Ҳокими Токио Юрико Коикэ гуфт, ки сенарияи беҳтарини баргузории Олимпиада дар пойтахти Ҷопон тобистони соли 2021 ташкили мусобиқот дар иншооти варзишӣ бо ҷойгоҳҳои пур аз тамошобинон хоҳад буд. Дар ин бора оҷонсии Reuters хабар медиҳад.
Қаблан дабири кулли Кумитаи тадорукоти Олимпиадаи Токио-2020 Тоширо Муто эълом дошт мақомоти Ҷопон тасмим гирифтанд варзишгарон ва тамошобинони ба Олимпиада омадаро аз кишварҳое, ки вазъи мусоиди эпидемиологӣ доранд, аз зарурати карантини дуҳафтаина раҳо кунанд.
Олимпиадаи Токио мебоист аз 24-уми июл то 9-уми августи соли 2020 баргузор мешуд. Вале ба иллати пандемияи коронавирус Бозиҳо як сол мавқуф гузошта шуданд ва аз 23-юми июл то 8-уми августи соли 2021 доир мегарданд. Ҳамзамон номи Бозиҳо «Токио-2020» нигоҳ дошта шуд.
Моҳи июн кумитаи тадорукоти Бозиҳои “Токио-2020” расман ҷонибдори содда кардани шакли мусобиқаи соли оянда шуда буд. Ба нақша гирифта шудааст, ки Бозиҳо аз рӯи се принсипи асосӣ: таъмини муҳити бехатар, кам кардани хароҷот ва содда кардани шакли Бозиҳо ташкил карда мешаванд.
Варзишгарони тоҷик барои дарёфти роҳхатҳо ба Бозиҳои тобистонаи олимпӣ дар Токио талош доранд. То имрӯз танҳо ду нафар – Баҳодур Усмонов ва Шаббос Неъматуллоев - дар риштаи бокс соҳиби роҳхатҳои олимпӣ гардидаанд.
