Пайвандҳои дастрасӣ

Хабари нав

Ҷоми Тоҷикистон: Нимфинал – «Регар» - «Вахш», «Равшан» - «Истиқлол»


Чор дастаи лигаи олӣ – "Вахш"-и Қӯрғонтеппа, “Регар-ТадАЗ”-и Турсунзода, “Равшан”-и Кӯлоб ва “Истиқлол”-и Душанбе ба даври ниманиҳоии Ҷоми Тоҷикистон роҳ ёфтанд.

Ёдовар мешавем, ки дастаи "Вахш" аввалин шуда ба нимфинал баромад. Футболбозони Қӯрғонтеппа рӯзи 17-уми сентябр дар майдони худ, варзишгоҳи “Пахтакор”, дастаи "Эсхата”-и Хуҷандро бо ҳисоби 3:0 шикаст доданд. Ҳарсе голро нимҳимоятгар Умедҷон Шарифов дар нимаи дувуми бозӣ ба ҳадаф расонд. Вале Умедҷон дар дақиқаи 81-ум корти сурх гирифт ва аз майдон хориҷ шуд. Бозии аввал дар Хуҷанд бо пирӯзии «Вахш» бо ҳисоби 2:1 анҷом ёфта буд.

Дастаи «Регар-ТадАЗ» 18-уми сентябр дар бозии ҷавобии чорякфиналӣ дар меҳмонӣ бар дастаи «Энергетик»-и Душанбе бо ҳисоби 2:1 пирӯз шуд. Сафаралӣ Каримов, бозигари «Регар-ТадАЗ», дар дақиқаи 18-ум ҳисобро кушод. Баъди 7 дақиқа Алия Силла, легионери «Энергетик» аз Гана, ҳисобро баробар кард. Голи дувуми меҳмононро Фирӯз Раҳматов дар дақиқаи 64-ум зад. Бояд гуфт, ки дар дақиқаи 43-юм Алия Силла («Энергетик») ва Далер Шомуродов (Регар-ТадАЗ) барои занозании якдигар аз майдон ронда шуданд. Бозии аввали ин дастаҳо дар Турсунзода бо ғалабаи «Регар-ТадАЗ» бо ҳисоби 2:0 ба охир расида буд.

Дар бозии дигари чорякниҳоӣ миёни дастаҳои “Равшан”-и Кӯлоб – “Парвоз”-и Бобоҷон Ғафуров, ки шоми чоршанбе дар Варзишгоҳи марказии Кӯлоб баргузор шуд, мизбонон бо ҳисоби 2:1 ғалаба карданд. Дар ин бозӣ низ ҳисобро меҳмонон кушоданд. Голро Фирӯз Бобиев дар дақиқаи 39-ум зад. Давронҷон Тухтасунов дар дақиқаи 47-ум ҳисобро баробар намуд. Чарлз Тико, легионери африқоии «Равшан», дар дақиқаи 58-ум голи дувуми мизбононро ба самар расонд. Бозии аввал низ бо пирӯзии «Равшан» бо ҳисоби 2:1 хотима ёфта буд.

Шоми чоршанбе дар варзишгоҳи «Авиатор»-и Душанбе дастаи мизбон - “Истиқлол” бар тими “Истаравшан”-и Истаравшан бо ҳисоби 2:1ғалаба кард. Аҷиб аст, ки дар ин бозӣ низ ҳисобро меҳмонон кушоданд. Голро дар дақиқаи 12-ум капитани «Истаравшан» Илҳом Баротов зад. Дар нимаи дувуми дидор, дар дақиқаи 48-ум, капитани мизбонон Дилшод Восиев аз пеналтӣ ҳисобро баробар кард. Голи дувумро Роберт Жилин, легионери русиягии «Истаравшан», дар дақиқаи 75-ум ба дарвозаи дастаи худ зад. Дар бозии аввал низ “Истиқлол” бо ҳамин ҳисоб «Истаравшан»-ро шикаст дода буд.

Ба ин тартиб, 27-уми сентябр дар бозиҳои аввали ниманиҳоӣ «Регар-ТадАЗ» бо «Вахш» ва «Равшан» бо “Истиқлол” рақобат мекунанд.

Ҷоми Тоҷикистон. 1/4 финал. Бозиҳои ҷавобӣ
17-уми сентябр, сешанбе.
«ВАХШ» - «ЭСХАТА» - 3:0. Сардовар: Комил Қурбонов (Турсунзода).
Қӯрғонтеппа, варзишгоҳи «Пахтакор».
Голҳо: Умедҷон Шарифов, 67 (1:0). Умедҷон Шарифов, 70 (2:0). Умедҷон Шарифов, 74 (3:0).
Бозии аввал – 2:1.

18-уми сентябр, чоршанбе.
«РАВШАН» - «ПАРВОЗ» - 2:1. Сардовар: Диловаршоҳ Орзуев (Ҳисор).
Кӯлоб, Варзишгоҳи марказӣ.
Голҳо: Фирӯз Бобиев, 39 (0:1). Давронҷон Тухтасунов, 47 (1:1). Чарлз Тико, 58 (1:2).
Бозии аввал – 2:1.

«ЭНЕРГЕТИК» - «РЕГАР-ТАДАЗ» - 1:2. Сардовар: Равшан Ишматов (Қӯрғонтеппа).
Душанбе, Варзишгоҳи КМВА-и Вазорати мудофиаи Тоҷикистон.
Голҳо: Сафаралӣ Каримов, 18 (0:1). Алия Силла, 25 (1:1). Фирӯз Раҳматов, 64 (1:2).
Бозии аввал – 0:2.

«ИСТИҚЛОЛ» - «ИСТАРАВШАН» - 2:1. Сардовар: Баҳром Сайдуллоев (Қӯрғонтеппа).
Душанбе, варзишгоҳи "Авиатор".
Голҳо: Илҳом Баротов, 12 (0:1). Дилшод Восиев, 48, аз пеналтӣ (1:1). Роберт Жилин, 75 – ба дарвозаи худ (2:1).
Бозии аввал – 2:1.

Ҷоми Тоҷикистон. 1/2 финал.
27-уми сентябр (ҷумъа)
Бозиҳои аввал
Оғози бозиҳо – соати 16.00

«РЕГАР-ТАДАЗ» - «ВАХШ»
«РАВШАН» - «ИСТИҚЛОЛ»

Бозиҳои ҷавобӣ
1-уми октябр (сешанбе)
Оғози бозиҳо – соати 15.00

«ВАХШ» - «РЕГАР-ТАДАЗ»
«ИСТИҚЛОЛ» - «РАВШАН»

Шарҳҳоро бинед (6)

Корбарони азиз! Ҳангоми навиштани шарҳ аз истифодаи таҳқиру тӯҳмат нисбат ба якдигар, намояндагони қавму миллатҳо ва динҳои гуногун худдорӣ кунед. Шарҳҳое, ки дорои туҳмату таҳқир, дашном ва иттилооти дурӯғанд ё гурӯҳеро таблиғ мекунанд, нашр карда намешаванд!
Ин баҳс баста шудааст.

Шарҳҳо

Шарҳи нав расид
Идома
XS
SM
MD
LG