Марко Балич, продюсери маросими ифтитоҳи Бозиҳои тобистонаи олимпӣ дар Токио, гуфт, ки дар сенарияи чорабинӣ эҳтимолан мавзӯи эпидемияи коронавирус ворид карда мешавад. Дар ин бора Insidethegames хабар додааст.
Аз сабаби хуруҷи коронавирус (COVID-19) дар ҷаҳон Олимпиадаи Токио, ки бояд тобистони соли 2020 доир мегардид, ба соли 2021 интиқол дода шуд.
"Ман итминон дорам, маросими олимпӣ, ки нур барои тамоми инсоният аст, бояд ба таври бояду шояд рӯйдодҳои ҳоло рухдодаро инъикос кунад",-гуфт Балич.
Бозиҳои олимпии тобистона дар Токио 23-юми июли соли оянда оғоз ёфта, 8-уми август ба итмом мерасанд.
Дар ҳамин ҳол, хабар дода мешавад, ки оташи олимпӣ дар Фукусима ба намоиш гузошта хоҳад шуд. Онро дар маркази таълимии миллии футболи J-Village дидан мумкин аст.
Оташи олимпӣ дар Фукусима то охири моҳи апрел боқӣ хоҳад монд ва пас аз он ба Токио фиристода мешавад.
