Зайниддин Зидан боз сармураббии бошгоҳи футболи "Реал"-и Мадрид таъйин шуд. Дар ин бора сомонаи расмии бошгоҳ хабар додааст.
Мутахассиси 46-солаи фаронсавӣ бо "Бошгоҳи шоҳона" то тобистони соли 2022 қарордод ба имзо расонидааст. Зидан дар бошгоҳи шаҳри Мадрид дар як сол 16 млн евро ба даст меорад. Вай дар ин вазифа Сантяго Солариро иваз намуд.
Зайниддин Зидан аз ин пеш аз соли 2016 то соли 2018 сармураббии "Реал" буд. Таҳти раҳбарии ӯ бошгоҳи испаниягӣ се бор ғолиби Лигаи қаҳрамонҳо гардида, якборӣ дар қаҳрамонии Испания ва Суперҷоми кишвар баранда шудааст. Ба ҷуз ин, "Реал" бо раҳбарии Зидан дуборӣ дар Суперҷоми УЕФА ва қаҳрамонии бошгоҳии ҷаҳон ғолиб омадааст.
Зидан ба ҳайси футболбоз дар "Реал" аз соли 2001 то соли 2006 бозӣ кардааст. Дар ҳайати даста ӯ ба унвони қаҳрамони Испания даст ёфта, ду бор Суперҷоми Испанияро ба даст оварда, инчунин ғолиби Лигаи қаҳрамонҳо, Суперҷоми УЕФА ва Ҷоми байниқитъавӣ гардидааст.
Сармураббии нави "Реал" бозгашти худро ба "Бошгоҳи шоҳона" чунин шарҳ додааст: "Даста баъди он ки ҳама чизро бурд, ба таҳаввулот эҳтиёҷ дошт, бинобар ин ман рафтам. Ҳамакнун ман бармегардам, зероки маро президент даъват намуд. Аз ҳама асосӣ он аст, ки баъди нӯҳ моҳи набуданам ман мехоҳам ба кор баргардам".
Зидан ба саволи имконияти бозгашти ҳамлагар Криштиану Роналду ба даста, ки тобистони соли 2018 ба «Ювентус»-и Италия гузаштааст, чунин посух додааст, ки "ҳоло дар бораи бозгашти Криштиану Роналду ҳарф задан бамаврид нест. Роналду таърихи "Реал" мебошад ва инро дигар карда намешвад. Ман ҳанӯз фикр накардаам кӣ Роналдуро иваз карда метавонад. Дар ҳамин ҳол ман хурсандам, ки ба бошгоҳ баргаштам. Дар пеш мо 11 бозӣ дорем, баъдан мо ба мавсими оянда омодагӣ мегирем".
Бозиҳои даҳ рӯзи ахир дастаи "Реал"-ро дар мавқеияти ниҳоят номуносиб қарор додааст. Даста дар муддати якуним ҳафта аз ҳаққи идомаи мубориза дар Ҷоми Испания ва Лигаи қаҳрамонҳо маҳрум гардида, дар қаҳрамонии кишвар аз "Барселона" 12 имтиёз камтар гирифтааст.
Аз сӯи дигар, мухолифат миёни сармураббӣ Сантяго Соларӣ бо бозигарон Иско ва Марсело ба оташи ин муноқиша рӯған рехтааст. Ҳамчунин ҳодисаи баъд аз шикаст аз "Аякс", ки президенти "Реал" Флорентино Перес дар утоқи либосивазкунӣ бо капитани даста Серхио Рамос хархаша намуд, ихтилоф дар ин бошгоҳи маъруфро амиқтар нишон медиҳад. Ин вазъи даста боиси нигаронии мухлисон гардидааст.
