Ҳашт даста ба чорякфинали қаҳрамонии Осиё (U-23) роҳ пайдо кард

январ 17, 2020

Нарзуллоҳи Латиф

Ҳамаи ҳашт дастаи ширкаткунандаи даври чорякниҳоии мусобиқаи қаҳрамонии футболи Осиё миёни ҷавонони то 23-сола, ки дар Тайланд ҷараён дорад, баъди натиҷагирии бозиҳои даври охирин дар гурӯҳҳо маълум шуд.

Шонздаҳ даста ба чаҳор гурӯҳ тақсим шуда буд:

Гурӯҳи «А»: Тайланд, Ироқ, Австралия, Баҳрайн
Гурӯҳи «В»: Қатар, Ҷопон, Арабистони Саудӣ, Сурия
Гурӯҳи «С»: Узбекистон, Кореяи Ҷанубӣ, Эрон, Чин
Гурӯҳи «D»: Ветнам, Кореяи Шимолӣ, Урдун, Имороти Муттаҳидаи Арабӣ

Баъди натиҷагирии бозиҳо дар гурӯҳҳо ҳашт даста ба чорякфинал роҳ пайдо кард: Австралия, Тайланд (гурӯҳи «А»), Арабистони Саудӣ, Сурия (гурӯҳи «В»), Кореяи Ҷанубӣ, Узбекистон (гурӯҳи «С»), Имороти Муттаҳидаи Арабӣ, Урдун (гурӯҳи «D»).

Дар чорякфинали қаҳрамонии Осиё (U-23) рӯзи шанбеи 18-уми январ Арабистони Саудӣ бо Тайланд ва Австралия бо Сурия рақобат мекунанд. Ду бозии дигари даври чорякниҳоӣ рӯзи якшанбеи 19-уми январ миёни дастаҳои мунтахаби Кореяи Ҷанубӣ – Урдун ва Иморот – Узбекистон доир мегардад.

Бозиҳои ниманиҳоӣ 22-юми январ, бозӣ барои ҷойи сеюм 25-уми январ ва бозии ниҳоӣ 26-уми январ баргузор мешаванд.

Бояд гуфт, ки ҷоизадорони қаҳрамонии футболи Осиё (U-23) дар Тайланд ба ҳаққи ширкат дар Олимпиадаи соли 2020 дар Токио мушарраф хоҳанд шуд.

Ёдовар мешавем, дастаи мунтахаби олимпии футболи Тоҷикистон (U-23) дар мусобиқаи интихобии қаҳрамонии Осиё-2020 дар гурӯҳи "F", ки моҳи марти соли гузашта дар Тошканд бо иштироки се дастаи мунтахаб доир гардид, аз роҳхат ба марҳилаи ниҳоӣ бенасиб монд.

Мунтахаби Тоҷикистон дар нахустин бозиаш тими Ҳиндустонро бо ҳисоби 2:0 мағлуб карда, бозии дувумашро бо дастаи мизбон - Узбекистон - бо ҳисоби 0:0 анҷом дод.

Дастаҳои Узбекистон ва Тоҷикистон чоримтиёзӣ гирифтанд. Аз рӯи таносуби беҳтари тӯбҳо мунтахаби Узбекистон дар гурӯҳи “F” ҷойи аввалро касб намуда, ба марҳилаи ниҳоии қаҳрамонии Осиё-2020 роҳ пайдо кард.