Пайвандҳои дастрасӣ

Узбакистон дар Душанбе Шри-Ланкаро голборон кард


Акс аз сайти расмии Конфедератсияи футболи Осиё.

Бозиҳои даври дувуми мусобиқоти интихобии қаҳрамонии футболи Осиё-2018 дар гурӯҳи «В» миёни дастаҳои мунтахаби ҷавонони зери 19-сола рӯзи 2-юми ноябр дар Варзишгоҳи марказии шаҳри Душанбе баргузор шуданд.

Дастаи мунтахаби ҷавонони Узбакистон (U-19) таҳти раҳбарии сармураббӣ Александр Мочинов дар аввалин бозиаш дар мусобиқоти интихобии қаҳрамонии футболи Осиё-2018 дар гурӯҳи «В» тими Шри-Ланкаро бо ҳисоби бузурги 10:0 шикаст дод. Ҷаҳонгир Абдусаломов чаҳор гол, Ислом Кенҷабоев ва Санҷар Зокиров дуголӣ, Суҳроб Иззатов ва Акмал Мозговой якголӣ заданд.

Дастаи мунтахаби ҷавонони Тоҷикистон (U-19) дувумин бозиашро дар мусобиқоти интихобии қаҳрамонии футболи Осиё-2018 дар гурӯҳи «В» рӯзи 4-уми ноябр бо мунтахаби Шри-Ланка анҷом медиҳад.

Дар бозии дигари даври дувуми мусобиқоти гурӯҳи “В” мунтахаби Бангладеш тими Молдивро бо ҳисоби 1:0 мағлуб кард. Голи ягонаро ҳамлагар Маҳбуб Раҳмон дар дақиқаи 90-уми бозӣ ба ҳадаф расонд.

Баъди натиҷагирии даври дувуми мусобиқот дастаи мунтахаби ҷавонони Бангладеш бо 4 имтиёз дар ҷадвали гурӯҳи “В” пешсаф аст. Мунтахаби Узбакистон, ки танҳо як бозӣ кардааст, бо 3 имтиёз дар ҷойи дувум қарор дорад. Дастаҳои Молдив, Шри-Ланка ва Тоҷикистон якимтиёзӣ гирифтаанд.

Дастаи мунтахаби ҷавонони Тоҷикистон (U-19) дар даври дувум истироҳат кард. Ёдовар мешавем, футболбозони ҷавони тоҷик таҳти раҳбарии сармураббӣ Мубин Эргашев аввалин бозиашонро дар мусобиқоти интихобии қаҳрамонии Осиё-2018 дар гурӯҳи «В» бо тими Бангладеш, ки 31-уми октябр дар Варзишгоҳи марказии шаҳри Ҳисор баргузор шуд, бо ҳисоби 0:0 анҷом дода буданд.

Мунтахаби ҷавонони Тоҷикистон.
Мунтахаби ҷавонони Тоҷикистон.

Мусобиқоти интихобии қаҳрамонии футболи Осиё-2018 дар гурӯҳи «В» бо ширкати дастаҳои мунтахаби ҷавонони зери 19-солаи Бангладеш, Молдив, Тоҷикистон, Шри-Ланка ва Узбакистон дар шаҳрҳои Душанбе ва Ҳисор то рӯзи 8-уми ноябр идома хоҳад кард.

Бинобар омодагии Варзишгоҳи марказии Ҳисор ба бозии ниҳоии Ҷоми AFC (Конфедератсиони футболи Осиё)-2017 миёни дастаҳои “Истиқлол”-и Тоҷикистон ва “Эйр Форс”-и Ироқ, бозиҳои даври севуми мусобиқоти интихобии қаҳрамонии футболи Осиё-2018 дар гурӯҳи «В» рӯзи шанбеи 4-уми ноябр дар Варзишгоҳи марказии шаҳри Душанбе барпо мегарданд. Бозиҳои ду даври охирини мусобиқот рӯзҳои 6-ум ва 8-уми ноябр дар Варзишгоҳи марказии Ҳисор доир хоҳанд шуд.

Дастаи мунтахаби ҷавонони Тоҷикистон (U-19) дувумин бозиашро дар мусобиқоти интихобии қаҳрамонии футболи Осиё-2018 дар гурӯҳи «В» рӯзи 4-уми ноябр бо мунтахаби Шри-Ланка анҷом медиҳад. Баъдан футболбозони ҷавони тоҷик 6-уми ноябр бо тими Молдив ва 8-уми ноябр бо дастаи Узбакистон рақобат мекунанд.

Бар асоси дастури мусобиқот ба марҳилаи ниҳоии қаҳрамонии футболи Осиё-2018 миёни дастаҳои мунтахаби ҷавонони зери 19-сола, ки соли оянда дар Малайзия барпо мегардад, ғолибони 10 гурӯҳи интихобӣ ва 5 дастае, ки дар гурӯҳҳои худ ҷойҳои дувумро мегиранд, аз рӯи нишондодҳои беҳтарин роҳ меёбанд.

Мусобиқоти интихобии қаҳрамонии футболи Осиё-2018 миёни дастаҳои мунтахаби ҷавонони зери 19-сола

Бозиҳои боқимондаи гурӯҳи «В»

Даври 3-юм

4 ноябр (шанбе)

12:00 – Узбакистон – Молдив. Душанбе, Варзишгоҳи марказӣ

15:00 – Тоҷикистон – Шри-Ланка. Душанбе, Варзишгоҳи марказӣ

Даври 4-ум

6 ноябр (душанбе)

14:00 – Бангладеш – Узбакистон. Ҳисор, Варзишгоҳи марказӣ

17:00 – Тоҷикистон – Молдив. Ҳисор, Варзишгоҳи марказӣ

Даври 5-ум

8 ноябр (чоршанбе)

14:00 – Шри-Ланка – Бангладеш. Ҳисор, Варзишгоҳи марказӣ

17:00 – Узбакистон – Тоҷикистон. Ҳисор, Варзишгоҳи марказӣ

Андешаи Шумо

Намоиши шарҳҳо

Назари хонандагон

New Comments Available

Агар сухане, назаре ё хабаре доред, бемалол ба мо занг занед ё SMS (паёмак) фиристед:

Дар Душанбе:

+992 988 65 94 63
+992 988 65 94 64

Дар Прага:

+420 724 053 959

XS
SM
MD
LG