Дастаи мунтахаби ҷавонони Тоҷикистон (футболбозони соли таваллудашон 2003 ва хурдтар) таҳти роҳбарии сармураббӣ Аҳлиддин Турдиев дар Ҷоми миллатҳои Араб-2021, ки аз 20-уми июн то 6-уми июл дар Миср баргузор мешавад, ширкат меварзад.
Тибқи натиҷаҳои қуръакашии Ҷоми миллатҳои Араб-2021 байни тимҳои мунтахаби ҷавонони то 20-сола дастаи Тоҷикистон ба гурӯҳи "В" шомил шуд. Рақибони мунтахаби ҷавонони Тоҷикистон дастаҳои мунтахаби Марокаш (20-уми июн), Имороти Муттаҳидаи Араб (23-юми июн) ва Ҷибути (26-уми июн) мебошанд.
Дар маҷмӯъ, дар Ҷоми миллатҳои араб-2021, ки ба чор гурӯҳ тақсим шудааст, 15 дастаи ҷавонон ширкат меварзад. Аз рӯи натиҷагирии марҳилаи гурӯҳӣ аз ҳар гурӯҳ ду даста ба плей-офф роҳ меёбад. Дар сурати ба чорякфинали мусобиқа баромадан, мунтахаби ҷавонони Тоҷикистон (U-19) яке аз дастаҳои гурӯҳи "А" - Миср, Нигерия, Мавритания ё Алҷазоирро ҳамчун рақиб қабул мекунад.
Бозии ниҳоии Ҷоми миллатҳои Араб-2021 миёни дастаҳои мунтахаби ҷавонон (U-20) рӯзи 6-уми июл ба нақша гирифта шудааст.
Ҷоми миллатҳои Араб-2021 миёни дастаҳои мунтахаби ҷавонон (U-20)
Гурӯҳи «А»: Миср, Нигерия, Мавритания, Алҷазоир.
Гурӯҳи «В»: Марокаш, Тоҷикистон, Имороти Муттаҳидаи Араб, Ҷибути.
Гурӯҳи «С»: Сенегал, Лубнон, Ироқ, Коморҳо.
Гурӯҳи «D»: Тунис, Яман, Арабистони Саудӣ.
Тақвими бозиҳои мунтахаби ҷавонони Тоҷикистон (U-19)
Даври 1-ум
20-уми июн (якшанбе)
Оғоз – соати 19:00 бо вақти Душанбе
Марокаш – Тоҷикистон
Даври 2-юм
23-юми июн (чоршанбе)
Оғоз – соати 22:00 бо вақти Душанбе
Тоҷикистон – Имороти Муттаҳидаи Араб
Даври 3-юм
26-уми июн (шанбе)
Оғоз – соати 22:00 бо вақти Душанбе
Ҷибути - Тоҷикистон
