Пайвандҳои дастрасӣ

Хабари нав

Арабистони Саудӣ ва Кореяи Ҷанубӣ дар финали қаҳрамонии Осиё


Мунтахаби олимпии Узбекистон.

Дастаҳои мунтахаби олимпии Арабистони Саудӣ ва Кореяи Ҷанубӣ ба финали қаҳрамонии футболи Осиё миёни ҷавонони то 23-сола, ки дар Тайланд ҷараён дорад, роҳ пайдо карданд.

Дар бозиҳои ниманиҳоӣ, ки 22-юми январ дар Тайланд баргузор шуданд, мунтахаби Арабистони Саудӣ бар дастаи Узбекистон бо ҳисоби 1:0 ва Кореяи Ҷанубӣ бар Австралия бо ҳисоби 2:0 ғолиб омаданд.

Дар финали қаҳрамонии Осиё (U-23) рӯзи якшанбеи 26-уми январ дастаҳои мунтахаби Кореяи Ҷанубӣ ва Арабистони Саудӣ рақобат мекунанд.

Як рӯз пеш аз финал - 25-уми январ бозӣ барои ҷойи севум миёни дастаҳои мунтахаби Австралия ва Узбекистон баргузор мешавад.

Бояд гуфт, ки ҷоизадорони қаҳрамонии футболи Осиё (U-23) дар Тайланд ба ҳаққи ширкат дар Олимпиадаи соли 2020 дар Токио мушарраф хоҳанд шуд. Дастаҳои мунтахаби Кореяи Ҷанубӣ ва Арабистони Саудӣ, ки ба финал баромаданд, ба Токио мераванд. Барои ба даст овардани роҳхати севум тимҳои мунтахаби Австралия ва Узбекистон талош меварзанд.

Ёдовар мешавем, дастаи мунтахаби олимпии футболи Тоҷикистон (U-23) дар мусобиқаи интихобии қаҳрамонии Осиё-2020 дар гурӯҳи "F", ки моҳи марти соли гузашта дар Тошканд бо иштироки се дастаи мунтахаб доир гардид, аз роҳхат ба марҳилаи ниҳоӣ бенасиб монд.

Мунтахаби Тоҷикистон дар нахустин бозиаш тими Ҳиндустонро бо ҳисоби 2:0 мағлуб карда, бозии дувумашро бо дастаи мизбон - Узбекистон - бо ҳисоби 0:0 анҷом дод.

Дастаҳои Узбекистон ва Тоҷикистон чоримтиёзӣ гирифтанд. Аз рӯи таносуби беҳтари тӯбҳо мунтахаби Узбекистон дар гурӯҳи “F” ҷойи аввалро касб намуда, ба марҳилаи ниҳоии қаҳрамонии Осиё-2020 роҳ пайдо кард.

Қаҳрамонии футболи Осиё (U-23)

1/4 финал

18-уми январ (шанбе)
Арабистони Саудӣ - Тайланд - 1:0
Австралия - Сурия - 1:0

19-уми январ (якшанбе)
Узбекистон - Иморот - 5:1
Кореяи Ҷанубӣ - Урдун - 2:1

Нимфинал

22-юми январ (чоршанбе)

Арабистони Саудӣ – Узбекистон – 1:0
Кореяи Ҷанубӣ – Австралия – 2:0

Бозӣ барои ҷойи севум

25-уми январ (шанбе)

Австралия - Узбекистон

Финал

26-уми январ (якшанбе)

Кореяи Ҷанубӣ – Арабистони Саудӣ

Корбарони азиз!

Ҳангоми навиштани шарҳ, лутфан, аз истифодаи таҳқиру тӯҳмат нисбат ба якдигар, намояндагони қавму миллатҳо ва динҳои гуногун худдорӣ кунед. Шарҳҳое, ки дорои туҳмату таҳқир, дашном ва иттилооти бардурӯғанд ва ё гурӯҳеро таблиғ мекунанд, нашр карда намешаванд!

Шарҳҳо

Шарҳи нав расид
Идома
XS
SM
MD
LG