Пайвандҳои дастрасӣ

Хабари нав

"Толибон" номи Раббониро аз Донишгоҳи таълим ва тарбияи Кобул бардоштанд


Вазорати таҳсилоти олии ҳукумати "Толибон" номи Бурҳонуддин Раббонӣ, раиси ҷумҳури пешини Афғонистонро аз унвони Донишгоҳи давлатии таълим ва тарбияи ин кишвар бардошт. Раббонӣ 20-уми сентябри соли 2011 кушта шуд. "Толибон" он замон масъулияти қатли ӯро ба уҳда гирифта буд.

Расонаҳои дохилии Афғонистон рӯзи 20-уми сентябр ба нақл аз эъломияи Вазорати таҳсилотии олии ҳукумати "Толибон" хабар доданд, ки ин донишгоҳ аз ин пас бо номи Донишгоҳи давлатии таълим ва тарбияи Кобул ёд хоҳад шуд.

Донишгоҳи давлатии таълим ва тарбия дар замони президентии Ҳомид Карзай ба "Донишгоҳи таълим ва тарбияи устод Раббонӣ" номгузорӣ шуда буд. Дар эъломияи Вазорати таҳсилоти олии ҳукумати "Толибон" гуфта мешавад, ки "бархӯрди сиёсӣ бо ниҳодҳои таҳсилиро намепазирад".

"Ниҳодҳои омӯзишӣ ва таҳсилӣ бояд бар асоси меъёрҳои илмӣ устувор бошанд, аммо мутаассифона дар зарфи бист соли гузашта ва дар сояи ишғоли Афғонистон бо ин ниҳодҳо бархӯрдҳои салиқаӣ, танзимӣ, самтӣ ва қавмӣ сурат гирифтааст", -- омадааст дар эъломия.

Эъломияи Вазорати таҳсилоти олии ҳукумати "Толибон" мегӯяд, дар гузашта дар пайи мухолифат ва эътирозҳо ба номгузории ин донишгоҳ ба номи Бурҳонуддин Раббонӣ чанд нафар кушта шуданд ва гуё чанд кас аз устодон ҳам норозӣ буданд.

Пеш аз ин гузориш шуда буд, ки Фурудгоҳи байналмилалии Ҳомид Карзай ҳам ба "Майдони ҳавоии Кобул" тағйири ном кард. Ҳамчунин, номи маршал Фаҳим аз як донишгоҳи низомӣ бардошта шудааст. "Толибон" то ҳанӯз расман ин гузоришҳоро тасдиқ накардаанд.

Дар пайи ҷангҳо дар Панҷшер, "Толибон" шишаи оромгоҳи Аҳмадшоҳ Масъуд -- қаҳрамони миллии Афғонистонро ҳам шикаста буданд. Баъдан онҳо эълон карданд, ки онро тармим кардаанд.

Бурҳонуддин Раббонӣ дар соли 1993 президенти Афғонистон шуд. "Толибон" дар соли 1996 ҳукумати ӯро аз Кобул берун ронданд ва кишварро ба ҷанги давомдор кашонданд. То ба қудрат расидани ҳукумати Ҳомид Карзай аксар кишварҳои ҷаҳон Раббониро раҳбари қонунии Афғонистон мешумурданд.

Бурҳонуддин Раббониро, ки раиси Шӯрои олии сулҳи Афғонистон буд, моҳи сентябри соли 2011 як узви "Толибон", ки худро қосиди сулҳи онҳо муаррифӣ карда буд, дар хонааш дар шаҳри Кобул кушт.

Раббонӣ дар Тоҷикистон аз маҳбубият бархӯрдор аст. Ҳукумати Тоҷикистон дар аввали моҳи сентябр ба Бурҳонуддин Раббонӣ ва низ Қаҳрамони миллӣ ва вазири собиқи дифои Афғонистон Аҳмадшоҳ Масъуд ордени дараҷаи аввали "Исмоили Сомонӣ" дод.

Ҳукумати Тоҷикистон далели тақдими унвони олиро ба Раббонӣ ва Масъуд "мусоидат ва миёнҷигарии онҳо ба баргузории музокироти байни тоҷикон дар солҳои 1993-1996 ва саҳми бузург дар раванди истиқрори сулҳ дар Ҷумҳурии Тоҷикистон" гуфт. Ордени "Исмоили Сомонӣ" мукофоти олии давлатии Тоҷикистон ба шумор меравад.

Шарҳҳоро бинед (5)

Корбарони азиз! Ҳангоми навиштани шарҳ аз истифодаи таҳқиру тӯҳмат нисбат ба якдигар, намояндагони қавму миллатҳо ва динҳои гуногун худдорӣ кунед. Шарҳҳое, ки дорои туҳмату таҳқир, дашном ва иттилооти дурӯғанд ё гурӯҳеро таблиғ мекунанд, нашр карда намешаванд!

XS
SM
MD
LG