Мусобиқа барои Ҷоми президенти Тоҷикистон оид ба ҷудо дар рӯзи таваллуди Эмомалӣ Раҳмон – 5-уми октябр - дар Варзишгоҳи марказии шаҳри Ваҳдат баргузор мешавад. Дар ин мусобиқа, ки барои бори панҷум барпо мегардад, ширкати гуштигирон аз кишварҳои мухталифи ҷаҳон дар назар аст. Тоҷикистонро дар ин мусобиқа ҳудуди 20 варзишгар намояндагӣ хоҳад кард.
Бар асоси дастури мусобиқа барои ҷоизаҳо варзишгарони синашон аз 18-сола боло дар вазни мутлақ рақобат мекунанд. Ба ҷуз ҷому медалҳо варзишгароне, ки ҷойҳои ифтихориро соҳиб мешаванд, бо ҷоизаҳои молӣ сарфароз мегарданд. Ҷавоизи мусобиқа 120 ҳазор сомониро ташкил медиҳад. Барои ҷойи аввал ҷоизаи молӣ ба маблағи 56 ҳазор сомонӣ, барои ҷойи дувум 32 ҳазор сомонӣ ва барои ҷойҳои севум 16 ҳазор сомонӣ муқаррар шудааст.
Мусобиқа барои Ҷоми президенти Тоҷикистон аз соли 2013 доир мешавад. Се бор (солҳои 2013-2015) ин мусобиқа дар шаҳри Душанбе барпо гардида буд. Соли 2013 Виталий Дудчики украинӣ дар вазни зери 81 кило ва Ислом Ал-Шаҳобӣ аз Миср дар вазни мутлақ ғолиб шуданд. Дудчик дар қувваозмоии ниҳоӣ гуштигири тоҷик Фарҳод Раҳимовро мағлуб кард. Ал-Шаҳобӣ бошад, дар финал бар паҳлавони тоҷик Муҳаммадмурод Абдураҳмонов дастболо шуд.
Баъдан ду бор Муҳаммадмурод Абдураҳмонов барандаи Ҷоми президенти Тоҷикистон гардидааст. Ӯ соли 2014 дар қувваозмоии ҳалкунанда барои ҷоизаи аслӣ бар ҳамватанаш Зиёратшо Баротов пирӯзӣ ба даст овард. Абдураҳмонов соли 2015 дар қувваозмоии ниҳоӣ бар Александр Ваховяк аз Беларус ғалаба кард.
Чорумин давраи Ҷоми президенти Тоҷикистон соли гузашта дар шаҳри Ваҳдат бо ширкати 45 гуштигир аз 15 кишвар баргузор шуд. Станислав Бондаренко аз Украина, ки дар қувваозмоии ниҳоӣ Алекс Гарсия Мендозаро аз Куба шикаст дод, бо Ҷом, медали тилло ва ҷоизаи молӣ ба маблағи 56 ҳазор сомонӣ сарфароз гашт. Ба варзишгари кубагӣ барои ҷойи дувум медали нуқра ва 32 ҳазор сомонӣ тақдим шуд. Мӯҳсин Ҳисомиддинов ва Абдулло Тангриев (ҳарду аз Узбакистон), ки ҷойҳои севумро гирифтанд, бо медалҳои биринҷӣ ва ҷоизаҳои молӣ ҳар кадом ба маблағи 16 ҳазор сомонӣ мукофотонида шуданд.
Дар мусобиқаи порсола барои Ҷоми президенти Тоҷикистон мизбонон барои аввалин бор аз ҷоизаҳо бенасиб монданд.
