Котиби давлатии Иёлоти Муттаҳида, Ҳилларӣ Клинтон, дар конфаронси байнулмилалии масъалаҳои Афғонистон дар шаҳри Гаагаи Нидерланд ба хабарнигорон гуфт, мулоқоте миёни намояндагони Амрико ва Эрон дар канори ин ҳамоиш ба миён омадааст. Ба гузориши хабарнигори радиои Озодӣ, намояндаи Амрико дар умури Афғонистон ва Покистон, Ричард Ҳолбрук дар ҳошияи конфаронси Гаага, як мулоқоти кӯтоҳ ва ғайрирасмӣ бо ноиби вазири умури хориҷии Эрон, Муҳаммадмаҳдӣ Охунзода дошт, ки дар он тасмим гирифта шуд, тамосҳои ду ҷониб идома пайдо кунанд ва бештар шаванд. Гуфта мешавад, ин мулоқот ғайрирасмӣ буд ва бидуни тарҳрезии пешакӣ ба вуқӯъ пайваст. Наздик ба 700 намоянда аз 80 давлат дар ин ҳамоиш ширкат доранд.
