Пайвандҳои дастрасӣ

Хабари нав

Мусобиқаи қаҳрамонии Осиё оид ба самбо дар Тошканд доир мешавад


Акс аз бойгонӣ.

Дар ҷаласаи онлайнии Ассотсиатсияи самбои Осиё роҳбарияти ташкилот, аъзои кумитаи иҷроия ва намояндагони иттиҳодияҳои миллӣ ширкат варзиданд.

Тибқи иттилои хадамоти матбуоти Ассотсиатсияи самбои Узбекистон, дар ҷараёни мулоқоти маҷозӣ, президенти Ассотсиатсияи самбои Осиё Аламҷон Муллоев нақшаи мусобиқаҳои муҳимро, ки дар давоми сол баргузор мешаванд, муаррифӣ кард. Инчунин дар бораи раванди ҷории дохил намудани самбо ба барномаи Бозиҳои осиёии ҷавонон-2025, ки дар Тошканд доир мегардад, зикр шуд.

Ҷанбаи дигари муҳим он буд, ки мусобиқаи қаҳрамонии Осиё-2021 моҳи июн дар Тошканд баргузор мешавад. Дарвоқеъ, ин мусобиқа мебоист дар Индонезия доир мешуд, аммо дар робита ба бозиҳои соҳилии имсол тасмим гирифта шуд, ки мусобиқа ба кишвари дигар интиқол дода шавад.

Дар натиҷа, дархости Ассотсиатсияи самбои Узбекистон барои баргузории қаҳрамонии Осиё қабул карда шуд. Аз ин рӯ, пешниҳод шуд, ки моҳи июн дар Тошканд қаҳрамонии Осиё байни наврасон, ҷавонон ва бузургсолон баргузор карда шавад. Аксарияти иштироккунандагони маҷлис ин пешниҳодро дастгирӣ карданд. Ҳамин тавр, Тошканд имсол мизбони қаҳрамонии самбои Осиё мешавад. Ғайр аз ин, дар ҷараёни мусобиқа Конгресси ҳарсола ва конфронси интихобии Ассотсиатсияи самбои Осиё баргузор мешавад.

Дар ҷараёни мулоқот раиси Ассотсиатсияи самбои Узбекистон Алишер Алимов низ барои эътимод изҳори сипос намуда, дар бораи сатҳи баланди ташкили мусобиқа сухан гуфт.

Дар навбати худ, президенти Ассотсиатсияи самбои Осиё ба коре, ки дар Узбекистон оид ба рушди минбаъдаи самбо гузаронида мешавад, баҳои баланд дод.

Ёдовар мешавем, варзишгарони тоҷик дар мусобиқаи қаҳрамонии Осиё оид ба самбо миёни наврасон, ҷавонон, бузургсолон ва самбои размӣ, ки моҳи сентябри соли 2019 дар шаҳри Деҳлии Ҳиндустон баргузор шуд, 11 медал (3 тилло, 1 нуқра, 7 биринҷӣ) ба даст оварданд.

Мирзоҷамил Рамазонов дар сабқати мардон миёни бузургсолон дар вазни зери 74 кило бо медали тилло сарфароз гашт. Дар сабқати ҷавонон Шердил Алмосов дар вазни зери 74 кило ба унвони қаҳрамони Осиё даст ёфт. Инчунин Саидиброз Икромов дар вазни зери 90 кило миёни ҷавонон, ки дар финал Шамил Шамшитовро аз Қирғизистон мағлуб кард, барандаи медали тилло гардид.

Ягона медали нуқраро Фирӯз Муъминов дар вазни зери 68 кило миёни ҷавонон соҳиб шуд. Дар сабқати наврасон Муҳаммадҷон Зиёев (-48 кг), Комилҷон Ҳайдаралӣ (-56 кг) ва Субҳон Мирзомуродзода (-70 кг), дар рақобатҳо миёни бузургсолон Талабшо Мунавваров (-52 кг), Ҳамроз Раҷабов (-82 кг) ва Одилҷон Сафаров (+100кг), инчунин дар сабқати самбои размӣ Худоёр Раҷабзода (-68 кг) ба гирифтани медалҳои биринҷӣ мушарраф шуданд.

Шарҳҳо

Шарҳи нав расид
Идома
XS
SM
MD
LG