Дастаи “Хуҷанд”-и шаҳри Хуҷанд, барандаи ҷоизаи нуқраи мусобиқаи қаҳрамонии футболи Тоҷикистон, дар Ҷоми AFC (Конфедератсиони футболи Осиё)-2019 ба мубориза аз марҳилаи плей-офф шуруъ мекунад. Хуҷандиҳо дар ин марҳила бо ғолиби даври муқаддамотӣ вориди рақобат мешаванд.
Ба иттилои дафтари матбуоти Федератсиони футболи Тоҷикистон, рақиби «Хуҷанд» дар марҳилаи плей-оффи Ҷоми AFC-2019 ғолиби ҷуфти даври муқаддамотӣ миёни ҷоизадори нуқраи қаҳрамонии Қирғизистон - «Олой»-и Ӯш ва бошгоҳи дуюми Туркманистон (барандаи Ҷом ё ҷоизадори нуқраи қаҳрамонии ин кишвар) мегардад. Бозиҳои онҳо рӯзҳои 20-ум ва 27-уми феврал доир мешаванд.
Нахустин бозии “Хуҷанд” дар доираи плей-оффи Ҷоми AFC-2019 рӯзи 6-уми март дар меҳмонӣ ва бозии ҷавобӣ дар хона 13-уми март барпо мегарданд. Дар мавриди пирӯзӣ хуҷандиҳо ба ҳаққи ширкат дар марҳилаи гурӯҳии ин мусобиқа мушарраф мешаванд.
Марҳилаи гурӯҳии Ҷоми АFC-2019 дар минтақаи Марказӣ 2-юми апрел шуруъ шуда, 26-уми июн ба поён мерасад. Ба марҳилаи баъдӣ танҳо ғолиби гурӯҳ роҳ меёбад. Баъди анҷоми марҳилаи гурӯҳӣ нимфинал ва финали байниминтақавӣ доир мегардад. Сипас рақобати асосӣ - бозии ниҳоӣ – рӯзи 2-юми ноябр баргузор мешавад.
Бошгоҳи футболи «Истиқлол»-и Душанбе бошад, дар мавсими нав бори аввал дар Лигаи қаҳрамонҳои AFC (Конфедератсиони футболи Осиё) бозӣ мекунад. Барои ба марҳилаи гурӯҳии мусобиқа роҳ ёфтан ба қаҳрамони Тоҷикистон зарур аст, ки дар марҳилаи муқаддамотӣ бошгоҳи футболи АГМК-и Узбекистан, баъдан дар даври плей-офф бошгоҳи «Ал-Наср»-и Арабистони Саудиро мағлуб намояд.
Агар «Истиқлол» ба марҳилаи гурӯҳии Лигаи қаҳрамонҳои АFC-2019 роҳ ёбад, онгоҳ «Регар-ТадАЗ»-и Турсунзода, ки имсол дар мусобиқаи қаҳрамонии Тоҷикистон ҷойи чорумро соҳиб шуд, дар марҳилаи гурӯҳии Ҷоми AFC-2019 бозӣ мекунад, зеро ки ҷоизадори биринҷии қаҳрамонии кишвар - бошгоҳи «Кӯктош»-и ноҳияи Рӯдакӣ - аз ташрифоти литсензионии AFC нагузашт.
Ҷоми AFC-2019
Минтақаи Марказӣ
Марҳилаи муқаддамотӣ. Бозии аввал
20-уми феврал (чоршанбе)
«Олой» (Қирғизистон) – бошгоҳи дуюми Туркманистон
Марҳилаи муқаддамотӣ. Бозии ҷавобӣ
27-уми феврал (чоршанбе)
Бошгоҳи дуюми Туркманистон – «Олой» (Қирғизистон)
Плей-офф. Бозии аввал
6-уми март (чоршанбе)
Ғолиби ҷуфти«Олой» (Қирғизистон) /бошгоҳи дуюми Туркманистон – «Хуҷанд» (Тоҷикистон)
Плей-офф. Бозии ҷавобӣ
13-уми март (чоршанбе)
– «Хуҷанд» (Тоҷикистон) – Ғолиби ҷуфти«Олой» (Қирғизистон) /бошгоҳи дуюми Туркманистон
