Федератсияи футболи Тоҷикистон ба Конфедератсияи футболи Осиё барои баргузории бозиҳои марҳилаи гурӯҳии Лигаи қаҳрамонҳои AFC-2021 ва Ҷоми AFC-2021 дар Душанбе ва Ҳисор бо иштироки бошгоҳҳои Тоҷикистон дархост фиристод. Дар ин бора сомонаи расмии ФФТ хабар додааст.
Ба иттилои манбаъ, ФФТ барои баргузории марҳилаи гурӯҳии Лигаи қаҳрамонҳои AFC-2021 дар гурӯҳи “А” дархост кардааст. Дар ин гурӯҳ қаҳрамони Тоҷикистон - "Истиқлол" -и Душанбе бо бошгоҳҳои "Ал-Ҳилол" (Арабистони Саудӣ) ва "Шабоб Ал-Аҳлӣ Дубай" (Имороти Муттаҳидаи Арабӣ), инчунин ғолиби ҷуфти плей-офф "Ал-Ғарафа "(Қатар) - АГМК (Узбекистон), ки аз 15-ум то 30-юми апрел дар шакли мутамарказ баргузор мешавад, бозӣ мекунад.
Ғайр аз ин, Федератсияи футболи Тоҷикистон ба AFC барои баргузории бозиҳои марҳилаи гурӯҳии Ҷоми AFC-2021 дар гурӯҳҳои "E" ва "F" дар Душанбе ва Ҳисор, ки дар онҳо бошгоҳҳои Тоҷикистон "Равшан"-и Кӯлоб ва “Хуҷанд”-и Хуҷанд ҳунарнамоӣ мекунанд, дархост фиристодааст.
Дар дуввумин мусобиқаи муҳимтарини бошгоҳӣ дар Осиё барандаи феълии Ҷоми Тоҷикистон “Равшан”-и Кӯлоб дар гурӯҳи “E” бозӣ хоҳад кард. Рақибони футболбозони Кӯлоб қаҳрамони Қирғизистон “Дордой"-и Бишкек ва ноиби қаҳрамони Туркманистон "Аҳал" мебошанд.
Барандаи медали нуқраи қаҳрамонии Тоҷикистон "Хуҷанд" дар гурӯҳи "F" ҳамроҳ бо дастаҳои AГМК ё "Насаф" (Узбекистон), "Олтин Асир" (Туркманистон) ва "Олой" (Қирғизистон) рақобат мекунад.
Марҳилаи гурӯҳии Ҷоми AFC-2021 дар шакли мутамарказ аз 14-ум то 20-уми май дар як давра баргузор мешавад. Ғолибони гурӯҳ дар финали минтақавӣ, ки аз ду бозӣ иборат аст ва рӯзҳои 11-ум ва 25-уми август баргузор мешаванд, бозӣ хоҳанд кард.
Конфедератсияи футболи Осиё макони баргузории марҳилаи гурӯҳии мусобиқаҳои бошгоҳии қитъаро дертар эълон мекунад.
