Марҳилаи сеюми мусобиқаи интихобии қаҳрамонии ҷаҳон-2022 дар қораи Осиё рӯзи 2-юми сентябр оғоз ёфт. 12 дастаи беҳтарини қора, ки дар ин марҳила ба ду гурӯҳ тақсим шудаанд, бозиҳои даври аввалро анҷом доданд.
Дар се бозии даври аввал дар гурӯҳи “А” танҳо як гол зада шуд - мунтахаби Эрон тими миллии Сурияро бо ҳисоби 1:0 мағлуб кард. Ду бозии дигари ин шашгона бо натиҷаи мусовӣ ва бидуни гол хотима ёфт: Кореяи Ҷанубӣ - Ироқ - 0:0 ва Имороти Муттаҳидаи Араб - Лубнон - 0:0.
Дар гурӯҳи “В” мунтахаби Ҷопон ғайричашмдошт дар майдони худ аз тими миллии Умон бо ҳисоби 0:1 шикаст хӯрд. Голи ягонаро ҳамлагар Иссам Ал-Сабӣ ба самар расонид.
Дар бозиҳои дигари гурӯҳи “В” Австралия бар Чин бо ҳисоби 3:0 ва Арабистони Саудӣ бар Ветнам бо ҳисоби 3:1 ғалаба карданд.
Ёдовар мешавем, дастаҳое, ки дар гурӯҳҳои худ ду ҷойи аввалро ишғол мекунанд, мустақиман ба қаҳрамонии ҷаҳон-2022 роҳхат мегиранд. Дастае, ки ҷойи сеюмро соҳиб мешавад, ба ҳаққи иштирок дар плей-офф мушарраф мегардад.
Мусобиқаи интихобии қаҳрамонии ҷаҳон-2022. Осиё, марҳилаи сеюм
Даври 1-ум, 2-юми сентябр
Гурӯҳи “А”
Кореяи Ҷанубӣ - Ироқ - 0:0
Эрон - Сурия - 1:0
Иморот - Лубнон - 0:0
Гурӯҳи “В”
Австралия - Чин - 3:0
Арабистони Саудӣ - Ветнам - 3:1
Ҷопон - Умон - 0:1
Ёдовар мешавем, дастаи мунтахаби миллии Тоҷикистон ба марҳилаи сеюми интихобии қаҳрамонии ҷаҳон-2022 роҳ наёфт. 15-уми июни имсол баъди натиҷагирии марҳилаи дуюми интихобии қаҳрамонии ҷаҳон-2022 дар минтақаи Осиё маълум шуд, ки тими миллии Тоҷикистон наметавонад ба марҳилаи баъдӣ роҳ ёбад.
Дар доираи марҳилаи дуюми интихобии қаҳрамонии ҷаҳон-2022 дар Осиё аз ҳашт гурӯҳ дастаҳои ҷойи аввал ва чор дастаи беҳтарини ҷойи дуюм ба марҳилаи сеюми интихобии қаҳрамони ҷаҳон-2022 ва қаҳрамонии Осиё-2023 роҳхат гирифтанд. Инҳо дастаҳои мунтахаби Сурия, Австралия, Эрон, Арабистони Саудӣ, Ҷопон, Имороти Муттаҳидаи Араб, Кореяи Ҷанубӣ, Умон, Ироқ, Ветнам, Чин ва Лубнон мебошанд.
Мунтахаби Тоҷикистон ҳам баробар ба тими миллии Лубнон имтиёз гирифт, вале голҳои задаи футболбозони тоҷик назар ба дастаи Лубнон чаҳор адад кам буд.
Мунтахаби Тоҷикистон дар гуруҳи "F" бо дастаҳои Ҷопон, Қирғизистон, Муғулистон ва Мянмар рақобат карда, дар ҳашт бозӣ 13 имтиёз ба даст овард. Тими миллии Тоҷикистон дастаи миллии Қирғизистонро ду дафъа шикаст дод, аз тими миллии Муғулистон чор имтиёз ситонид, ба дастаи Мянмар як бозиро бохт ва як ғалаба ба даст овард, ба тими Ҷопон дар ду бозӣ ноком шуд.
Баъди натиҷагирии ҳамаи бозиҳо дар гуруҳи “F” Ҷопон бо 24 имтиёз дар ҷойи аввал, Тоҷикистон бо 13 имтиёз дар ҷойи дуюм, Қирғизистон бо 10 имтиёз дар ҷойи сеюм, Муғулистон ва Мянмар бо 6-имтиёзӣ мутаносибан дар ҷойҳои чоруму панҷум қарор гирифтанд.
