Мусобиқоти қаҳрамонии ҷаҳон оид ба рапид ё шоҳмоти фаврӣ ва блитс ё шоҳмоти барқвор, ки аз 25-ум то 31-уми декабр дар шаҳри Санкт-Петербурги Русия баргузор шуд, бо пирӯзии шатранҷбозон аз Русия, Чин ва Норвегия ба поён расид.
Ба иттилои сомонаи расмии ин мусобиқот, дар қаҳрамонии ҷаҳон зӯртарин шатранҷбозони ҷаҳон, ки дар феҳристи ФИДЕ (Федератсиони байналмилалии шоҳмот) на камтар аз 2500 имтиёз доранд, иштирок карданд.
Дар мусобиқа оид ба рапид миёни мардон, ки 150 шатранҷбоз аз 40 кишвар ширкат варзид, Даниил Дубови русиягӣ ғолиб омад. Ӯ аз 15 имтиёзи имконпазир 11 имтиёз гирифт. Шатранҷбози озарбойҷонӣ Шаҳриёр Мамедёров (10,5 имтиёз) дувум ва амрикоӣ Ҳикару Накамура (10,5 имтиёз) севум шуданд.
Дар сабқати занон оид ба рапид Тзюй Вэнтзюни чиноӣ, қаҳрамони ҷаҳон оид ба шоҳмот, бо 10 имтиёз аз 12 имтиёзи имконпазир ғолиб шуд. Соросаодат Ходималшарёҳ аз Эрон дар ҷойгоҳи дувум ва Александра Горячкинаи русиягӣ дар ҷойгоҳи севум қарор гирифтанд.
Магнус Карлсени норвегиягӣ, қаҳрамони 16-уми ҷаҳон оид ба шоҳмот, ғолиби қаҳрамонии ҷаҳон оид ба блитс гардид. Ӯ аз рӯи натиҷагирии 21 давр 17 имтиёз ба даст овард ва танҳо аз устоди байналмилалӣ Шамсиддин Воҳидови узбекистонӣ шикаст хӯрд.
Ян-Кшиштоф Дуда аз Лаҳистон ҷойи дувум ва Ҳикару Накамура аз Иёлоти Муттаҳидаи Амрико ҷойи севумро касб намуданд.
Екатерина Лагнои русиягӣ дар сабқати занон оид ба блитс ба унвони қаҳрамони ҷаҳон даст ёфт. Ӯ дар 17 бозӣ 13,5 имтиёз гирифт ва аз Соросаодат Ходималшарёҳи эронӣ (13 имтиёз) ва Лэй Тинтсзеи чиноӣ (12,5 имтиёз) пеш гузашт.
Фаррух Амонатов, шатранҷбози маъруфи тоҷик, дар мусобиқоти қаҳрамонии ҷаҳон оид ба рапид ё шоҳмоти фаврӣ ширкат варзид. Ӯ ягона шатранҷбозе буд, ки Тоҷикистонро дар ин мусобиқоти ҷаҳонӣ намояндагӣ кард. Ӯ бо 8 имтиёз дар байни 150 нафар мақоми 72-юмро касб намуд.
Маблағи бунёди ҷавоизи мусобиқот 1 миллион доллари ИМА-ро ташкил медод. Аз он ҷумлв, ба ғолибони қаҳрамонии ҷаҳон оид ба рапид ва блитс миёни мардон 60 ҳазор доллар ва миёни занон 40 ҳазор доллар супурда шуд.
