Пайвандҳои дастрасӣ

Хабари нав

Ҷоми Тоҷикистон: Пирӯзии "Истиқлол" ва "Хуҷанд" дар бозиҳои аввали ниманиҳоӣ


Дастаҳои “Истиқлол”-и Душанбе ва «Хуҷанд»-и шаҳри Хуҷанд дар бозиҳои аввали ниманиҳоии Ҷоми Тоҷикистон, ки рӯзи чоршанбе, 17-уми октябр, баргузор шуданд, ғолиб гаштанд.

“Истиқлол” дар майдони худ - Варзишгоҳи марказии ҷумҳуриявӣ - тими «Душанбе-83»-и Душанберо бо ҳисоби 3:1 шикаст дод. Аҷиб аст, ки сардовари ин бозӣ Насим Ҳамидов (Душанбе) се ҷаримаи 11-метрӣ ё пеналтӣ таъйин кард (дутоаш ба дарвозаи «Душанбе-83» ва яктоаш ба дарвозаи “Истиқлол”).

Голҳои “Истиқлол”-ро Ҷаҳонгир Абдумуъминов дар дақиқаи 11-ум, Нозим Бобоҷонов дар дақиқаи 55-ум аз пеналтӣ ва Аҳтам Назаров дар дақиқаи 86-ум аз пеналтӣ ба ҳадаф расонданд. Голи «Душанбе-83»-ро Элчибек Рашидбеков дар дақиқаи 60-ум аз пеналтӣ зад.

Дар бозии дигари ниманиҳоии Ҷоми Тоҷикистон «Хуҷанд» дар меҳмонӣ “Регар-ТадАЗ”-и Турсунзодаро бо ҳисоби 1:0 мағлуб кард. Голи ягонаро Дилшод Бозоров дар дақиқаи 41-ум ба самар расонд.

Бозиҳои ҷавобии ниманиҳоии Ҷоми Тоҷикистон рӯзи якшанбе, 21-уми октябр, баргузор мешаванд.

Мусобиқа барои Ҷоми Тоҷикистон сар аз соли 1992 барои бори 27-ум баргузор шудааст. Ҳамагӣ даҳ даста барандаи Ҷом гардидааст. Аз ҳама бештар – шашборӣ - “Регар-ТадАЗ”-и Турсунзода ва “Истиқлол”-и Душанбе Ҷоми Тоҷикистонро ба даст овардаанд. “Хуҷанд”-и Хуҷанд чор бор, “Вахш”-и Қӯрғонтеппа, “Варзоб”-и Душанбе ва “Парвоз” (собиқ “Авиатор”)-и Бобоҷон Ғафуров дуборӣ, “Помир”-и Душанбе, “Ситора”-и Душанбе, “Равшан”-и Кӯлоб ва “Пахтакор”-и ноҳияи Ҷаббор Расулов якборӣ Ҷоми Тоҷикистонро соҳиб гаштаанд.

Соли гузашта дастаи “Хуҷанд” дар бозии ниҳоии Ҷоми Тоҷикистон, ки 2-юми декабр дар Варзишгоҳи марказии Душанбе баргузор шуд, тими “Истиқлол”-ро бо ҳисоби 2:0 шикаст дода буд.

Ҷоми Тоҷикистон-2018

Нимфинал. Бозиҳои аввал

17-уми октябр (чоршанбе)

«Истиқлол» – «Душанбе-83» - 3:1

Голҳо: Ҷаҳонгир Абдумуъминов, 11 (1:0). Нозим Бобоҷонов, 55 — аз пеналтӣ (2:0). Элчибек Рашидбеков, 60 — аз пеналтӣ (2:1). Аҳтам Назаров, 86 — аз пеналтӣ (3:1).

Сардовар: Насим Ҳамидов (Душанбе).

Душанбе, Варзишгоҳи марказии ҷумҳуриявӣ.

«Регар-ТадАЗ» – «Хуҷанд» - 0:1

Гол: Дилшод Бозоров, 41

Сардовар: Беҳрӯз Муртазоев (Душанбе).

Турсунзода, варзишгоҳи «ТАЛКО-Арена»

Нимфинал. Бозиҳои ҷавобӣ

21-уми октябр (якшанбе)

«Душанбе-83» – «Истиқлол»

«Хуҷанд» – «Регар-ТадАЗ»

Шарҳҳоро бинед (1)

Корбарони азиз! Ҳангоми навиштани шарҳ аз истифодаи таҳқиру тӯҳмат нисбат ба якдигар, намояндагони қавму миллатҳо ва динҳои гуногун худдорӣ кунед. Шарҳҳое, ки дорои туҳмату таҳқир, дашном ва иттилооти дурӯғанд ё гурӯҳеро таблиғ мекунанд, нашр карда намешаванд!
Ин баҳс баста шудааст.

Шарҳҳо

Шарҳи нав расид
Идома
XS
SM
MD
LG