозаниву тирпарронии сокинон ва нерӯҳои ду кишвар мешаванд.

Владимир Путин, раиси ҷумҳурии Русия, дастур додааст, то мақомоти ин кишвар созишномаи бунёди шабакаи ягонаи мудофиаи зиддиҳавоиро бо Тоҷикистон омода карда, ба имзо расонанд.

Матни дастури Путин дар ин бора рӯзи 17-уми май дар пойгоҳи иттилооти ҳуқуқии ин кишвар нашр шуд.

Тибқи он Вазорати мудофиа ва Вазорати корҳои хориҷии Русия уҳдадор шудаанд, ки бо Тоҷикистон музокира пеш бурда, лоиҳаи созишномаро ба имзо расонанд.

Ин дар ҳолест, ки Тоҷикистон лоиҳаи чунин созишномаро бо Русия ҳанӯз моҳи сентябри соли 2020 тасвиб карда буд. Дар лоиҳаи санад гуфта мешавад, созишнома бо мақсади беҳбуди самарбахшии мудофиаи зиддиҳавоӣ дар минтақа баста мешавад.

Дар матни лоиҳаи созишнома, ки мақомоти Тоҷикистон онро ҷонибдорӣ кардаанд, гуфта мешавад, бо назардошти аз якдигар ҷудо будани қаламравҳои Тоҷикистону Русия, тарафҳо масъулияти ҳимояи қисматҳои фазои Тоҷикистонро муайян хоҳанд кард.

Гуфта шудааст, созишнома ба муҳлати панҷ сол баста мешавад, вале агар ҳеч яке аз тарафҳо нияти қатъи ин созишномаро надошта бошанд, амали он ба таври автоматӣ ба панҷ соли дигар дароз карда мешавад.

Додгоҳе дар Русия муҳокимаи парвандаи зидди созмонҳои сиёсатмадори мунаққиди Кремлин Алексей Навалнийро дар робита бо “экстремистӣ” унвон шудани онҳо ба мӯҳлати дигар гузошт. Қарор буд, ки додгоҳи шаҳри Маскав рӯзи 17-уми май талаби додситониро дар бораи дар фаъолиятҳои экстремистӣ гунаҳгор кардани Бунёди зидди коррупсия, Бунёди ҳимоят аз ҳуқуқи шаҳрвандон ва қароргоҳи минтақавии Навалний баррасӣ мекард. Вале, ба иттилои Komanda 29, ки аз тими Навалний ҳимоя мекунад, дар оғози мурофиа додситонҳо боз шаш бастаи дигари санадҳоро ба парванда ҳамроҳ карданд. Ин ба он маъност, ки акнун тими Навалний барои омӯхтани мӯҳтавои ин санадҳо фурсат хоҳад дошт. Дар қарори додгоҳ гуфта шуд, ки мурофиа то 9-уми июн боздошта мешавад.

Додситонҳо гуфтанд, ки ин ташкилот “таҳти шиорҳои либералӣ шароитро барои бесубот кардани вазъи иҷтимоӣ ва иҷтимоиву сиёсӣ фароҳам мекунанд”. Фаъолони ҳуқуқ ин амали додситониро ҳамчун талоши “моҷароҷӯёна” барои хомӯш ва саркӯб кардани мухолифону дигарандешон дар кишвар маҳкум карданд. Муттафиқи Навалний Леонид Волков дар як изҳороташ моҳи апрел гуфт, дар сурати аз талаби додситонӣ ҷонибдорӣ кардани додгоҳ интизор меравад, ки ҳар нафари дахил дар ин амалҳо “билофосила аз рӯи иттиҳоми экстремизм муҳокима мешавад ва ин амал бо ҳукми зиндон меанҷомад”. Бар асоси қонунҳои Русия, афрод ё созмонҳои маҳкумшуда барои “экстремизм” бо ҳукми то 10 соли зиндон рӯбарӯ мешаванд.

Раҳбари UNICEF рӯзи 17-уми май аз кишварҳои узви Гурӯҳи Ҳафтгона (G7) ва Иттиҳоди Аврупо хост, ки ба барномаи тақсими ройгони воксинаҳои COVAX-и СММ ба хотири коҳиши шиддати коронавирус воксина хайр кунанд. Ҳенриетта Фор, раҳбари иҷроияи UNICEF гуфт, ки тақдими воксинаҳо “як чораи камтарин, зарурӣ ва оҷил аст, ки ҳамин ҳоло бояд сурат гирад”. Дар изҳороташ Фор гуфт, ки G7 ва Иттиҳоди Аврупо агар моҳҳои июн, июл ва август ҳадди аққал 20 дарсади захираҳои воксинаҳои худро ҳам бидиҳанд, ин 153 миллион дона мешавад. Ба гуфтаи ӯ, бо ин кор онҳо ба барномаи эмкунии кишварҳои худ ҳеҷ осебе намерасонанд.

Тоҷикистон як узви барномаи COVAX-и Созмони ҷаҳонии тандурустӣ буда, то ҳол даҳҳо ҳазор адад воксина ба ин кишвар ворид шудааст.

Ин даъват дар ҳоле садо дод, ки Бритониё маҳдудиятҳои боқимондаи марбут ба пандемияи COVID-19 дар кишвар сабук кард. Шурӯъ аз 17-уми май дар ин кишвар дубора тарабхонаву кинотеатрҳо боз шуданд ва сокинон то 30-нафарӣ метавонанд дар як ҷо нишинанд.

Дар Ҳинд дар 24 соати гузашта шумори олудашавиҳои нав ба коронавирус беш аз 281 ҳазор ҳолат ва марг бар асари COVID-19 - 4106 ҳолатро ташкил дод.

Дар маҷмӯъ дар ин кишвари Осиёи Ҷанубӣ шумори олудашудаҳо 24,97 миллион нафарро ташкил додааст, ки аз назари омор баъди ИМА дуюмин кишвар дар сайёра мешавад.

Ду расонаи чехӣ – “Радиои чехӣ” ва маҷаллаи “Респект” рӯзи 17-уми май навиштанд, соҳиби анбори силоҳи IMEX Group Пётр Бернатик як рӯз пеш аз таркиши ин муасиса дар шаҳри Острава, дар наздикии меҳмонхонаи

Corrado қарор дошт. Дар ин меҳмонхона ду ҷосуси эҳтимолии рус Александр Петров ва Руслан Боширов хона иҷора гирифта буданд. Расонаҳо бо такя ба маълумоти телефонҳои мобили Бернатик маълум кардаанд, ки як рӯз пеш аз таркиши анбор дар деҳаи Врбетитсе рӯзи 15-уми октябри соли 2014 ин соҳибкор дар наздикиҳои меҳмонхона қарор дошт. Дар ҳамин рӯз, ба иттилои матбуот, кормандони ширкати IMEX ногаҳон амре гирифтанд, ки дар он гуфта мешуд, ки ҳама бояд як рӯзи истироҳат гиранд. Бернатик танҳо нафаре буд, ки як рӯз пеш аз таркиш ба дохили анбор даромада буд. Таркишро, ба қавли мақомот ва тафтишоти Чехия, Петров ва Боширов амалӣ карданд.

Маълум нест, ки Бернатик он замон дар шаҳри Острава чӣ мекард ва чаро дар назди меҳмонхона қарор дошт. Вакили ӯ ба журналистон гуфтааст, ки соҳибкор метавонист он замон савори мошинаш аз назди меҳмонхона гузарад ва дар чорроҳа мошинро нигаҳ дошт. Вакили ӯ гуфт, ки зерҳимояаш ҳеҷ гоҳ дар дохили меҳмонхонаи Corrado набуд ва ҳеҷ гоҳ бо шаҳрвандони Русия мулоқот накардааст. Журналистон маълум кардаанд, ки Бернатик давоми 40 дақиқа дар маҳаллаи назди меҳмонхона буд. Манбаъҳо дар хадамоти амнияти Чех ба таври махфӣ ба журналистон тасдиқ карданд, ки полис ҳаракати Бернатикро дар рӯзи 15-уми октябри соли 2014 бо ёрии телефони мобили ӯ нақшакашӣ кардаанд.

Баъди исташ дар Острава Бернатик ба деҳаи Врбетитсе рафтааст. Шоҳидон гуфтанд, ки вақте ӯ ба анбор дохил мешуд, танҳо буд. Ин воқеият ҳамкоронашро дар тааҷҷуб гузоштааст, чунки одатан соҳибкор ҳамроҳ бо Людек Петржик ҳамроҳ рафтуомад мекард. Петржик яке аз ду кормандони IMEX аст, ки дар таркиш кушта шуд.

Маълум шудааст, ки Бернатик тахминан се соат дар дохили анбор буд. Дар дохил он соатҳо ҳеҷ касе аз кормандон ҳузур надоштанд, чунки ҳамаро ба истироҳат фиристоданд.

Рафтори ин соҳибкор мавриди таваҷҷӯҳи тафтишот шуд. «Радиои чехӣ» менависад, ки моҳи феврали имсол Бернатик давоми 48 соат дар боздошт буд ва хонаашро кофтукоб карданд. Муфаттишон ӯро аз назари эҳтимоли пинҳон кардани иттило дар бораи таркиш бозпурсӣ кардаанд.

Мақомоти чех 17-уми апрели имсол гуфтанд, ки ҷосусони низомии русро дар ташкили таркиш дар анбори силоҳи Врбетитсе гумонбар медонанд. Раҳбарони Чех, ба истиснои президент Милош Земан, пойфишорӣ мекунанд, ки дар заминаи ҳодисаи таркиши анбори силоҳ танҳо як фарзия вуҷуд дорад ва он ҳам даст доштани Русия мебошад. Тахмин меравад, ки ҳадафи таркиш нобуд кардани муҳимоти ҷангӣ ва аслиҳа мебошад, ки барои хориҷа, эҳтимолан Украина, пешбинӣ мешуд.

Баъди ин Ҷумҳурии Чех 18 корманди сафорати Русияро аз хокаш берун кард. Баъди чанд иқдоми ҷавобӣ, Маскаву Прага ба мувофиқа расиданд, ки шумори кормандони намояндагии дипломатии ҳарду кишвар дар қаламравашон баробар мешавад. Русия ҳама гуна иттиҳом дар заминаи ташкили таркиш дар Чехро рад кардааст.

Суннатулло Лоиқов, паҳлавони тоҷик, дар Ҷоми Осиё миёни навҷавонон оид ба ҷудо (Junior Asian Judo Cup Almaty 2021), ки рӯзҳои 14-16-уми май дар шаҳри Алмаатои Қазоқистон баргузор шуд, медали нуқра ба даст овард.

Ба иттилои Федератсияи ҷудои Тоҷикистон, дар ин мусобиқа, ки дар Маҷмааи варзишии ба номи Балуан Шолак доир гардид, беш аз 150 варзишгар аз 4 кишвари Осиёи Марказӣ – Қазоқистон, Қирғизистон, Тоҷикистон ва Узбекистон - ширкат варзиданд.

Ба ҳайати дастаи мунтахаби Тоҷикистон шаш варзишгар шомил буд: Муҳаммадсолеҳ Қувватов (-60 кг), Қурбоналӣ Бозоров (-73 кг), Ғаниҷон Ғаниев (-73 кг), Суннатулло Лоиқов (-81 кг), Ҳайдаралӣ Шоев (-90 кг) ва Эмомризо Анварзода (-100 кг).

Аз миёни онҳо танҳо Суннатулло Лоиқов медал ба даст овард. Вай дар вазни то 81 кило дар даври аввал Бекзот Таугалиеви қазоқро мағлуб кард ва ба даври чорякниҳоӣ роҳ ёфт. Дар чорякфинал бар варзишгари дигари мизбон – Ботирхон Сакенов - пирӯз гашт. Дар даври ниманиҳоӣ Абдулло Ҷалолиддинови қирғизро шикаст дод ва ба даври ниҳоӣ роҳ пайдо кард. Вале Лоиқов дар мубориза барои нишони тиллои мусобиқа аз қаҳрамони ҷаҳон миёни ҷавонон дар соли 2019 Аян Бойғозӣ аз Қазоқистон ноком шуд ва дар натиҷа барандаи медали нуқра гардид.

Ҳамзамон рӯзҳои 14-16-уми май дар Алмаато Ҷоми Осиё миёни наврасон оид ба ҷудо (Cadet Asian Judo Cup Almaty 2021) доир гардид. Дар ин мусобиқа Тоҷикистонро 5 варзишгар - 4 писар: Самиршо Муҳаббатов (-60 кг), Акбарҷон Ниёззода (-60 кг), Бахтиёр Ғафуров (-73 кг), Муҳаммадҷон Афғонов (-90 кг) ва як духтар – Меҳронаи Маҳмадзода (-57 кг) - намояндагӣ карда, аз медалҳо бенасиб монданд.

Чанде аз кормандони СММ аз мақомоти Туркманистон дархост карданд, ки дар бораи рӯзноманигори маҳкумшудаи туркманистонӣ Нургелдӣ Холиқов иттилоъ диҳанд. Дар ин бора расонаҳои марбут ба Туркманистон хабар медиҳанд.

Моҳи феврали соли ҷорӣ чанд масъули ниҳодҳои марбут ба СММ бо ирсоли як номаи даҳсаҳифаӣ аз мақомоти Туркманистон хостанд, ки дар бораи ҳукми Холиқов маълумот диҳанд. Ба навиштаи расонаҳо, Холиқови 26-соларо барои ирсоли акси сафари ҳайати Созмони ҷаҳонии беҳдоштӣ ба Туркманистон 4 сол зиндонӣ кардаанд.

Дар номаи масъулони СММ омадааст, ки Холиқов рӯзи 12-уми июли соли 2020 ба рӯзноманигорони мустақил акси ҳайати СҶТ-ро ирсол кардааст. Рӯзи баъд рӯзноманигорро мақомоти ҳифзи ҳуқуқи Туркманистон ба бозпурсӣ даъват кардаанд. Рӯзи 26 июл Холиқов дар суҳбат бо расонаҳо гуфт, ки ӯро дар барнагардонидани қарз дар ҳаҷми 5 ҳазор доллар муттаҳам мекунанд, ки гӯё ибтидои соли 2020 гирифтааст. Холиқов моҳи сентябри соли 2020 бо иттиҳоми "қаллобӣ" 4 сол зиндонӣ шуд.

Дар бораи ҳукми Холиқов ба хешовандонаш танҳо дар моҳи декабри соли 2020 хабар доданд. Мақомот ҳамзамон ваъда доданд, ки вай дар доираи қонуни авф озод хоҳад шуд. Вале Холиқов то кунун дар зиндон боқӣ мондааст.

Масъулони СММ дар номааш гуфтаанд, ки муҳокимаи парвандаи Холиқов хилофи меъёрҳои адолати додгоҳӣ ва меъёрҳои байналхалқии риояи ҳуқуқи инсон сурат гирифтааст.

Дар Беларус ду гузоришгар, аз ҷумла як хабарнигори расонаи олмонии Deutsche Welle бо иттиҳоми гӯё ширкат кардани онҳо дар намоишҳои эътирозии ғайриқонунӣ ба мӯҳлати то 20-рӯзӣ ҳабс шуданд. Ҳукме, ки 15-уми май содир шуд, яке аз даҳҳо қазиҳои додгоҳӣ дар Беларус алайҳи журналистон аст. Баъди интихоботи баҳсбарангези президентии августи порсол ва эътирозҳои сартосарӣ дар Беларус мақомот аз шеваи саркӯбҳои шадид кор гирифта, аз ҷумла журналистонро ҳам, ки дар пӯшиши хабарии ин таҳаввулот кор мекарданд, ба ҷавобгарӣ кашиданд.

Хабарнигори Deutsche Welle Александр Буряков ва журналисти мустақил Владимир Лаптсевич рӯзи 12 май дар шаҳри Могилёв боздошт шуданд. Дар ин шаҳри воқеъ дар 200-километрии шарқи Минск ин ду журналист бо пӯшиши хабарии додгоҳи Певел Северинетс, як сиёсатмадори мухолифи ҳукумати Александр Лукашенко машғул буданд. Полиси Беларус дар далели боздошти онҳо гуфт, ки ин журналистон “такроран дар намоишҳои эътирозии ғайриқонунии соли ҷорӣ иштирок карданд”. Вале гурӯҳи ҳомии ҳуқуқи MayDay гуфт, ки рӯзи 12 май дар муқобили додгоҳи шаҳри Могилёв ҳеҷ намоиши эътирозӣ баргузор нашудааст. Раҳбари кулли Deutsche Welle Питер Лимбург аз мақомоти Беларус озодии билофосилаи журналистонро тақозо кард.

Дар Қирғизистон ихтилофҳо барои назорат аз болои Кони Қумтор пуршиддат мешавад. Ахиран як комисссиюни давлатӣ пешниҳод кардааст, ки назорати ин кон муваққатан аз дасти ширкати канадаии Centerra Gold ба ҳукумат гузарад. Дар навбати худ, Centerra Gold гуфт, ки аз болои Бишкек барои талоши дубораи миллисозии ин ширкат ба додгоҳ шикоят кардааст. Қумтор яке аз калонтарин конҳои тилло дар Осиёи Марказӣ ба шумор меравад.

Оқилбек Ҷабборов, раиси комиссиюни давлатии Қирғизистон рӯзи 17-уми май гуфт, аъзои ин ниҳод ба хулосае омаданд, ки бо сабаби “фасод ва вайрон кардани қоидаҳои амниятиву муҳитзистӣ” созиши ба ихтиёри Centerra Gold додани кон бояд бекор шавад. Оқилбек Ҷабборов гуфт: “Комиссиюни давлатӣ ошкор кард, ки созишномаҳои дар солҳои 1992, 2003, 2009 ва 2017 имзошуда дар заминаи фаъолияти Қумтор ҷавобгӯи манфиатҳои миллии Қирғизистон нест. Онҳо меъёрҳои марбут ба ҳифзи тамомияти арзии Қирғизистонро вайрон мекунанд ва бар пояи ғаризаҳои фасодкоронаи мақомоти вақт имзо шудаанд”.

Ин изҳорот як рӯз баъди он пахш шуд, ки ширкати канадаии Centerra Gold алайҳи Бишкек ба додгоҳи мунсифа шикоят карда қонунгузории ахиран қабулшуда дар бораи муваққатан зери назари давлат гузаштани кони тиллоро ба чолиш кашидааст. Дар шикоят ширкат гуфта шудааст, ки ин қонун “фазои сармоягузорӣ” дар заминаи истихроҷи тиллоро вайрон мекунад.

Энтонӣ Блинкен, вазири корҳои хориҷии Амрико ва ҳамтои покистониаш Шоҳ Маҳмуд Қурайшӣ дар як тамоси телефонӣ ҷараёни сулҳи Афғонистон ва ҷанги зидди терроризмро баррасӣ кардаанд.

Президенти Амрико Ҷо Байден моҳи апрел гуфт, ки то 11-уми сентябри имсол 2500 низомии амрикоиро аз хоки Афғонистон берун мебаранд.

Тавофуқи маъмурияти президенти собиқи Амрико бо Толибон ин буд, ки то 1-уми майи имсол нирӯҳои амрикоӣ хоки Афғонистонро тарк мекунанд. НАТО гуфт, бо айни ҳамин нақша кор карда, беш аз 7 ҳазор нирӯҳои эътилофиашро аз Афғонистон берун мебарад.

Департаменти давлатии Амрико шоми 16-уми май бо пахши изҳороте гуфт, дар сӯҳбати телефонӣ Блинкен ва Қурайшӣ ба "зарурати идомаи ҳамкорӣ дар ҷараёни сулҳи Афғонистон, пешрафти Покистон дар муқобила бо терроризм, инчунин, тавсеаи имконбахши ҳамкориҳо дар бахши тиҷорату савдо ва ҳам беҳтар кардани иртибототи минтақавӣ дар Осиёи Ҷанубӣ" таъкид карданд.

Берун рафтани нирӯҳои хориҷӣ аз Афғонистон нигаронии баъзе аз кишварҳои минтақаро ба бор овардааст, ки дар сурати набудани созиши сулҳ бо Толибон оё нирӯҳои Афғонистон мустақилона тавони муқобила бо ин гурӯҳи шӯришиҳо хоҳанд дошт ё на.