Омодагии мунтахаби Тоҷикистон ба бозии дӯстона бо Баҳрайн дар Манама

Дастаи мунтахаби футболи Тоҷикистон барои барпо кардани бозии дӯстона бо тими миллии Баҳрайн ба шаҳри Манама расид. Футболбзони тоҷик ба ин бозӣ дар пойтахти Баҳрайн таҳти раҳбарии мутахассиси узбекистонӣ Усмон Тошев омодагӣ мебинанд.

Ба иттилои Федератсияи футболи Тоҷикистон, бозии дӯстона миёни тимҳои миллии Баҳрайн ва Тоҷикистон рӯзи панҷшанбеи 20-уми декабр дар Варзишгоҳи миллии шаҳри Манама соати 19:00 ба вақти маҳаллӣ (соати 21:00 - ба вақти Душанбе) шуруъ мешавад.

Зимнан, мунтахаби Баҳрайн ба марҳилаи ниҳоии Ҷоми Осиё-2019 омодагӣ мебинад. Рақибони Баҳрайн дар гурӯҳи «А» дастаҳои мунтахаби Имороти Муттаҳидаи Араб, Тайланд ва Ҳиндустон мебошанд.

Футболбозони тоҷик баъди анҷом додани ду бозии дӯстона бо мунтахаби Умон аз Масқат ба Манама омаданд. Ёдовар мешавем, дастаи мунтахаби Тоҷикистон дар ҳарду бозии дӯстона аз тими миллии Умон бо натиҷаҳои 1:2 ва 0:1 шикаст хӯрда буд.

Мунтахаби Тоҷикистон алъон дар рейтинг ё раддабандии Федератсияи байналмилалии футбол (FIFA) дар байни 211 кишвар бо 1161 имтиёз дар ҷойгоҳи 118-ум қарор дорад. Мунтахаби Баҳрайн бошад, дар ин феҳрист бо 1178 имтиёз ҷойгоҳи 113-умро касб намудааст. Баҳрайн дар байни дастаҳои мунтахаби миллӣ, ки ба Конфедератсияи футболи Осиё (AFC) шомиланд, ҷойгоҳи 20-ум ва Тоҷикистон ҷойгоҳи 22-юмро ишғол кардаанд.

Ҳайати дастаи мунтахаби Тоҷикистон дар бозии дӯстона муқобили тими миллии Баҳрайн:

Дарвозабонҳо: Беҳрӯз Хайриев («Истиқлол»), Шоҳрух Қирғизбоев («Барқчӣ»), Фатҳулло Бобоев («Хатлон»);

Ҳимоятгарон: Зоир Ҷӯрабоев («Металлург», Узбекистон), Сиёвуш Асроров, Аҳтам Назаров, Табрези Давлатмир (ҳарсе - «Истиқлол»), Хуршед Бекназаров («Хуҷанд»), Ваҳдат Ҳанонов, Ҳусейн Нурматов (ҳарду – «Барқчӣ»), Доробҷон Эргашев (ССКА «Помир»), Бахтиёр Қаландаров («Регар-ТадАЗ»);

Нимҳимоятгарон: Амирбек Ҷӯрабоев, Эҳсони Панҷшанбе, Муҳаммадҷон Раҳимов (ҳарсе – «Истиқлол»), Шервонӣ Мабатшоев, Шарафҷон Солеҳов (ҳарду – «Барқчӣ»), Кароматулло Саидов («Хатлон»), Муҳсинҷон Абдуғаффоров (ССКА «Помир»);

Ҳамлагарон: Муҳаммадҷон Лоиқов («ЮАС-Житковичи», Беларус), Шериддин Бобоев, Комрон Турсунов (ҳарду – «Истиқлол»), Ҷаҳонгир Эргашев («Хуҷанд»);

Бозии дӯстона

20-уми декабр (панҷшанбе)

Оғози бозӣ – соати 21:00 ба вақти Душанбе

Баҳрайн – Тоҷикистон

Манама, Варзишгоҳи миллӣ