Пайвандҳои дастрасӣ

Хабари нав

Табибони тоҷик. "Фариштаҳои наҷот" ва "пешмаргҳои мубориза" бо COVID-19


Табибон дар Бохтар ҳангоми гусели бемороне, ки шифо ёфтаанд. Акс аз хадамоти матбуотии ҳукумати Хатлон

Пизишкони тоҷик, ки дар сафи пеши бархӯрд бо бемории COVID-19 муҳориба мекунанд, то кунун чанде аз ҳамкорони худро аз даст додаанд. Ба иттилои расмӣ, дар ду ҳафтаи ахир дар Тоҷикистон 29 кас аз бемории ҳамагир фавтиданд, аммо гуфта намешавад, чанде аз онҳо табибонанд. Дар як рӯйхати ғайрирасмии фавтидагони се ҳафтаи ахир, номи зиёда аз 30 корманди соҳаи тиб дарҷ шудааст. Радиои Озодӣ аз ин феҳраст чаҳор номро интихоб кард.

Ватаншоҳ Раҷабов

Ӯ дар марказии "Ёрии таъҷилӣ" дар Душанбе кор мекард ва барои расондани кумаки аввал ба беморон мешитофт. Дастикам аз охири моҳи март ба ин тараф муроҷиати беморон ба пизишкон зиёд шудааст. Ба нақли ҳамкоронаш, Ватаншоҳ Раҷабов гоҳе рӯ ба рӯ ба онҳо машварату дору медод ва гоҳе телефонӣ ба суолҳояшон посух мегуфт, аммо худаш рӯзи 7-уми май дар шифохонаи "Истиқлол" зери дастгоҳи нафасдиҳии сунъӣ даргузашт.

Тавре ҳамсар ва ҳамкасбаш Гулсифат Ҷабборова мегӯяд, "пеш аз он ки ба бемористон барем, дар шароити хона табобат гирифт. Беҳтар шуд, вале якбора нафастангӣ азият дод. Ба "Истиқлол" бурдем..."

Ватаншоҳ Раҷабов
Ватаншоҳ Раҷабов

Ҳамкорони Ватаншоҳ Раҷабов, ки нав 50-сола шуда буд, мегӯянд, як пизишки ботаҷриба ва инсони некро аз даст рафт. Муҳоҷири корӣ Баҳриддин Ғаниев бо ёдоварӣ аз табобатҳои Ватаншоҳ Раҷабов мегӯяд, "вақте барои ширкат дар семинарҳои илмӣ ба Русия мерафт, ҳатман суроғи онҳоро мегирифт ва бачаҳоро ҷамъ мекарду маслиҳат медод, ки саломатии худро эҳтиёт кунанд."

Ҳоло хабарҳо аз марги пизишкон бо нишонаҳои илтиҳоби шуш, бемориҳои қанду қалб ва фишор дар шаҳру ноҳияҳои Тоҷикистон зиёд мерасад. Ҳар рӯз дар шабакаҳои иҷтимоӣ, аз ҷумла дар гуруҳи "Пизишкони Тоҷикистон" дар Фейсбук аз маргу бемории чанд табиб ва корманди соҳаи тиб хабар нашр мешавад. Вале ҳодисаҳое низ ҳаст, ки дар ҷое нашр намешаванд ва аз чашми матбуоту шабакаҳои иҷтимоӣ дур мемонанд. Монанди саргузашти Саидаҳмад Гадоев.

Саидаҳмад Гадоев

Марги нобаҳангоми Саидаҳмад Гадоев, пизишки кӯдакон дар ноҳияи Восеъ, хурду бузургро дар ин минтақа ва атрофи он мотамзада кард. Риштаи умри ин табиб рӯзи 10-уми май бар асари бемории COVID-19 дар 69-солагӣ канда шуд.

Вай яке аз беморонро барои муоина ба пойтахт овард ва баъди бозгашт ба ноҳия як ҳафта дар бистарӣ шуд ва дигар натавонист ба пой хезад.

Пайвандону ҳамкоронаш мегӯянд, Гадоев 45 соли умри худро барои хидмат ба сокинони ноҳия бахшид ва даргузашти ӯ ба рӯзҳои сахт рост омаду набуданаш эҳсос мешавад.

Садбарг Қурбонова, яке аз ҳамкорони Саидаҳмад Гадоев, ба Радиои Озодӣ гуфт, сокинон на танҳо дар бемории кӯдаконашон ба ӯ муроҷиат мекарданд, балки ба ҳама дарди худ аз ӯ даво мехостанд. "Рӯзи дуюми май сари кор буданд, рӯзи 3-юми май як беморро барои ташхис ба Душанбе бурданд. Баъд аз он дигар ба кор наомаданд. Вақте пурсидам, ки чаро сари кор нестед, гуфтанд, сардард доранд. Бо ҳамин, рӯзи 10-уми май аз дунё гузаштанд," -- нақл кард ӯ.

Қурбонова мегӯяд 22 соли охир бо Гадоев ҳамроҳ кор кардааст ва ӯ ҳеч гоҳ аз беморие шикоят надошт. "Мо ҳамин қадар бемориҳои сахтро пушти сар кардем. Домана, зардпарвин, сурхча, ин одам ҳатто зукоми одӣ намешуд. Вақте гуфт, сарам дард мекунад, гуфтам духтур фиристем, хандида гуфт лозим нест, наход одам барои дарди сар ҳам духтур даъват кунад?"

Турғун Тӯраев

Дар шаҳри Турсунзода ӯ аз беҳтарин мутахассисони бемориҳои сироятӣ буд. Бо таҷрибаи 42-сола Турғун Тӯраев берун аз минтақа ҳам эътибор дошт. Вай охири моҳи апрел аз бемории қалб даргузашт.

Ӯ замоне фавтид, ки даҳҳо нафар дар бемористонҳои ин шаҳр ба карантин фаро гирифта шудаву зери назорати ӯ ва ҳамкоронаш қарор доштанд. Панҷӣ Аслонов, яке аз ҳамкорони ӯ, рузи 13-уми май ба Радиои Озодӣ гуфт, дар шабу рӯзе ки мебоист Тӯраев ба ҳазорон бемор дармон бахшад, "худаш ҷон дод".

"Аз духтури одӣ то духтури дараҷаи 1 кор карданд. Мудири шуъбаи бемориҳои сироятӣ дар дармонгоҳи рақами 1-и шаҳри Турсунзода буданд. Фақат даҳ сол пеш бемори қалб шуданд, вале мушкили хосе надоштанд. Кор мекарданд, дар беморхонаҳои сироятии шаҳр навбатдор меистоданд. Афсӯс, ки дигар бо мо нестанд".

Панҷӣ Аслонов бо таассуф мегӯяд, дар маъракаи мубориза бо коронавируси нав барои табибон як марҳилаи сангин пеш омадааст ва ибрози умед кард, бо вуҷуди хатар онҳо ба савганди хӯрдаи худ пойбанд хоҳанд монд.

Акобиршо Сатшоев

Сабаби марги табибонро сактаи қалб, фишорбаландӣ, илтиҳоби шуш ё каслиҳои дигар меноманд. Аммо гӯё фаромӯш мешавад, ки вақте коронавирус дар кишвар "расман" вуҷуд надошт, онҳо беморонро бе сарулибоси ҳифозатӣ ва ниқоб пешвоз мегирифтанд ва муойина мекарданд. Аввалин бонги изтироб замоне садо дод, ки марди 60-сола дар беморхонаи марказии ноҳияи Ҷаббор Расулов даргузашт ва ҳамаи кормандони беморхонаро, ки бо ӯ тамос доштанд, карантин карданд.

Шояд дар бисёре аз шаҳру навоҳӣ аллакай дер шуда буд. Ҳатто дар Вилояти Мухтори Куҳистони Бадахшон.

Наздикони ҷарроҳи 75-сола, Акобиршо Сатшоев, ки се рӯз пеш дафн карда шуд, мегӯянд, ӯ аз бемории қалб фавтид. Некқадам Шоназаров, домоди Сатшоев, ба Радиои Озодӣ гуфт, як сол пеш ҷарроҳии қалб карда буд ва дар Душанбе табобат мегирифт, аммо се рӯз пеш вазъаш бад шуд ва ӯро ба ноҳияи Рӯшон бурданд, вале натавонистанд наҷот диҳанд.

Онҳое ҳам ки борҳо барои машварату табобат назди Сатшоев рафтаанд, марги ӯро талафоте дар бахши тиб номиданд. Салимшо Акобиршо, сокини ноҳияи Рӯшони вилояти Мухтори Кӯҳистони Бадахшон гуфт, натавонист дар маросими видоъ бо ин пизишк ширкат кунад, зеро ҷамъ шудани нафарони зиёдро манъ кардаанд.

Ин ҳамсуҳбати мо гуфт, Акобиршо Сатшоев бо падараш ҳамном буд ва худи ӯ борҳо корафтодаи ин табиб шудааст: "Чунин одамон хеле кам ҳастанд. Инҳо мутахассисони замони Шӯравиянд. Дар касб, одобу рафтор ва инсоният беназир ҳастанд. Агар ҷамъомадҳои серодам манъ намебуд, бовар дорам дар маросими дафни ӯ аксари мардуми Бадахшон ширкат мекарданд".

Ҳар рӯз дар шабакаҳои иҷтимоӣ корбарон аз кору пайкори табибон ситоиш мекунанд ва онҳоро "қаҳрамонҳои замон" ва "фариштаҳои наҷот" ном мебаранд ва барояшон каф мекубанд. Вале "пешмаргони ҷанг бо COVID-19" низ меноманд.

PS: Дар зер феҳрасти ғайрирасмии табибони фавтидаро нашр мекунем, ки маълумоти дарёфтӣ ва фиристодаи корбарон аст ва мо кафолати дурустии ҳар нуктаи онро дода наметавонем. Зарур медонем, ки хонандагон нукотеро аз он рад ё тасдиқ ва бо маълумоти бештар пурра кунанд. Ҳамчунин сипоc мегузорем, агар хонандагон маълумоте, ки дар бораи фавтидагон дар ин рӯзҳо бо нишонаҳои бемориро доранд, бароямон фиристанд.

Рӯйхати ғайрирасмӣ:

1

Алимова Оишамоҳ

корманди Беморхонаи марказии вилоятии шаҳри Бохтар

58

12.04

ташхиси қисми мобайнии ҳарду шушҳо фавтид

2

Баротқулов Умарқул

Пизишки терапевт дар Бемористони марказии ноҳияи Зафаробод

24.04

3

Солиев Фаттоҳ Гаппаралиевич

Физиотерапевти Бемористон ба номи Карим Маҳмудов

24.04

Ташхиси расмӣ: Илтиҳоби шуш

4

Суярқулова Хосият

Парастор дар Бемористони марказии ноҳияи Зафаробод

25.04

Ташхиси расмӣ: Илтиҳоби шуш

5

Отаев Набиҷон

Пизишки оилавӣ дар маркази тандурустии "Меҳргон”-ноҳияи Ҷаббор Расулов

68

26.04

Ташхиси расмӣ: Илтиҳоби шуш

6

Дустматов Дустмуҳаммад

Пизишки осебшинос (травматолог) аз ноҳияи Бобоҷон Ғафуров. Бино бар маълумоти дигар корманди поликлиникаи № 5 дар шаҳри Хуҷанд

62

27.04

Нишонаҳои бемории COVID-19

7

Бақоев Рашодхон

Ҷарроҳи нейрохирург, Беморхонаи №1 шаҳри Хуҷанд

68

1.05

Диагноз: пневмония

8

Гулнора Сатторова

Пизишки асабшинос, невролог аз Беморхонаи №1 шаҳри Хуҷанд

Нишонаҳои бемории COVID-19

9

Гадоев Гадо

Дорусоз, фармацевт, мудири аптека дар шаҳри Душанбе

1.05

Нишонаҳои бемории COVID-19

10

Раҷаббоев Ҷурақул

врач-нейрохирург, 8 кор. караболо профессор нейрохирург

69

1.05

Нишонаҳои бемории COVID-19

11

Ҷаббор Ғуломов (Ҳоҷӣ Ҷаббор)

Тоҷир, соҳиби силсилаи доруфурӯшиҳо дар минтақаи Кӯлоб

55

1.05

Нишонаҳои бемории COVID-19

12

Шералӣ Ҷурақулов

Табиби МСШ -12 дар шаҳри Душанбе

3.05

Диагноз: COVID-19

13

Собирова Мушкинисо

Ҳамшираи шафқат, момодоя

3.05

14

Акои Аҳмад

Духтур ва ронандаи Маркази саломатии раками 9-и н. Сино

4.05

Ташхис: COVID-19

15

Доктор Миршафиев

Осебшинос травматолог аз шаҳри Истаравшан

78

6.05

Нишонаҳои бемории COVID-19

16

Раҳимов Нурали Раҷабович

Врач Т Вахдат, НТҶ равматолог

75

7.05

Ташхиси расмӣ: Илтиҳоби шуш

17

Раҷабов Ватаншоҳ Шоевич

Уролог аз Бемористони “Ёрии таъҷилӣ” дар Душанбе

7.05

Нишонаҳои бемории COVID-19

18

Қодирова Зарифа

Парастор дар дармонгоҳи ВКД Тоҷикистон

54

Ташхиси расмӣ: Илтиҳоби шуш

19

Дадабаева Роҳат Ҳайдаровна

Акушер г Душанбе инеколог

8.05

Ташхиси расмӣ: Илтиҳоби шуш

20

Охунова Хафизачон

Хамшираи тиббии маркази саломати #3

Нишонаҳои бемории COVID-19

21

Шаҳодат Ғаниева

Дорушинос, корманди дорухона дар шаҳри Хуҷанд

8.05

Ташхиси расмӣ: Илтиҳоби шуш

22

Тоҷибоева Ҳабиба

ҳамшираи калон дар маркази солимгардонии рақами 4, ш. Хуҷанд,

8.05

Нишонаҳои бемории COVID-19

23

Фатхуддинова Мохинав

Вирусолог, номзади илми тиб, корманди Институти илми- тадқиқотии профилактикии Вазорати тандурустӣ ва ҳифзи иҷтимоӣ

9.05

Нишонаҳои бемории COVID-19

24

Махбуба

Клиникаи стоматологии “Садаф” дар шаҳри Хуҷанд

43-44

9.05

25

Муродов Мирзоали Сайдалиевич

глав бух мед. коледж

58

10.05

Диагноз: пневмонияи дутарафа

26

Хамидов Рустам

врач офтальмолог

10.05

Нишонаҳои бемории COVID-19

27

Исмоил Остонақулов

Парастор, Беморхонаи марказии ноҳияи Фархор

58

10.05

Нишонаҳои бемории COVID-19

28

Саидмаҳмад Гадоев

Духтури кудакона ва табиби оилави аз дехаи Кадучии Восеь

10.05

Нишонаҳои бемории COVID-19

29

Мирзоалим Оқилов

Сардухутури собиқи Беморхонаи марказии ноҳияи Айнӣ

11.05

30

Давлат

Пизишки деҳаи Тани Ёл, корманди беморхонаи шаҳри Кулоб

11.05

31

Уткур Аҳмедов Улукназарович

Пизишк, номзади илми тиб дар Душанбе

67

11.05

Нишонаҳои бемории COVID-19

32

Шарипов Сайфиддин

Табиби шуъбаи таҳқиқи ултрасадоии МДМШЁТТ

35-40

12.05

Нишонаҳои бемории COVID-19

Шарҳҳоро бинед (28)

Шарҳҳо

Шарҳи нав расид
Идома
XS
SM
MD
LG