Муовини вазири иқтисод ва молияи Қирғизистон рӯзи 29-уми июл дар ҷаласаи порлумони он кишвар гуфт, сохтмони 60 манзили зист дар вилояти Бодканд, ки дар натиҷаи низои марзӣ бо Тоҷикистон осеб дида буданд, ба поён расидааст.

Дониёр Имоналиев, дар ин бора дар посух ба интиқодҳои як вакил дар мавриди ба дарозо кашидани бунёди хонаҳои осебдида хабар дод.

Ба гуфтаи ӯ, сохтмони хонаҳои мазкур ба далели дер расидани маҳсулоти сохтмонии онҳо аз Туркия тӯл кашид.

"Аз 140 хона сохтмони 60-тоаш ба поён расидааст. 15 хонавода аллакай ба манзилҳои нави худ даромадаанд", -- афзуд ӯ.

Пештар намояндаи махсуси президенти Қирғизистон дар вилояти Бодканд, Маъмурҷон Раҳимов, гуфта буд, теъдоди хонаҳое, ки дар натиҷаи низои марзӣ бо Тоҷикистон тахриб шудаанд, ба 140 расидааст. Пештар шумори онҳо 136 адад гуфта мешуд.

Ба гуфтаи Раҳимов, тамоми ин хонаҳо то ҷашни 30-солагии Истиқлоли давлатии Қирғизистон мавриди истифода қарор хоҳанд гирифт.

Рӯзҳои 28-29-уми апрели имсол дар марзи Қирғизистону Тоҷикистон низоъ сар зада, дар натиҷаи он аз ҳар ду ҷониб даҳҳо манзили зист ба коми оташ фурӯ рафтанд.

Моликони нави “Имон интернешнл” дар шаҳри Хуҷанд мегӯянд, бастаи саҳмияҳои ин ташкилоти молиро аз соҳибони пешинаи он бо нархи бозор харидаанд. Ин нукта дар як нишасти хабарӣ дар Хуҷанд рӯзи 28-уми июл садо дод.

Пештар муҳаққиқони OCCRP, Маркази пажӯҳиши фасод ва ҷиноятҳои созмонёфта, ошкор карда буданд, ки "Имон интернешнл" дар як амалиёти печида ва шубҳанок аз дасти муассисони тоҷикистониаш бо нархи арзон гирифта шуда, соҳибкори итолиёвӣ Винчензо Транӣ бастаи асосии саҳмияҳоро ба даст овард.

ИНЧУНИН, БИХОНЕД:

"Имон"-ро кӣ хӯрд? Миллионҳои шубҳанок ё фишори Бонки миллӣ? Таҳқиқи OCCRP

Муаллифони таҳқиқ навиштаанд, дар харидани саҳмияҳо, соҳибкори итолиёвӣ аз пуштибонии Ҷамолиддин Нуралиев, муовини аввали раиси Бонки Миллӣ ва домоди раиси ҷумҳурии Тоҷикистон бархӯрдор буд.

Моликони нав фошкориҳои журналистони таҳқиқгарро бепоя хонданд. Александр Ерёмин, раиси Шӯрои нозирони “Имон интернешнл” гуфт, “мефаҳмед, агар ин матлаб асос медошт, мо ҳоло шоҳиди бозпас гирифтани амонатҳо мешудем. Зеро агар туро ба фаъолиятҳои ношаффоф айбдор кунанд, муштариҳо безобита шуда, мераванд."

Дар тақвияти ин иддао худи Ерёмин гуфт, сармоягузорони “Имон интернешнл” ҳамкориро бо ин ташкилот қатъ накарда, балки идома медиҳанд. Ӯ афзуд, ахиран Бонки Аврупоии Таҷдид ва Рушд барои “Имон интернешнл” 4 миллион доллар қарз ҷудо кард.

Дар ин нишаст ҳамчунон гуфта шуд, хариду фурӯши саҳмияҳои Имон интернешнл” зери назари мақомоти Тоҷикистон сурат гирифт ва хилофкорие дар он рӯй надодааст.

Хариду фурӯши "Имон интернешнл", ки баҳсҳои зиёдро ба миён овардааст, моҳи марти соли 2021 анҷом шуд. Бар асоси он, ширкати Mikro Kapital, Бонки Аврупоии Таҷдид ва Рушд ва Бонки рушди соҳибкории FMO-и Ҳолланд ба сурати умум 43,5 дарсади саҳмияҳои Imon International-ро, ки дар дасти саҳоми асосии он -- Фонди хурди қарздиҳии "Имон" буд, ба 5,4 миллион доллар хариданд.

ИНЧУНИН, БИХОНЕД:

Чаро "Имон" ба чоҳ афтод? Миллионҳо доллар ҳамчун қазияи "пулшӯйӣ" -- OCCRP

"Имон интернешл" яке аз ниҳодҳои фаъоли қарзӣ дар Тоҷикистон мебошад, ки соли 2005 аз сӯйи Гулбаҳор Маҳкамова ва Санавбар Шарифова ташкил шуд. Ҳадафи онҳо аз ибтидо расондани хадамоти молиявӣ ба занони соҳибкор буд.

Ташкилоти "Имон интернешнл" дар солҳои охир ба яке аз иштирокчиёни асосии бозори бонкии Тоҷикистон табдил шуд ва аз сармоягузорони хориҷӣ маблағҳои калони қарзӣ ҷалб кард. Мушкил дар кори "Имон интернешл" соли 2017 оғоз шуд.

Дар он сол Бонки Миллӣ эълон кард, ки дар кори "Имон" ва бонки "Эсхата" камбудҳои зиёд ошкор шудааст. Дар пайи эълони Бонки Миллӣ, роҳбарияти онвақтаи "Эстаха" ва "Имон" аз мақомҳояшон барканор шуданд. Чанде баъд Бонки миллӣ бо судури як қарор фондҳоеро мисли «Имон» уҳдадор кард саҳмияҳошонро фурӯшанд. Ин қарори Бонки миллӣ ба Гулбаҳор Маҳкамова ва Санавбар Шарифова интихоберо ҷуз фурӯхтани саҳмияҳояшон нагузошт.

Намояндагони ширкати "Барқи тоҷик" гуфтанд, аҳолӣ аз истифодаи нерӯи барқ 1,3 миллиард сомонӣ қарздор аст. Баъзе аз хабарнигорон дар нишасти матбуотии масъулони ширкат ин оморро ба баҳс кашиданд.

Исмоил Маликов, масъули “Шабакаҳои тақсими барқ”, рӯзи 29-уми июл гуфт, имсол қарзи аҳолӣ дар назди барқ зиёд нашуда, 1,3 миллиард смонӣ қарзе аст, ки солҳои пеш ҷамъ шудааст. «Имсол, баръакс, аҳолӣ пешпардохт доштанд», -- афзуд ӯ.

Мавзӯи қарзи аҳолӣ аз истифодаи барқ миёни хабарнигорон ва масъулони “Барқи тоҷик” баҳси гармеро ба миён овард. Чанд хабарнигор худашонро мисол оварда, гуфтанд, «агар ҳаққи барқро пардохт накунӣ, нозири барқ симро мебурад.»

Масъулини “Барқи тоҷик” чанд дафъа талош карданд, собит кунанд, ки омори қарзи аҳолӣ аз истифодаи барқ дуруст аст. Даъвоҳои ширкат дар бораи қарздории аҳолӣ солҳои пеш ҳам шубҳаву гумонҳои зиёдро ба миён оварда буд. Аз рӯи омори “Барқи тоҷик” аҳолӣ бузургтарин қарздор аст.

Инҳо низ аз «Барқи тоҷик» қарздор будаанд:

• Талко – 422 миллион сомонӣ;
• Оҷонси беҳдошти замин – 333 миллион сомонӣ;
• Хоҷагиҳо – 201 миллион сомонӣ;
• Соҳаи обу корез – 52 миллион сомонӣ.

Дар ҳамин ҳол, як масъули ширкати "Барқи тоҷик" гуфт, қисми асосии қарзи аҳолӣ маблағе аст, ки 10-20 сол пеш ҷамъ шуда, бояд бахшида шавад.

"Масалан, як қисми маблағ қарзи колхозҳо аст. Колхозу совхозҳо дигар нестанд. 10 сол пеш аудиторони байналхалқӣ тавсия доданд, ки як қисми ин қарз ҳамчун қарзи беэътимод бахшида шавад. Вале ин кор то ҳол сурат нагирифтааст", -- гуфт масъули «Барқи тоҷик» бе зикри номаш.

Коршиносон сабабҳои ин мушкилро ба мудирияти нодуруст рабт медиҳанд. Айни замон баъзе аз кормандони ширкат бе зикри номи худ мегӯянд, қарзҳои зиёд умдатан аз корхонаву шахсонест, ки ба хешовандони мансабдорон тааллуқ доранд.

Масъулони ширкати “Барқи тоҷик” гуфтанд, нархи истифодаи барқ имсол дар Тоҷикистон гарон мешавад, аммо нагуфтанд, ки чӣ қадар.

Рустам Маҷидзода, сардори департаменти иқтисод ва молияи ширкати “Барқи тоҷик”, рӯзи 29-уми июл гуфт, нархи барқро «як гуруҳи корӣ дар назди Хадамоти зиддиинҳсорӣ муайян мекунанд».

Масъули “Барқи тоҷик” афзуд, онҳо хароҷоти худро ба ин гуруҳи корӣ пешниҳод кардаанд ва дар ниҳоят ҳукумат тасмим мегирад, ки нархи барқ чӣ қадар бошад.

Рустам Маҷидзода дар посух ба суоли Радиои Озодӣ гуфт, арзиши асосии истеҳсоли як киловат барқ дар Тоҷикистон бе назардошти хароҷоти интиқол 20 дирам мебошад. Маҳмадумар Асозода, муовини аввали раиси “Барқи тоҷик”, шарҳ дод, ки «арзиши аслии истеҳсоли барқ вобаста ба хароҷот метавонад зиёдтар бошад.»

Дар бораи боло рафтани нархи барқ рӯзи 12-уми июл вазири энержӣ ҳам суҳбат кард. Пештар баъзе аз сокинон аз ҳаргуна тасмими мақомот барои боло бурдани нархи барқ танқид кардаанд. Мақомот ҳамвора мегӯянд, нархи истифода аз барқ дар Тоҷикистон дар муқоиса ба кишварҳои дигари пасошӯравӣ хеле поин аст.

Чанд созмони молии байналмилалӣ, аз ҷумла Бонки Ҷаҳонӣ дар чанд шарти худ ба Тоҷикистон боло бурдани қимати барқро зикр кардаанд.

Нархи барқ пайваста дар Тоҷикистон боло меравад ва танҳо соли гузашта ба хотири пандемия ҳукумат афзоиши нархи барқро манъ кард.

Масъулони ширкати “Барқи тоҷик” гуфтанд, тасарруфи чанд минтақаи наздимарзӣ аз сӯи гуруҳи Толибон ба интиқоли барқ ба Афғонистон ягон таъсир нарасондааст.

Маҳмадумар Асозода, муовини аввали ширкати “Барқи тоҷик”, рӯзи 29-уми июл ҳангоми нишасти хабарӣ гуфт, сарфи назар аз вазъи сиёсӣ содироти барқ ба Афғонистон идома дорад.

Муовини аввали раиси “Барқи тоҷик” афзуд, дар моҳҳои июн ҳолатҳои корношоям шудани симчӯбҳо сабт шудааст, аммо дар моҳи июл ин ҳолатҳо камтар буд. Аммо ин масъули “Барқи тоҷик” нагуфт, ки чӣ қадар симчӯбҳои интиқоли барқ хароб шудаанд.

Дар соли 2016 дар ҷараёни даргириҳои шадид миёни гурӯҳи Толибон ва нерӯҳои амниятии Афғонистон дар вилояти Бағлон, як пояи хатти интиқоли нерӯи барқи баландшиддат тахриб шуда буд. Дар пайи он шаҳри Кобул - пойтахти Афғонистон ба камбуди нерӯи барқ рӯбарӯ шуд.

ИНЧУНИН, БИХОНЕД:

Тахриби пояи дигари барқи содиротии Тоҷикистон дар Бағлон

Маҳмадумар Асозода афзуд, дар шаш моҳи аввали имсол ба Афғонистон 457,9 миллион киловат соат барқ содирот шудааст. Ширкати “Барқи тоҷик” барқро асосан ба ширкати “Брешно”-и Афғонистон мефурӯшад. Нархи як киловат барқ барои Афғонистон 4,5 сент будааст.

Дар вилояти Кобул, Нангарҳор, Лағмон, Лугар, Пактико, Парвон, Панҷшер, Каписо ва Бағлон аз нирӯи барқи воридотӣ аз Тоҷикистон истифода мекунанд.

Дар ду моҳи охир бахши калони минтақаҳои ҳаммарзи Афғонистон бо Тоҷикистон ба тасарруфи гуруҳи Толибон даромад ва нигарониҳо дар бораи таъмини амният зиёд шуд.

Мақомоти расмии Русия мегӯянд, ин кишвар ҳеч қароре дар бораи фиристодани нерӯҳои иловагӣ барои кумак дар муҳофизати марзи кишварҳои Осиёи Марказӣ бо Афғонистон қабул накардааст.

Дмитрий Песков, сухангӯи Владимир Путин, раиси ҷумҳурии Русия, рӯзи 29-уми июл дар шаҳри Маскав ба хабарнигорон гуфт, ончӣ ки дар Афғонистон мегузарад, мояи нигаронии амиқ барои Маскав аст. Ӯ афзуд: "Мо омодаем, дар муқобили хатарҳое, ки Афғонистон меоянд, дар канори муттафиқони худ биистем."

Песков гуфт, Владимир Путин ҳеч қароре дар бораи фиристодани нерӯҳои иловагӣ ба марзи Афғонистон қабул накардааст, вале аз тамринҳои низомии муштараке ёдовар шуд, ки қарор аст, ба зудӣ дар Тоҷикистон сурат бигирад.

Аз ин пештар низомиёни Русия гуфтанд, ки аз 5 то 10-уми август дар размоишгоҳи Ҳарбмайдони Тоҷикистон ва 20 километр дуртар аз сарҳади Афғонистон сарбозони Русияву Тоҷикистону Узбекистон машқҳои ҷангӣ баргузор мекунанд.

Дар ин размоиш бештар аз 1500 афсару сарбоз ширкат меварзанд ва роҳҳои маҳви гуруҳҳои мусаллаҳ ва муҳофизати иншооти муҳимро меомӯзанд.

Юсуф Раҳмон, додситони кулли Тоҷикистон, бо як сафари корӣ ба Олмон рафта, бо чанд мансабдори он кишвар дар бораи мубориза бо терроризму истирдоди гумонбарон ба ҷиноят суҳбат кардааст.

Дар шаш соли охир даҳҳо шаҳрванди Тоҷикистон дар Олмон паноҳанда шудаанд. Онҳо худро қурбонии саркӯб дар Тоҷикистон медонанд вале мақомот ба ифротгароиву ҳамкорӣ бо созмонҳои мамнуъ муттаҳам мекунанд.

Дафтари матбуоти Додситонии кул дар бораи ҷузъиёти суҳбатҳо, аз ҷумла оё дахл доштани ин сафар ба қазияи паноҳандаҳои сиёсӣ тафсилот надод.

Аммо бино бар иттилоияи расмии он, Юсуф Раҳмон рӯзҳои 27 ва 28-уми июл бо додситони кулли Олмон, додситони шаҳри Дюсселдорф ва мансабдорони Замини Рейни Шимолӣ-Вестфалия мулоқот кардааст. Минтақаҳое, ки шаҳрвандони Тоҷикистон бештар ҳузур доранд.

Дар гузашта дар Вестфилия чанд чанд шаҳрванди Тоҷикистон дастгир ва иддае аз онҳо бо гумони ифротгароӣ ба зиндон маҳкум шуданд.

“Дар мулоқот масъалаҳои муқовимат ба терроризму экстремизм, ҷинояткории муташаккили фаромиллӣ, ҳифзи ҳуқуқи шаҳрвандони ду кишвар, парвандаҳои ҷиноии мушаххас, истирдоди ҷинояткорони дар кофтукоб қарордошта... баррасӣ шуданд”, -- навишт дафтари матбуоти Додситонии кулли Тоҷикистон. Ба иттилои манбаъ, “сафар ҳанӯз идома дорад”, вале ҷузъиёташ дастрас нест.

Аз соли 2015 ба ин тараф садҳо шаҳрванди Тоҷикистон барои паноҳҷӯйӣ ва кору иқомат ва таҳсил ба кишварҳои аврупоӣ, аз ҷумла Олмон рафтаанд. Дар миёни онҳо ҷонибдорони ҳизби ҳоло дар кишвар мамнӯи наҳзати исломӣ, "Гуруҳи 24", хабарнигорону тоҷирон, ҳомиёни ҳуқуқ ва пайравони равияҳое ба монанди салафия низ ҳастанд.

Аксари ин афрод далели паноҳҷӯйӣ дар кишварҳои аврупоиро ба таъқибу саркӯб ва фишори афзоянда болои дигарандешон дар Тоҷикистон ва парвандаҳои сохта ба зидди онҳо рабт медиҳанд. Мақомоти Тоҷикистон баъзе аз онҳоро расман ба терроризму ифротгароӣ ва ҳамкорӣ бо созмонҳои фаъолияташон мамнуъ дар кишвар муттаҳам кардаанд.

"Корпуси шафқат" - як созмони хайрияи Амрико бо мақомоти Узбекистон тафоҳумномаи ҳамкориро дар бахши таъмини ғизои кӯдакистонҳои Узбекистон имзо кард. Дар ин бора сафорати Узбекистон дар ИМА хабар дод.

Ин барнома бо буҷаи бештар аз 21 миллион доллар барои таъмини ғизои бештар аз 400 кӯдакистон ва таъмири 245 кӯдакистони дигар пешбинӣ шудааст. Барнома дар маҷмуъ беҳсозии таҳсил ва ғизои 90 ҳазор кӯдакро дар назар дорад.

Ба ҷуз ин, дар доираи барнома густариши дастрасӣ ба таҳсилоти босифати томактабӣ барои кӯдакони аз 3 то 7-сола мадди назар аст.

Намояндагии "Корпуси шафқат" дар Узбекистон пас аз танаффуси даҳсола моҳи марти соли гузашта дубора ба кор шуруъ кард.

Вазорати корҳои дохилии Русия ҳушдор дод, он шаҳрвандони хориҷие, ки дар занозаниҳои гуруҳӣ иштирок мекунанд, на танҳо аз Русия берун, балки “мамнуъ-ул-вуруд” хоҳанд шуд. Ба гуфтаи масъулони ин ниҳод, ҳафтаҳои охир ҷанҷоли оммавии муҳоҷирон дар Русия зиёд шудааст.

Чунин ҳолатҳо дар Маскаву Санкт-Петербург, Амур, Свердловск ва Ҷумҳурии Доғистон сабт шуданд. Баъзе ин ҷанҷолҳо хушунат ва ҳамла ба намояндагони мақомотро низ дар пай доштааст. Ҳамчунин иштирокдорони занозаниҳо роҳҳоро баста, ба иншооти шаҳрӣ зарар расондаанд.

Дар Вазорати корҳои дохилии Русия иброз доштаанд, ки аксари муҳоҷирони ҷангҷӯ ҷазо гирифтанд. Онҳо 15 рӯз дар ҳабси маъмурӣ буда, сипас аз Русия депортатсия ё ихроҷ шуданд.

Як гуруҳ аз зодагони Осиёи Марказӣ рӯзи 12-уми июли имсол дар назди метрои Кузминки ҷанҷол карданд. Ба иттилои расонаҳои русӣ, шаби 27-уми июл низ муҳоҷирон дар яке аз кӯчаҳои марказии Санкт-Петеребург занозанӣ карданд ва он бештар ба муҳорибаи бидуни қоида монандӣ дошт.

Қирғизистону Тоҷикистон 40 километри дигари марзро “мушаххас карданд”.

Дар ин бора дар ҷаласаи порлумони Қирғизистон рӯзи 29-уми июл Абдулат Мирзоев, узви Кумисюни ҳукуматии он кишвар дар мавриди таъину нишонагузории сарҳад иттилоъ дод. Ҷониби Тоҷикистон дар ин бора чизе нагуфтааст.

"Дар 3 мулоқоти охири гуруҳҳои кории ду кишвар 40 километри дигари марз мушаххас шуд. Моҳи август мулоқот дар Тоҷикистон дар нақша аст. Корҳо идома доранд, аммо мо гуфта наметавонем, ки масъала кай ҳал мешавад", - гуфт Мирзоев.

Аз 12 то 17-уми июл дар шаҳри Бишкек мулоқоти гуруҳҳои кории Тоҷикистон бо Қирғизистон баргузор шуд. Мақомоти Қирғизистон ҷузъиёти ин мулоқотро шарҳ надоданд.

Тоҷикистон бо Қирғизистон 970-980 километр марз дорад, ки аз ин танҳо 519 километр мушаххас ва нишонагузорӣ шудааст. Ҳамасола дар минтақаҳои баҳсии марзи ду кишвар бо сабабҳои гуногун муноқиша сар мезанад.

Дар охири моҳи апрели соли ҷорӣ дар натиҷаи муноқишаи мусаллаҳона дар ноҳияи Исфараи Тоҷикистон бо Бодканди Қирғизистон аз ду тараф даҳҳо кас кушта ва даҳҳо манзилу иншооти дигар вайрон шуд.

Ҷо Байден, раиси ҷумҳурии Амрико, рӯзи 28-уми июл раҳбари мухолифини Беларус Светлана Тихановскаяро дар Кохи Сафед ба ҳузур пазируфт.

Ӯ пас аз мулоқот иброз дошт, ки Иёлоти Муттаҳида талошҳои мардуми Беларусро барои демократия ва ҳуқуқи башар дастгирӣ мекунад.

Тихановская, ки ҳоло дар ғурбат ба сар мебарад, дар суҳбат бо телевизиони “Настояшее Время” гуфт, суҳбаташ бo Байден кӯтоҳ, вале пурмуҳтаво буд. Вай афзуд, дар симои Байден шахсеро дид, ки ба сарнавишти мардуми Беларус бетафовут нест.

Светлана Тихановская таъкид кард, дар суҳбаташ бо президенти Амрико паёми мардуми Беларусро расонида, хотирнишон кардааст, муборизаи беларусиҳо "сиёсати ҷуғрофиёӣ" нест.

Пешвои мухолифини Беларус бо ҳадафи дарёфти пуштибонии бештар аз ҷунбиши демократии Беларус дар муборизааш бо раҳбари худкома, Александр Лукашенко, 18-уми июл ба Иёлоти Муттаҳида сафар кард.

Бино бар гармии ҳаво як пора пирях дар кӯҳҳои Сугати минтақаи Лахш (Ҷингатоли собиқ) канда шудааст. Дар натиҷа, ба иттилои расмӣ, яхпора маҷрои дарёи Тугат ва Сурхобро баст ва об қисме аз роҳи Ваҳдат-Лахш-Қирғизистонро зер намуд. Масъулони Кумитаи ҳолатҳои фавқулода рӯзи 29-уми июл гуфтанд, оқибатҳои офати табииро бартараф карданд. "Равуои нақлиёт барқарор гардида, сатҳи оби дарёи Сурхоб назорат карда мешавад", -- гуфтанд дар Кумита. Ба иттилои Маркази обу ҳавошиносии Тоҷикистон, ҳаво то 31-уми июл гарму хушк мемонад. Дар як қатор минтақаҳои кишвар эҳтимоли фаромадани селҳо мавҷуд аст.

Созмони Ҷаҳонии Тандурустӣ эълон кард, ки дар даври дуввуми маъракаи ваксинзанӣ ба зидди фалаҷи атфол дар Тоҷикистон бештар аз 1 миллиону 200 ҳазор кӯдак ваксина гирифтаанд.

Ин маърака баъди он оғоз шуд, ки моҳи ноябри соли гузашта дар кишвар чанд мавриди сирояти фалаҷи атфоли навъи дуввум дар вилояти Хатлон сабт шуд.

Дар баёнияи созмон, ки рӯзи 26-уми июл нашр шуд, омадааст, аз 22-юми ноябри соли 2020 то 13-уми июли имсол 15 мавриди сирояти фалаҷи атфол ба кӯдакон дар Тоҷикистон сабт шудааст.

Ин навъи беморӣ аз он навъи фалаҷ будааст, ки дар Покистон зиёд мушоҳида мешавад ва даври дуввуми ваксинзанӣ рӯзи 5-уми июл ба поён расидааст.

Созмони Ҷаҳонии Беҳдошт гуфтааст, ҳукумати Тоҷикистон ва маъмурони беҳдоштӣ аз моҳи март барои барномарезӣ ва анҷоми маъракаи ваксинзанӣ кор мекарданд ва бо вуҷуди авҷ гирифтани сирояти COVID-19 теъдоди зиёди кӯдакон ваксина гирифтаанд.

Дар баёния омадааст: "Дар даври аввали маъракаи ваксинзанӣ, ки моҳи июн ба поён расид, 99.2 дар сади кӯдакон ва дар даври дуввум 99.1 кӯдакон ваксина гирифтанд." Дар таъмин бо ваксина ва роҳандозии маърака Созмони Ҷаҳонии Тандурустӣ, Бунёди Ҳимоят Аз Кӯдакони Созмони Милал ва дигар муассисаҳои байналмилалӣ ба Тоҷикистон кумак мекунанд.

Тоҷикистонро аз соли 2002 кишвари орӣ аз фалаҷи атфол ва ё полиомелит эълон карда буданд, ҳарчанд то соли 2010 мавридҳои алоҳидаи сирояти беморӣ ва маргу мири кӯдакон аз он сабт шуда буд.

Бори охир, 11 сол пеш, дар кишвар вируси ин беморӣ ба 458 кӯдак сироят кард ва 29 нафари онҳоро кушт. Дар миёни 458 нафар тақрибан нисфи онҳо кӯдакони аз 1 то 5-сола будаанд.

Рӯзи 28 июл аз Қазоқистон 25 ҳазор воя ваксинаи QazVac-и зидди коронавирус ба Қирғизистон ирсол шуд.

Вазорати ҳифзи тандурустӣ ва рушди иҷтимоии Қазоқистон гуфт, ин миқдор ваксина ҳамчун кӯмаки башарӣ ба Қирғизистон ирсол шудааст.

Ергалӣ Абдураимов, яке аз созандагони ваксинаи QazVac гуфт, ки то ин замон бештар аз 300 ҳазор кас дар Қазоқистон аз ин ваксина гирифтаанд.

Ба иттилои расонаҳо, истифодаи ваксинаи QazVac дар Қазоқистон 26 апрели соли ҷорӣ - пеш аз анҷоми марҳилаи севуми озмоиш - шуруъ шуд.

Ваксинаи QazVac дар Институти илмиву таҳқиқотии масоили амнияти биологии вазорати маориф ва илми Қазоқистон таҳия шудааст.

Додгоҳе дар Беларус телевизиони Belsat-ро, ки бо сармоягузории Лаҳистон (Полша) кор мекард, “тундгаро” номид.

Бастани дафтари ин телевизион дар Беларус як тадбири дигари мақомот дар амри саркӯби матбуоти озод ва ҷомеаи маданӣ мебошад.

Вазорати умури дохилии Беларус рӯзи 27-уми июл гуфт, ба ҳар нафаре, ки хабарҳои Belsat-ро паҳн мекунад, ҷарима ё ҳабс таҳдид мекунад.

Ин телевизион яке аз маъруфтарин пойгоҳҳои хабарии мухолифон аст, ки таҳаввулот дар Беларуси таҳти назари раҳбари худкома Александр Лукашенкоро аз наздик пайгирӣ мекунад.

Бо амри додгоҳ, вебсайти ин телевизион ва тамоми саҳифаҳояш дар шабакаҳои иҷтимоӣ баста мешаванд. Лукашенко моҳи июл таҳдид кард, ки Беларусро аз фаъолон, матбуот ва ҷомеаи маданӣ “пок” мекунад.

Моҳи август аз интихоботи даъвоии президентии Беларус, ки ба қавли мақомот бо пирӯзии Лукашенко анҷомиду сабаби сар задани эътирозҳои сартосарӣ дар кишвар гардид, як сол пур мешавад.

Ба иттилои маркази ҳуқуқи башари “Весна”, танҳо дар моҳи июл дар ин кишвар беш аз 200 рейд дар дафтарҳои кориву хонаҳои фаъолону журналистон барпо шуд. Ҳоло 27 журналист дар ҳабс ё дар интизори мурофиаҳои додгоҳӣ қарор доранд.

Ду журналисти Belsat TV – Катерина Андреева ва Даря Чултсова ҳам дар зиндон ҳукми дусолаи ҳабсро пушти сар мекунанд.

Яке аз раҳбарони ин телевизион Алекси Дзикавитски гуфт, ки кори ин шабакаи телевизионӣ идома хоҳад ёфт.

Мақомоти Тоҷикистон гуфтанд, ки созишномаро дар бораи нафақаи муҳоҷирони тоҷик дар Русия то охири имсол қабул мекунанд.

Ширин Амонзода, вазири меҳнату муҳоҷират ва шуғли аҳолии Тоҷикистон, 28-уми июл гуфт, созишнома дар бораи нафақаи муҳоҷирон яке аз санадҳое аст, ки то поёни сол миёни Душанбеву Маскав имзо хоҳад шуд. Вале ӯ ба суолҳои батакрори хабарнигорон дар бораи ҷузъиёти он маълумот надорад.

Ҳафтаи гузашта Дилмурод Давлатзода, раиси Оҷонси суғуртаи иҷтимоӣ ва нафақа, ҳам гуфта буд, ки созишнома дар бораи пардохти нафақа миёни Тоҷикистону Русия ниҳоӣ шудааст.

Сарвазири Русия, Михаил Мишустин, рӯзи 27-уми июл ба Вазорати меҳнат ва Вазорати корҳои хориҷии он кишвар дастур додааст, ки дар масъалаи созишномаи таъмини нафақаи муҳоҷирон бо мақомоти Тоҷикистон гуфтушунид кунанд.

Навори пурра аз нишасти матбуотии вазири меҳнату муҳоҷират:

Ҷузъиёти созишнома ва гуфтугӯи Тоҷикистону Русия дар бораи таъмини нафақаи муҳоҷирон рӯшан нест. Дар назар аст, ҳар ду ҷониб нафақапулиро барои муҳоҷирон вобаста ба андоз ё молиёти иҷтимоие, ки дар давоми солҳои корӣ дар ин кишварҳо супоридаанд, таъин хоҳанд кард.

Садҳо ҳазор шаҳрванди Тоҷикистон дар сохтмону бозорҳои Русия кор карда, оилаи худро таъмин мекунанд, вале ҳамеша аз он нигаронанд, ки дар айёми пирӣ аз нафақа маҳрум хоҳанд шуд.

Дар Тоҷикистон барои шахсоне, ки дар кишвар расман кор накардаанд, ба миқдори 187 сомонӣ нафақаи иҷтимоӣ медиҳанд, ки ба қавли сокинон барои рӯзгузаронӣ кофӣ нест.

Пештар мақомоти Тоҷикистон мегуфтанд, ҳаққи бознишастагии муҳоҷиронро бояд Русия бидиҳад, чун онҳо дар он кишвар кор мекунанд ва молиёт месупоранд.

Дар Русия ба ин фикр буданд, ки муҳоҷирон аз он кишвар ба Тоҷикистон миллиардҳо доллар мефиристанд ва он бахши муҳими иқтисоди кишвар асту бояд давлат дар пирӣ ғами шаҳрвандонашро бихӯрад.

Ҳоло маълум нест, ду ҷониб ин баҳсро чӣ гуна ҳаллу ниҳоӣ кардаанд.

ИНЧУНИН, БИХОНЕД:

Мақомот ба муҳоҷирон: “Нафақа мехоҳед, суратҳисоб кушоед”

Вазири меҳнат ва муҳоҷирати Тоҷикистон гуфт, пешниҳоди Оҷонси суғуртаи иҷтимоиро барои боло бурдани синни нафақа рад кардаанд, чун «ҳоло барои ин кор барвақт аст.»

Ҳафтаи гузашта масъулини Оҷонси суғуртаи иҷтимоӣ ва нафақа гуфтанд, мехоҳанд, синни нафақаро барои мардон аз 63 ба 65 ва барои занон аз 60 ба 62 боло бибаранд.

Ширин Амонзода, вазири меҳнат ва муҳоҷират, рӯзи 28-уми июл гуфт, пешниҳоди боло бурдани нафақа аз сӯи мутахассисони Пажӯҳишгоҳи меҳнат санҷида шуд ва ба он «посухи рад доданд».

Ба гуфтаи Амонзода, “қабл аз ба тасвиб расидан ё тасмимҳо дар бораи қабули қарор, руҷуъҳои илман асоснокшуда бояд бошад. Баланд бурдани синни нафақа ҳанӯз дар Тоҷикистон барвақт аст.”

Дар Тоҷикистон мардон аз 63 ва занон аз 60-солагӣ бознишаста мешаванд. Масъулони Оҷонси суғуртаи иҷтимоӣ ҳафтаи гузашта гуфтанд, ба ҳукумат пешниҳод кардаанд, то синни нафақаро боло барад.

Вазири меҳнати Тоҷикистон мегӯяд, дарозмурӣ барои мардон 75 ва барои занон 76 аст ва дар сурати боло бурдани синни нафақа “барои истироҳат ва фаъол нигоҳ доштани ҷисми инсон фурсати кам мемонад.”

Ба ҷуз аз синни нафақа, сокинон аз кам будани нафақапулӣ ҳам шикоят доранд.

Озарбойҷону Арманистон, ки тирамоҳи соли гузашта як ҷанги шашҳафтаинаро дар минтақаи ҷудоиталаби Қаробоғи Кӯҳӣ паси сар карданд, дар тирандозии ахир ҳам якдигарро гунаҳкор намуданд.

Ереван гуфт, дар ҳодисаи рӯзи 28-уми июл се сарбози Вазорати дифои Арманистон куштаву ду нафар захмӣ шуданд.

Масъулони Вазорати дифои ин кишвар гуфтанд, нирӯҳои мусаллаҳи Озарбойҷон "бо амали таҳрикомези худ бори дигар муқаррароти оташбасро дар қисмати шимолушарқи сарҳади Арманистону Озарбойҷон вайрон карда", ба сӯи ҳадафҳои Арманистон оташ кушоданд. Онҳо масъулияти ҳодисаро ба дӯши Озарбойҷон гузошта, айни замон гуфтанд, дар ҷониби Озарбойҷон ҳам талафоте будааст.

Дар навбати худ Вазорати дифои Озарбойҷон Арманистонро дар шиддатёбии вазъ гунаҳкор кард. Дар изҳороти Боку омадааст, ки нирӯҳои мусаллаҳи Арманистон ба сӯи мавқеъҳои нирӯҳои Озарбойҷон дар ноҳияи Калбаҷар баъд аз нисфишаб оташ кушода, ду сарбози озариро захмӣ намуданд.

Сергей Шойгу, вазири дифои Русия, гуфтааст, кишвараш барои муҷаҳҳаз кардани артиши Тоҷикистон иловатан силоҳу муҳиммоти ҷангӣ медиҳад.

Дафтари матбуоти Вазорати мудофиаи Русия эълон кард, ки Сергей Шойгу 28-уми июл бо ҳадафи иштирок дар Шӯрои вазирони дифои кишварҳои узви Созмони Ҳамкориҳои Шонгҳой вориди Душанбе шудааст. Ба иттилои манбаъ, «дар ҳошияи нишаст, ӯ бо Шералӣ Мирзо, вазири мудофиаи Тоҷикистон, дидору мулоқот дошт».

Дар ин суҳбат масъалаи пешгирӣ аз хатарҳои амниятии бархоста аз вазъи Афғонистон таъкид шудааст.

Шойгу дар ин мулоқот гуфтааст, бар замми омода кардани кадрҳои низомӣ, Русия барои тақвияти артиши Тоҷикистон ба таври ройгон силоҳу муҳиммоти ҷангӣ медиҳад. «Барои рафъи хатар аз Афғонистон, Русия омодааст, ба Тоҷикистон ҳамаҷониба ёрӣ кунад», -- афзудааст ӯ.

Пас аз берун шудани нерӯҳои Амрико ва ҳампаймононаш аз Афғонистон, Толибон дар ин кишвар фаъол шуда, аз ҷумла сеяки хатти марзи Афғонистонро бо Тоҷикистон «ишғол кардаанд».

Embed ба дигарон фиристед

Вазири мудофиаи Русия Сергей Шойгу ба Тоҷикистон ёрии низомӣ ваъда дод

Embed ба дигарон фиристед

Нусхабардорӣ шуд

---

бар px баландӣ px

---

URL нусхабардорӣ шуд

Феълан кор намекунад

0:00 0:00:36 0:00

Оҷонси мубориза бо фасод дар Тоҷикистон мегӯяд, масъалаи ситондани қарзҳои додаи "Агроинвестбонк" аз баъзе муштариёнаш то ҳол ҳалли худро наёфтааст.

Сулаймон Султонзода, раиси Оҷонсӣ, 28-уми июл дар нишасти матбуотӣ гуфт, 27 ширкате, ки дар гузашта аз "Агроинвестбонк" қарз гирифта буданд, 223 миллион сомониро барқарор карда, 146 миллиони дигар мондааст. Ба иттилои ӯ, "баъзе аз намояндагони ширкатҳо пас аз пардохти қарзи бонкӣ, бо татбиқи қонуни афв, озод шуданд, вале чанде аз онҳо дар боздошт ҳастанд".

Пештар масъулони Оҷонсӣ гуфта буданд, ки намояндагони ширкатҳо дар истифодаи ғайриҳадафмандонаи маблағҳои қарзии "Агроинвестбонк" даст доранд. Раҳбарияти Оҷонсӣ дар посух ба ин суол, ки оё дар баробари муштариёни қарздор, нисбат ба масъулони бонк ҳам парванда боз шудааст, танҳо аз Фаррух Тағоймуродов, раиси пешини "Агроинвестбонк" ном гирифт.

Фахриддин Акрамзода, муовини сардори Раёсати тафтишоти Оҷонсӣ гуфт, Тағоймуродов моҳи январи имсол пас аз барқарор кардани беш аз 15 миллион сомонӣ зараре, ки ба давлат расонида буд, бо татбиқи қонуни афв озод гардид. Тағоймуродов дар пешниҳоди ғайриқонунии қарзҳои бонкӣ муттаҳам буд.

"Агроинвестбонк", ки дар гузашта аз бонкҳои низомсози кишвар ба ҳисоб мерафт, аз соли 2015 дучори буҳрон шуда, дар бозгардондани пасандози амонатгузорон оҷиз монд. Моҳи майи имсол Бонки миллии Тоҷикистон иҷозатномаи "Агроинвестбонк"-ро бозхонд намуд. Ин бонк дар ҳоле муфлисшуда эълон гардид, ки муштариёнаш аз тақдири бозпас гирифтани маблағҳои худ нигаронанд.

Ҳоким Холиқзода, раиси Бонки миллии Тоҷикистон, ҳафтаи гузашта зимни як нишаст дар Душанбе гуфт, қарзи умумии "Агроинвестбонк" дар назди муштариён аз 2,4 миллиард сомонӣ то 1,38 миллиард сомонӣ кам шудааст.

Чанд рӯз баъди “агенти хориҷӣ” номгузорӣ шудани вебсайти The Insider, полис субҳи 28 июл манзили сардабири ин расона Роман Доброхотовро ҷустуҷӯ кард. Доброхотов дар саҳифааш дар Твиттер навишт, ки полис субҳ ба хонааш омад. Дар бораи рейди полис инчунин ҳамсари журналист ба гурӯҳи ҳуқуқии ОВД-инфо хабар дод, вале баъди ин телефони ӯ хомӯш шуд. Ба иттилои ин гурӯҳ, адвокат Оксана Опаренко ба хонаи Доброхотов равона шуд. Ба иттилои База, полис инчунин хонаи волидони журналистро кофтуков кардааст. Дар як навори видеоӣ дида мешавад, ки чанд мард бо либоси мулкӣ ба волидони журналист мегӯянд, ки дар доираи як парвандаи ҷиноӣ хонаи онҳо кофтукоб мешавад. Дар бораи рейд дар хонаи Доброхотов ҳеҷ иттилои расмӣ нашр нашудааст. Парвандаи ҷиноӣ алайҳи Доброхотов бар асоси шикояти як шаҳрванди Ҳолланд Макс ван дер Верфф боз шудааст, ки вебсайти The Insider-ро дар тӯҳмат айбдор намуд.

Толибон гуфтанд, ки ҳайате ба раҳбарии Мулло Абдулғанӣ Бародар, аз ҳаммуассисони ин гурӯҳи ҷангӣ, дар Пекин бо мақомоти Чин гуфтугӯ кардааст.

Муҳаммад Наим, сухангӯи Толибон, дар як изҳороташ тавассути Твиттер 28-уми июл навишт, "сиёсат, иқтисод ва масоили марбут ба амният дар ҳарду кишвар ва ҳам вазъи феълии Афғонистон ва ҷараёни сулҳ дар ин нишаст баррасӣ шудааст."

Сафари дурӯзаи ҳайати Толибон ба Чин дар ҳолест, ки ҳамлаи ҷангҷӯёни ин гурӯҳ дар саросари Афғонистон, ки бо Чин ҳаммарз аст, тавсеа меёбад ва хуруҷи нирӯҳои амрикоӣ аз ин кишвар идома дорад.

Ҷангӯёни Толибон нуқтаҳои зиёд, аз ҷумла қисми зиёди сарҳади Афғонистон бо Тоҷикистонро зери назорати худ даровардаанд. Талошҳои расидан ба сулҳи миёни ҳукумати Афғонистон ва Толибон дар Қатар ҳам то ҳол натиҷа надодааст.

Дар изҳороти ҷониби Чин омадааст, ки Ван И, вазири корҳои хориҷии ин кишвар, ба Толибон гуфтааст, Пекин тамомияти арзии Афғонистонро эҳтиром мекунад.

Наим гуфт, Толибон Чинро мутақоид карданд, ки иҷоза намедиҳанд, Афғонистон ба ҳайси пойгоҳи гурӯҳҳое ба муқобили кишварҳои дигар истифода шавад.

Сарвазири Русия Михаил Мишустин ба сохторҳои дахлдор дастур дод, ки созишномаи марбут ба нафақаи муҳоҷиронро ба имзо расонанд. Дар ин бора дар портали иттилооти ҳуқуқӣ хабар дода шудааст. Тибқи санади нашргардида, Михаил Мишустин бо имзои фармон ба Вазорати меҳнат ва вазорат корҳои хориҷии Русия супориш додааст, ки барои имзои созишномаи нафақа бо Тоҷикистон гуфтушунид кунанд. Бар пояи қарордод, ҳар ду ҷониб ҳаҷми нафақапулиро барои муҳоҷирон вобаста ба андози иҷтимоие, ки дар давоми солҳои корӣ дар ин кишварҳо супоридаанд, таъйин хоҳанд кард. Ба ҳамин тартиб муҳоҷири меҳнатӣ баъди баргаштан ба ватан аз кишваре, ки дар он ҷо кор кардааст, нафақапулӣ хоҳад гирифт. Дар бораи ниҳоӣ шудани тарҳи миёни Тоҷикистону Русия оиди пардохти нафақаи муҳоҷирон ҳафтаи гузашта раиси Оҷонсии суғуртаи иҷтимоӣ ва нафақаи Тоҷикистон низ иттилоъ дода буд. Феълан ҷузъиёти дигари ин созишнома ва ҳам шартушурути таъйини нафақа ва ҳаҷми он дар даст нест.

Аз имрӯз дар Тоҷикистон эмгузаронии саросарии сокинони аз 18-сола боло бо ваксаинаи амрикоии "Модерна" шурӯъ мешавад. Вазорати тандурустӣ ба пойгоҳи Your. Tj гуфтааст, шаҳрвандон метавонанд барои моякубӣ бар зиддӣ бемории Ковид-19 ба марказҳои саломатии маҳалли зисташон муроҷиат кунанд. Тоҷикистон аз Амрико рӯзи 26-уми июл дар доираи кӯмаки башардӯстона 1,5 млн дона воя ваксинаи "Модерна" дарёфт кард, ки барои 13 фойизи аҳолӣ пешбинӣ шудааст. Ҳамчунин қарор аст, имрӯз 2 миллион ваксинаи чинии "Коронавак" низ ба Тоҷикистон ворид гардад.

Саид Муллоии эрониасл, ки дар Бозиҳои Олимпии Токио аз Муғулистон намояндагӣ мекунад, барои ин кишвар медали нуқра овард.

Муллоӣ 29 сол дорад ва дар рақобати рӯзи 27-уми июл дар миёни мардони 81-килоӣ аз намояндаи Ҷопон Таканори Нагасе мағлуб шуд.

Ӯ соли 2018 унвони қаҳрамони ҷаҳонро бурд ва ду сол пеш Эронро тарк кард. Сабаби чунин қарораш ин шуд, ки ба ӯ амр доданд дар Ҷоми ҷаҳонии ҷудо ба хотири фирор аз рақобат бо варзишгари исроилӣ Саги Муки махсус мағлуб шавад.

Дар натиҷаи ин қарор, Эрон аз ширкат дар бозиҳои Федератсияи байналмилалии ҷудо маҳрум гардид. Ин қарор соли ҷорӣ аз ҷониби Додгоҳи ҳакамии варзиш бекор шуд. Эрон дар симои Исроил душманро мебинад ва маъмулан варзишгаронаш аз рақобат бо исроилиҳо худдорӣ мекунанд, ҳатто агар бар зарари Эрон ҳам шавад.

Муллоӣ, ки аз сиёсати варзиши кишвараш норозӣ буд, баъд аз тарки он ба тими муҳоҷирон пайваст ва баъдан шаҳрвандии Муғулистонро гирифт. Ӯ моҳи феврали имсол дар Исроил рақобат кард ва бо Муки мулоқоте дошт. Муки ӯро "бародари худ" номид.