Пайвандҳои дастрасӣ

Хабари нав

Хабарҳо

Як узви "Толибон" дар ИМА ба ҳабси абад маҳкум шуд

Дар Амрико як узви ҷунбиши Толибони Афғонистон ба иттиҳоми қочоқи маводди мухаддир ва терроризм ба ҳабси абад маҳкум шуд.

Хон Муҳаммад, зодаи вилояти Нангарҳор, нахустин касест, ки бар асоси қонунҳои ИМА барои қочоқи маводди мухаддир муттаҳам ва ба ҳабс маҳкум мешавад. Муҳаммад, ки соли 2007 аз Афғонистон ба Амрико омадааст, моҳи майи соли ҷорӣ муттаҳам дониста шуда буд.

Додситонҳои Амрико вайро муттаҳам карданд, ки ӯ ба Амрико ҳероин интиқол медодааст ва даромад аз онро барои кумак ба "Толибон" сарф мекардааст. Муҳаммад барои харидории мушакҳое, ки баъдан барои ҳамла ба нерӯҳои Амрико дар фурудгоҳи Ҷалолобод истифода шудааст, муттаҳам дониста шуд.

Ҳамаи хабарҳои имрӯзро дар инҷо бихонед

Дар Душанбе 100 кӯдаки беморро ройгон ҷарроҳӣ мекунанд

Акс аз бойгонӣ.

Наздики 100 кӯдакро, ки бемории модарзодии қалб доранд, дар шаҳри Душанбе ройгон ҷарроҳӣ мекунанд. Ин ҷарроҳиҳо аз сӯи пизишкони маҳаллӣ ва 12 кишвари хориҷӣ сурат мегиранд.

Иқдоми мазкур бо ташаббуси Вазорати тандурустии Тоҷикистон ва бо пуштибонии молии Имороти Муттаҳидаи Арабӣ барои кӯдакон аз хонаводаҳои камбизоат амалӣ мешавад. Бархеҳо ҷарроҳӣ шудаанд.

То имрӯз 30 пизишк аз 12 кишвари хориҷӣ бештар аз 40 ҷарроҳии пӯшида ва 20 ҷарроҳии боз анҷом додаанд. Ҳамарӯза дар беморхонаи "Истиқолол"-и шаҳри Душанбе бештар аз 10 ҷарроҳӣ анҷом мешавад.

Чунин иқдом аз соли 2017 ба ин тараф соле як маротиба сурат мегирад. Дар панҷ сол таҳти ин иқдом 560 ҷарроҳӣ анҷом шудааст.

Аммо на ҳамаи кӯдаконе, ки ба ҷарроҳӣ ниёз доранд, дар ин ташаббус фаро гирифта мешаванд. Зеро ин иқдом барои 100-110 кӯдак дар сол пешбинӣ шудааст. Ҷарроҳиҳо то 2 ноябр идома мекунанд.

Дар Русия теъдоди зиндониёни сиёсӣ дар панҷ соли охир 5 баробар афзудааст

Акс аз бойгонӣ.

Ҳомиёни ҳуқуқ мегӯянд, дар Русия ҳадди ақал 420 зиндонии сиёсӣ мавҷуд аст. Ин нисбат ба 5 соли пеш 5 баробар бештар аст. Иттилои мазкурро сомонаи "Медуза" бо такя ба маркази ҳифзи ҳуқуқи "Мемориал"-и Русия нашр кардааст.

Аз 420 зиндонӣ 360 тани онҳо бо ангезаҳои динӣ зиндонӣ шудаанд. Ин зиндониён асосан мусалмон ҳастанд, ки бо айби ширкат дар созмонҳои мамнуъ ҳабс мешаванд.

Созмони "Мемориал" гуфтааст, натиҷаи таъқибҳои сиёсӣ буд, ки мухолифи ҳукумати Русия Алексей Навалний зиндонӣ ва чанде аз ёрони вай боздошту ҳабс шуданд.

Теъдоди воқеии маҳбусони сиёсӣ дар Русия мумкин аст, чанд баробар бештар бошад. Сергей Давидис, як масъули "Мемориал" гуфт, мумкин аст, дар Русияи кунунӣ шумори маҳбусони сиёсӣ аз шумори маҳбусони сиёсии солҳои охирии СССР низ бештар бошад. "Мемориал" мегӯяд, вақте Михаил Горбачев, охири роҳбари СССР дастури озодии маҳбусони сиёсиро дод, наздики 700 тан аз зиндонҳо раҳо шуданд.

"Тири воқеӣ чӣ гуна ба дасти синамогарон афтод?" Идомаи таҳқиқи куштор бо ширкати Алек Болдуин

Ситораи синамои Ҳолливуд Алек Болдуин додгоҳи Манҳеттени Ню-Йоркро тарк мекунад. 26-уми октябр

Дар доираи тақиқи қазияи кушта шудани наворбардори синамо Ҳалина Ҳатчинси украинитабор ҷузъиёти ба дасти синамогарон афтодани тирҳои воқеӣ таҳқиқ мешавад. Ӯ ҳафтаи гузашта аз ҷониби ҳунарпешаи Ҳолливуд Алек Болдуин дар лаҳзаҳои наворгирии филме кушта шуд. Таҳқиқи пешакӣ нишон дод, ки дар силоҳе, ки ӯ дар даст дошт, тири воқеӣ буд ва ҳамин як тир аз бадани наворбардор гузашта коргардони филмро ҳам захмӣ кардааст. Фоҷеа ҳангоми наворгирии филме бо номи “Зангбаста” рух дод, ки дар бораи моҷароҳои қарни 19 қисса мекунад.

Дар як нишасти хабарии рӯзи 27-уми октябр раиси полис Адан Мендоза гуфт, ки муфаттишон 500 дона тирро таҳқиқ карда ба хулосае омаданд, ки дар миёни онҳо тирҳои сохтаву воқеӣ омехта шудааст. Ӯ гуфт, “ҳоло саволи асосӣ ин аст, ки чӣ гуна тирҳои воқеиву сохта якҷо ба дасти филмсозон афтоданд” ва ҳам ин қазия “бархе масъалҳои амниятиро дар соҳаи синамо ва ҳам дар аёлати Ню Мехико эҷод мекунад”. Ӯ гуфт, ки шахсони масъули нигаҳдории тиру силоҳ дар баробари худи Алек Болдуин ва дигарҳо бо тафтишот ҳамаҷониба ҳамкорӣ мекунанд. Полис гуфт, ки вобаста ба ҷараёни таҳқиқ ҳама ширкатдорони ин ҳодиса, аз ҷумла Алек Болдуин метавонанд ба ҷавобгарии ҷиноӣ кашида шаванд.

Рекордҳои нави олудашавиҳо ба коронавиврус дар Русияву Украина

Як беморхонаи Русия

Русия як рӯзи рекордии дигари олудашавӣ ба коронавирусро пуштисар кард. Ин кишвар, ки дар остонаи карантини 11-рӯза қарор дорад, дар 24 соати гузашта шоҳиди олудашавии 40,096 нафар ва марги 1159 шахси дигар аз COVID-19 шуд. Аз замони шурӯи пандемия дар Русия 235 ҳазор нафар ҷон додаанд ва ин чорумин баландтарин нишондод дар ҷаҳон баъдии ИМА, Бразилия ва Ҳинд будааст. Рӯзи 28 октябр Маскав қисман баста шуд ва танҳо нуқтаҳои тиҷоратии бисёр зарури мисли дорухонаву дӯконҳои ғизофурӯшӣ боз монданд. Қарор аст ҳафтаи аввали моҳи ноябр дар тамоми Русия маҳдудиятҳои навбатии марбут ба пандемия ҷорӣ шаванд.

Украина – ҳамсояи Русия ҳам бо рекорди нави якрӯзаи олудашавиҳо ба COVID-19 рӯбарӯ шудааст. Дар ин ҷо дар як рӯзи гузашта се ҳазор нафар бештар назар ба рӯзе аз он пеш - 26,071 нафар бемор шудаву 576 нафар даргузаштаанд. Мақомот дар Украина ва дигар нуқоти Аврупо мегӯянд, ки афзоиши навбатии олудашавиҳо ба мизони кунди эмшавӣ бар зидди коронавирус рабт дорад.

Дар Пиҷим чӣ гузашт? Мақомот хушунат бар асоси адовати қавмиро рад мекунанд

Саҳнае аз занозании гурӯҳии мактаббачаҳо дар Пиҷим

Полиси вилояти Алмаато дар Қазоқистон гуфт, ки дар паи бетартибиҳои ҷавонон дар деҳаи Пиҷими ноҳияи Панфилов, ки шаби 27 ба 28-уми октябр рух дод, аз рӯи моддаи “авбошӣ” парванда боз шудааст. Бахши қазоқии Радиои Озодӣ мегӯяд, шоми чоршанбе нахуст хабар расид, ки дар як мактаби деҳа миёни хонандаҳои синфҳои болоӣ занозанӣ рух дод ва дар натиҷа, як навраси 16-сола ба беморхона интиқол ёфт. Дар ин ҳодиса чанд нафари дигар осеб диданд. Бар асоси иттилои мухталиф, дар занозаниву бетартибиҳо ҳудудан 30 нафар иштирок кардааст. Полис гуфт, ки шишаи хонаҳо шикаста, чанд мошин осеб дид.

Дар ҳамин ҳол, раиси ноҳияи Панфилов Талъат Умаралиев гуфтааст, ки овозаҳо дар бораи гӯё заминаҳои қавмию миллӣ доштани ин моҷаро беасос аст. Дар ҳоле, ки мақомоти маҳаллӣ ангезаҳои миллӣ доштани моҷарои мактаббачаҳое, ки аз оилаҳои қазоқу уйғур будаанд, рад мекунанд, бархе намояндагони оилаҳои уйғуртабори ин деҳа гуфтаанд, ки дар ду ҳафтаи ахир “фарзандонашон бо табъйизу фишори ҳамсолони худ” рӯбарӯ шудаанд.

Феълан санҷидани дурустии ин иддао имкон надорад. Деҳаи Пиҷим дар 20-километрии марзи Қазоқистону Чин ҷойгир буда, дар он панҷ ҳазор уйғуртабору ҳафт ҳазор қазоқҳо зиндагӣ мекунанд. Омори расмӣ мегӯяд, ки соли 2020 дар ҳудуди ноҳияи Панфилов 130 ҳазор нафар, асосан қазоқҳову сеякашон уйғуртаборҳо зиндагӣ мекарданд.

Ҳаракати мунтазами автобусҳои Тошканд-Хуҷанд-Тошканд барқарор шуд

8 марти соли 2018. Бо барқарор шудани муносибатҳои сиёсиву иҷтимоии Тоҷикистону Узбекистон, гурӯҳи ҳунармандони Узбекистон бо автобус барои ширкат дар як консерт ба Душанбе сафар карданд

Ҳаракати мунтазами автобусҳои Тошканд-Хуҷанд-Тошканд барқарор гардид. Ба навиштаи вазорати нақлиёти Узбекистон, равуо тавассути ин масир аз ҷониби автобусҳои ширкати «Узавто транс сервис» ҳамарӯза сурат хоҳад гирифт. Нархи роҳкиро аз пойтахти Узбекистон ба маркази вилояти Суғд 100 ҳазор сӯми узбекӣ, муодили 105 сомонӣ тайин шудааст. Ёдовар мешавем, ки баъди якуним соли танаффус бо сабаби пандемияи коронавирус ва баста шудани марзҳои Тоҷикистону Узбекистон, рӯзи 18-уми октябр ҳаракати мусофирбарҳо дар роҳи Хуҷанд-Тошканд-Хуҷанд дубора оғоз шуд. Шаҳрвандони Тоҷикистон ҳангоми гузаштан аз марзи Узбекистон бояд гувоҳномаи ваксина ё натиҷаи манфии санҷиши коронавирусро нишон диҳанд.

Вазорат: наздики нисфи аҳолии Тоҷикистон эм шудаанд. Шубҳа рафъ нашудааст

Эмкунӣ бар зидди коронавирус дар Тоҷикистон баҳори имсол шурӯъ шуд

Мақомоти вазорати беҳдошт мегӯянд, ки дар саросари Тоҷикистон беш аз 45 фойизи аҳолӣ бар зидди коронавирус ваксина гирифтаанд. Бино ба иттилои Вазорати тандурустӣ, то 20-уми октябри соли ҷорӣ дар кишвар зиёда аз 2 миллиону 600 ҳазор афроди аз 18-сола боло моякубӣ шудаанд. Дар шаҳри Душанбе нақшаи ваксинзанӣ беш аз 100 фойиз иҷро шудааст. Вале омори расмӣ шубҳаву гумонҳоеро эҷод кардааст. Бахусус инки дар муддати ним сол чӣ гуна қариб 2,5 миллион нафар эм карда шудаанд.Тоҷикистон то ин дам панҷ навъи ваксина – AstraZeneca, CoronaVac, Moderna, Sputnik V ва Pfizer гирифтааст. Аз инҳо Pfizer ҳанӯз дар истифодаи пурра қарор нагирифтааст, чун шароити интиқол ва нигоҳдориаш мушкилтар аст.

Муҳоҷири дар ҷои кор даргузаштаро дар Душанбе ба хок супурданд

Акс аз бойгонӣ

Рӯзи гузашта дар оромгоҳи Душанбе ҷасади ҷавонеро ба хок супориданд, ки чанд рӯзи пеш ба таври ногаҳонӣ дар ҷоий кораш дар Русия ба ҳалокат расид. Наворе, ки дар он Сафари 22-сола, ҳангоми ҷобаҷогузории бор дар яке аз мағозаҳои Маскав эҳтимолан бо сабаби якбора аз кор мондани дилаш ба замин мефтад, дар шабакаҳои иҷтимоӣ нашр шуд. Барои интиқоли тобути ӯ ба Душанбе муҳоҷирон маблағ ҷамъ кардаанд. Ба гуфтани онҳое, ки Сафарро мешинохтанд, марҳум се соли охир дар муҳоҷират буд. Субҳи дирӯз ҷасади ӯ ба дасти пайвандонаш расид. Дар баробари он ки муҳоҷират то кунун як манбаи асосии даромади хонаводаҳо дар Тоҷикистон боқӣ мемонад, ҳодисаҳои фавти онҳо ҳам дар Руси якам нест. Шуморе аз онҳо, мисли Сафари ғуррамарг дар айни ҷавонӣ ва шаҳди зиндагӣ ночашида дунёро падруд гуфтаанд.

Пешбиниҳо аз афзоиши шумори муҳоҷирон дар Русия

Мактабе дар шаҳри Перми Русия. Як фарзанди муҳоҷирон расм мекашад

Ҳукумати Русия дар соли 2021 афзоиши шумори муҳоҷиронро интизор аст. Тибқи пешгӯӣ, соли ҷорӣ шумораи муҳоҷирони меҳнатӣ дар ин кишвар метавонад тахминан 400 ҳазор нафар зиёд шавад, ки дар 25 соли охир рекордӣ маҳсуб меёбад. Нашрияи «Известия» бо такя ба Девони вазирон менависад, бо вуҷуди вуруди зиёди муҳоҷирон, аҳолии Русия то соли 2025 метавонад 1 миллиону 600 ҳазор нафар кам мешавад. Бо ин ҳол, афзоиши муҳоҷират ба ин кишвар дар охири соли 2020-ум 106 ҳазор ва дар ҳафт моҳи имсол 161 ҳазор касро ташкил додааст. Аксари кулли муҳоҷирон аз кишварҳои Ҳамсуд, аз ҷумла 38 ҳазор нафар аз Тоҷикистон ба Русия рафтаанд.

Генерали амрикоӣ озмоиши мушаки гиперсоникро аз ҷониби Чин тасдиқ кард

1 октябри соли 2019. Мошинҳои низомие, ки тавони интиқоли мушакҳои моваросавтии навъи DF-17-ро доранд, дар гашти низомии нирӯҳои чинӣ дар майдони Тянанмини шаҳри Пекин намоиш дода шуданд

Генерал Марк Миллей – як афсари олирутбаи Амрико тасдиқ кард, ки Ҷумҳурии Мардумии Чин аввали имсол як мушаки гиперсоник ва ё моваросавтиро озмоиш кардааст, ки мояи нигаронии ҷиддӣ аст. Мушаки мазкур, ки суръаташ аз суръати садо панҷ маротиба тезтар аст ва дар як соат то 6 ҳазор километр парвоз мекунад, дар атрофи Замин як маротиба чарх задааст. Марк Миллей рӯзи 27-уми октябр гуфт, ки “озмоиши мушаки моваросавтӣ як ҳодисаи бисёр чашмгир ва мояи нигаронии ҷиддӣ аст.” Ӯ озмоишро баробар ба партоби нахустин моҳвораи шӯравии Спутник ба фазо номид, ки дар соли 1957 таваҷҷуҳи тамоми ҷаҳонро ба худ ҷалб кард ва ин нигарониро ба вуҷуд овард, ки Амрико аз назари пешрафти технологӣ аз Иттиҳоди Шӯравӣ ақиб мемонад. Дар бораи озмоиши мушаки пешрафта рӯзи 16-уми октябр нашрияи амрикоии Financial Times хабар дод. Он замон вазорати умури хориҷии Чин гуфт, ки онҳо на мушак, балки як фазонавардро озмоиш кардаанд.

Тавофуқ барои пешгирӣ аз муноқишаҳо дар марзи Тоҷикистону Қирғизистон

Ин бино дар муноқишаи пурқурбонии моҳи апрели соли ҷорӣ хароб карда шуд. 4 май, деҳаи Мақсади вилояти Ботканд

Мақомот дар Исфараву Бодканд ба созиш расиданд, ки барои ҷилавгирӣ аз муноқишаҳои марзӣ чоранадешӣ намоянд. Рӯзи 27 октябр дар деҳаи Хоҷаи Аълои Тоҷикистон Раҷаббой Аҳмадзода, раиси вилояти Суғд бо Абдукарим Алимбоев, намояндаи ваколатдори раисҷумҳури Қирғизистон дар вилояти Бодканд музокирот намуданд. Дар пайи ин дидор тасмим гирифта шуд, ки ҳама гуна сохтмон дар наздикии "сарҳади шартӣ" қатъ шуда, чорвои ба ҳудуди тарафҳо воридгардида ба ҳамдигар баргардонида мешавад ва барои пешгирӣ аз қочоқ тадбирҳои муштарак амалӣ мегардад. Ниҳодҳои интизомии манотиқи марзии Қирғизистону Тоҷикистон бояд дар ояндаи наздик тарҳи иқдомоти муштарак барои таъмини субот дар марзро таҳия ва мувофиқа кунанд. Марзи Тоҷикистону Қирғизистон ҳудуди 980 километр буда, пас аз фурӯпошии Иттиҳоди Шӯравӣ дар он даҳҳо қитъаҳои баҳсбарангез боқӣ мондаанд. Аз ин сабаб аҳёнан байни сокинон ва низомиёни ду кишвар низоъхо, аз чумла бо истифодаи аз силоҳ ба амал меоянд. Феълан Комиссияи ҳукуматии ду кишвар музокирот дар бораи таъину аломатгузорӣ дар марзро идома медиҳанд.

Ҷопон ба паноҳҷӯёни афғон дар Тоҷикистон кӯмак мекунад

19 июни соли 2015. Паноҳҷӯёни афғон дар Тоҷикистон

Ҳукумати Ҷопон ба паноҳҷӯёни афғон дар Тоҷикистон кӯмаки бебозгашти фаврӣ хоҳад кард. Дар хабарномаи сафорати ин кишвар дар Душанбе омадааст, аз ёрии ҳукумати Ҷопон кишварҳои Афғонистон, Тоҷикистон, Покистон, Эрон ва Узбекистон бархӯрдор хоҳанд буд. Маблағи умумии кӯмак аз 65 миллион доллар иборат буда,ба Тоҷикистон тариқи Раёсати Комиссариати олии умури паноҳандагони СММ 700 ҳазор доллар дода мешавад. Манбаъ меафзояд,Ҷопон кумакҳои башардӯстонаро тавассути ҳафт созмони байналмилалӣ барои таъмин бо манзил, бахшҳои беҳдошт, обрасонӣ, ғизо, кишоварзӣ ва маориф равона мекунад. Чанд рӯз қабл Саймуъмин Ятимов, раиси Кумитаи давлатии амнияти миллии Тоҷикистон гуфта буд,ки дар ду моҳи охир беш аз 15 ҳазор паноҳҷӯ аз Афғонистон ба Тоҷикистон омадаанд.

Ҷаласаи Теҳрон: Даъват ба таъсиси ҳукумати фарогир ва роҳ надодан ба нирӯҳои хориҷӣ дар Афғонистон

Теҳрон, 27 октябр. Вазири корҳои хориҷии Тоҷикистон Сироҷиддин Муҳриддин ва сафири Тоҷикистон дар Эрон Низомиддин Зоҳидӣ

Вазирони умури хориҷии кишварҳои ҳамсояи Афғонистон, аз ҷумла Тоҷикистон рӯзи чаҳоршанбе дар шаҳри Теҳрон, пойтахти Эрон ҷамъ омада ва роҳҳои таъмини сулҳи пойдор дар он кишвари зери ҳукумати Толибонро баррасӣ карданд. Вазири умури хориҷии Тоҷикистон дар нишаст, дигарбора мавқеи кишварро такрор кард ва аз вазъи башарӣ дар Панҷшер изҳори нигаронӣ кард. Дар нишаст вазирони Покистону Туркманистон ва Узбекистон ҳузур доштанд ва ҳамтоёни онҳо аз Чину Русия тавассути иртиботи онлайнӣ дар нишаст суханронӣ карданд. Ҳусейн Амирабдуллоҳиён, вазири умури хориҷии Эрон дар ин нишаст гуфт, кишвараш тарафдори як ҳукумати фарогир дар Афғонистон аст. Сироҷиддини Муҳриддин, вазири корҳои хориҷии Тоҷикистон ҳам айни назарро гуфта афзудааст, ки Тоҷикистон ҳамеша тарафдори таъсиси як ҳукумати фарогир ва бо ҷалби тамоми неруҳои сиёсӣ ва аққалиятҳои миллӣ дар Афғонистон аст. Ӯ аз вазъи башарӣ дар водии Панҷшер, ки аксаран тоҷикнишин аст, изҳори нигаронии амиқ кард. Сергей Лавров дар ин нишаст аз ҳамсоякишварҳои Афғонистон даъват кард, неруҳои ғарбиро дар қаламравҳояшон ҷой надиҳанд. Ӯ гуфт: “Бори дигар аз кишварҳои ҳамсояи Афғонистон даъват мекунем, ки иҷоза надиҳанд, ки нерӯҳои Амрико ва НАТО баъд аз тарки Афғонистон дар қаламравҳояшон ҳузур дошта бошанд”.

Русия кишварҳои Осиёи Марказиро як ҳавзаи таҳти нуфузи худ мешуморад ва ҳамеша ба ҳузури неруҳои ғарбӣ дар онҷо мухолифат кардааст. “Толибон” моҳи август Афғонистонро гирифтанд ва ҳукуматеро ташкил додаанд, ки касе онро ба расмият намешиносад. Давлати Тоҷикистон ҳам гуфтааст, ҳукуматеро дар Афғонистон ба расмият мешиносад, ки дар он ҳамаи аққалиятҳо ва бахусус тоҷикон саҳми сазовори худро дошта бошанд.

Байден пеш аз парвоз ба G20 мехоҳад тарҳи буҷа қабул шавад

Президенти ИМА Ҷо Байден  

Рӯзҳои истироҳат раҳбарони кишварҳои узви Гурӯҳи бистгонаи пешрафтаи иқтисодӣ ё G20 дар нахустин мулоқоти ҳузурие дар давраи пандемияи COVID-19 ҷаласа мекунанд. Дар ҷаласае, ки дар шаҳри Руми Итолиё мегузарад, президенти ИМА Ҷо Байден ҳам иштирок хоҳад кард. Пеш аз парвоз ба Аврупо Байден ният дорад рӯзи 28-уми октябр дар миёни демократҳои Маҷлиси намояндагон тарҳи буҷаро баррасӣ ва ба қабули он пойфишорӣ кунад.

Раҳбарони демократҳо гуфтаанд, ки шонси қабули ин санад зиёд аст. Дар миёни хароҷоти аслии буҷа маблағгузории барномаҳои сиҳҳатӣ, боғчаҳои бачагона ва ҳам ҷудо кардани 500 миллиард доллар ба муқобила бо тағйироти иқлим мебошад.

Байден аз Конгресс хост, ки ин тарҳро ба як ҳолати ниҳоӣ наздик кунад.

Дар Узбекистон муовини декан бо гумони озори ҷинсии донишҷӯ дастгир шудааст

Акс аз бойгонӣ.

Муовини декани Донишгоҳи давлатии омӯзгории шаҳри Тошканди Узбекистон бо гумони озори ҷинсии донишҷӯи курси севум дастгир шудааст. Дар ин бора намояндаи расмии Вазорати умури дохилии Узбекистон Шохрух Ғиёсов хабар додааст.

Бино ба навиштаи тарҳи Nemolchi, донишҷӯй М.К. барои пешниҳоди номзадияш ба ҷоизаи Зулфия, ба назди муовини декан оид ба умури ҷавонон рафта, аз ӯ хостааст, ки барояш тавсифнома диҳад. Муовини декан ба донишҷӯдухтар дастдарозӣ кардааст. Вале баъди фарёд задани духтару тақ-тақ шудани дар ӯро аз тиреза ба замин партофтааст.

Донишҷӯй бо нишонаҳои шикастани устухонҳои кос ва осеби мағзӣ дар беморхона бистарӣ шудааст.

Зидди муовини декан, ки 23 октябр дастгир гаштааст, бо бандҳои "таҷовуз" ва "барқасдона расонидани зарари ҷисмонӣ" парванда боз кардаанд.

Дар ҷануби Қирғизистон сокинон зидди истихроҷи ангишт тазоҳурот карданд

Эътирози сокинони деҳаи Согондуи ноҳияи Алайи вилояти Ӯш.

Ҳудуди 200 сокини деҳаи Согондуи ноҳияи Алайи вилояти Ӯши Қирғизистон зидди коркарди як кони ангишт ҳамоиши эътирозӣ баргузор карданд.

Яке аз эътирозгарон бо номи Миртемир Раҳмонбердиев ба бахши қирғизии Радиои Озодӣ гуфт, сокинон зидди истихроҷи кони ангишти "Тайгак-Таш", ки дар 2,5-километрии деҳа ҷойгир аст, тазоҳурот намуданд. Ба гуфтаи эътирозгарон, коркарди кон муҳити зист ва обро ифлос мекунад.

Муовини раиси ноҳияи Алай Шерикбой Жапанов бо тазоҳургарон мулоқот кард. Раиси Согонду Килич Мусоев гуфт, бештари сокинони маҳаллӣ ду соли ахир зидди коркарди кони ангишти мазкур эътироз доранд.

Туркия фаъоли туркманро баъди гуруснанишинӣ озод кард

Тазоҳуроти туркманистониҳо дар Истанбул. Акс аз бойгонӣ.

Фаъоли мадании туркман Аҳмад Раҳмонови 47-сола, ки 22-юми октябр дар Туркия дастгир гашта буд, озод шудааст. Ба фаъолони боздоштшудаи дигари Туркманистон дар он кишвар ихроҷ ба ватан таҳдид мекунад.

Созмони Дидбони Ҳуқуқи Башар (Human Rights Watch) 26 октябр хабар дод, ки мақомоти турк Раҳмоновро озод карданд. Пештар созмон аз Анқара даъват карда буд, ки фаъолони боздоштшудаи туркманро озод карда, имкон диҳад, ки дар доираи қонун дар Туркия зиндагӣ кунанд.

Аҳмад Раҳмонов мудири саҳифаи гуруҳи "Интихоби демократии Туркманистон" дар шабакаҳои иҷтимоӣ буд. Вай ҳукумати Туркманистонро дар шабакаҳои иҷтимоӣ ошкоро танқид мекард.

Раҳмонов 18 октябр барои тамдиди муҳлати иҷозатномаи зисти худ ба шуъбаи Хадамоти муҳоҷирати Туркия дар шаҳри Анталия рафт ва дар онҷо дастгир шуд. Ӯ дар боздоштгоҳ зидди сиёсатҳои президенти Туркманистон Қурбонгулӣ Бердимуҳаммадов гуруснанишинӣ эълом кард.

Дар баробари Раҳмонов чандин фаъоли мадании туркмани дигар низ дастгир шудаанд. Аз ҷумла, Комил Абулови 35-сола шоми 18 октябр дар манзили зисташ дар Истамбул дастгир шуд. Ҳамсари Абулов гуфт, рӯйхати 28 касе мавҷуд аст, ки бояд бо дархости консулгарии Туркманистон дастгир шаванд.

Мақомоти Туркия ва Туркманистон то ҳол боздошти фаъолонро шарҳ надодаанд.

Узбекистон соҳиби рамзҳои расмии президент шуд

Аз ин ба баъд президенти Узбекистон рамзҳои расмӣ - аломат ва штандарт хоҳад дошт. Қонун дар ин бора аз сӯи президент Шавкат Мирзиёев рӯзи 25-уми октябр имзо шуд.

Акнун дар рӯзи савгандёдкунии президент ба вай аломат ва штандарт - парчами президентӣ дода мешавад.

Ин дар ҳолест, ки 30 сол баъди касби истиқлол дар Узбекистон рамзҳои президент ҷорӣ мешаванд.

Парчами президент дар ҳамаи чорабиниҳои муҳим, ки бо ширкати президент баргузор мешаванд, овехта мегардад.

Қазоқистон барои бонувони афғон роҳ кушод

Ҳавопаймое дар фурудгоҳи Алмаато

Қазоқистон барои берун рафтани занони додрас, вакилони порлумон ва аъзои хонаводаи онҳо аз Афғонистон роҳи транзитӣ ташкил кардааст.

"Раҳбари давлат бо назардошти пойбандии Қазоқистон ба уҳдадориҳои байнулмилалии худ чунин тасмим гирифт", - омадааст дар иттилоияи Вазорати корҳои хориҷии Қазоқистон.

Ба иттилои сомонаи маҳалли Informburo, мебоист, тавассути ин "долони сабз" 99 кас ба хориҷ аз Қазоқистон парвоз кунанд.

Ба огаҳии вазорат, роҳи мазкури транзитӣ дар ҳамкорӣ бо созмонҳои байнулмилалии ғайридавлатӣ тавассути фурудгоҳи шаҳри Алматои Қазоқистон ташкил карда шудааст.

Боздошти шаҳрванди Тоҷикистон дар Қирғизистон

Сарҳади Тоҷикистону Қирғизистон

Вазорати корҳои дохилии Қирғизистон аз боздошти як шаҳрванди Тоҷикистон бо гумони фурӯши маводи мухаддир хабар дод. Вазорат гуфт, шаҳрванди Тоҷикистон дар роҳи деҳаи Ҷаштики вилояти Бодканд, ҳаммарз бо вилояти Суғд, дастгир шудааст.

Аз шаҳрванди Тоҷикистон гуё беш аз 9 кило ҳашиш дарёфт ва мусодира шудааст. Ба иттилои мақомоти Қирғизистон, санҷиш нишон додааст, ки онҳо "ҳашиши афғонӣ" ҳастанд. Мақомоти Тоҷикистон ҳанӯз дар ин бора хабаре надодаанд.

Ба зидди шаҳрванди Тоҷикистон бо банди "Қочоқи маводи мухаддир" парванда боз шуда, ӯ феълан дар боздоштгоҳи муваққатии ноҳияи Лайлаки Қирғизистон нигаҳдорӣ мешавад.

Номи шаҳрванди Тоҷикистон ва ҷузъиёти дигари қазия дар даст нест. Ҳамчунин, маълум нест, ки оё шахси боздоштшуда ба ин иттиҳом чӣ назар дорад ва то куҷо бо вакили мудофеъ таъмин шудааст.

Чанде пеш Додгоҳи ноҳияи Лайлак ду шаҳрванди Тоҷикистонро ба зиндони якумрӣ ва се шаҳрванди тоҷики Қирғизистонро ба ҳабс маҳкум кард. Онҳоро дар пайванд ба задухӯрди мусаллаҳонаи моҳи апрели имсол дар сарҳади Тоҷикистону Қирғизистон гунаҳкор карданд, вале пайвандонашон беасос медонанд.

Ваколати Ангела Меркел дар Олмон расман ба поён расид

Ангела Меркел, ки аз моҳи ноябри соли 2005 садри аъзами Олмон буд, расман аз мансаби раиси ҳукумати Олмон канор рафт.

26-уми октябр, дар рӯзи ҷаласаи аввали порлумони нав, президенти Олмон Франк-Волтер Штайнмайер ба Меркел ва аъзои ҳукуматаш санади ба поён расидани ваколатҳояшонро дод.

Акнун, бино ба Конститутсияи Олмон, Меркел ва аъзои ҳукуматаш то замони ташкили ҳукумати нав ба иҷрои ваколатҳояшон муваққатан идома медиҳанд.

Интихоботи порлумонӣ дар Олмон 26-уми сентябр баргузор шуд. Дар он Ҳизби сотсиал-демократ бо роҳбарии Олаф Шолтс пирӯз шуд. Барои ташкили ҳукумати нав миёни ҳизбҳои сиёсие, ки вориди порлумон шуданд, гуфтугӯҳо идома доранд.

Вазири тоҷик бо мақомоти Эрон ҳамкориҳоро баррасӣ кардааст

Вазирони корҳои хориҷии Тоҷикистон ва Эрон Сироҷиддин Муҳриддин ва Ҳусейн Амир Абдуллоҳиён

Вазири корҳои хориҷии Тоҷикистон, Сироҷиддин Муҳриддин, бо президенти Эрон Иброҳим Раисӣ ва вазири умури хориҷии он кишвар Ҳусейн Амир Абдуллоҳиён мулоқот кардааст.

Дидори онҳо дар остонаи ҷаласаи ҳамсояҳои Афғонистон дар Теҳрон гузашт.

​Ба навиштаи сомонаҳои расмии Тоҷикистон, дар мулоқот "алоқамандии ҷонибҳо барои густариши равобити сиёсӣ, тиҷоратию иқтисодӣ ва фарҳангӣ" таъкид шудааст.

Як мавзӯи суҳбат вазъ дар Афғонистон будааст, ки Тоҷикистон ва Эрон хоҳони ташкили як ҳукумати фарогир ва истиқрори сулҳу субот дар он кишвар ҳастанд.

Интизор меравад, Сироҷиддин Муҳриддин ва дипломатҳои дигари Тоҷикистон дар ҷаласаи "вазирони корҳои хориҷии кишварҳои ҳамсояи Афғонистон+Русия" низ иштирок кунанд.

ТАСС навишт, дар ин нишаст Сергей Лавров, вазири корҳои хориҷии Русия, суханронӣ мекунад. Бори нахуст кишварҳои ҳамсояи Афғонистон 8-уми сентябр дар як нишасти маҷозӣ мулоқот карда буданд.

Дар нишасти рӯзи чоршанбе раҳбарони сиёсатҳои хориҷии кишварҳои Эрон, Русия, Чин, Покистон, Тоҷикистон, Туркманистон ва Узбекистон иштирок мекунанд ва тамаркузи онҳо сари масоили Афғонистон, аз ҷумла, ташкили ҳукумати фарогир, равона мешавад.

Кишоварзони Узбекистонро маҷбур доранд, заминҳояшонро ба ихтиёри давлат супоранд

Замини пахта дар Узбекистон

Кишоварзони ноҳияи Букини вилояти Тошканди Узбекистонро маҷбур доранд, ки "дар бораи ихтиёрӣ ба захираи давлатӣ интиқол додани заминҳояшон" ариза нависанд.

Яке аз кишоварзон гуфт, шахсан шоҳиди 30 ҳолате шудааст, ки аз кишоварзон иҷборан ариза гирифтаанд.

"Нахустин ҳолат рӯзи 17-уми октябр сурат гирифт. Он замон 20 кишоварз маҷбуран ариза навиштанд", - гуфт ҳамсуҳбати бахши узбекии Радиои Озодӣ.

"Мақомоти маҳаллӣ аз нерӯи мақомоти қудратӣ дар маҷбур кардани кишоварзон ба навиштани ариза истифода мекунанд", - мегӯянд кишоварзон.

Бо ин вуҷуд, мақомоти маҳаллӣ ин хабарҳоро рад мекунанд.

Абдурозиқ мусобиқаи ҷаҳонии боксро дар Белград ифтитоҳ кард

Акси Абдурозиқ аз моҳи январи соли 2020. Манбаъ: "Азия-Плюс"

Абдурозиқ, овозхони ҷавон ва блогери маъруфи тоҷик, дар маросими ифтитоҳи мусобиқаи қаҳрамонии бокси ҷаҳон дар Белград ширкат карда, ду тарона хондааст.

Ӯ дар Instagram видеоеро аз ҷараёни ҳунарнамоиаш дар ин маросим гузошт. Тоҷикистонро дар қаҳрамонии бокси ҷаҳон, ки 25-уми октябр дар Сербия шуруъ шуд, ҳашт варзишгар намояндагӣ мекунанд.

Мусобиқаи қаҳрамонии бокси Осиё дар миёни наврасону ҷавононро ҳам тобистони имсол Абдурозиқ бо задани зангӯла оғоз карда буд. Ин рақобатҳо дар Дубай баргузор шуданд.

Абдурозиқи 18-сола блогери маъруфи тоҷик дар Инстаграм аст. Шумораи обуначиёни ӯ дар ин шабака ба беш аз якуним миллион нафар расидааст.

Ба Абдурозиқ замоне таваҷҷуҳ карданд, ки дар кӯчаву бозорҳои зодгоҳаш “бо сӯзу гудоз” тарона мехонд. Ӯ бо ёрии репсарои тоҷик, “Барон”, аз Панҷакент ба пойтахт омад ва ба саҳнаҳои калони Тоҷикистон ва берун аз он роҳ ёфт.

Ҳуввияти муҳоҷирзаноне, ки аз шароити ғуломӣ шикоят карданд, мушаххас шуд

Акс аз бойгонӣ

Ду рӯз пеш дар шабакаҳои иҷтимоӣ наворе ба чархиш даромад, ки дар он се зани тоҷик аз шароити ғуломии худ дар Русия шикоят карда, хостори кӯмак шудаанд. Онҳо дар ин навор гуфтанд, як марди тоҷик онҳоро бо ваъдаи кор ба ин кишвар овардааст. Ин занҳо мегӯянд, давоми се моҳ кори кишоварзӣ кардаанд, вале маблағи ваъдагияшонро нагирифтаанд. Ҳамчунин марди корфармо, ки озарбойҷонӣ будааст, шиносномаҳояшонро бозпас намедиҳад. Дар пайи нашри навор, Муҳаммадиқболи Ато, сухангӯи вазорати меҳнат ва муҳоҷирати Тоҷикистон навиштааст, ин занон зодагони ноҳияҳои Вахш ва Кушониён буда, бе ягон санади расмӣ ба кор ҷалб шудаанд. Ҳоло онҳо дар Екатеринбург мебошанд. Ба қавли Муҳаммадиқболи Ато, қазияи ин муҳоҷирзанон таҳти назорати сафорати Тоҷикистон ва намояндагии Вазорати меҳат дар Русия карор дошта, ба онҳо ёрии ҳуқуқӣ ва моддӣ расонида бо ҷойи кор низ таъмин мешаванд.

Ёфтҳои бештар

XS
SM
MD
LG