Ҷо Байден, нойиби раисиҷумҳури ИМА, ба хотири суръат бахшидан ба раванди ташкили ҳукумати нави Ироқ, имрӯз дар Бағдод бо раҳбарони ду ҳизби бузурги сиёсии кишвар мулоқот мекунад. Қарор аст, ки ӯ аввал бо сарвазири феълӣ Нурӣ ал-Моликӣ ва сипас ҷудогона бо рақиби ӯ, нахуствазири пешини Ироқ Аёд Алловӣ гуфтугӯ кунад. Дар интихоботи парлумонии рӯзи 7 март ягон ҳизб пирӯз нашуд ва раҳбарони ду ҳизби бузург сари мавзӯъ баҳс мекунанд, ки кадоме аз онҳо ҳаққи ташкили ҳукуматро дорад. Нурӣ ал-Моликӣ ва Аёд Алловӣ муддати тулонӣ талош карданд, ки тавассути ҷалби дигар аҳзоб барои дарёфти аксарият дар парлумон ва таъсиси ҳукумати нав муваффақ шаванд.
