Тими миллии футболи Олмон аввалин дастаи сайёра шуд, ки ба финали Ҷоми ҷаҳон-2022 дар Қатар роҳхат гирифт.
Шогирдони Ҳанс-Дитер Флик дар бозии даври 8-уми марҳилаи интихобии Ҷоми ҷаҳон-2022 дар меҳмонӣ бар дастаи мунтахаби Македонияи Шимолӣ бо ҳисоби 4:0 ғолиб омаданд ва барои тимҳои гурӯҳи J дастнорас шуданд.
Ҳамзамон дар бозиҳои дигари ин гурӯҳ мунтахаби Руминия бар тими миллии Арманистон бо ҳисоби 1:0 ва дастаи Исландия бар мунтахаби Лихтенштейн бо ҳисоби 4:0 пирӯз гаштанд.
Ду давр қабл аз анҷоми марҳилаи интихобӣ мунтахаби Олмон дар ҳашт бозӣ 21 имтиёз ба даст овардааст, ки аз дастаи Руминия 8 имтиёз зиёд аст. Мунтахаби Руминия дар ҷойи дувум қарор дорад.
Инчунин, ба тими миллии Қатар кафолат дода шудааст, ки дар марҳилаи ниҳоии қаҳрамонии ҷаҳон-2022 ҳамчун кишвари мизбони мусобиқа ширкат варзад.
Дар мусобиқаи қаҳрамонии ҷаҳон-2022, ки аз 21-уми ноябр то 12-уми декабри соли 2022 дар Қатар баргузор хоҳад шуд, 32 дастаи мунтахаб иштирок мекунад.
Дар марҳилаи сеюми мусобиқаи интихобии қаҳрамонии ҷаҳон-2022 дар қораи Осиё 12 дастаи беҳтарин, ки ба ду гурӯҳ тақсим шудаанд, рақобат доранд.
Баъди натиҷагирии бозиҳои даври сеюм дар гурӯҳи «А» тими миллии Эрон бо 9 имтиёз пешсаф аст. Мунтахаби Кореяи Ҷанубӣ бо 7 имтиёз дар ҷойи дуюм мебошад. Дар ин гурӯҳ се дастаи мунтахаб - Имороти Муттаҳидаи Араб, Лубнон ва Ироқ - дуимтиёзӣ гирифтаанд. Сурия, ки дар се бозӣ як имтиёз ба даст овардааст, дар зинаи охирин қарор дорад.
Дар гурӯҳи “В” ду дастаи мунтахаб – Австралия ва Арабистони Саудӣ – бо 9-имтиёзӣ пешқадаманд. Ҷопон, Умон ва Чин 3-имтиёзӣ доранд. Ветнам, ки ҳарсе бозиашро бохтааст, бидуни имтиёз дар зинаи охирин ҷойгир шудааст.
Дастаҳое, ки дар гурӯҳҳои худ ду ҷойи аввалро ишғол мекунанд, мустақиман ба қаҳрамонии ҷаҳон-2022 роҳхат мегиранд. Дастае, ки ҷойи сеюмро соҳиб мешавад, ба ҳаққи иштирок дар плей-офф мушарраф мегардад.
Бозиҳои даври чоруми марҳилаи сеюми мусобиқаи интихобии қаҳрамонии ҷаҳон-2022 дар Осиё имрӯз, 12-уми октябр, баргузор мешаванд.
Мусобиқаи интихобии қаҳрамонии ҷаҳон-2022. Осиё, марҳилаи сеюм
Даври 4-ум, 12-уми октябр
Гурӯҳи «А»
Эрон – Кореяи Ҷанубӣ
Иморот - Ироқ
Сурия – Лубнон
Гурӯҳи «В»
Умон - Ветнам
Арабистони Саудӣ - Чин
Ҷопон - Австралия
