Пайвандҳои дастрасӣ

Хабари нав

Амрико як ҷангҷӯи тоҷикро ба феҳрасти "сиёҳ" шомил кард


Фаррух Файзиматов (Форуқ Шомӣ), ҷангҷӯи тоҷик дар Сурия

Фаррух Файзиматов, машҳур бо лақаби "Форуқ Шомӣ", шаҳрванди 25-солаи Тоҷикистон, таҳти таҳрими Иёлоти Муттаҳида қарор гирифт.

Вазорати молияи Амрико рӯзи 28-уми июл ӯро бо гумони ёрӣ ба созмони террористии "Ал-Қоида" ва ҷалби одамон ба сафи гурӯҳҳои тундрав дар Сурия ба феҳрасти "сиёҳ" ворид кард. Пештар номи ӯ дар рӯйхати "шахсони алоқаманд ба терроризм"-и Бонки Миллии Тоҷикистон дарҷ шуда буд.

Ба иттилои мақомоти Амрико, Фаррух Файзиматов дар ҳайати созмони тундрави "Ҳайату Таҳрир аш-Шом" дар Сурия аст ва ба "Ал-Қоида" ёрии моливу техникӣ мекунад.

Ҳамкори "Ал-Қоида"

Иёлоти Муттаҳида "Ҳайату Таҳрир аш-Шом"-ро ҳамкори "Ал-Қоида" медонад. "Ал-Қоида", ки дар бисёре аз кишварҳо, аз ҷумла Тоҷикистон, террористӣ шинохта шудааст, масъули даҳҳо ҳамла ва қатлу харобкориҳо дар гӯшаҳои ҷаҳон аст. Ҳамлаҳои террористии рӯзи 11-уми сентябри соли 2001 ба Амрико низ кори дасти ин созмон буд.

"Файзиматов шабакаҳои иҷтимоиро барои нашри таблиғ, ҷалби аъзои нав ва ҷамъоварии хайрия барои созмони "Ҳайату Таҳрир аш-Шом" истифода мекунад. Инчунин, маблағҳои худро барои харидани таҷҳизот, аз ҷумла мототсиклҳо ба ин созмон сарф намудааст", -- гуфта шудааст дар гузориши мақомоти амрикоӣ.

Радиои Озодӣ маълум кард, ки Фаррух Файзиматов зодаи шаҳри Исфараи вилояти Суғд аст ва "соли 2016 ба Сурия рафтааст".

"Дар Идлиб аст, баргардонда натавонистем"

Як масъули Шӯъбаи корҳои дохилии шаҳри Исфара рӯзи 29-уми июл бо шарти зикр нашудани номаш ба Радиои Озодӣ гуфт, ҳанӯз аз соли 2016 нисбат ба ӯ бар асоси моддаи 401-и Кодекси ҷиноӣ, яъне “ҷалб, таълим, кумаки молӣ ба зархаридон ва ширкат дар ҷангҳои мусаллаҳонаи кишварҳои хориҷӣ” парванда боз шуда буд. Ин модда дар Тоҷикистон аз панҷ то 20 сол ҷазо пешбинӣ мекунад.

“Бар асоси иттилои дарёфтии мо, ҳоло ӯ дар Идлиб қарор дорад ва бо хонаводааш дар тамос аст. Талошҳои мо барои баргардонидани натиҷа надод”, -- гуфт ин масъули Шӯъбаи корҳои дохилии Исфара.

Дар гузашта Тоҷикистон эълон карда буд, ки агар ҷавонони тоҷик аз майдонҳои ҷанг дар хориҷа пушаймон шудаву ба ватан баргарданд, афв мешаванд.

Фаррух Файзиматов дар шабакаҳои иҷтимоӣ фаъол аст ва аз саҳнаҳои ҷангу харобӣ дар Идлиби Сурия навор нашр карда, ҷавононро барои ширкат дар ҷанг даъват мекунад. Аксар наворҳои ӯ ва мусоҳибаҳои таблиғотиаш бо ҷангҷӯён бо забони русӣ аст.

Гузориш аз харобкориҳо ё даъват ба ҷанг?

Вай дар як паёми хаттӣ гуфт, дар бораи таҳти таҳрими Амрико қарор гирифтанаш шаби 28-уми июл хабардор шуд. Файзиматов худро “журналист ва блогере номид”, ки “аз харобкориҳои ҳукумати Башор Асад ва Русия дар Идлиб навор таҳия мекунад.” Ва тасдиқ кард, ки дар Ҳайату Таҳрир аш-Шом" қарор дорад, аммо гуфт, ба “Ал-Қоида” робита надорад.

Номи “Форуқ Шомӣ” моҳи марти имсол дар матбуоти Фаронса дар робита ба қатли Самуэл Патти, омӯзгоре, ки аз ҷониби Абдулло Анзоров, як ҷавони чечен кушта шуда буд, расонаӣ шуд.

Нашрияи фаронсавии Le Parisien (“Паризен”) навишта буд, ки Анзоров пас аз куштани Самуэл Пати, омӯзгори таърих, ки ба хонандагон карикатураҳои паёмбари Исломро нишон дод, ба Форуқи Шомӣ ном шахсе тавассути Инстаграм паём фиристодааст. Онҳо дар ин шабака дар бораи масоили динӣ бо ҳам мукотиба доштаанд. Фаррух Файзиматов тасдиқ кард, ки воқеан бо Абдулло Анзоров тамос дошт.

Дар рӯйхати "сиёҳ"-и Амрико ва Тоҷикистон

Рӯйхати Вазорати молияи Амрико, ки шаҳрванди Тоҷикистон вориди он шудааст, ҳама гуна робитаи молиро бо ӯ манъ мекунад.

Номи ӯ дар феҳрасти сиёҳи Бонки Миллии Тоҷикистон низ ҳаст. Ин рӯйхат бори аввал соли 2017 таҳия шуда, ҳар сол сафи "афроди алоқаманд ба терроризм" дар он меафзояд. Дар феҳрасте, ки соли 2020 эълон шуд, номи 2647 касро навиштаанд. Моҳи октябри соли 2019 дар онҷо номи 2392 нафар дарҷ шуда буд.

Шарҳҳоро бинед (3)

Корбарони азиз! Ҳангоми навиштани шарҳ аз истифодаи таҳқиру тӯҳмат нисбат ба якдигар, намояндагони қавму миллатҳо ва динҳои гуногун худдорӣ кунед. Шарҳҳое, ки дорои туҳмату таҳқир, дашном ва иттилооти дурӯғанд ё гурӯҳеро таблиғ мекунанд, нашр карда намешаванд!
Ин баҳс баста шудааст.

Шарҳҳо

Шарҳи нав расид
Идома
XS
SM
MD
LG