Пирӯзии "Хуҷанд", "Истаравшан" ва "Файзканд" дар оғози мусобиқаи лигаи олӣ

апрел 07, 2021

Нарзуллоҳи Латиф

Дар мусобиқаи қаҳрамонии футболи Тоҷикистон миёни дастаҳои лигаи олӣ рӯзҳои 5-6-уми апрел ду бозии боқимонда баргузор шуд. Дар ин бора сомонаи Федератсияи футболи Тоҷикистон (ФФТ) хабар медиҳад.

Ба иттилои манбаъ, дастаи нави лигаи олӣ - «Эсхата»-и Хуҷанд - бозиро дар майдони худ бо «Хатлон»-и Бохтар бо ҳисоби мусовии 1:1 анҷом дод. Ба голи легионери узбек Акобир Тураев бохтариҳо бо зарбаи нишонраси Жан Гатен НД посух доданд.

Дар бозии дигар «Истаравшан»-и шаҳри Истаравшан дар майдони худ дар ҳузури 10 ҳазор тамошобин «Равшан»-и Кӯлобро бо ҳисоби 1:0 мағлуб кард. Голи ягонаро легионери узбек Аббос Икромов дар дақиқаи 28-ум ба самар расонид.

Ёдовар мешавем, рӯзи якшанбеи 4-уми апрел ду бозӣ баргузор шуда буд. «Файзканд»-и Восеъ дар Варзишгоҳи марказии Ҳисор ССКА-и Душанберо бо ҳисоби 1:0 мағлуб кард. Голи ягонаро дар дақиқаи 15-уми бозӣ капитан ё сарвони «Файзканд» Маҳмадалӣ Содиқов ба самар расонид. Зимнан, ин аввалин гол дар мусобиқаи қаҳрамонии Тоҷикистон-2021 мебошад.

Инчунин дастаи «Хуҷанд» дар варзишгоҳи «20-солагии Истиқлолияти Тоҷикистон»-и шаҳри Хуҷанд тими «Душанбе»-ро бо ҳисоби бузурги 4:1 шикаст дод. Голҳои Максим Грек, Артём Сердюк, Парвиз Боқӣ-Охунов ва Дилшод Бозоров ба «Хуҷанд» дар ибтидои мусобиқаи имсола се имтиёз оварданд.

Бояд гуфт, ки бинобар омодагӣ ва иштироки дастаи«Истиқлол»-и Душанбе дар марҳилаи гурӯҳии Лигаи қаҳрамонҳои АFC-2021 ҳамаи бозиҳои бошгоҳи Душанбе дар ибтидои мусобиқаи қаҳрамонии Тоҷикистон-2021 ба муҳлати дертар гузаронида шуд ва дар рӯзҳои эҳтиётӣ пас аз бозгашти даста аз Арабистони Саудӣ доир мешаванд.

Бозиҳои даври дувум рӯзҳои 10-11-уми апрел баргузор мешаванд.

Тибқи низомномаи мусобиқа, дастаҳое, ки имсол дар лигаи олӣ ҷойҳои 9-ум ва 10-умро мегиранд, дар мавсими соли 2022 ба лигаи аввал мегузаранд. Ғолиб ва барандаи медалҳои нуқраи лигаи аввал дар мавсими соли оянда дар лигаи олӣ бозӣ хоҳанд кард.

Мусобиқаи қаҳрамонии Тоҷикистон-2021

Лигаи олӣ. Даври 1-ум

«Эсхата» – «Хатлон» – 1:1

Гол: Акобир Тураев, 45+1 – аз пеналти (1:0). Жан Гатен НД, 51 – аз пеналти (1:1).

Беҳтарин бозигари дидор: Иброҳимхон Эшонхонов («Эсхата»).

Сардовар: Беҳрӯз Муртазоев (Душанбе).

5 апрел. Хуҷанд. Варзишгоҳи «20-солагии Истиқлолияти Тоҷикистон». 2350 тамошобин.

«Истаравшан» – «Равшан» – 1:0

Гол: Аббос Икромов, 28.

Беҳтарин бозигари дидор: Аббос Икромов («Истаравшан»).

Сардовар: Насим Ҳамидов (Душанбе).

6 апрел. Истаравшан. Варзишгоҳи марказӣ. 10 000 тамошобин.

Мавқеи дастаҳо дар ҷадвалит мусобиқа

Ҷ	ДАСТАҲО	Б	Ғ	М	Б	Т	И
1	«Хуҷанд» (Хуҷанд)	1	1	0	0	4-1	3
2	«Истаравшан» (Истаравшан)	1	1	0	0	1-0	3
3	«Файзканд» (Восеъ)	1	1	0	0	1-0	3
4	«Хатлон» (Бохтар)	1	0	1	0	1-1	1
5	«Эсхата» (Хуҷанд)	1	0	1	0	1-1	1
6	«Истиқлол» (Душанбе)	0	0	0	0	0-0	0
7	«Кӯктош» (Рӯдакӣ)	0	0	0	0	0-0	0
8	ССКА (Душанбе)	1	0	0	1	0-1	0
9	«Равшан» (Кӯлоб)	1	0	0	1	0-1	0
10	«Душанбе» (Душанбе)	1	0	0	1	0-1	0