Пайвандҳои дастрасӣ

Хабари нав

Натиҷаҳои шатранҷбозони тоҷик дар Олимпиадаи ҷаҳонӣ


Фаррух Амонатов

Дар Олимпиадаи ҷаҳонии шоҳмот, ки дар шаҳри Батумии Гурҷистон ҷараён дорад, баъди натиҷагирии ҳафт даври мусобиқот дар байни 150 кишвар дастаи занонаи Тоҷикистон бо 9 имтиёз дар ҷойи 30-юм ва тими мардона бо 6 имтиёз дар ҷойи 105-ум қарор доранд.

Бузургустод ё гроссмейстери байналмилалӣ Фаррух Амонатов дар ҳафт бозӣ 5 имтиёз ба даст овардааст.

Ба ҳайати дастаи занонаи Тоҷикистон Марворид Насриддинзода, Надежда Антонова, Мутриба Ҳотамӣ ва Сабрина Абророва (капитан Саодат Одинаева) дохиланд. Ҳарчор шатранҷбози тоҷик дар ҳафт бозӣ 4,5-имтиёзӣ ба даст овардаанд.

Баъди натиҷагирии даври ҳафтум дар сабқати занон тими Арманистон бо 13 имтиёз дар ҷойи аввал аст. Дастаҳои занонаи Чин, Украина, Гурҷистон ва Руминия бо 12-имтиёзӣ дар миёни панҷ кишвари пешсаф дохиланд. Тоҷикистон бо 9 имтиёз ҷойи 30-юмро касб намудааст.

Занони шатранҷбози тоҷик дар чор бозӣ бар тимҳои Непал (4-0), Ямайка (4-0), Африқои Ҷанубӣ (2,5-1,5) ва Уругвай (4-0) ғолиб омада, як бозиро бо тими Швейтсария мусовӣ (2-2) кардаанд ва дар ду бозӣ аз тимҳои Чин (1,5-3,5) ва Канада (1-3) шикаст хӯрдаанд.

Тими занонаи Тоҷикистон дар байни кишварҳои Осиёи Марказӣ пас аз Қазоқистон (11 имтиёз, дар ҷойи 12-ум) ва Узбекистон (10 имтиёз, дар ҷойи 18-ум) ва пеш аз Туркманистон (8 имтиёз, дар ҷойи 51-ум) ва Қирғизистон (6 имтиёз, дар ҷойи 91-ум) қарор дорад.

Дар Олимпиадаи ҷаҳонӣ дар Батуми дастаи мардонаи Тоҷикистон дар ҳайати Фаррух Амонатов, Муҳаммад Ҳусейнхоҷаев, Мустафохоҷа Ҳусейнхоҷаев, Амин Қобилов ва Алишер Каримов (капитан Ҷамшед Исоев) ширкат дорад.

Бузургустод ё гроссмейстери байналмилалӣ Фаррух Амонатов дар ҳафт бозӣ 5 имтиёз ба даст овардааст. Ӯ дар 4 бозӣ пирӯз шуда, 2 бозиро мусовӣ кардааст ва дар як бозӣ мағлуб гаштааст. Алишер Каримов дар 5 бозӣ 3 имтиёз, Амин Қобилов дар 5 бозӣ 2,5 имтиёз, Мустафохоҷа Ҳусейнхоҷаев дар 6 бозӣ 2,5 имтиёз ва Муҳаммад Ҳусейнхоҷаев дар 5 бозӣ 1,5 имтиёз гирифтаанд.

Дар сабқати мардон баъди натиҷагирии даври ҳафтум тимҳои Озарбойҷон, Лаҳистон ва Иёлоти Муттаҳидаи Амрико бо 13-имтиёзӣ мутаносибан дар зинаҳои аз 1-ум то 3-юм ҷойгир шудаанд. Тими Арманистон бо 12 имтиёз дар ҷойи чорум аст. Дастаи мардонаи Тоҷикистон бо 6 имтиёз дар байни 150 кишвар дар зинаи 105-ум ҷойгир шудааст.

Мардони шатранҷбози тоҷик дар се бозӣ бар тимҳои Лесото (4-0), Тайланд (3-1) ва Қатар (3,5-1,5) ғолиб омада, дар чор бозӣ аз тимҳои Ҷумҳурии Чех (1-3), Нидерланд (0-4), Қазоқистон (1,5-2,5) ва Исландия (1,5-2,5) шикаст хӯрдаанд.

Тими мардонаи Тоҷикистон дар байни кишварҳои Осиёи Марказӣ пас аз Қазоқистон (10 имтиёз, дар ҷойи 29-ум), Узбекистон (9 имтиёз, дар ҷойи 37-ум), Туркманистон (9 имтиёз, дар ҷойи 39-ум) ва Қирғизистон (8 имтиёз, дар ҷойи 65-ум) қарор дорад.

Дар даври ҳаштуми Олимпиадаи ҷаҳонии шоҳмот дар Батуми имрӯз, 2-юми октябр, тими занонаи Тоҷикистон бо дастаи Малайзия, ки бо 9 имтиёз дар ҷойи 41-ум аст, рақобат мекунад. Рақиби тими мардонаи Тоҷикистон дар даври панҷум дастаи Умон мебошад, ки бо 6 имтиёз дар зинаи 122-юм ҷойгир аст.

Олимпиадаи ҷаҳонии шоҳмот дар Батуми то рӯзи 6-уми октябр идома хоҳад кард. Олимпиадаи шоҳмотро Федератсиони байналмилалии шоҳмот (FIDE) дар ду сол як маротиба баргузор менамояд. Аввалин Олимпиадаи ҷаҳонии шоҳмот соли 1927 доир шудааст.

Шарҳҳоро бинед (2)

Корбарони азиз! Ҳангоми навиштани шарҳ аз истифодаи таҳқиру тӯҳмат нисбат ба якдигар, намояндагони қавму миллатҳо ва динҳои гуногун худдорӣ кунед. Шарҳҳое, ки дорои туҳмату таҳқир, дашном ва иттилооти дурӯғанд ё гурӯҳеро таблиғ мекунанд, нашр карда намешаванд!
Ин баҳс баста шудааст.

Шарҳҳо

Шарҳи нав расид
Идома
XS
SM
MD
LG