Дастаи «Душанбе-83», ки дар бозии ҷавобии чорякниҳоии Ҷоми Тоҷикистон бар тими «Файзканд» -и ноҳияи Восеъ бо ҳисоби 1:0 пирӯз шуд, ба даври ниманиҳоӣ роҳ ёфт. Ҳамакнун «Душанбе-83» дар нимфинал бо “Истиқлол”-и Душанбе рақобат мекунад.
Бозии ҷавобии чорякниҳоии Ҷоми Тоҷикистон миёни «Душанбе-83», дастаи лигаи аввали футболи Тоҷикистон, ва «Файзканд» -и ноҳияи Восеъ, тими лигаи дуюм, 10-уми сентябр дар шаҳри Душанбе, дар майдони эҳтиётии Варзишгоҳи марказии ҷумҳуриявӣ, баргузор шуд. Голи ягонаро Элчибек Рашидбеков дар дақиқаи 59-ум ба самар расонд. Бозии аввал низ бо ҳисоби 1:0 ба нафъи «Душанбе-83» ба поён расида буд.
Ҷоми Тоҷикистон
1/4 финал. Бозии ҷавобӣ
«Душанбе-83» (Душанбе) – «Файзканд» (Восеъ) – 1:0
Гол: Элчибек Рашидбеков, 59.
Огоҳонида шуданд: Бенҷамин Асамоа, Иззатулло Рӯзиев, Бобури Абдулаҳатзода, Дилшод Расулов, Коленс Адухеней («Душанбе-83»), Валиҷон Ҳотамов, Анушервон Наврӯзов («Файзканд»).
Аз майдони хориҷ шуд: Авуку Калеб («Душанбе-83»), 84 – корти 2-юми зард.
Беҳтарин бозигари дидор: Руслан Тиллоев («Душанбе-83»).
Сардовар: Сайёдҷон Зайниддинов (Душанбе).
10 сентябр. Душанбе. Майдони эҳтиётии Варзишгоҳи марказии ҷумҳуриявӣ. 100 тамошобин.
Бозии аввал – 1:0.
Ёдовар мешавем, дастаи “Истиқлол”-и Душанбе, ки 8-уми сентябр дар варзишгоҳи «Авиатор»-и шаҳри Душанбе дар бозии ҷавобии чорякниҳоии Ҷоми Тоҷикистон бар тими «Локомотив-Помир»-и Душанбе бо ҳисоби 6:0 пирӯз шуд, аввалин шуда ба даври ниманиҳоӣ роҳ ёфт. Бозии аввал низ бо ғалабаи “Истиқлол” бо ҳисоби 4:3 хотима ёфта буд. Ба ин тартиб, “Истиқлол” дар даври ниманиҳоӣ бо «Душанбе-83» рақобат мекунад.
Боз як бозии ҷавобии ниманиҳоии Ҷоми Тоҷикистон миёни дастаҳои «Хуҷанд»-и шаҳри Хуҷанд ва «Барқчӣ»-и Ҳисор рӯзи якшанбеи16-уми сентябр дар варзишгоҳи «20-солагии Истиқлолияти Тоҷикистон»-и Хуҷанд соати 16:00 шуруъ мешавад. Бозии аввал миёни ин ду даста бо пирӯзии “Хуҷанд” бо ҳисоби 2:0 ба поён расида буд.
Инчунин дастаи «Регар-ТадАЗ»-и Турсунзода, ки дар бозии аввали чорякниҳоии Ҷоми Тоҷикистон 23-юми август дар меҳмонӣ тими «Хатлон»-и Бохтарро бо ҳисоби 3:0 шикаст дода буд, барои ба нимфинал баромадан заминаи устувор гузоштааст. Ғолиби ин ҷуфт, ки баъди бозии ҷавобӣ маълум хоҳад шуд, дар нимфинал бо ғолиби ҷуфти «Хуҷанд» ва «Барқчӣ» рақобат мекунад.
Бозии ниҳоии Ҷоми Тоҷикистон рӯзи 20-уми октябри имсол дар Варзишгоҳи марказии шаҳри Ваҳдат, ки барои тамошобинон 25 ҳазор ҷойгоҳ дорад, доир хоҳад шуд. Бояд гуфт, ки барандаи Ҷоми Тоҷикистон-2018 ба ҳаққи ширкат дар Ҷоми AFC (Конфедератсияи футболи Осиё)-2019 даст меёбад.
Мусобиқа барои Ҷоми Тоҷикистон сар аз соли 1992 барои бори 27-ум баргузор шудааст. Ҳамагӣ даҳ даста барандаи Ҷом гардидааст. Аз ҳама бештар – шашборӣ - “Регар-ТадАЗ”-и Турсунзода ва “Истиқлол”-и Душанбе Ҷоми Тоҷикистонро ба даст овардаанд. “Хуҷанд”-и Хуҷанд чаҳор бор, “Вахш”-и Қӯрғонтеппа, “Варзоб”-и Душанбе ва “Парвоз” (собиқ “Авиатор”)-и Бобоҷон Ғафуров дуборӣ, “Помир”-и Душанбе, “Ситора”-и Душанбе, “Равшан”-и Кӯлоб ва “Пахтакор”-и ноҳияи Ҷаббор Расулов якборӣ Ҷоми Тоҷикистонро соҳиб гаштаанд.
Соли гузашта дастаи “Хуҷанд” дар бозии ниҳоии Ҷоми Тоҷикистон, ки 2-юми декабр дар Варзишгоҳи марказии Душанбе баргузор шуд, тими “Истиқлол”-ро бо ҳисоби 2:0 шикаст дода буд.
