Чаҳор даста - муддаъиёни унвони қаҳрамони Тоҷикистон

Сентябр 18, 2008

Нарзуллоҳи Латиф

Давраи севуми мусобиқоти қаҳрамонии лигаи олии футболи Тоҷикистон бо ду бозӣ оғоз шуд.

«Вахш»-и Қӯрғонтеппа дар майдони худ бар «Равшан»-и Кӯлоб бо ҳисоби бузурги 4:0 ғалаба кард. Бозии CSKA «Помир»-и Душанбе бо дастаи меҳмон - «Гвардия»-и Душанбе бо ҳисоби 1:1 хотима ёфт.

Дар ҳамин ҳол, «Регар» ТадАЗ-и Турсунзода, ки дар 20 бозӣ 50 имтиёз ба даст овардааст, дар садри ҷадвали мусобиқот қарор гирифтааст. Воқеъан, «Регар» ТадАЗ дар даври ниманиҳоии Ҷоми раиси Конфедеросиюни футболи Осиё 19-уми сентябр бо дастаи «Ишқобод»-и Туркманистон қувваозмоӣ мекунад. Ин бозӣ соати 11 ба вақти Душанбе дар варзишгоҳи марказии «Спартак»-и пойтахти Қирғизистон – шаҳри Бишкек оғоз мешавад. Сипас бозии дуввуми ниманиҳоӣ дар ин варзишгоҳ байни дастаҳои «Дордой-Динамо»-и Қирғизистон ва «Полис Клаб»-и Непал баргузор мегардад. Ғолибони даври ниманиҳоӣ ба бозии ниҳоӣ, ки рӯзи якшанбеи 21-уми сентябр барпо мешавад, роҳ меёбанд.

Дастаҳои «Парвоз»-и Бобоҷон Ғафуров ва «Вахш»-и Қӯрғонтеппа 45-имтиёзӣ ба даст овардаанд. Бо дарназардошти таносуби беҳтари тӯбҳо «Парвоз» дар ҷои дуввум, «Вахш» дар ҷои севум мебошанд. Муддаъии дигари унвони қаҳрамонӣ - «Хуҷанд»-и Хуҷанд бо 44 имтиёз дар зинаи чаҳорум қарор дорад.

Мавқеъи дастаҳо дар ҷадвали мусобиқот

Ҷ	Дастаҳо	Б	Ғ	М	Б	Т/Т	И
1	«Регар» ТадАЗ	20	16	2	2	68-17	50
2	«Парвоз»	20	14	3	3	42-18	45
3	«Вахш»	21	14	3	4	39-17	45
4	«Хуҷанд»	20	14	2	4	28-13	44
5	«Энергетик»	23	10	3	10	39-34	33
6	«Динамо»	20	9	4	7	32-30	31
7	«Тоҷиктелеком»	21	7	1	13	29-42	22
8	«Саройкамар»	22	5	4	13	30-41	19
9	«Гвардия»	23	5	3	15	22-50	18
10	CSKA «Помир»	22	5	1	16	14-45	16
11	«Равшан»	22	4	2	16	20-56	14