Ду медали паҳлавонони ҷавони тоҷик дар қаҳрамонии ҷудои Осиё

Дар рӯзи аввали мусобиқот Шодмон Ризоев дар рақобатҳо дар вазни зери 66 кило баъди се пирӯзӣ бар рақибонаш аз Непал, Ҳонконг ва Кореяи Ҷанубӣ ба даври ниманиҳоӣ роҳ пайдо кард. Ӯ дар нимфинал бар Ҳаким Оғомамедови туркман ғолиб омада, ба финал баромад. Вале Шодмон қувваозмоии ниҳоиро ба Томойа Вакасаи ҷопонӣ бохт ва барои мақоми дувум бо медали нуқра мукофотонида шуд.

Медали дувуми нуқраро Шарифҷон Назриев дар рӯзи дувуми рақобатҳо ба мунтахаби Тоҷикистон овард. Ӯ дар вазни зери 100 кило ба рақобат аз даври чорякниҳоӣ шуруъ карда, пас аз пирӯзӣ бар Оразбек Алмазбеков аз Қирғизистон ба даври ниманиҳоӣ роҳ ёфт. Дар нимфинал бар Бекарис Садуакас аз Қазоқистон ғолиб омад. Вале Шарифҷон қувваозмоии ниҳоиро ба Алӣ Парҳезгар аз Эрон бохт ва ҷойи дувумро азони худ кард.

Ду паҳлавони тоҷик - Меҳрзод Суфиев дар вазни зери 60 кило ва Оламафрӯз Абдураҳмонов дар вазни зери 81 кило - ҷойҳои панҷумро гирифтанд.

Вале панҷ гуштигири дигари тоҷик – Ҷамолиддин Абдуллоев (-66 кг), Муҳаммадшариф Наҷмуддинов (-73 кг), Эмомризо Анварзода (-90 кг) ва Иброҳимҷон Элмуродов (-100 кг) миёни писарон, инчунин Шоҳида Қаландарова (-57 кг) миёни духтарон дар даври муқаддамотӣ аз рақибонашон шикаст хӯрданд.

Ба иттилои сомонаи расмии Федеросиюни байналмилалии ҷудо (IJF) дар мусобиқоти қаҳрамонии Осиё миёни навҷавонон 170 варзишгар (100 писар ва 70 духтар) аз 21 кишвар ширкат дошт.

Баъди натиҷагирии ду рӯзи мусобиқот дар ҳисоби умумидастаӣ мунтахаби Ҷопон бо касби 10 медал (6 тилло, 1 нуқра ва 3 биринҷӣ) ҷойи аввалро соҳиб шуд. Мунтахаби Кореяи Ҷанубӣ бо касби 10 медал (3 тилло, 1 нуқра ва 6 биринҷӣ) дар мақоми дувум қарор гирифт. Мунтахаби Қазоқистон бо касби 13 медал (1 тилло, 3 нуқра ва 9 биринҷӣ) ҷойи севумро азони худ кард. Дастаи Тоҷикистон бо касби ду медали нуқра ҷойи ҳаштумро ишғол намуд.