Пайвандҳои дастрасӣ

Хабари нав

Хабарҳо

Истиқболи Бародай аз имкони гуфтугӯи мустақим

Муҳаммад Бародай, раҳбари Ожонси байналмилалии назорати нирӯи ҳастаӣ, аз имкони гуфтугӯи мустақим миёни Амрикову Эрон бар сари барномаҳои баҳсбарангези ҳастаии Теҳрон истиқбол кард. Раҳбари ин муассисаи вобаста ба СММ дар мусоҳиба бо рӯзномаи амрикоии “Вошингтон Пост” гуфт, ин ду ҷониб дар амри роҳандозии музокироти мустақим ва бидуни қайду шарти пешакӣ “ комилан дер кардаанд.” Раисиҷумҳури Амрико Барак Обама пиромуни имкони гуфтугӯ бо Эрон аломат додааст. Обама ҳафтае пеш дар мусоҳибааш гуфт, ки агар раҳбарони Эрон мушти гиреҳкардаи худро кушоянд, Амрико ба сӯи Эрон дасти дипломатияашро дароз мекунад.

Ҳамаи хабарҳои имрӯзро дар инҷо бихонед

Ҷоизаи Дилноза Муҳиддинова ва Афсона Акобиршоева барои мавқеи фаъоли шаҳрвандӣ

Афсона Акобиршоева

Бюрои ҳуқуқи башар ва риояи қонун дар Тоҷикистон фаъоли ҷамъиятӣ Дилноза Муҳиддиноваро бо дипломи “Беҳтарин ҳомии ҳуқуқ” қадрдонӣ кард. Аъзои ҳакамон талошҳои ӯро барои роҳ надодан ба болоравии нархи Интернет дар баҳори соли 2018 ситоиш карданд.

Дилноза Муҳиддинова дар маъракаи ҷамъоварии имзо ба зидди тасмими боло бурдани нархи Интернет иштирок кард. Дар ду рӯз ба ин мактуб беш аз 600 нафар имзо гузоштанд. То ин ки мактуб ба дастгоҳи президент расад, раиси ҷумҳур қарори боло бурдани қимати Интернетро муваққатан боздошт. Вале баъди он Дилноза Муҳиддинова зери маъракаи созмонёфтаи фишору таҳқир қарор гирифт.

Ин ҷоиза рӯзи 9-уми декабр супурда шуд.

Бюрои ҳуқуқи башар ва риояи қонунҳо аз соли 2009 боз бо пуштибонии молии сафорати Амрико дар Душанбе ҳар сол ҷоизаи “Беҳтарин мудофеи ҳуқуқи башари сол”-ро ба донишмандон, чеҳраҳои сиёсию иҷтимоӣ, рӯзноманигорон, намояндагони созмонҳои дифоъ аз ҳуқуқи башар дар кишвар тақдим мекунад.

Ба гуфтаи Наргис Зокирова, раиси ин созмон, ҳадаф аз эътои ҷоиза қадрдонӣ аз кори душвори мудофеони ҳуқуқи башар ва созмонҳои ҳомии ҳуқуқи инсон ба шумор меравад.

Афсона Акобиршоева, хабарнигори Радиои Озодӣ дар Душанбе барои “Мавқеи фаъоли шаҳрвандӣ дар журналистика” соҳиби диплом шуд.

Акобиршоева аз нахустин духтароне буд, ки барои озори лафзӣ дар хиёбонҳои Душанбе ба пулис шикоят бурд ва аз ин роҳ таваҷҷуҳи ҷомеаро ба ин мушкил дар Тоҷикистон ҷалб кард.

Дар солҳои қаблӣ, созмони дифоъ аз ҳуқуқи башари “Ампаро”, Ҷамъияти ҳуқуқшиносҳои Помир, созмони “Ҳуқуқ ва шукуфоӣ”, хабарнигорон Рамзия Мирзобекова, Анора Саркорова, ҳуқуқдонҳо Шӯҳрат Қудратов ва Ойниҳол Бобоназарова ҷоизаи Бюрои ҳуқуқи башари Тоҷикистонро дарёфт кардаанд.

Путин ва Зеленский дар Париж мулоқот мекунанд

Президентҳои Украина ва Русия рӯзи 9-уми декабр дар Париж барои гуфтугӯи деринтизор оид ба ҳалли муноқишаи низомӣ дар шарқи Украина вомехӯранд, ки дар он аз соли 2014 ба ин тараф зиёда аз 13 ҳазор нафар кушта шудаанд.

Гуфтугӯи миёни президенти Украина Владимир Зеленский ва ҳамтои русаш Владимир Путин аз ҷониби президенти Фаронса Эммануэл Макрон ва садри аъзами Олмон Ангела Меркел дар форуми ба ном "Нормандия" кумак мекунад.

Бори аввал аст, ки сарони Украина ва Русия аз соли 2016 ба ин тараф вомехӯранд ва ин нахустин нишаст миёни Путину Зеленский аст, ки моҳи апрел интихоб шуда буд.

Маскав дахолати рӯиростро дар муноқишаҳои миёни гурӯҳҳои ҷудоихоҳ дар шарқи Украина ва ҳукумати Киев рад мекунад, ҳарчанд Русия ба ҷудоихоҳон дастгирии низомӣ, иқтисодӣ ва сиёсӣ мерасонад ва далелҳои ҷиддии иштироки низомии Русия низ ҳастанд.

Додгоҳи Байналмилалии Ҷиноятӣ моҳи ноябри соли 2016 қарор қабул кард, ки ҷанг дар шарқи Украина "як ҷанги мусаллаҳонаи байналмилалӣ миёни Украина ва Федератсияи Русия аст”. Кремл мехоҳад, то ба қадри имкон нуфузашро ба Киев нигоҳ дорад ва замини ҷудоиталабонро, ки дар Донбасс пуштибонӣ мекунанд, ҳамчун фишанг истифода барад.

Марги як нафар дар Кӯлоб бар асари заҳролудшавӣ

Дар шаҳри Кӯлоб бар асари заҳролудшавӣ аз сабзавоти консервашуда як нафар ҷон бохта, шаш каси дигар дар беморхона бистарӣ шудаанд.

Абдукарим Шокиров, пизишки бемористони Кӯлоб, 9-уми декабр ба Радиои Озодӣ гуфт, ҳодиса як рӯз пеш иттифоқ афтод. "Назрулло Мардонов ва шаш каси дигарро дар ҳолати вазнин ба бемористон оварданд. Баъди ташхсис маълум шуд, ки онҳо аз сабзавоти консервашуда заҳролуд шудаанд. Назрулло Мардонов даргузашт, боқимондаҳо табобат мегиранд," -- афзуд ӯ.

Инҳо сокинони Чармгарони Поёни шаҳри Кӯлоб буда, дар корхонаи хиштпазӣ кор мекарданд.

Аввали моҳи октябри имсол бар асари заҳролудшавӣ аз як гиёҳи заҳрогин дар яке аз пахтазорҳои ҷамоати Гулшани ноҳияи Фархор, Азизулло Сафарови шашсола ва Сумайя Сафароваи ҳаштсола ҷон бохта, се тани дигар бистарӣ шуда буданд.

Пеш аз ин дар моҳи август ду узви як хонавода дар Кӯлоб бар асари заҳролудшавӣ ҷон бохта, ду тани дигар дар бемористон бистарӣ шуданд.

Ҷасади табибе, ки “ҷонашро барои Афғонистон қурбон кард”, ба Токио расид

Ҷасади Накамура дар фурудгоҳи Токио. Ҳамсар ва дигар наздикони табиби кушташуда ба пешвози ҷасад омадаанд

Ҷасади табиби 73-сола Тетсу Накамура, як табиби ҷопонӣ, ки давоми даҳсолаҳо дар шарқи Афғонистон кору зиндагӣ мекард, барои хоксупорӣ ба ватанаш Ҷопон оварда шуд. Накамура рӯзи 4 декабр ҳамроҳ бо панҷ муҳофизи афғон ва дигар ҳамкоронаш аз тири туфанг кушта шуд. Мақомоти ҳукумати Ҷопон баробари ба Токио расидани ҷасад барои арзи эҳтиром ба ҳамсар ва фарзандони табиб дар фурудгоҳ маросими ёдбуд барпо карданд. Накамура раҳбарии созмони ҷамъиятии “Хамоти тибби Ҷопон барои сулҳ”-ро ба ӯҳда дошт ва моҳи апрел бо қарори президенти Афғонистон Ашраф Ғанӣ бо мақоми шаҳрванди ифтихорӣ мукофотонида шуд.

Ҳеҷ гурӯҳ ё нафаре масъулияти куштор дар шаҳри Ҷалолободи вилояти Нангарҳорро ба ӯҳда нагирифтааст. Накамура соли 2003 бо ҷоизаи “Рамон Магсайсей” қадрдонӣ шудааст, ки онро ҷоизаи Нобели осиёӣ ҳам меноманд.

Сухангӯи президенти Афғонистон куштори мардеро, ки ба гуфтааш, “зиндагии худро барои тағйир додани зиндагии мардуми афғон бахшид ва дар самти мудирияти об, сарбандҳо ва беҳбуди анъанаҳои кишоварзӣ дар Афғонистон кор кард”, бисёр “нафратовар” хонд.


ИМА ва Толибон азсаргирии музокираҳоро тасдиқ карданд

Мулло Абдулғанӣ Бародар - аз чап сеюм - раҳбарии музокираҳо дар Қатарро ба дӯш дорад. Акс аз моҳи маи соли 2019, Русия

Гузоришҳо ҳокист, ки нахустин бор баъди бо қарори президенти ИМА Доналд Трамп ногаҳон қатъ шудани музокираҳо бо Толибон, ки шароити хатми ҷанги 19-сола дар Афғонистонро мавриди баррасӣ қарор додаанд, ҳам ИМА ва ҳам Толибон расман дар бораи азсаргирии ин гуфтугӯҳо хабар доданд. Ин гузоришҳо ҳокист, ки фиристодаи ИМА Залмай Халилзод рӯзи 7 декабр дар макони қаблӣ дар Қатар бо мақомоти Толибон мулоқот карда, инчунин рӯзи 8 декабр ҳам ин гуфтугӯҳоро идома додааст. Азсаргирии ногаҳонии музокираҳо баъди он имконпазир шуд, ки рӯзи 28 ноябр президенти ИМА Доналд Трамп бо як сафари ғайримунтазира ҷашни амрикоии шукргузориро дар Афғонистон ва дар ҳайати низомиёни кишвараш таҷлил кард. Ӯ дар ин сафар изҳори умедворӣ кард, ки “Толибон мехоҳанд созиш кунанд ва мо ҳам бо онҳо мулоқот мекунем”. Вале то рӯзи 7 декабр ҳеҷ як аз ҷонибҳо азсаргирии гуфтугӯҳоро расман тасдиқ накарданд.

Дар изҳороти ИМА гуфта мешавад, ки дар мулоқотҳои нав Толибон бояд ваъда супуранд, ки хушунатҳо хотима меёбанд, вале ҳадафи азими дарозмуддат хатми ҳамешагии ҷанг мебошад. Гуфта шуд, ки раҳбари бахши сиёсии Толибон Мулло Абдулғанӣ Бародар раҳбарии музокиротро ба ӯҳда мегирад. Толибон, ки нисфи Афғонистонро назорат мекунанд, аз барпо кардани гуфтугӯҳо бо ҳукумати Афғонистон худдорӣ кардаанд. Ин гурӯҳи ифротӣ ҳукумати марказӣ дар Кобулро “як лӯхтаки Амрико” номидааст. Халилзод, ки бар асоси бархе хабарҳо ҳафтаи гузашта дар Кобул бо президенти Афғонистон Ашраф Ғанӣ дидору гуфтугӯ карда буд, мехоҳад Толибонро водор кунад, ки барои ширкат дар музокироти сиёсӣ намояндагони ҳукумати Афғонистон ҳам роҳ дода шаванд.

Санна Марин сарвазири ҷавонтарин дар ҷаҳон хоҳад шуд

Санна Марин

Санна Марини 34-сола аз Финландия сарвазири ҷавонтарин дар ҷаҳон хоҳад шуд. Номзадии ӯро ҳизби пештози эътилофи раҳбарикунандаи сотсиал-демократи Финландия тасдиқ кардааст.

Ин зани ҷавон ҳамчунин раҳбари ҷавонтарини ҳукумат дар таърихи Финландия хоҳад буд. Қаблан Марин дар мақоми вазири нақлиёти Финландия кор кардааст.

Ӯ аз Алексей Гончарук, сарвазири Украина ва раҳбари Куриёи Шимолӣ Ким Чин Ун ҳам ҷавонтар аст.

Ҳафтаи гузашта Антти Ринне бо сабаби ихтилофҳо дар ҳукумати Финландия, ки дар масъалаи коршикании кормандони почта пеш омад, аз мақоми нахуствазири ин кишвар истеъфо дод.

Эътилофи чапгарои ҳокими Финландия пас аз интихоботи баҳори имсол ташкил шудааст, ки панҷ ҳизбро дар бар мегирад. Раҳбарони ҳамаи ҳизбҳо занон ҳастанд. Дар зимн раҳбари ҳизби чапгароҳо ва ҳизби марказӣ 32-сола ва аз Санна Марин хурдтар аст.

Вулқон дар Ҷазираи шимолии Зеландияи Нав 5 нафарро кушт

Ба гуфтаи мақомоти пулис, дар натиҷаи таркиши вулқон дар Ҷазираи шимолии Зеландияи Нав ба камияш 5 кас кушта ва 20 каси дигар захмӣ шуданд. Шумори бедаракшудагон беш аз даҳ нафар будааст.

Мақомот мегӯянд, 23 нафар аз мавзеи White Island (Ҷазираи сафед) наҷот дода шуданд. Ба гуфтаи онҳо, дар атроф ҳудуди 100 нафар қарор доштанд.

Дар изҳороти пулис гуфта мешавад, ҳадди ақал яке аз нафароне, ки ба соҳил оварда шуд, сахт захмӣ аст. Пулис меафзояд, дар минтақа ҳама гуна паровзҳо манъ карда шуд.

Вулқони White Island (Ҷазираи сафед) дар Зеландияи нав аз ҳама фаъол аст.

White Island дар 50-километрии соҳилҳои шарқии Ҷазираи шимолӣ ҷойгир аст ва забонаҳои бузурги вулқон аз қора (материк) дида мешаванд.

Йасинда Ардерн, сарвазири Зеландияи Нав дар нишасти хабарӣ гуфт, "медонем, ки дар замони рух додани ҳодиса дар ҷазира ва атрофи он сайёҳон – ҳам сокинони Зеландияи Нав ва ҳам меҳмонон аз хориҷа ҳузур доштанд."

"Онҳое, ки наздикони дӯстдоштаашон он замон дар ҷазира буданд, ғаму андуҳи зиёде доранд. Итминон медиҳам, ки пулис ҳар кори имконпазирро барои наҷоти онҳо анҷом медиҳад," -- афзуд ӯ.

Русия барои чор сол аз ширкат дар Олимпиада ва бозиҳои ҷаҳонии варзишӣ маҳрум шуд

Бинои “Русада”

WADA ё Оҷонсии ҷаҳонии зиддидопингӣ дар ҷаласаи рӯзи 9 декабри худ қарор кард, ки Русия ба мӯҳлати чор сол аз ширкат дар бозиҳои олимпӣ ва ҳам мусобиқаҳои ҷаҳонии варзишӣ маҳрум мешавад. Ҳанӯз вокуниши Русия ба ин тасмим маълум нест.

Моҳи гузашта аъзои ин оҷонсӣ пешниҳод карданд, ки Русия барои чор соли дигар аз ҳақи ширкат дар мусобиқаҳои ҷаҳонии варзишӣ, аз ҷумла, олимпиадаи соли 2020-и Токио маҳрум шавад. Мутахассисони WADA гуфтанд, ки дар иттилои аз ҷониби озмоишгоҳ ба унвонии оҷонсӣ пешниҳодшуда бархе “номувофиқатҳо” ошкор шуд. Русия соли 2014 дар робита бо моҷарои азими допингӣ бадном шуд ва як таҳқиқоти байналмилалӣ собит кард, ки дар сатҳи давлати Русия сиёсати истеъмоли допинг аз ҷониби варзишгарон ба хотири таъмини кишвар бо медалҳои олипмӣ ба роҳ монда шудааст. Сентябри соли 2018 WADA таҳрими сесолаи оҷонсии зиддидопингии “Русада”-ро шартан бекор кард ва гуфт, ки Русия бояд ин оҷонсиро бо намунаҳои солҳои 2012 то 2015-ум таъмин кунад. Вале Кумитаи мутобиқат ба бозбиниҳои шикоятҳои WADA рӯзи 25 ноябр дар бораи аз ҷониби як озмоишгоҳи Маскав дар моҳи январ сохтакорӣ шудани бархе маълумот хабар дод ва пешниҳод кард, ки “Русада” ба мӯҳлати чор соли дигар таҳрим шавад ва худи кишвар аз ҳақи ширкат дар мусобиҳақои варзишии азим маҳрум шавад.

Зоиров аз Раҳмон хост, гаравпулии интихоботро бекор кунад

Раҳматилло Зоиров

Раҳматилло Зоиров, раиси Ҳизби сотсиал-демократ ва мушовири пешини раиси ҷумҳури Тоҷикистон, аз президент Эмомалӣ Раҳмон хостааст, ки гаравпулии номзадҳоро барои интихоботи порлумонӣ бекор кунад.

Гаравпулӣ барои ҳар номзад 5 ҳазору 800 сомонӣ (баробар ба тақрибан 600 доллар) муқаррар шудааст.

Зоиров рӯзи 9-уми декабр дар изҳороте гуфт, "барои 10 номзади ҳизб 58 ҳазор сомонӣ ва барои 22 нафар беш аз 127 ҳазор сомонӣ зарур аст. Ин ғорат дар рӯзи равшан аст."

Гаравпулӣ як шарти асосии иштирок дар интихобот аст. Ҳар касе пирӯз шуд, маблағашро пас мегирад, вале афроди ноком пули худро аз даст медиҳанд.

Намояндагони мақомот мегӯянд, гаравпулӣ дар гузашта ба 200 нишондиҳанда, яъне ба ҳисоби ҳозира ба 11 ҳазору 600 сомонӣ баробар буд ва соли 2014 онро ба сад нишондиҳанда поин оварданд.

Дар гузашта баъзе аз афроди алоҳида низ гаравпулии номзадҳоро гарон хонда ва ба бекор кардани он даъват намуда буданд. Қувваталӣ Муродов, як намояндаи пешини "Фронти Халқӣ", ки аз эҳтимоли иштирокаш дар интихоботи президентӣ хабар дода буд, соли 2018 барои аз байн бурдани ҳамагуна гаравпулӣ дар интихобот даъват кард.

Раҳматилло Зоиров мегӯяд, "ҳамин тавр, пуле, ки бо меҳнати сангин ба даст овардем, ба "фоида”-и буҷаи давлатӣ мубаддал мегардад. Яъне, ин як роҳи даромад гирифтани давлат аз ҳисоби одамонест, ки ба ҳукумат номақбул мебошанд. Гарави интихоботиро фавран бекор кунед, ончунон ки 10 сол пеш Русия бекор карда буд."

Ба қавли Зоиров, онҳо дар 10 соли ахир беш аз понздаҳ бор масъалаи бекор кардани ҳама гуна гарави интихоботиро дар миён гузоштанд, вале бенатиҷа.

"Дар Президиуми Шӯрои сиёсии ҲСДТ суолҳо дар бораи вазъи кишвар, аз ҷумла, масъалаи гарави интихобот муҳокима шуд. Ба хулосае омадем, ки ҳукумат, аз ҷумла порлумон, ба маънои пурра одамони бовиҷдон ва боэътимодро таҳқир карда, ба манфиати онҳо туф мекунанд, заминаҳоро фароҳам мекунанд, ки интихобот таҳрим гардад... Бо қаҳру ғазаби мардум бозӣ накунед", -- афзудааст ӯ.

То ба ҳол мақомот ба дархост ва изҳороти Раҳматилло Зоиров ҳанӯз вокуниш накардаанд.

Шоҳиди ҳодисае шудед, ё аксе видеое доред, лутфан, ба ин шумораҳо ва ба воситаи Вотсап, Вайбер, Телеграм ва ё ИМО бифристед: (+420) 607 900 808; (+420) 724 056 681; (+420) 724 053 959; (+992) 980 15 10 10

Пайдо шудани ҷасади марди 41-сола дар Кӯли ҷавонони Душанбе

Мақомоти Кумитаи ҳолатҳои фавқулодаи Тоҷикистон гуфтанд, рӯзи 8-уми декабр аз дохили “Кӯли ҷавонон” дар Душанбе ҷасади марди 41-соларо пайдо кардаанд. Умеда Юсуфӣ, сухангӯи Кумитаи ҳолатҳои фавқулода, гуфт, ин мард 17-уми ноябр дар пайи баҳси оилавӣ аз хона баромада, “бедарак шуда буд”.

“Ҷасади ӯро рӯзи якшанбе аз об берун оварданд ва таҳқиқ идома дорад,” – афзуд ӯ. Вале ҳоли ҳозир аз марди ҳалокшуда ном бурда намешавад.

Мақомот мегӯянд, марди ҳалокшуда сокини ноҳияи Синои пойтахт буда, соҳиби ду маълумоти олӣ: тиббӣ ва ҳуқуқшиносӣ будааст. “Аз марҳум ду фарзанди ноболиғ мондааст,” -- гуфтанд мақомот.

Мирзиёев бархе аз "тундгароён"-ро афв кард

Шавкат Мирзиёев, президенти Узбекистон дар робита ба таҷлили 27-солагии қабули Қонуни асосии он кишвар қонуни авф қабул кард.

Дар асоси ин қонун 92 шаҳрванди он кишвар, аз ҷумла 79 касе, ки бо айбҳои марбут ба иштирок дар фаъолияти гуруҳҳои мамнуъ зиндонӣ шуда буданд, авф мешаванд.

Аз маҷмуи авфшудаҳо 20 тан комилан озод ва 37 тани дигар шартан пеш аз муҳлат аз зиндон мебароянд. Ҳукми 16 тани дигар сабук мешавад.

Ба илова, муҳлати ҷазои 19 каси дигар кам мешавад. Миёни авфшудаҳо 3 марди аз 60-сола боло ҳаст.

Вазоратҳо ва муассисаҳои масъул вазифадор шудаанд, ки барои ба хона бар гаштани авфшудаҳо ва бо ҷомеа мутобиқ гардидани онҳо мусоидат кунанд.

Додситон хост, ду шаҳрдори пешини Бишкек аз 15 то 20 сол зиндонӣ шаванд

Дар Додгоҳи ноҳияи Ленини шаҳри Бишкек баррасии парвандае идома дорад, ки дар доираи он 13 нафар, аз ҷумла ду шаҳрдори пешини пойтахти Қирғизистон Кубаничбек Қулматов ва Албек Ибраимов ба ҳайси гумонбар иштирок доранд.

Айбдоркунандаи давлатӣ 9 декабр дар мурофиа хост, Кубаничбек Қулматов 15 сол ва Албек Ибраимов 20 сол зиндонӣ шаванд. Кубаничбек Қулматов дар фасодкорӣ ҳангоми сохтани мактабе айбдор мешавад.

Албек Ибраимов якбора дар доираи чанд парванда айбдор мешавад - фурӯши истироҳатгоҳи "Соҳили офтобӣ" бо арзиши ниҳоят паст, харидории "ТНК Дастан"-и маснуоти заргарӣ бо баҳои гарон, фасодкорӣ ҳангоми ҷудо кардани қитъаи замин. Ба ҷуз ин, номи вай дар парвандаи Кубаничбек Қулматов зикр мешавад.

Вакилони мудофеи ду шаҳрдори пешин борҳо аз додгоҳ хостанд, ки парвандаҳои афроди зери ҳимояашон дар алоҳидагӣ баррасӣ шаванд. Аммо додгоҳ ин дархостҳоро рад кард. Қулматов ва Ибраимов айбҳои эъломшударо рад мекунанд ва вакилони мудофеашон аз поймолшавии қонун хабар дода буданд.

Худдорӣ аз намоиши филм дар бораи собиқ додситони кулли Узбекистон

Президенти Узбекистон Шавкат Мирзиёев 19 майи соли 2018 дар як ҷаласа додситони кулли пешини ин кишвар Рашид Қодировро пеш аз содир шудани қарори додгоҳ "дузди воқеӣ" номида, гуфт, дар давоми ду се моҳи оянда ба воситаи телевизион тавба хоҳад кард.

Бо вуҷуди 1,5 сол гузаштан аз ин "ваъда"-и президенти Узбекистон филм дар бораи додситони кулли пешини ин кишвар ҳанӯз ҳам намоиш дода нашудааст.

Ба гуфтаи як ҳамсуҳбати мо, ки филми 70-дақиқагӣ дар бораи додситони кулли пешинро тамошо кардааст, "Гирдоб" ном дорад ва Қодирову мансабдорони дигари зиндонии узбек дар он ба даст доштани худ дар ҷинояткорӣ эътироф мекунанд.

"Сенарияи филмро Комилҷон Шамсиддинов навиштааст. Ӯ бо Қодиров ва мансабдорони дигари зиндонӣ суҳбат кардааст. Наворбардории ин филм тақрибан як сол дар маконҳои гуногун, таҳхонаи Вазорати умури дохилӣ, кумитаи тафтишотӣ ва маҳбаси Зангиота идома кард. Дар филм дар баробари маҳкумшудаҳо соҳибкорон низ баромад мекунанд, ки чи гуна тиҷорати онҳо ғасб шудааст",-афзуд ӯ.

Дар охири филми "Гирдоб" Қодиров ва ҳаммаслаконаш тавба карда, аз президент ва мардуми Узбекистон бахшиш мепурсанд.

Яке аз мансабдорони узбек гуфт, филми мазкур пас аз дахолати раиси пешини Хадамоти амнияти миллии Узбекистон Рустам Иноятов, ки ҳоло сенатори Маҷлиси олии ин кишвар аст, намоиш дода нашуд.

Додгоҳи ноҳияи Юнусободи шаҳри Тошканд рӯзи 26-уми июн Рашид Қодировро ба 10 соли зиндон маҳкум кард. Рашид Қодиров ба порагирӣ, тақаллуб, фирор аз пардохти андоз, дахолат ба ҷараёни тафтишот ва қонунӣ кардани даромадҳои бо роҳи ҷиноӣ бадастомада гунаҳкор дониста шуд. Инчунин, додгоҳ ӯро ба пардохти 500 маоши ҳадди ақал муваззаф намуд.

Мақомоти Қазоқистон қазоқтаборони фирории Чинро истирдод мекунанд

Қазоқтаборони чинӣ Кастер Мусохонулӣ ва Мурагер Алимулӣ, ки марзи Қазоқистонро ғайриқонунӣ убур кардаанд, ба Чин истирдод мешаванд. Дар ин бора Дархан Дилманов, мудири хадамоти марзбонии Кумитаи амнияти миллии Қазоқистон хабар дод.

"Баъди анҷоми баҳсҳои додгоҳӣ ва муҳлати ҷазои ҷиноӣ мо ин шаҳрвандонро ба ватанашон истирдод мекунем. Аз ҳамин хотир, онҳо имкони инҷо боқӣ монданро надоранд",-гуфт Дархан Дилманов.

Кастер Мусохонулӣ ва Мурагер Алимулӣ пештар аз ин бо нашри наворе дар шабакаҳои иҷтимоӣ гуфтанд, ки ба далели таъқиби мақомоти Чин тасмим гирифтаанд, фирор кунанд. Мусохон ва Алимулӣ дар нимаи аввали рӯзи 14-уми октябр нишасти матбуотӣ баргузор карда буданд. Ба гуфтаашон, хонаводаи онҳо дар Чин мондаанд.

Мусохони 30-сола ва Алимулии 25-сола гуфтанд, рӯзи 1 октябр марзи давлатии Чинро убур ва 5 рӯз дар минтақаи байни сарҳади ду давлат боқӣ монданд. Танҳо дар рӯзи 6 октябр муваффақ шуданд, ки вориди Қазоқистон шаванд.

Кастер Мусохон гуфт, баъди он аз Чин фирор кард, ки "наздики чаҳор солу ҳашт моҳи охир дар урдугоҳ нигаҳдорӣ мешуд". Мусохон мегӯяд, дар урдугоҳ ба ӯ фишор меоварданд ва латту кӯб мекарданд. Алимулӣ низ аз фишору латту кӯби мақомоти Чин нақл кард.

Баҳси марзбонони узбек бо сокинони Қирғизистони сари гӯсфандони "марзшикан"

Хадамоти марзбонии Қирғизистон ҳодисаи рӯзи 7 декабр дар марзи байни ин кишвар ва Узбекистон рухдодаро шарҳ дод.

Ба иттилои ниҳоди мазкур, дар наздикии деҳаи Кок-Тоши вилояти Ҷалолободи Қирғизистон, ки бо Узбекистон ҳаммарз аст, сокинони маҳаллӣ гӯсфандчаронӣ мекард. Гӯсфандон хатти шартии марзро убур ва вориди ҳудуди Узбекистон шуданд.

Дар мувофиқа бо созишномаҳои имзошуда, дар ҳолати ворид шудани ҳайвонҳо ба марзи якдигар, марзбонон онҳоро берун мекунанд. "Аз ҳамин хотир марзбонони Узбекистон гӯсфандонро аз ҳудуди он кишвар берун кардаанд. Аммо байни низомиҳои Узбекистон ва сокинони маҳаллии Қирғизистон баҳси лафзӣ рух додааст",-хабар дод Хадамоти марзбонии Қирғизистон.

Баъди чанде марзбонони Қирғизистон низ ба ҷои ҳодиса ҳозир шуда, бо ҳамтоёни узбеки худ гуфтугӯ карданд. Баҳси ду ҷониб ҳал шуд. Ин хадамот аз сокинони наздимарзӣ даъват кард, ки ҳар гуна нофаҳмиро бо роҳи гуфтугӯ ҳал кунанд.

Нахустин мулоқоти Путин ва Зеленский дар Порис баргузор мешавад

Дар шаҳри Порис 9 декабр мулоқоти "шакли нормандӣ" барои ба эътидол овардани вазъ дар Донбасси Украина баргузор хоҳад шуд.

Раҳбарони Украина, Олмон, Фаронса ва Русия дар се соли охир бори нахуст барои пайдо кардани роҳҳои қатъи даргирӣ дар шарқи Украина пушти мизи гуфтушунид хоҳанд нишаст.

Дар маркази шаҳри Киев, пойтахти Украина 8 декабр, пеш аз мулоқоти "шакли нормандӣ" ҳамоиши эътирозӣ баргузор шуд. Ба иттилои AFP, дар тазоҳурот ҳудуди 5 ҳазор одам иштирок доштанд.

Сокинонро ба баргузории ин ҳамоиш вакилони порлумони Украина аз ҷиноҳҳои мухолиф, аз ҷумла "Ҳамраъйии аврупоӣ", "Садо" ва "Озодӣ" даъват карда буданд. Вакилони мухолиф дар арафаи мулоқоти Порис, ба истилоҳ "хати сурх"-еро нашр карданд, ки президенти Украина Владимир Зеленский дар мулоқот бо раҳбарони Русия, Олмон ва Фаронса набояд аз доираи он берун равад.

Мухолифони Украина, аз ҷумла ягонагии давлат, баргузор накардани интихобот дар Донбасс то хориҷ шудани нерӯҳои Кремл, худдорӣ аз созиш дар робита ба мақоми нимҷазираи ишғолии Қрим ва ба додгоҳи байналмилалӣ кашидани Русияро талаб карданд.

Дар Қазоқистон ҳоҷатхонаҳои сарироҳии 60-ҳазордолларӣ сохта мешавад

Хабари бунёди ҳоҷатхонаҳои сарироҳии 60-ҳазордолларӣ дар Қазоқистон сокинони ин кишварро дар ҳайрат гузоштааст.

Ширкати давлатии "Қазавтожол"-и Қазоқистон, ки масъули назорати роҳҳои мошингард аст, гуфт, дар канори роҳҳои ин кишвар 304 ҳоҷатхона бунёд хоҳад кард. Ба гуфтаи ширкат, ҳар як ҳоҷатхона бо харҷи 23 миллион танга, ҳудуди 60 ҳазор доллар сохта мешавад. Ин хабар дар ҷомеаи Қазоқистон баҳсҳои тундеро ба миён овардааст.

Вале масъулони ширкат мегӯянд, ин ҳоҷатхонаҳоро бо пули сармоягузорон хоҳанд сохт. "Дар бунёди ҳоҷатхонаҳо ягон танга аз буҷаи давлат сарф намешавад. Вале харҷи нигоҳубини онҳо аз ҳисоби буҷа хоҳад буд",-изҳор дошт муовини мудири "Қазавтожол" Талгат Смагулов.

Ба гуфтаи ӯ, нигоҳубини ҳоҷатхонаҳои нав аз 700 ҳазор то 1,5 млн танга моҳона харҷ хоҳад дошт. Вале дар ҳоли ҳозир ҳаҷми харҷ дақиқ нест. "Дар озмун касе баранда хоҳад шуд, ки барои нигаҳдории ҳоҷатхонаҳо маблағи кам пешниҳод кунад",-афзуд вай.

Қарор аст, дар навбати аввал ҳоҷатхонаҳо дар қисмати шимолии Қазоқистон бунёд шавад. Ба иттилои "Қазавтожол", 304 ҳоҷатхона то соли 2022 бунёд карда хоҳад шуд.

Рӯҳонӣ буҷаи муқовимат бо таҳримҳоро пешниҳод кард

Ҳасани Рӯҳонӣ, раиси ҷумҳури Эрон, чизе, ки онро буҷаи муқовимат дар баробари таҳримҳо хонд, рӯзи 8-уми декабр ба порлумон пешниҳод кард. Ӯ гуфт, қарзи эҳтимолии чандин миллиарддолларӣ аз Русия як манбаи муҳими даромад хоҳад буд.

Раиси ҷумҳури Эрон афзуд, дар ин буҷа камтарин такя ба даромади нафт дар назар гирифта шудааст.

Тибқи гузоришҳо буҷаи пешниҳодии Рӯҳонӣ барои соли оянда тақрибан чиҳил миллиард доллар ва нисбат ба имсол 20 дарсад бештар аст.

Ин буҷаи пешниҳодӣ барои соли оянда дар ҳоле матраҳ мешавад, ки фишори таҳримҳои Амрико афзоиш ёфта ва эрониҳо ҳанӯз ҳам аз паёмадҳои саркӯби маргбори тазоҳуроти моҳи гузашта ба худ наомадаанд. Эътирозҳо моҳи ноябр ва баъд аз боло рафтани қимати сӯзишворӣ баргузор шуд.

Куриёи Шимолӣ як мушаки дурпарвозро санҷиш кардааст

Мақомоти Куриёи Шимолӣ гуфтанд, як озмоиши муҳими мушакҳои дурпарвозро анҷом доданд.

Пеш аз ин мақомҳои амрикоӣ гуфта буданд, Куриёи Шимолӣ ниме аз маҳаллеро, ки мушак ба тозагӣ аз онҷо партоб шуд, дар натиҷаи гуфтугӯҳо бо ҳадафи ғайриҳастаӣ кардани нимҷазираи Куриё вайрон намудааст.

Пхенян рӯзи 8-уми декабр эълом кард, озмоиши навро пас аз он анҷом дод, ки як мақоми Куриёи Шимолӣ гуфтааст: "дар музокирот бо Иёлоти Муттаҳида ғайриҳастаӣ кардани нимҷазираи Куриё шомил нест.”

Мақомҳои Куриёи Ҷанубӣ аз ибрози назар дар мавриди озмоиши нави мушаки Куриёи Шимолӣ худдорӣ кардаанд.

Президенти “Озодӣ”: Аз таъқиби хабарнигорон нигарон ҳастем

Ҷеми Флай

Президенти Радиои Аврупои Озод/Радиои Озодӣ аз маҳдудияти дар ҳоли афзоиш дар баробари дастрасии хабарнигорони байналмилалӣ ба шунаванддагон дар Эрон изҳори нигаронӣ кард.

Ҷеми Флай рӯзи шанбе дар мусоҳибае бо Радиои Фардо, бахши эронии Радиои Озодӣ гуфт: "Мо аз таъқиби хабарнигоронамон дар Радиои Фардо сахт нигарон ҳастем. Ҳамкорони мо аз бахши форсии Садои Амрико, Би-би-сӣ ва Мавҷи Олмон низ бо ин вазъ рӯ ба рӯянд."

Изҳороти президенти Радиои Озодӣ дар пайи эътирозҳои густардаи хушунатомез дар Эрон сурат гирифт. Эътирозҳо дар сартосари Эрон баъд аз тасмими Теҳрон дар бораи афзоиши қимати сӯзишворӣ оғоз шуд.

Дар натиҷа Ҷумҳурии Исломӣ чанд рӯз дастрасӣ ба шабакаи интернетро қатъ кард.

Оятуллоҳ Алии Хоманаӣ, раҳбари Эрон тазоҳуроти ахир дар он кишварро танзимшуда аз хориҷ номид.

Ҳендке Ҷоизаи Нобелро гирифт, вале аз ҷанҷол чизе нагуфт

Петер Ҳендке

Петер Ҳендке, нависандаи австриягӣ, барандаи ҷоизаи Нобел дар бахши адабиёт (соли 2019) шинохта шуд. Вай рӯзи 7-уми декабр дар Академияи Нобел дар шаҳри Стокҳолм суханронӣ кард, аммо дар мавриди изҳороти ҷанҷолиаш чизе нагуфт.

Ҳендке пештар Слободан Милошевич, раиси ҷумҳури Югословияи собиқро ситоиш карда буд, ки хашми сокинони ҳавзаи Балканро барангехт. Қарор аст, ҷоизаи Нобел барои Петер Ҳендке рӯзи сешанбеи 10-уми декабр тақдим шавад.

Гуруҳи “Алфа” ба шикори гургон ба Бадахшон рафтааст?

Дар вилояти Бадахшони Тоҷикистон барои шикори гургҳо як гуруҳи вижа таъсис додаанд. Мақомоти вилоят рӯзи 8-уми декабр расман гуфтанд, ки ин гуруҳ аз нирӯҳои зиддитеррористии “Алфа”-и Кумитаи давлатии амнияти миллии Тоҷикистон иборат аст. Ба иттилои мақомот, хатари ҳамлаи гургон дар чанд ҷамоати ноҳияи Шуғнон, Роштқалъа ва ноҳияи Рӯшон вуҷуд дорад. “Гурӯҳи мазкур бо лавозимоти муосири шикорӣ таъмин буда, вазифаи асосии онҳо нобуд сохтани гургон дар деҳаҳои вилоят аст”, -- гуфтанд дар ҳукумати вилоят. Соли гузашта дар фасли зимистон бар асари ҳамлаи гургҳо дар ҷамоати Поршиневи ноҳияи Шуғнон ду нафар ҷони худро аз даст дода буданд. Сокинон гуфтанд, гургон ҳамчунин ҳайвонҳои хонагии онҳоро мекушанд. Вале мардуми маҳаллӣ ҳамвора аз ҳузури бештари низомиён дар ин минтақаи мухтор нигарон будаанд.

Ду сарвазири собиқи Қирғизистон зиндонӣ шуданд

Додгоҳи Бишкек ду сарвазири собиқи Қирғизистонро бо иттиҳоми фасодкорӣ аз озодӣ маҳрум кард.

Сафар Исҳоқов, сарвазири собиқ бо мусодираи молу мулк ба 15 соли зиндон маҳкум шуд. Бар асоси ҳукми додгоҳ ӯ аз рутбаи дипломатӣ ва аз ордени «Манас» дараҷаи ду маҳрум шуд.

Жанторо Сотиболдиев, сарвазири дигари собиқ бо мусодираи молу мулк ба 7,5 соли зиндон маҳкум шуд.

Ба ҷуз ин, дар доираи ин парванда Олга Лаврова, вазири собиқи молия ва Осмонбек Ортиқбоев, вазири собиқи энергетика ҷарима шуданд. Инчунин, чандин мансабдорони баландпоя ба солҳои гуногуни зиндон маҳкум шуданд.

Ҳамаи онҳо барои фасодкорӣ ҳангоми бозсозии Маркази гармидиҳии Бишкек гунаҳкор шуданд.

Баъди садамаи 26 январи соли 2018 дар маркази гармидиҳии Бишкек нисбати мансабдорони собиқ ва кунунӣ парвандаи ҷиноӣ боз шуд. Яке аз ин парвандаҳо марбут ба фасодкорӣ ҳангоми интихоби ширкати кироякор буд. Тафтишот гуфта буд, ки шахсони масъул аз манфиатҳои ширкати TBEA ҷонибдорӣ кардаанд.

Бозсозии ин марказ бо 386 миллион қарзи Чин ба роҳ монда шуда буд. Дар доираи ин парванда ҳамчунин Алмосбек Отамбоев, президенти собиқи Қирғизистон низ муттаҳам дониста мешавад.

Трамп аз Бонки Ҷаҳонӣ хост, ки ба Чин қарз надиҳад

Доналд Трамп, президенти ИМА аз Бонки Ҷаҳонӣ хостааст, ки ба Чин қарз надиҳад.

Як рӯз пеш аз хости Трамп Бонки Ҷаҳонӣ тарҳи қарздиҳӣ ба Пекинро тасвиб кард.

Трамп рӯзи ҷумъа дар саҳифаи Твиттери худ навишт: “Чаро Бонки Ҷаҳонӣ ба Чин қарз медиҳад? Ин мумкин аст? Чин пули фаровон дорад ва агар надорад, онҳо (пул) месозанд. Бас кунед!”

Бонки Ҷаҳонӣ 5-уми декабр тарҳеро тасвиб кард, ки бар асоси он солона аз як миллиард то якуним миллиард доллар бо фоизи паст ба Чин қарз медиҳад.

Ин Бонк гуфтааст, додани қарз ба Чин ба пешрафти ислоҳоти молӣ ва коҳиши олудагии ҳаво кӯмак мекунад.

ИМА бузургтарин саҳмдори Бонки Ҷаҳонӣ аст, аммо дар заминаи қарздиҳӣ ба кишварҳои мушаххас салоҳияти вето надорад.

Олмон нисбат ба ду афсари Русия парванда боз кард

Russia - Two men identified as Aleksandr Petrov and Ruslan Boshirov appeared on Russia Today (RT) to discuss charges in Britain that they were involved in Novichok poisoning - screen grab

Дар Олмон нисбат ба кормандони эҳтимолии ГРУ ё Раёсати марказии истихбороти Русия, ки дар Бритониё барои заҳролуд намудани ҷосуси дуҷониба, Сергей Скрипал ва духтараш дар Солсбери муттаҳам мешаванд, тафтиш ҷараён дорад.

Дар ин бора “Der Spiegel” хабар дод.

Ба навиштаи нашрия, таҳқиқро бо номи рамзии “Нови” Додситонии кулли Олмон ва пулиси ҷиноии ин кишвар пеш мебаранд.

Парванда нисбат ба шаҳрвандони Русия бо номи Руслан Боширов ва Александр Петров, ки дар заҳролуд намудани Скрипалҳо гумонбаранд, боз шудааст. Онҳо соли 2014 се рӯз дар Фарнкфурт-на-Майнеи Олмон будаанд.

Ба ҷуз ин, рӯзноманигорони “Spiegel” ва гурӯҳи таҳқиқгарони “Bellingcat” мегӯянд, миёни “Боширов” ва “Петрова” бо генерале, ки раҳбари онҳо дониста мешавад, аз Олмон тамос вуҷуд дошт. Манзур генерал-майор Андрей Аверянов ҳаст, ки қаблан дар борааш расонаҳо навишта буданд.

“Spiegel” ба таҳқиқи куштори Зелимхон Хангошвилӣ, ки тобистони имсол дар Берлин кушта шуд, ишора мекунад.

Зелимхон Хангошвилӣ аз соли 1999 то 2002 дар Ҷанги дуюми Чеченистон ба зидди нирӯҳои давлатии Русия зери фармондеҳии Шамил Басаев ҷангида, эҳтимолан бо Аслан Масхадов ҳам робита дошт. Масхадов ба таври кӯтоҳмуддат дар мақоми президенти Чеченистон кор кардааст.

Дар гузориши рӯзи 3-юми декабри гурӯҳи Bellingcat иддао мешавад, ки шахси гумонбар ба Берлин бо номи мустаори Соколов сафар кардааст. Дар ҳоле ки номи асосии ӯ Вадим Красиков аст ва ӯ 54 сол дорад.

Bellingcat навиштааст, "Красиков моҳи июни соли 2013 дар қазияи куштори як зани соҳибкори рус гумонбари асосӣ буд". Ин зан пеш аз мурданаш чанд дафъа мавриди сӯиқасд қарор гирифта буд."

Bellingcat навишт, "куштор дар Маскав аз чанд ҷиҳат бо шеваи куштор дар Берлин монанд аст: қотил ба ҳадафаш бо дучарха наздик шуд ва ба сӯи ӯ аз фосилаи наздик аз туфангча тир холӣ кард. Ҳарду дафъа тир аз пушти сари қурбонӣ расидааст ва баъди ин бо ҳамин дучархааш аз ҷойи ҳодиса фирор кардааст”.

Бино ба гуфтаи гурӯҳи таҳқиқотӣ, Красиков дар Қазоқистон бузург шуда, баъдан ба Сибир кӯчидааст.
Таҳқиқоти ҷудогонаи Bellingcat иддао кардааст, ки талоши куштори Скрипал ва духтарашро аз роҳи заҳролудсозӣ се афсари ГРУ ташкил кардаанд. Аз ин се мард ду нафараш дар ҷустуҷӯи ҷиноии мақомоти Бритониё қарор доранд. Скрипал ва духтараш баъди заҳролудшавӣ дар шаҳри Салисбурии Бритониё аз марг наҷот ёфтанд, вале зани дигаре, ки тасодуфан бо осори маводи заҳролудшуда дар тамос шуда, ҳеч рабте ба Русия надорад, даргузашт.

Ёфтҳои бештар

Гузоришҳои видеоӣ

Тоҷирони бозори "Корвон"-и Душанбе изи ангушт месупоранд
лутфан мунтазир бошед

Феълан кор намекунад

0:00 0:02:53 0:00
XS
SM
MD
LG