Пайвандҳои дастрасӣ

Хабари нав

Ба тоҷикон насиб накард. Ҷоизаи дави Душанбе ба Эфиопия рафт


Ниммарафони IX байналмилалӣ бахшида ба Рӯзи пойтахти Тоҷикистон, ки рӯзи 21-уми апрел, дар шаҳри Душанбе баргузор шуд, бо пирӯзии Тефера Гоза аз Эфиопия ва Даря Маслова аз Қирғизистон ба поён расид.

Варзишгароне, ки дар ин ниммарафон ҷойҳои аз 1 то 6-умро гирифтанд, бо ҷоизаҳои молӣ ба маблағи аз 13 ҳазору 350 сомонӣ то 31 ҳазору 150 сомонӣ сарфароз гаштанд.

Дар ниммарафони байналмилалӣ, ки бо тасмими раиси шаҳри Душанбе сар аз соли 2010 нӯҳумин бор барпо гардид, ҳудуди 50 варзишгар аз 18 кишвар ширкат дошт. Ниммарафон, ки масофаи 21 километру 97 метрро дарбар гирифт, аз “Наврӯзгоҳи пойтахт” шуруъ шуда, дар назди ҳайкали Исмоили Сомонӣ хотима ёфт.

Дар ниммарафони IX байналмилалӣ дар сабқати мардон Тефера Гоза аз Эфиопия бо натиҷаи 1 соату 5 дақиқаю 3 сония мақоми аввалро касб кард. Маана Ретер Курушбу аз Кения (1:05,05) мақоми дувум ва Фенте Гирша аз Эфиопия (1:05,39) мақоми севумро соҳиб шуданд. Адилет Киштанбеков (Қирғизистон, 1:07,05) ҷойи чаҳорум, Иля Тапкин (Қирғизистон, 1:07,15) ҷойи панҷум ва Андрей Петров (Узбекистон, 1:08,27) ҷойи шашумро ишғол карданд.

Дар сабқати занон Даря Маслова аз Қирғизистон бо натиҷаи 1 соату 13 дақиқаю 38 сония мақоми аввалро касб намуд. Мария Хмелнитская (Узбекистон, 1:16,05) мақоми дувум ва Ситора Ҳамидова (Узбекистон, 1:14,19) мақоми севумро соҳиб шуданд. Александра Шафар (Украина, 1:17,53) ҷойи чаҳорум, Мария Коробитеная (Қирғизистон, 1:18,54) ҷойи панҷум ва Мурунги Бетти Касамбӣ (Кения, 1:20,55) ҷйи шашумро гирифтанд.

Шаҳрдорӣ барои баргузории ниммарафони IX байналмилалӣ 398 ҳазору 53 сомонӣ (ҳудуди 45 ҳазор доллари ИМА) ихтисос дода буд. Варзишгароне, ки дар ин ниммарафон миёни занону мардон ҷойҳои аз 1-ум то 6-умро гирифтанд, бо ҷоизаҳои молӣ ба маблағи аз 13 ҳазору 350 сомонӣ то 31 ҳазору 150 сомонӣ сарфароз гаштанд.

Ёдовар мешавем, соли гузашта дар ниммарафони VIII байналмилалӣ дар сабқати мардон Тилаҳун Гирма аз Эфиопия бо натиҷаи 1 соату 4 дақиқаю 58 сония ва дар сабқати занон Виктория Полюдина аз Қирғизистон бо натиҷаи 1 соату 13 дақиқаю 19 сония ғолиб шуда буданд.

Вале варзишгарони тоҷик дар Ниммарафони IX байналмилалӣ аз ҷоизаҳо бенасиб монданд. Бояд гуфт, ки натиҷаҳои беҳтарини варзишгарони тоҷик дар нӯҳ даври ниммарафони байналмилалӣ ҷойҳои чоруми Ҳасан Ғаффоров (солҳои 2013 ва 2016) байни мардон ва Надима Мирзоева (соли 2010 ) миёни занон мебошад.

Ҳамаи ғолибони ниммарафони байналмилалӣ (2010-2018):

Занон

2010 – Надежда Поволяева (Русия)

2011 – Алёна Самохвалова (Русия)

2012 – Камила Ханипова (Русия)

2013 – Александра Дулиба (Беларус)

2014 – Ситора Ҳамидова (Ӯзбекистон)

2015 – Юлия Чиженко (Русия)

2016 – Даря Маслова (Қирғизистон)

2017 – Виктория Полюдина (Қирғизистон)

2018 – Даря Маслова (Қирғизистон))

Мардон

2010 – Тоҳир Мамашев (Қазоқистон)

2011 – Михаил Биков (Русия)

2012 – Андрей Петров (Ӯзбекистон)

2013 – Андрей Петров (Ӯзбекистон)

2014 – Роман Романенко (Украина)

2015 – Юрий Чечун (Русия)

2016 – Либога Вилсон (Кения)

2017 – Тилаҳун Гирма (Эфиопия)

2018 – Тефера Гоза (Эфиопия

Шарҳҳоро бинед (4)

Ин баҳс баста шудааст.

Шарҳҳо

Шарҳи нав расид
Идома
XS
SM
MD
LG