Дастаи мунтахаби миллии футболи Тоҷикистон бо раҳбарии Усмон Тошев дар Душанбе, инчунин дар варзишгоҳи “Нефтяник”-и ноҳияи Рӯдакӣ ба бозии дӯстона бо мунтахаби Узбекистон омодагӣ мебинад. Дар ин бора сомонаи расмии Федератсияи футболи Тоҷикистон хабар додааст.
Ба иттилои манбаъ, мунтахаби миллии Тоҷикистон то рӯзи 31-уми август дар Душанбе мебошад ва баъдан ба Тошканд сафар хоҳад кард. Бозии дӯстона миёни дастаҳои мунтахаби Узбекистон ва Тоҷикистон 3-юми сентябр дар Тошканд баргузор мешавад.
Сармураббии мунтахаби миллии Тоҷикистон Усмон Тошев ба ҷамъомад 24 бозигар – 3 дарвозабон, 7 ҳимоятгар, 9 нимҳимоятгар ва 5 ҳамлагарро даъват кардааст.
Ба ҷойи ҳимоятгар Искандар Ҷалилов, ки дар бошгоҳи худ осеб дидааст, ба тими миллӣ намояндаи дигари «Истиқлол» – ҳимоятгари 20-сола Ваҳдат Ханонов даъват шуд.
Ҳимоятгари “Бунёдкор”-и Тошканд Давронҷон Эргашев, ки дар ихтиёри бошгоҳи худ мебошад, ба мунтахаби миллии Тоҷикистон дар Тошканд мепайвандад.
Дарвозабони “Истиқлол”-и Душанбе Рустам Ятимов, ки дар бозии дӯстона бо мунтахаби Малайзия моҳи ноябри соли гузашта корти сурх гирифта буд, тибқи дастури FIFA дар бозӣ бо Узбекистон иштирок намекунад.
Ҳайати дастаи мунтахаби Тоҷикистон дар ҷамъомади таълимиву тамринӣ дар Душанбе:
Дарвозабонҳо: Рустам Ятимов («Истиқлол»), Шоҳрух Қирғизбоев («Локомотив-Помир»), Қурбоналӣ Бобоев («Кӯктош»);
Ҳимоятгарон: Аҳтам Назаров, Табрези Давлатмир, Зоир Ҷӯрабоев, Ваҳдат Ханонов (ҳарчор аз «Истиқлол»), Манучеҳр Сафаров («Локомотив-Помир»), Хуршед Бекназаров, Алишер Баротов (ҳарду аз «Хуҷанд»);
Нимҳимоятгарон: Алишер Ҷалилов, Амирбек Ҷӯрабоев, Эҳсони Панҷшанбе, Муҳаммадҷон Раҳимов (ҳарчор аз «Истиқлол»), Илҳом Баротов («Истаравшан»), Умарҷон Шарипов («Хатлон»), Шарафҷон Солеҳов («Файзканд»), Комрон Турсунов («Моҳун Баган», Ҳиндустон), Хуршед Абдуллоев («Душанбе-83»);
Ҳамлагарон: Манучеҳр Ҷалилов, Шериддин Бобоев (ҳарду аз «Истиқлол»), Ҷаҳонгир Эргашев, Дилшод Бозоров, Тоҳир Малодӯстов (ҳарсе аз «Хуҷанд»)
Сармураббӣ – Усмон Тошев.
