Пайвандҳои дастрасӣ

Хабари нав

Дар чанд ҷумла

Бекназаров: Мавзӯъи пойгоҳи нави Русия матраҳ нашудааст

Муовини раиси ҳукумати муваққати Қирғизистон изҳор намуд, ки мақомоти Русия мавзӯъи имкони бунёди пойгоҳи нави низомӣ дар вилояти Ӯшро баррасӣ накардаанд. Ба иттилоъи бахши қирғизии Радиои Озодӣ, ин вокуниши Азимбек Бекназаров ба матлабе дар нашрияи “Независимая газета”, чопи Маскав аст, ки дар он, бо ишора ба манобеъи низомии Русия, дар бораи нияти Маскав барои бунёди пойгоҳи нави низомӣ дар ҷануби Қирғизистон сухан меравад. Муаллифи гузориш Владимир Мухин ба бахши тоҷикии Радиои Озодӣ гуфт, ки ин иттилоъ воқеъист ва вазорати дифоъи Русия музокирот бо раҳбарони Қирғизистонро баъд аз анҷоми раъйпурсӣ оид ба тарҳи нави Қонуни асосии Қирғизистон шурӯъ хоҳад кард. Раъйпурсӣ рӯзи 27 июн доир мешавад.
Айни ҳол Русия ва ИМА дар канори Бишкек пойгоҳҳои низомии худро доранд.

Ҳамаи хабарҳои имрӯзро дар инҷо бихонед

Ҷои Булгаковро дар мақоми муовини вазири дифои Русия "қассоби Мариупол" гирифт

Дмитрий Булгаков аз соли 2008 дар мақоми муовини вазири дифоъ кор кардааст

Вазорати дифои Русия рӯзи 24-уми сентябр гуфт, ки муовини вазир Дмитрий Булгаков “бо сабаби ба вазифаи дигар гузаштан” аз ин мақом сабукдӯш мешавад. Ба ҷои ӯ ба ин мақом генерал-полковник Михаил Мизинтсев таъин шуд, ки пештар дар мақоми раиси Маркази назорати дифои миллии Русия кор мекард.

Низомиёни украинӣ гуфтанд, ки Мизинтсев раҳбарии ҳуҷум ба бандарҳои баҳри Азови Украинаро дар Мариупол ба ӯҳда дошт ва дар он ҷо лақаби “қассоби Мариупол”-ро гирифт. Мариуполро Русия дар охири моҳи май ишғол кард ва аксар қаламравҳои ин шаҳрро ба харобаҳо табдил дод ва ҳазорҳо сокинони мулкӣ кушта шуданд.

Дар ин охирҳо раҳбарияти низомии таҳти раёсати вазири дифоъ Сергей Шойгу, ки аз доираи наздик ба Кремлин дониста мешавад, мавриди интиқод аст. Тахминан ду ҳафта пеш артиши Русия аз минтақаҳои шарқии Харкиви Украина ронда шуд.

Раисӣ: Эрон бояд бо мухолифони низом "қотеона амал кунад". Дар эътирозҳои Эрон 35 кас кушта шудааст

Теҳрон, 21-уми сентябр

Президент Иброҳим Раисӣ рӯзи 24-уми сентябр гуфт, ки Эрон “бояд бо онҳое, ки зидди амният ва оромии кишвар баромад мекунанд, қотеона амал кунад”. Ин изҳорот дар ҳоле садо дод, ки матбуоти давлатӣ навишт, дар эътирозҳои як ҳафтаи ахир бо сабаби марги духтари 22-солаи боздоштшуда барои ҳиҷоби нодуруст 35 нафар кушта шуд. Раисӣ ин суханҳояшро зимни як сӯҳбати телефонӣ бо оилаи ходими амнияти дар ҷараёни эътирозҳои зиддиҳукуматӣ кушташуда баён кардааст.

Эътирозҳову раҳпаймоиҳо аз он ҷо шурӯъ шуд, ки рӯзи 16-уми сентябр се рӯз баъди боздошти полиси ахлоқ барои гӯё нодуруст пӯшидани ҳиҷоб Маҳсо Аминии 22-сола бо нишонаҳои латукӯбу шиканҷа даргузашт. Эътирозҳо аз зодгоҳи духтар – вилояти Курдистон шурӯъ шуда ба дигар минтақаҳои кишвар то Теҳрон паҳн шуд. Рӯзи 23-юми сентябр мақомот ба кӯчаҳо тарафдорони режими исломиро бароварданд. Рӯзи 24-уми сентябр хадамоти иктишофии Эрон иддао кард, ки аз чандин нақшаи таркиши бомба дар ҷараёни эътирозҳо пешгирӣ кардааст. Иддао мешавад, ки ин нақшаро собиқ тарафдорони шоҳ ва ниманизомиёни сокини Табрез ташкил карданӣ буданд, вале санҷидани дурустии ин иддао тавассути манобеи мустақил имон надорад.

Фаъолон мегӯянд, ки Аминӣ дар идораи полис аз сараш зарба хӯрдааст, вале полис инро рад мекунад. Аҳмад Ваҳидӣ, вазири корҳои дохилии Эрон рӯзи 23-юми сентябр гуфт, ки “таҳқиқи тиббию судӣ нишон дод, ки латукӯб ҷой надошт”. Қаблан полис гуфт, ки ин духтар аз сактаи қалбӣ даргузашт, вале наздиконаш бо ишора ба захмҳои сангини бадани духтар ба шиканҷа шудани ӯ пойфишорӣ мекунанд.

Қирғизистон аз афзоиши қурбониҳои муноқишаи марзӣ гуфт. Феҳристи қурбониён аз Тоҷикистон ҳам ниҳоӣ нест

Тоҷикистон Қирғизистонро дар ҳамлаи дроне ба масҷиди деҳаи Овчӣ Қалъача гунаҳгор кард, ки боиси марги беш аз даҳ нафар шуд. Қирғизистон ин иттиҳомро шарҳ надод

Мақомоти Қирғизистон гуфтанд, ки шумори қурбониёни муноқишаи марзӣ бо Тоҷикистон дар ин кишвар то 62 нафар афзудааст. Дар ин бора рӯзи 24-уми сентябр Вазорати беҳдошти Қирғизистон хабар додааст.

Мақомоти Тоҷикистон дар бораи кушта шудани 41 нафар гузориш дода, рӯйхати пурраи қурбониёнро надоданд. Вале Радиои Озодӣ бо истифода аз манобеи худ, хешовандон, шабакаҳои иҷтимоӣ ва мақомоти маҳаллӣ то ин дам номи 70 нафареро гирд овард, ки ҳангоми даргириҳои мусаллаҳонаи 14-17-уми сентябр дар сарҳади Тоҷикистон бо Қирғизистон кушта шудаанд. Ин рӯйхат ғайрирасмӣ аст ва ниҳоӣ нест. Дар миёни қурбониҳои муноқишаи хунин аз ҳарду тараф кӯдакон ҳам ҳастанд.

Рӯзҳои 14-17-уми сентябри имсол сарҳади Тоҷикистону Қирғизистон шоҳиди муноқишаи мусаллаҳонаи бесобиқае шуд, ки дар сар задани он ва истифодаи силоҳҳои сангини низомӣ ҳарду тараф ҳамдигарро айбдор карданд. Бар асоси протоколи хатми низоъ дар марз, ки 19-уми сентябр имзо шуд, мақомоти ду ҳамсоя ӯҳдадор шуданд, ки шартҳои сулҳро риоя кунанд. Равобити сиёсиву маишии байни ду ҳамсоя, ки 970 км марзи муштарак доранду беш аз нисфи он аломатгузорӣ нашудааст, мушкил ва печида боқӣ мемонад.

Як ҳафта баъди марги духтари боздоштшуда, Эрон ғарқи эътирозҳо шудааст

Эътирозҳо на танҳо дар дохили Эрон, балки дар хориҷа, аз ҷумла дар Туркия ҳам барпо мешаванд. Дар акс Маҳсо Аминӣ

Дар муқобили мавҷи эътирозҳои мардумие, ки баъди даргузашти хушунатбори духтари 22-солаи эроние дар полис барои гӯё ҳиҷоби нодуруст буруз кард, ҳукумат раҳпаймоиҳои тарафдорони низомро дар шаҳру манотиқи Эрон ташкил кард. Хабаргузории давлатии ИРНА гуфт, ки мардуми рӯзи 23-юми сентябр ба хиёбонҳо баромада зидди “таҳқири Қуръон, оташ задани масҷидҳо ва ҳам вайрон кардани қоидаи пӯшидани либоси исломӣ” шиор мезананд.

Ин нафарон эътирозгарони зиддидавлатиро чун “сарбозони Исроил” маҳкум карданд. Онҳо инчунин шиорҳои “марг ба Амрико” ва “марг ба Исроил”-ро ба забон меоварданд, ки як одати маъмулии рӯҳониён дар таҷаммӯъҳои давлатии Эрон мебошад. Қаблан мақомот дар Эрон таҳдид карданд, ки ба “душманон” муқовимат мекунанд. Ин ишора ба садҳо ҳазор эътирозгарони марги пурхушунати Маҳсо Аминӣ дар ҳодисаҳои 16-уми сентябр аст, ки баъди боздошт шуданаш аз ҷониби полиси ахлоқ бо иттиҳоми “ҳиҷоби нодуруст” бо захмҳои шадиде дар бемористон ҷон дод.

Полис иддао кардааст, ки ӯ аз сактаи қалбӣ даргузашт, вале фаъолон полисро дар шиканҷаи ин духтар айбдор мекунанд, ки боиси марги ӯ шудааст. Эътирозҳо аз зодгоҳи Маҳсо Аминӣ дар вилояти Курдистон шурӯъ шуда ба дигар қисматҳои Эрон доман паҳн кард ва ба Теҳрон ҳам расид.

Марги Аминӣ боиси баландтар садо додани даъватҳо ба бекор кардани қоидаи ҳиҷобпӯшии занҳо ва ҳам манъи кори полиси ахлоқ шуд. Дар видеоҳое, ки сокинони Эрон дар шабакаҳои иҷтимоӣ нашр мекунанд, саҳнаҳои эътирози занону духтарон аз роҳи оташ задани ҳиҷобҳояшон нашр мешавад. Бархе эътирозгарон ба хатми режими исломӣ дар Эрон даъват мекунанд.

Муфаттишони СММ дар ҷанги Украина ҷиноятҳои ҷангиро сабт кардаанд

Эрик Мосе, раиси Комиссиюни муфаттишон оид ба Украина

Муфаттишони СММ ба хулосае омаданд, ки дар Украина дар давоми ҳуҷуми бедалели Русия ба хоки ин кишвару ишғоли қаламравҳояш ҷиноятҳои ҷангии мисли бомбгузории минтақаҳои аҳолинишин, қатлҳои худсарона, шиканҷа ва таҷовузҳои ваҳшатнок содир шудааст.

Эрик Мосе, раиси Комиссиюни муфаттишон оид ба Украина зимни суханрониаш дар Шӯрои ҳуқуқи башари СММ дар Женева рӯзи 23 сентябр гуфт, ки бар пояи маълумоти бадастомада “ба хулосае омадем, ки дар Украина ҷиноятҳои ҷангӣ содир шудаанд”. Кори комиссиюн моҳи май шурӯъ шуд ва вазифааш ҳам таҳқиқу арзёбии қонуншиканиҳои давраи ҷанг дар Украина буд, ки 24-уми феврали имсол баъди ҳуҷуми Маскав ба Украина шурӯъ шуд.

Дар ҷараёни корҳои тафтишотии мутахассисони СММ, аз ҷумла бо нафароне ҳам сӯҳбатҳо шудааст, ки дар боздоштгоҳҳои таҳти наари артиши Русия нигароҳдорӣ шудаанд ва бисёри онҳо гуфтанд, ки латукӯб ва бо барқ шиканҷа ва зӯран лучи модарзод шудаанд.

Тими муфаттишон инчунин дар бораи қатлҳои худсаронаву ваҳшиёна дар минтақаҳои Киев, Черниҳив, Харкив ва Суми ҳам далел овардааст, ки муддате таҳти ишғоли русҳо буданд. Дар миёни қурбониёни ҷиноятҳои шаҳвоние, ки сарбозони Русия содир кардаанд, 4 то 82-солаҳо ёд мешаванд.

Навалний: сафарбаркуниву референдуми сохта "ҷинояти таърихии Путин" аст

Сиёсатмадори зиндонии рус Алексей Навалнийро, ки дар зиндони низомаш сангини вилояти Владимир қарор дорад, аз моҳи август ба ин сӯ бори панҷум ба мӯҳлати 12 рӯз ба утоқи ҷаримавии зиндон фиристоданд. Ба гуфтаи Кира Ярмиш, сухангӯи ин сиёсатмадори мухолифин, Навалнийро як рӯз баъди анҷоми мӯҳлати 15 рӯзи буданаш дар ШИЗО аз нав ба ин утоқи ҷаримавӣ фиристоданд, ки бо шароити сахту сангинаш фарқ мекунад. Раҳбари зиндон ба Навалний рӯирост гуфтааст, ки ин навбат ӯро барои маҳкум кардани маъракаи сафарбарии мардум ба ҷанги алайҳи Украина дар мурофиаи ахири додгоҳӣ ҷазо медиҳад.

Худи Навалний, ки рӯзи 23-юми сентябр дар мурофиаи додгоҳие суханронӣ мекард, гуфт, 12 рӯзи ҷазо барояш дар муқобили сафарбаркунии шаҳрвандони Русия ба қатли мардуми бегуноҳ дар Украина “ҳеҷ аст”. Ӯ гуфт:

“Ин ҷиноят алайҳи кишвари ман аст. Муносибати ман ҳамин аст. Ман хомӯш намешинам ва умедворам, ки онҳое, ки маро мешунаванд, дар ин замина хомӯш нахоҳанд буд. Чунки коре, ки ҳоло мегузарад, аз 12-у 120 рӯзи ШИЗО ҳам бадтар аст. Ин ҷинояти таърихӣ аст, ин шарики ҷинояти Путин шудани садҳо ҳазор нафар аст. Мисле, ки мафия мекунад, бо ин сафарбаркуниву референдумҳои тақаллубӣ дасти садҳо ҳазор одамро хунолуд ва аз ҳам муттаҳам мекунад”.

Дар мурофиаи додгоҳие, ки феълан ҷараён дорад, Навалний қарори аввали ба ШИЗО бурда шуданаш дар таърихи 12-уми августро ба чолиш кашидааст.

Алексей Навалний аз январи соли 2021 дар пушти панҷара аст ва охирин ҳукмаш 9 соли зиндон бар асоси иттиҳоми тақаллубкорӣ аст, ки худи ӯ онро рад карда дорои ангезаҳои сиёсӣ меномад.

С.Муҳриддин ва Ҷ.Кулубаев бо муовини Гутерреш вазъ дар марзро баррасӣ карданд

Мавзӯи муноқишаи ахир дар марзи Тоҷикистону Қирғизистон, ки ҷони беш аз сад нафарро аз ҳарду тараф гирифту даҳҳо нафари дигарро маҷрӯҳ ва бесарпаноҳ гузошт, дар мулоқоти сегонаи вазирони корҳои хориҷии ин кишварҳо ва муовини дабири кулли СММ оид ба масоили сиёсӣ баррасӣ шудааст.

Вазоратҳои корҳои хориҷии Тоҷикистон ва Қирғизистон дар хабарҳои мухтасаре, ки 24-уми сентябр нашр карданд, гуфтанд, ки мулоқоти вазирони корҳои хориҷии Тоҷикистону Қирғизистон - Сироҷиддин Муҳриддин ва Ҷеенбек Кулубаев бо Розмари Анн ДиКарло, муовини Антонио Гутерреш дар масоили сиёсӣ рӯзи 23-юми сентябр дар ҳошияи иҷлосияи 77-уми СММ дар Ню-Йорк баргузор шуд. ВКХ Тоҷикистон гуфт, “ширкатдорони ин мулоқот дар бораи вазъ дар марзи давлатии Тоҷикистону Қирғизистон табодули назар ва омодагии худро барои идомаи музокирот ба хотири ҳалли сулҳомези масъала баён карданд”.

Ҳарду сохтори дипломатӣ навиштанд, ки дар ҷараёни ин мулоқот ба зарурати иҷрои шартҳои протоколи рӯзи 19-уми сентябр миёни ду кишвар имзошуда таъкид гардид.

Ба расонашиноси тоҷик иҷозаи вуруд ба Қирғизистон дода нашуд

Акси Тимур Тимерханов аз саҳифаи фейсбукии Азия-Плюс

Тимур Тимерханов, як рӯзноманигор ва расонашиноси тоҷикро иҷозат надоданд, ки ба Қирғизистон ворид шавад. Тимерханов мегӯяд, шаҳрвандии Тоҷикистон ва Русияро дорад ва 21 сентябр бо шиносномаи русӣ аз Санкт-Петербург ба Бишкек сафар карда буд.

Тимур Тимерханов ба хабаргузории “Азия-Плюс” гуфтааст, ба хотири онки дар шиносномаи русиаш ҷойи таваллуд Тоҷикистон нишон дода шудааст, ба ӯ иҷозаи вуруд ба Қирғизистонро надоданд.

“Вақте диданд, ки дар шиносномаи зодгоҳи ман Тоҷикистон навишта шудааст, дарҳол пурсиданд, ки "оё душаҳрвандӣ дорам"? Ман тасдиқ кардам. Сарҳадбонон шиносномаи тоҷикии маро пурсиданд ва онро пешниҳод кардам. Онҳо ба тафтиши шиноснома сар карданд ва ин кор бисёр тӯл кашид. Муддати дароз ба ман нафаҳмонданд, ки барои чӣ маро нигоҳ доштаанд. Аввал маро дар ошёнаи якуми терминал нигоҳ медоштанд, баъд ба ошёнаи дуюм бароварданд. Мегуфтанд, ки "мунтазир бош". Ин кор қариб 4 соат давом кард,” - гуфтааст Тимур Тимерханов.

Ин рӯзноманигори тоҷик мегӯяд, як рӯз дар фурудгоҳи “Манас” истод ва дар ин муддат барояшон обу ғизо надоданд. Ба гуфтаи Тимур Тимерханов, ӯ бо хатсайри ширкати “Уралские авиалинии” ба Бишкек омада буд ва парвози навбатии ин ширкат ба Санкт-Петербург рӯзи 24 сентябр буд. Тимерханов мегӯяд, ӯ наметавонист чор рӯз дар фазои бастаи фурудгоҳ истад ва ба ин хотир маҷбур шуд аз ҳисоби худ билет харида, ба Маскав парвоз кунад. Ба гуфтаи ин рӯзноманигор, ӯ бо кори шахсиаш барои 6 рӯз ба Қирғизистон омада буд.

Қирғизистон моҳи майи соли гузашта баъди як муноқиша дар сарҳад, марзҳои худро ба рӯи Тоҷикистон баст. Баъд аз ин қарор шаҳрвандони Тоҷикистон дар фурудгоҳҳои кишвари ҳамсоя ба мушкил дучор шуданд. Аз ҷумла, 25 майи соли гузашта як ҳавопаймои "Сомон Эйр" наздик ба дусад нафарро ба Бишкек бурд, вале пас аз чаҳор соати интизорӣ бо мусофиронаш дубора ба Душанбе баргашт. Ин мусофирон, ба гуфтаи худашон, бояд аз Бишкек ба шаҳрҳои Русия парвоз мекарданд.

Равобити Душанбе ва Бишкек дар як соли ахир пурмушкил шудааст. Далели тира шудани равобити Тоҷикистону Қирғизистон сар задани муноқишаҳои пайиҳам дар марзи ду кишвар гуфта мешавад. Аз ҷумла дар даргирии рӯзҳои 14-17 сентябр аз ҳарду тараф беш аз 100 нафар кушта ва даҳҳо нафар маҷруҳ шуданд. Ҳарду тараф якдигарро дар ин кор гунаҳкор мекунанд.

Қазоқистон афзоиши сафари хориҷиҳо ба ин кишварро тасдиқ кард

Хадамоти марзбонии Қазоқистон мегӯяд, рӯзҳои ахир шумори шаҳрвандони хориҷие, ки мехоҳанд аз Русия ба ин кишвар ворид шаванд, афзоиш ёфтааст.

"Ба далели афзоиши шумори мусофирон ва теъдоди мошинҳо дар гузаргоҳҳо ҷамъшавиҳо ба назар мерасад. Вазъ таҳти назорати махсус аст", - афзудааст манбаъ.

Ба иттилои хадамот, 30 нуқтаи қабули мошинҳо дар гузаргоҳҳои Қазоқистон ба таври муқаррарӣ фаъолият мекунанд.

Хадамоти марзбонии Қазоқистон афзуда, ки дар якҷоягӣ бо мақомоти салоҳиятдори дигари давлатӣ “амнияту риояи қонунҳоро дар гузаргоҳҳои марзӣ” таъмин ва бо Идораи марзбонии Русия низ ҳамкорӣ менамоянд.

Тибқи омори Вазорати умури дохилии Қазоқистон, аз аввали имсол 4,3 миллион шаҳрванди хориҷӣ вориди ин кишвар шудааст ва аз ин миён, 1,6 миллиони онҳоро русиягиҳо ташкил медиҳанд.

Мирзиёев гуфт, ба хориҷ газ намефурӯшем. Чин гуфт, мефурӯшанд

Президенти Узбекистон Шавкат Мирзиёев рӯзи 22 сентябр дар мулоқот бо фаъолони вилояти Тошканд гуфт, содироти газу пахтаро қатъ кардаанд.

"Мо дар ҳоли ҳозир пахта ва газро ба хориҷ содир намекунем. Ҳатто газро аз хориҷа мехарем. Сабаб дар он аст, ки саноати мо тараққӣ мекунад. Ҳаҷми содироти мо бо вуҷуди фурӯхта нашудани ин ду маҳсулоти асосӣ ба хориҷ назар ба соли 2016 панҷ ё шаш баробар афзудааст, "- иқтибос овардааст хабаргузории "Kun.uz" аз суханони Мирзиёев.

Расонаҳо бо истинод ба гузориши Идораи гумруки Чин аз 20 июли имсол хабар дода буданд, ки Узбекистон дар шаш моҳи соли равон ба он кишвар ба маблағи 404 миллион доллар гази табиӣ фурӯхтааст. Ба гуфтаи мақомоти Чин, ин рақам назар ба ҳамин давраи соли гузашта 2,2 баробар бештар аст.

Зодагони Осиёи Марказиро ба артиши Русия ҷалб карданианд

Зодагони Осиёи Марказӣ, ки давоми 10 соли охир шаҳрвандии Русияро гирифтаанд, эҳтимол аст, дар доираи фармони сафарбаркунӣ ба артиш ба адои як соли хидмат дар сафи неруҳои мусаллаҳи он кишвар муваззаф шаванд.

Узви Шӯрои ҳуқуқи башари назди президенти Русия Кирилл Кабанов гуфт, дар ин бора аллакай пешниҳоде омода шудааст.

Ба гуфтаи Кабанов, муҳоҷирони Узбекистон, Тоҷикистон, Қирғизистон ва Қазоқистон, ки шаҳрвандии Русияро доранд, дар сурати саркашӣ аз хидмат шаҳрвандии онҳо ва аъзои хонаводаҳояшон бекор карда мешавад.

Мақомоти кишварҳои Осиёи Марказӣ ахиран дар пайи фармони президенти Русия Владимир Путин дар бораи сафарбаркунӣ аз шаҳрвандони худ даъват карданд, ки дар амалиёти ҷангӣ дар қаламрави кишварҳои хориҷӣ ширкат накунанд, чун ҷавобгарии ҷиноӣ дорад.

Тоҷикистон ба Кувайт маҳсулоти ҳалол мефиристад

Гӯҳаи маҳсулоти ҳалоли як супермаркети фаронсавӣ дар остонаи моҳи Рамазон.

Тоҷикистон интиқоли маҳсулоти ҳалол ба Кувайтро афзоиш медиҳад. Дар ин бора мақомоти ду кишвар дар доираи ҷаласаи севуми комиссияи муштараки байниҳукуматии Тоҷикистону Кувайт як санади ҳамкорӣ имзо кардаанд.

Ин ҳамоиш рӯзҳои 19-22 сентябр баргузор шуд ва дар он ду кишвар ҷалби сармоя ва технологияҳои пешрафтаи Кувайтро барои татбиқи лоиҳаҳои иқтисодӣ дар Тоҷикистон, аз ҷумла бунёди зербиноҳои нақлиётӣ, таъсиси корхонаҳои муштараки саноатӣ ва содироти меваи тозаву хушк ва оби ошомиданиро муҳим донистанд.

Мақомоти ду кишвар махсусан ба он таъкид карданд, ки бояд содироти ҳарчи бештари маҳсулоти дорои бренди «Ҳалол» аз Тоҷикистон ба Қувай ба роҳ монда шавад.

Мардони норозӣ аз ширкат дар ҷанги зидди Украина дар талоши фирор аз Русияанд

Сарҳади Русия бо Гурҷистон

Баъди эълони сафарбарии ҷузъӣ ба артиши Русия дар шабакаҳои иҷтимоӣ наворҳое пайдо шуд, ки дар он дида мешавад мардуми зиёд дар гузаргоҳи марзии ҷумҳурии Осетияи Шимолии Русия навбат истодаанд ва мехоҳанд ба Гурҷистон бираванд. Дар яке аз наворҳо, ки 22-уми сентябр зуҳур намуд, навбати садҳо мошини сабуркав ва боркаш дар посгоҳи Земо Ларсӣ ва Ларсии Болои Гурҷистон ба чашм мехӯрад. Ронандагон ва мусофиронашон талош доранд ба минтақаи ҷудоихоҳи Осетияи ҷанубии Гурҷистон убур кунанд. Фирори мардум аз Русия 21-уми сентябр баъди эълони Президенти Русия Валадимир Путин дар бораи сафарбарии нисбии низомиёни эҳтиётӣ ба таҷовузи Украина афзоиш ёфт.

Таҳдиди бекор кардани шаҳрвандии Русия ба зодагони ОМ дар сурати фирор аз артиш

Кирилл Кабанов дуюм аз чап

Як мақомдори рус пешниҳод кардааст, ки барои саркашӣ аз хизмат дар артиш ва ҷанги Украина муҳоҷирони соҳиби шиносномаи русиро аз шаҳрвандӣ маҳрум кунанд. Кирилл Кабанов, узви Шӯрои ҳуқуқи башари назди президенти Русия гуфтааст, муҳоҷироне, ки на камтар аз 10 сол боз шаҳрвандии Русияро доранд ва намехоҳанд дар амалиёти ҷангии ин кишвар ширкат кунанд, бояд бо аҳли оилаашон аз шаҳрвандӣ маҳрум карда шаванд.

Даъвати бекор кардани шаҳрвандии муҳоҷирон барои саркашӣ аз хизмат баъди он садо дод, ки мақомоти Тоҷикистону Қирғизистон ва Узбекистон ахиран ба шаҳрвандонашон дар Русия ҳушдод доданд, ки дар ҷангҳои хориҷӣ ширкат накунанд.

Мақомоти Русия ба муҳоҷирон ваъда доданд, ки дар ивази хидмат дар артиши Русия метавонанд ба таври осон соҳиби шиноснома шаванд. Аммо мақомоти кишварҳои Осиёи Марказӣ, аз ҷумла Тоҷикистон, шаҳрвандонашонро огоҳ карданд, ки ширкат дар амалиёти ҷангии кишвари дигар ҷиноят аст.

Референдуми сохтаи Русия дар минтақаҳои ишғолшудаи Украина

Минтақаҳое, ки он ҷо ба ном референдум барпо мешавад

Имрӯз дар чор минтақаи аз тарафи Русия ишғолшудаи Украина ба ном назархоҳӣ барои шомилшавӣ ба Русия доир мешавад. Мақомоти рӯ ба Маскави вилоятҳои Луҳанск, Донетск, Херсон ва Запорижя мехоҳанд ба воситаи як референдуми мухолиф ба қонунҳои байналмилалӣ ва оинномаи СММ ин устонҳоро ба Русия шомил кунанд. Президенти Украина Володимир Зеленский ин назархоҳиро "сохтакоронаву ғайридемократӣ номид. Кишварҳои ғарбӣ ҳам гуфтаанд, ки ин референдум ғайриқонунӣ аст. ​

Пешниҳоди додани силоҳ ба сокинони наздимарзии Қирғизистон

"Кохи сафед" дар шаҳри Бишкек

Вакили порлумони Қирғизистон Улан Бакасов лоиҳаи қонунеро пешниҳод кардааст, ки додани силоҳ ба сокинони минтақаҳои марзии ин кишварро пешбинӣ мекунад. Лоиҳа барои баррасии умум ироа шудааст.

Ба гуфтаи Бакасов, дар ҳоли ҳозир дар минтақаи Осиёи Марказӣ хатари терроризми байналмилалӣ, ифротгароӣ, ҷудоихоҳӣ вуҷуд дорад ва бинобар ин, Қирғизистон бояд ба сокинони аз 20-сола болои минтақаҳои марзии худ силоҳ тақсим кунад.

Ҳамчунин пешниҳод шудааст, шаҳрвандоне, ки силоҳ мегиранд, бояд аз омӯзиш ва имтиҳони истифодаи дурусти силоҳ гузаранд.

Як гуруҳ аз намояндагони мардумии қирғиз моҳи майи соли гузашта, баъди як низоъ дар марзи Қирғизистон бо Тоҷикистон низ ин пешниҳодро карда буданд.

Узбекистон хидматрасонӣ ба кортҳои русии "Мир"-ро қатъ кард

Хидматрасонӣ тавассути кортҳои низоми пардохтии "Мир"-и Русия дар Узбекистон аз 23-юми сентябр қатъ шудааст.

Дар ин бора Маркази ягонаи ҷумҳуриявии "Uzcard" хабар дода, гуфтааст, он "бо сабабҳои техникӣ" қатъ гашт.

Хабари бо мушкил рӯбарӯ шудани соҳибони кортҳои "Мир" дар Узбекистон чанд рӯз пеш дар шабакаҳои иҷтимоӣ нашр шуда буд. "Uzcard" 21-уми сентябр бо нашри изҳороте гуфта буд, ки қабули кортҳои "Мир"-ро идома медиҳад.

Қаблан Бонки "Halyk Bank"-и Қазоқистон ҳам қабули кортҳои "Мир"-ро қатъ карда буд ва чандин бонки туркӣ, аз ҷумла бузургтарин бонки хусусии Туркия - "Iş Bankası" эълом кард, ки ҳамкориро бо низоми пардохтии русии "Мир" қатъ кардааст.

Нархи билети Душанбе-Маскав ба 25 ҳазор сомонӣ расид

Яке аз нуқтаҳои билетфурӯшӣ дар Душанбе

Баъди фармони Владимир Путин дар бораи сафарбар кардани неруҳои эҳтиётӣ ба артиши Русия, нархи билет аз Маскав ба Душанбе даҳ баробар зиёд шудааст.

Субҳи 23-юми сентябр дар чанд нуқтаи билетфурӯшии Душанбе гуфтанд, барои рӯзҳои наздик аз Маскав ба Душанбе билети арзон надоранд. Дар яке аз нуқтаҳои билетфурӯшии Душанбе гуфтанд, нархи билети Маскав-Душанбе барои 25-уми сентябр 25 ҳазор сомонӣ (2,5 ҳазор доллар) аст.

Дар нуқтаи билетфурӯшии яке аз ширкати русӣ дар Душанбе нархи билет барои 24-уми сентябрро 17 ҳазор сомонӣ (1700 доллар) гуфтанд. Ин дар ҳолест, ки то рӯзи 20-уми сентябр нархи билет аз Маскав ба Душанбе 1800-3000 сомонӣ буд.

Ба навиштаи корбарони Фейсбук, асосан онҳое аз Русия ба Тоҷикистон рафтан мехоҳанд, ки солҳои пеш шаҳрвандии Русияро гирифтанд ва ҳоло метарсанд, ки онҳоро ба ҷанг мебаранд.

Баъзе аз муҳоҷирони тоҷик, ки шаҳрвандии Русияро доранду дар гузашта дар артиши он кишвар хидмат кардаанд, аллакай даъватнома гирифтаанд. Ба ҷуз аз Тоҷикистон, нархи билет аз Русия ба кишварҳое боло рафт, ки русиягиҳо бидуни виза метавонанд ба онҷо сафар кунанд.

Амриддин Аловатшоевро аз маҳбас ба боздоштгоҳ овардаанд

Аловатшоев баъди боздошт чанд маротиба дар телевизионҳои давлатӣ баромад кард

Амриддин Аловатшоев, як чеҳраи шинохта дар миёни ҷавонони Бадахшонро аз маҳбаси шаҳри Ваҳдат дубора ба Боздоштгоҳи муваққатии Душанбе овардаанд. Аловатшоев охири моҳи апрел ба 18 соли зиндон маҳкум ва барои адои ҷазо ба маҳбаси Ваҳдат интиқол шуда буд.

Як манбаи Радиои Озодӣ бидуни зикри номаш гуфт, мақомот Амриддин Аловатшоевро аввали ҳафта аз маҳбаси шаҳри Ваҳдат ба боздоштгоҳи муваққатии шаҳри Душанбе интиқол доданд. Пайвандони Аловатшоев, интиқоли ӯро аз маҳбас ба боздошгоҳи муваққатӣ тасдиқ карданд, аммо гуфтанд, сабабашро намедонанд.

Мақомот ҳам нагуфтанд, ки сабаби ба Боздоштгоҳи шаҳри Душанбе овардани Амриддин Аловатшоев чист. Вале як ҳамсуҳбати мо дар Боздоштгоҳи шаҳри Душанбе гуфт, Аловатшоевро барои шоҳидӣ додан дар мурофиаи Холбаш Холбашов аз маҳбас оварданд. Додгоҳи олии Тоҷикистон рӯзи 22 сентябр генерали Нерӯҳои марзбонӣ Холбаш Холбашовро ба зиндони якумрӣ маҳкум кард.

Амриддин Аловатшоевро охири моҳи апрел бар асоси панҷ банди Кодекси ҷиноӣ ба 18 соли зиндон маҳкум карданд. Наздиконаш он замон гуфтанд, ӯ худро бегуноҳ меҳисобад, вале шикоят бурдан ба зинаи болоиро бефоида донист. Дақиқ нест, ки аз шикоят даст кашидани ӯ тасмими ӯ мустақилона буд , ё зери фишор.

Амриддин Аловатшоеви 44-сола моҳи январи имсол дар Русия нопадид ва як моҳ баъд дар Тоҷикистон “пайдо” шуд. Додситони кулли Тоҷикистон моҳи феврал гуфт, ӯ истирдод шудааст, аммо вазири корҳои дохилӣ гуфт, бо хоҳиши худ баргашту дастгир шуд.

Додситонӣ хост, бародарзодаи президенти пешини Қазоқистон шаш сол зиндонӣ шавад

Додситонӣ талаб кард, ки Кайрат Сатибалдӣ, бародарзодаи президенти пешини Қазоқистон Нурсултон Назарбоев ба 6 сол зиндон маҳкум шуда, ҳамчунин молу мулкаш мусодира шавад.

Сатибалдӣ дар додгоҳ гуфт, ки аз мурофиа ҷонибдорӣ мекунад. "Муҳтарам судя, ҳар чизе, ки додситон гуфт, ҳар чизе, ки дар созиши мурофиа ҳаст, ман чизи дигаре ба он илова карданӣ нестам", - гуфт Сатибалдӣ.

Пештар аз ин Сатибалдӣ дар додгоҳ ғорати маблағҳои ширкати "Қазоқтелеком" ва "Маркази хадамоти нақлиёт"-и Қазоқистонро эътироф карда буд.

Бародарзодаи Назарбоев дар азхудсозии 12,7 миллиард тангаи "Қазоқтелеком" ва 28,6 миллиард тангаи "Маркази хадамоти нақлиёт" айбдор мешавад.

Сатибалдӣ дар додгоҳ ҳарфе назад, аз номи вай вакилони мудофеи ҷониби ҷабрдида гуфтанд, ки "Сатибалдӣ айбҳои эълоншударо эътироф кардааст".

Додгоҳи ноҳияи Байконури шаҳри Остонаи Қазоқистон баррасии парвандаи Кайрат Сатибалдиро 16 сентябр оғоз кард.

Бино ба хабари расонаҳои Қазоқистон, Сатибалдӣ ба “расонидани зарари молӣ бо роҳи фиреб ё сӯистифода аз боварӣ” ва “азхудкунӣ ё дуздидани моли мулки ғайр" айбдор мешавад.

Хадамоти мубориза зидди фасоди Қазоқистон 13 марти имсол Кайрат Сатибалдиро, ки ба гуфтаи мақомот, мехост, кишварро ба қасди Дубай тарк кунад, дастгир кард. Он замон гуфта мешуд, ки Сатибалдии 51-сола дар "сӯистифода аз мақом ва дуздии дороиҳои ширкати мухобиротии "Қазоқтелеком" дар ҳаҷми махсусан калон" айбдор мешавад.

Дар хадамот гуфта буданд, ки Кайрат Сатибалдӣ "ба халалдор кардани амнияти давлат" низ айбдор мешавад.

Қаблан расонаҳо Кайрат Сатибалдиро ягона муассиси ширкати оффшории "Skyline Investment Company S.A." номида буданд. Forbes Kazakhstan дороии Сатибалдиро 163 миллион доллар арзёбӣ ва ӯро ба рӯйхати бонуфузтарин соҳибкорони Қазоқистон ворид карда буд.

Ба сокинони Алмаато иҷозаи гирдиҳамоӣ надоданд

Ҳукумати шаҳри Алмаатои Қазоқистон ба сокинон иҷоза надод, ки зидди интихоботи пеш аз муҳлати президентӣ гирдиҳамоӣ ташкил кунанд. Фаъолони шаҳрвандӣ ва "Эътилофи неруҳои демократӣ" мехостанд, гирдиҳамоӣ кунанд.

"Мо аз ҳукуматҳои шаҳрҳои Алмаато ва Остона ҷавоби рад гирифтем. Ҳарчанд қонун пешбинӣ кардааст, ки дар сурати мавҷуд набудани имкони баргузории гирдиҳамоӣ дар макони дархостшаванда, мақомот бояд ҷойи дигарро пешниҳод кунанд", - гуфт Мухтор Тайжан, яке аз фаъолон.

Сокинон Алмаато нахуст мехостанд, рӯзи 17 сентябр гирдиҳамоӣ кунанд, аммо рӯзи 14 сентябр мақомот ба онҳо иҷозаи расмӣ надоданд.

Арайлим Назарова, яке аз дигар фаъолон гуфт, "тасмим доштанд, дар гирдиҳамоӣ талаб кунанд, ки интихоботи пеш аз муҳлат баргузор нашавад, як давраи 7-солаи президентӣ тасдиқ нагардад ва ҳамаи маҳбусони сиёсӣ озод карда шаванд".

Писари сухангӯи Кремл ва сарвазири Русия намехоҳанд, ба ҷанг раванд

Ютубканали "Популярная политика" рӯзи 21 сентябр дар пахши мустақим ба пайвандони, ба гуфтаашон, мансабдорони баландпояи Русия занг заданд.

Масъулони ин канад, худро намояндагони комисариатҳои ҳарбӣ муаррифӣ ва аз ҳамсуҳбатон хостанд, ки ба маконҳои ҷамъшавӣ дар доираи сафарбарии артиши Русия ҳозир шаванд.

Нафаре, ки ровиҳои канали ютубии "Популярная политика" Николай - писари Дмитрий Пескова, сухангӯи Кремл номиданд, аз ҳозир шудан ба комисариати низомӣ худдорӣ кард. "Агар шумо донед, ки ман муҳтарам Песков ҳастам, шумо бояд дарк кунед, ки ҳузури ман онҷо дуруст нест", - гуфт Николай ва ваъда кард, ки "масъалаи мазкурро дар сатҳи дигар ҳал мекунад".

Дмитрий Песков, сухангӯи Владимир Путин, президенти Русия, дар суҳбат бо хабарнигорон рад накард, ки Николай - писари вай бо ровиҳои "Популярная политика" гуфтугӯ кардааст.

Муштарии дигар Алексей Мишустин, ки худро писари сарвазири Русия Михаил Мишустин унвон кард, дар суҳбат бо канали "Популярная политика" гуфт, ба артиш сафарбар нахоҳад шуду. Зеро вай дар Мактаби олии иқтисодӣ таҳсил мекунад ва ҳам илова кард, ки хоҳиши ҷанг кардан надорад.

Фармони президенти Русия дар бораи қисман сафарбар кардан ба артиш, 21 сентябр содир шуд. Вазири мудофиаи Русия Сергей Шойгу хабар дод, ки 300 ҳазор сарбози захиравиро ба хидмати ҳарбӣ ҷалб мекунанд.

Радду бадали зиддиҳам миёни вазоратҳои умури хориҷии Тоҷикистон ва Қирғизистон

Осори даргирии 16-уми сентябр, Овчӣ-Қалъача, ноҳияи Бобоҷон Ғафуров

Вазорати корҳои хориҷии Қирғизистон ба изҳороти Вазорати умури хориҷии Тоҷикистон, ки рӯзи 22-юми сентябр дар бораи таъқиби тоҷикон дар он кишвар нашру паҳн шуд, вокуниш кард.

Мақомоти Қирғизистон гуфтаанд, нисбати тоҷикон ҳеч фишоре нест ва бо эътирози қатъӣ Тоҷикистонро ба дубора халалдор кардани сулҳи, ба гуфтаашон, шикананда айбдор кардаанд.

Ин дар ҳолест, ки Вазорати умури хориҷии Тоҷикистон гуфтааст, аз таъқибу фишор ва зӯргӯйӣ ба тоҷиктаборон ва шаҳрвандони Тоҷикистон дар Қирғизистон бисёр нигарон аст.

Дар баёнияи расмии вазорат аз 22-юми сентябр гуфтаанд, ҷониби Қирғизистон қасд дорад, бештар аз 500 донишҷӯйи тоҷикро аз донишгоҳҳои вилояти Уш биронад.

Вазорат мегӯяд, пеша кардани таъқиби шаҳрвандони Тоҷикистон ва тоҷиктаборон натиҷаи "маъракаи фарогири душмантарошӣ аст" ва мақомоти Қирғизистон бояд ба ин табъиз хотима бахшанд ва бар асоси қонунҳои байнулмилалӣ амнияти дипломатҳои Тоҷикистонро таъмин намоянд.

Идораи умури хориҷии Қирғизистон ин иддаоро рад карда ва гуфтааст, Қирғизистон ба чунин аъмол роҳ нахоҳад дод.

Тарафи Тоҷикистон гуфтааст, шоми 18-уми сентябр як фарди ношинос саъй кардааст, дари қароргоҳи сафири Тоҷикистонро дар Қирғизистон бишканад ва доду фарёд карда, дар ҳаққи Тоҷикистон носазо гуфтааст.

Вазорати умури хориҷии Қирғизистон мегӯяд, Бишкек уҳдадориҳои худро барои ҳифзи сафорати Тоҷикистон ба таври пурра иҷро мекунад. "Аз намояндагии дипломатии Тоҷикистон дар мавриди нигаронӣ аз амнияти кормандон ва ё хонаводаҳои онҳо муроҷиате нашудааст," – омадааст дар изҳороти ВКХ-и Қирғизистон. Вазорат, баръакс, аз афзоиши фишор ба қирғизҳо дар Тоҷикистон нигаронӣ намудааст. Тоҷикистон ҳанӯз ба ин иддао вокуниш накарда.

Дар ин байн Вазорати умури хориҷии Қирғизистон мегӯяд, факти латукӯби хабарнигоре ба номи "Насибахон Давронбекова", ки ВКХ-и Тоҷикистон ӯро "хабарнигори тоҷиктабори Радиои Озодӣ" номидааст, тасдиқ нашуд. Радиои Аврупои Озод/Радиои Озодӣ низ вуҷуди хабарнигорашро ба ин ном дар вилояти Уш ё ҳар ҷойи дигар рад кард. Ин нукта баъдан аз изҳороти вазорат бардошта шуд.

Рӯзи 17-уми сентябр дар Уши Қирғизистон хабарнигори бахши узбекии радиои "Садои Амрико" Даврон Насибхонов аз сӯи афроди ношинос латукӯб шуда буд. Ӯ низ дар шабакаҳои иҷтимоӣ аз изҳороти ВКХ Тоҷикистон эътироз намудааст.

Идораҳои умури хориҷии ду кишвар изҳор доштаанд, ки ҳадафашон таҳкими риояти созишномаҳоест, ки ба даргириҳо дар марз хотима бахшиданд.

Муноқишаи хунин дар марзи Тоҷикистону Қирғизистон аз 14 то 17-уми сентябри имсол идома кард ва аз ду тараф бештар аз 100 кушта барҷой гузошт.

Баъди он мақомоти ду кишвар ба радду бадал ва корбарони шабакаҳои иҷтимоӣ ба шиорпартоиҳои миллатгароёна ва носазогӯӣ ва дашному таҳқир дар ҳаққи якдигар шуруъ карданд. Ҳамзамон қисми зиёди корбарони ду тараф аз посдории оташбас миёни неруҳои ду кишвар дар марз ҳимоят мекунанд.

Пешбарии номзадҳо ба интихоботи президентии Қазоқистон аз 23 сентябр оғоз мешавад

Муовини раиси Комиссияи марказии интихоботии Қазоқистон Константин Петров рӯзи панҷшанбе дар як ҷаласа гуфт, пешбарии номзадҳо ба интихоботи пеш аз муҳлати президентӣ дар ин кишвар аз 23 сентябр оғоз мешавад.

Ба гуфтаи масъулони комиссия, то 1 июли имсол дар Қазоқистон 11 миллиону 827 ҳазору 277 шахси қобили раъй ба қайд гирифта шудааст. "Ба ҷонибдории ҳар як номзад бояд 118 ҳазору 273 имзои воқеӣ ҷамъоварӣ шавад", - изҳор дошт Петров.

Ба гуфтаи ӯ, пешбарии номзадҳо ба мақоми президентии Қазоқистон дар интихоботи пеш аз муҳлат то соати 18:00-и 21 октябри имсол идома меёбад. Маъракаҳои пешазинтихоботӣ дар Қазоқистон аз 21 октябр оғоз шуда, 19 ноябр рӯзи хомӯшӣ хоҳад буд.

Қаблан президенти Қазоқистон Қосимҷомарт Тоқаев бо имзои фармоне санаи интихоботи пеш аз муҳлати президентиро эълом кард. Он 20 ноябри имсол баргузор хоҳад шуд.

Порлумони Қазоқистон 16 сентябр тағйирот ба Конститутсияи он кишварро қабул кард. Вакилон баргардонии номи пойтахти он кишварро ба Остона ва маҳдудсозии муҳлати президентиро ба як давраи 7-сола ҷонибдорӣ карданд.

Ҳушдори Узбекистону Қирғизистон ба муҳоҷирон дар Русия

Акс аз бойгонӣ

Мақомоти Узбекистон ва Қирғизистон муҳоҷиронашонро огоҳ кардаанд, ки барои иштирок дар амалиёти низомии Русия муҷозот хоҳанд шуд.

Дар пайи эълони ваъдаи пешниҳоди шаҳрвандӣ ба муҳоҷирон бар ивази қарордод бо артиши Русия, Додситонии кулли Узбекистон аз шаҳрвандон хост, ба сафи нерӯҳои мусаллаҳи кишвари дигар ворид нашаванд.

Додситонӣ таъкид кардааст, ки ин амал тибқи қонун ҷиноят аст ва барои он аз панҷ то 10 сол зиндон пешбинӣ мешавад.

Сафорати Қирғизистон дар Русия ҳам пас аз эълони осон шудани додани шаҳрвандӣ бар ивази хидмат дар Русия ба муҳоҷиронаш аз пайомадҳои ширкат дар ҷанг ва амалиёти низомии кишвари бегона ёдрас шуд.

Ба шаҳрвандони Қирғизистон барои ин амал то 10 сол зиндон таҳдид мекардааст.

Ёфтҳои бештар

XS
SM
MD
LG