Мунтахаби Тоҷикистон дар Душанбе бо Туркия ду бозии дӯстона мегузаронад

Дастаи мунтахаби Тоҷикистон дар доираи омодагӣ ба мусобиқоти қаҳрамонии футзали Осиё-2018, ки аз 1-ум то 11-уми феврал дар Тайбэйи Чин баргузор мешавад, бо тими миллии Туркия ду бозии дӯстона анҷом медиҳад.

Ба иттилои дафтари матбуоти Федератсияи футболи Тоҷикистон, бозиҳои дӯстона миёни дастаҳои мунтахабии миллии футзали Тоҷикистон ва Туркия 26-ум ва 27-уми декабр дар шаҳри Душанбе барпо мегарданд.

Зимнан, моҳи феврали соли равон дастаҳои мунтахаби футзали Туркия ва Тоҷикистон ду бозии дӯстона доир карда буданд, ки ҳарду дидор дар шаҳри Ялова бо пирӯзии мизбонон бо натиҷаҳои 5:4 ва 3:2 хотима ёфт.

Бозиҳои дӯстона бо мунтахаби Туркия барои тими миллии Тоҷикистон як давраи омодагӣ ба мусобиқоти 15-уми қаҳрамонии футзали Осиё ба шумор меравад. Рақибони дастаи мунтахаби Тоҷикистон дар гурӯҳе, ки бозӣ хоҳад кард, 12-уми декабр бар асоси қуръакашӣ маълум мешаванд.

Аллакай таркиби сабадҳо, ки аз рӯи онҳо ҳангоми қуръакашии мусобиқоти қаҳрамонии Осиё-2018 дастаҳо тақсим мешаванд, маълум гаштааст. Ба мунтахаби Тайбэйи Чин ба ҳайси мизбони мусобиқот дар гурӯҳи “А” мавқеи аввал дода шудааст. Ба сабади якум, инчунин ҷоизадорони мусобиқоти охирини қаҳрамонии Осиё дар Тошканд – Эрон, Узбакистон ва Тайланд - дохиланд.

Ба сабади дувум дастаҳои мунтахаби Ветнам, Қирғизистон, Ҷопон ва Ироқ ворид шуданд. Мунтахаби Тоҷикистон ба сабади севум шомил гашт ва дар марҳилаи гурӯҳии мусобиқоти қаҳрамонии Осиё-2018 бо дастаҳои Чин, Лубнон ва Урдун рӯбарӯ намешавад. Ба сабади чаҳорум Малайзия, Баҳрайн, Кореяи Ҷанубӣ ва Мянмар дохиланд.

Аз рӯи натиҷагирии қуръакашӣ ширкаткунандагони марҳилаи ниҳоӣ ба чаҳор гурӯҳ (аз «A» то «D») тақсим мешаванд. Ду дастаи зӯртарин аз ҳар гурӯҳ ба даври плей-офф роҳ меёбанд.